|
|
 |
| (GMT+08:00)
2005-07-21 10:07:35
|
 |
|
ອຸ່ນໃຈລູກກຳພອຍດ້ວຍຄວາມຮັກແພງ
cri
Author: q
ໃນຄາວນັ້ນ,ພາຍຫຼັງ ຖືກ ຍີ່ປຸ່ນຮຸກຮານແລ້ວ,ຈີນຂາດເຂີນອາຫານການກິນແລະວັດຖຸສິ່ງຂອງຕ່າງໆ,ຊີວິດການເປັນຢູ່ຂອງປະຊາຊົນທຸກຍາກລຳບາກທີ່ສຸດ.ແຕ່ວ່າພວກພໍ່ລ້ຽງແມ່ລ້ຽງເຫຼົ່ານີ້ຊ້ຳພັດຢອມກິນຢອມໃຊ້ສູ້ທຸກທົນຍາກເອົາເອງ,ຊຸບລ້ຽງພວກລູກກຳພອຍຍີ່ປຸ່ນໃຫ້ເຕີບໃຫຍຂຶ້ນ.ນາງ ຊີໂອບາຣາ ຮາສູມິ ເມື່ອກ່າວເຖິງບຸນຄຸນຂອງພໍ່ລ້ຽງແມ່ລ້ຽງ,ກໍນ້ຳຕາໄຫຼອາບໜ້າ.ນາງເວົ້າວ່າ:
"ພໍ່ລ້ຽງແມ່ລ້ຽງຂ້ອຍລ້ວນແຕ່ກິນອາຫານທີ່ເຮັດດ້ວຍຂີ້ສ່າແລະກາກໝາກຖົ່ວ.ກິນອາຫານຊະນິດນີ້ຈົນຖ່າຍອອກເລືອດ,ພວກເພິ່ນຢອມແປ້ງໝີ່ໄວ້ໃຫ້ຂ້ອຍກິນ.ບຸນຄຸນຂອງພໍ່ລ້ຽງແມ່ລ້ຽງຂ້ອຍບໍ່ລືມຕະຫຼອດຊີວິດ.ຂ້ອຍມີຊີວິດຈົນຮອດຊູ່ມື້ນີ້ກໍແມ່ນຍ້ອນຄົນຈີນພວກເພິ່ນໄດ້ໃຫ້ຄວາມຮັກແກ່ ຂ້ອຍ,ຂ້ອຍຈະບໍ່ລືມບຸນຄຸນພວກເພິ່ນ ຈົນເທົ່າໃດໆ."
ໃນຊາວຈີນທີ່ຊຸບລ້ຽງລູກກຳພອຍຍີ່ປຸ່ນນັ້ນ,ມີຫຼາຍໆຄົນເຄີຍຖືກທະຫານຍີ່ປຸ່ນທຳຮ້າຍ.ມີແມ່ເຖົ້າຜູ້ໜຶ່ງຊື່ວ່າລີຊູສຽນໃນຍາມກອງທະຫານຍີ່ປຸ່ນຍຶດຄອງນະຄອນສາງຊຸນ ພາກຕາເວັນອອກສຽງເໜືອຈີນ,ແມ່ເຖົ້າເຄີຍຖືກທະຫານຍີ່ປຸ່ນເຕະທ້ອງນ້ອຍ,ຈິ່ງບໍ່ສາມາດມີລູກໄດ້.ແຕ່ວ່າ,ເມື່ອໄດ້ເຫັນນາງອາວຢາມາ ໂມໂມເອະ ລູກກຳພອຍຍີ່ປຸ່ນທີ່ພະເນຈອນຢູ່ຕາມຖະໜົນ,ແມ່ເຖົ້າລີຊູສຽນທີ່ໃຈບຸນ ພັດໄດ້ເອົານາງ ອາວຢາມາ ໂມໂມເອະເມືອເຮືອນຊຸບລ້ຽງ.ເພິ່ນໄດ້ໃສ່ຊື່ໃຫ້ນາງວ່າສູກຸ້ຍລານ,ຫວັງໃຫ້ເດັກຍິງຜູ້ນີ້ມີຊີວິດທີ່ສວຍງາມປານດອກໄມ້.ຫຼັງຈາກນັ້ນຫຼາຍສິບປີ, ແມ່ເຖົ້າລີຊູສຽນທີ່ນອນເຈັບຢູ່ເທິງຕຽງເມື່ອກ່າວເຖິງປະສົບການຕອນນັ້ນກໍເວົ້າຢ່າງສະຫງົບໃຈວ່າ,ຂ້ອຍເຮັດຕາມຖານະເປັນແມ່ຍິງ,ເປັນແມ່ຜູ້ໜຶ່ງ.
