|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ, ໃນລາຍການພາກນີ້, ຂ້າພະເຈົ້າຈະເລົ່າສຸພາສິດເລື່ອງ "ຈ້ຽນຢູ້ເຈ່ຍຈິ້ງ" ສູ່ຟັງ, ຫວັງວ່າທ່ານຄົງຈະມັກ.
ຄວາມໝາຍເດີມຂອງຄຳສຸພາສິດດັ່ງກ່າວແມ່ນສະພາບຄ່ອຍໆດີຂຶ້ນ ມີຄວາມສົນໃຈຫຼາຍຂຶ້ນເທື່ອລະກ້າວແລະມີຄວາມຮູ້ສຶກຊົມຊື່ນ. ລາງເທື່ອກໍ່ໝາຍເຖິງຄ່ອຍໆເຖິງຂັ້ນຍອດຢ້ຽມ. ພາຍຫຼັງມາ, ຄົນທັງຫຼາຍໃຊ້ມາອຸປະມາຜູ່ໃດຜູ່ໜຶ່ງມີຄວາມສົນໃຈນຳຍິ່ງຂຶ້ນເປັນກ້າວໆຫຼືສະພາບກະເຕື້ອງດີຂຶ້ນເປັນກ້າວໆ.
ເລື່ອງກ່ຽວກັບຄຳສຸພາສິດດັ່ງກ່າວມີມາຄືດັ່ງລຸ່ມນີ້:
ກູ້ໄຂຈື່ແມ່ນນັກແຕ້ມທີ່ມີຊື່ສຽງດົ່ງດັງໃນລາຊະວົງຈິ້ນຂອງຈີນ, ຊ່າງແຕ້ມຮູບບຸກຄົນ. ຮູບແຕ້ມຂອງເພິ່ນມີຊີວິດຊີວາ, ຈົນຮອດປະຈຸບັນຍັງໄດ້ຮັບຄວາມຍ້ອງຍໍແລະຮໍາຮຽນນຳຈາກນັກແຕ້ມຍຸກປະຈຸບັນ. ຍ້ອນເພິ່ນມີລະດັບສູງດ້ານສິລະປະ, ແລະເກັ່ງຫຼາຍດ້ານ, ເປັນຄົນໃຈກວ້າງ, ເວົ້ານົວຫົວມ່ວນ, ນັກປາດໃນຄາວນັ້ນຈຶ່ງໂຄລົບເພິ່ນເປັນ "ຄົນເກັ່ງພິເສດ" "ນັກແຕ້ມເກັ່ງພິເສດ. ເມື່ອເລື່ອງລາວເລັກໆນ້ອຍໆກ່ຽວກັບເພິ່ນໄດ້ຊ່າລືກັນອອກໄປແລ້ວ, ຄົນທັງຫຼາຍໄດ້ອີງຕາມຄວາມຕະຫຼົກຂອງເພິ່ນ ເອີ້ນເພິ່ນເປັນ "ບ້າພິເສດ".
ໃນຍາມຍັງເປັນເດັກນ້ອຍ, ເມື່ອຫັດແຕ້ມຮູບ, ເມື່ອຫັດແຕ້ມດົນແລ້ວ ກູ້ໄຂຈື່ກໍມັກບໍ່ຢາກແຕ້ມອີກ, ເພາະຮູ້ສຶກເມື່ອຍຫຼາຍ. ໃນເວລານັ້ນ ເພິ່ນມັກເອົາອ້ອຍມາກິນ, ທັງແກ້ຄໍແຫ້ງທັງເຮັດໃຫ້ຈິດໃຈສົດຊື່ນຂຶ້ນ, ຍັງໄດ້ພັກຜ່ອນອີກ. ເມື່ອພັກຜ່ອນແລ້ວກໍຮຽນແຕ້ມຮູບຕໍ່ໄປອີກ. ເມື່ອກິນອ້ອຍ ເພິ່ນຍັງມັກກິນແຕ່ຕອນປາຍໄປສູ່ຕອນກົກ.
ມີເທື່ອໜຶ່ງ, ມີເພື່ອນຜູ່ໜຶ່ງມາຢາມເພິ່ນ, ພໍດີໄດ້ເຫັນເພິ່ນຮຽນແຕ້ມຮູບເມື່ອຍແລ້ວພວມກິນອ້ອຍຢູ່, ຈຶ່ງຖາມເພິ່ນຢ່າງປະຫຼາດໃຈວ່າ, "ເປັນຫຍັງເຈົ້າຈຶ່ງກິນຈາກຕອນປາຍ? ອ້ອຍມັນຫວານຕອນກົກບໍ່ແມ່ນຫວະ!"
ກູ້ໄຂຈື່ໄດ້ຍິນແລ້ວຈຶ່ງຍິ້ມຕອບວ່າ: "ນີ້ຫລະເອີ້ນວ່າຄ່ອຍໆດີຂຶ້ນ. ແມ່ນແທ້, ອ້ອຍມັນຕອນກົກຫວານກວ່າຕອນປາຍ, ແຕ່ກິນແຕ່ຕອນປາຍ ຄ່ອຍໆກິນໄປຮອດຕອນກົກ, ຈຶ່ງຈະຫວານຂຶ້ນຊັກໄຊ້, ແລະຍິ່ງຫວານຍິ່ງຢາກກິນຕໍ່. ຖ້າກິນແຕ່ຕອນກົກທີ່ຫວານທີ່ສຸດ, ກໍຍ່ອມຈະຍິ່ງກິນຍິ່ງຈືດລົງ, ສ່ວນຕອນປາຍສຸດນັ້ນກໍບໍ່ຢາກຈະກິນຕໍ່ໄປ. ຂ້າພະເຈົ້າຫັດການແຕ້ມຮູບກໍແມ່ນເຫດຜົນດຽວກັນ, ໃນໄລຍະຫົວທີອາດແຕ້ມບໍ່ແຈບໃຈປານໃດ, ແຕ່ຂ້າພະເຈົ້າຄິດວ່າ, ມີແຕ່ຍຶດໝັ້ນຫັດແຕ້ມຢ່າງບໍ່ລົດລະ, ຈຶ່ງຈະແຕ້ມໄດ້ດີຂຶ້ນຊັກໄຊ້, ເຮັດແນວນີ້ຈຶ່ງສາມາດກະຕຸກຄວາມສົນໃຈຂອງຕົນໃຫ້ຫັດແຕ້ມຕໍ່ໄປ; ກົງກັນຂ້າມ, ຖ້າຂ້າພະເຈົ້າອິ່ມອົກອິ່ມໃຈນຳຜົນງານຂອງຕົນໃນໄລຍະຫົວທີ, ກໍ່ບໍ່ອາດຈະມີຄວາມກ້າວໜ້າອີກ.
ເພື່ອນມິດໄດ້ຍິນແລ້ວກໍງຶກຫົວຍອມຮັບ. ແຕ່ນັ້ນມາ, ຈິດໃຈຮຽນແຕ້ມຮູບຢ່າງທໍລະຫົດອົດທົນຂອງກູ້ໄຂຈື່ກໍ່ໄດ້ຊ່າລືກັນໄປ.
|