ການກະທຳທີ່ພໍ່ແມ່ປະຊາຊົນເປັນເຈົ້າການຮັບລ້ຽງລູກກຳພອຍຍີ່ປຸ່ນນັ້ນໄດ້ຮັບການສະໜັບສະໜູນຈາກລັດຖະບານໃໝ່ຈີນ.ທ່ານຢົງເວີຍມູ້ ສາສະດາຈານຂອງສະຖາບັນຄົ້ນຄວ້າປະຫວັດສະໄໝມໍ່ສະພາບັນດິດວິທະຍາສາດສັງຄົມຈີນກ່າວວ່າ:
"ລູກກຳພອຍຍີ່ປຸ່ນສາມາດຢູ່ລອດແລະດຳລົງຊີວິດຢູ່ຈີນແມ່ນກ່ຽວພັນກັບນະໂຍບາຍຂອງລັດຖະບານຈີນທີ່ມີຕໍ່ພວກເຂົາເຈົ້າ,ສົງຄາມທີ່ຍີ່ປຸ່ນຮຸກຮານຈີນໄດ້ສ້າງໄພພິບັດຢ່າງໜັກໜ່ວງໃຫ້ຈີນ,ແຕ່ລັດຖະບານຈີນໄດ້ປະຕິບັດຕາມຫຼັກການມະນຸດສະທຳ,ບໍ່ໄດ້ດູໝິ່ນລູກກຳພອຍຍີ່ປຸ່ນ,ແລະຍັງໄດ້ໃຫ້ການສະໜັບສະໜູນດ້ານວັດຖຸແກ່ປະຊາຊົນໃຈບຸນທີ່ຮັບລ້ຽງລູກກຳພອຍຍີ່ປຸ່ນ.ໃນດ້ານນີ້,ລັດຖະບານຈີນໄດ້ສະແດງຄວາມໂອບອ້ອມອາລີຕໍ່ປະຊາຊົນຍີ່ປຸ່ນ."
ພາຍໃຕ້ການເອົາໃຈໃສ່ຂອງລັດຖະບານຈີນແລະການເບິ່ງແຍ່ງລ້ຽງດູຂອງພໍ່ລ້ຽງແມ່ລ້ຽງ,ພວກລູກກຳພອຍຍີ່ປຸ່ນໄດ້ເຕີບໃຫຍ່ຂຶ້ນ,ທັງໄດ້ເຮັດວຽກແລະສ້າງຄອບຄົວທີ່ມີຄວາມສຸກ.
ປີ1972,ຈີນຍີ່ປຸ່ນໄດ້ສ້າງສາຍສຳພັນການທູດເປັນປົກກະຕິ,ການໄປມາຫາສູ່ກັນລະຫວ່າງປະຊາຊົນໄດ້ເພີ່ມຂຶ້ນເລື້ອຍໆ.ລູກກຳພອຍຍີ່ປຸ່ນທີ່ຍາດພີ່ນ້ອງຍີ່ປຸ່ນຊອກພົບນັ້ນໄດ້ອຳລາຈາກພໍ່ລ້ຽງແມ່ລ້ຽງ,ແລ້ວກັບຄືນສູ່ຍີ່ປຸ່ນຕາມໆກັນ.
ລູກກຳພອຍຍີ່ປຸ່ນທີ່ເຕີບໃຫຍ່ຂຶ້ນແລ້ວກັບຄືນສູ່ຍີ່ປຸ່ນນັ້ນພຽງແຕ່ແມ່ນສ່ວນໜຶ່ງເທົ່ານັ້ນ,ສ່ວນລູກກຳພອຍຫຼາຍໆຄົນໄດ້ເລືອກທີ່ຈະດຳລົງຊີວິດນຳກັນກັບພໍ່ລ້ຽງແມ່ລ້ຽງຢູ່ຈີນ.ທ່ານນາງອູຢຸນທີ່ດຳລົງຊີວິດຢູ່ເຂດມົງໂກໃນປົກຄອງຕົນເອງໃນປັດຈຸບັນນັ້ນກໍແມ່ນຕົວຢ່າງໜຶ່ງ,ນາງອູຢຸນ,ຊື່ຍີ່ປຸ່ນແມ່ນຕາສີບານາ ອາເກມິ.ປີ1981,ນາງໄດ້ຕິດຕໍ່ກັບອ້າຍທີ່ຢູ່ຍີ່ປຸ່ນ,ເມືອຢ້າມບ້ານ.ແຕ່ວ່າເພື່ອຕອບແທນບຸນຄຸນຂອງພໍ່ລ້ຽງແມ່ລ້ຽງ,ນາງໄດ້ອຳລາຈາກຍາດພີ່ນ້ອງ,ແລ້ວກັບຄືນສູ່ຈີນຢ່າງເດັດດ່ຽວ.
ນາງອຸຢຸນເວົ້າວ່າ,ໃນຍາມຍັງນ້ອຍ,ພໍ່ແມ່ຂອງນາງກໍເສຍໄປໃນສົງຄາມ,ຕົນເອງຖືກປະໄວ້ຢູ່ຈີນ.ໃນນາມເປັນລູກກຳພອຍຍີ່ປຸ່ນ,ນາງໄດ້ກ່າວຟ້ອງລັດຖະບານຍີ່ປຸ່ນວ່າ:
"ສົງຄາມຮຸກຮານຈີນທີ່ລັດທິລັດຖະທະຫານຍີ່ປຸ່ນກໍ່ຂຶ້ນນັ້ນບໍ່ພຽງແຕ່ໄດ້ນຳເອົາໄພພິບັດອັນໜັກໜ່ວງມາໃຫ້ປະຊາຊົນຈີນທໍ່ນັ້ນ,ຍັງໄດ້ນຳເອົາໄພພິບັດອັນໜັກໜ່ວງມາໃຫ້ປະຊາຊົນຍີ່ປຸ່ນເຊັ່ນດຽວກັນ.ກໍຄືກັນກັບຄອບຄົວຂ້ອຍ,ຄອບຄົວນັບເປັນພັນເປັນໝື່ນບ້ານແຫກແຕກສະຫຼາຍ,ລົ້ມຫາຍຕາຍຈາກ,ນີ້ແມ່ນແມ່ນຍ້ອນລັດທິລັດຖະທະຫານກໍ່ສົງຄາມຮຸກຮານຈີນ."
ພ້ອມກັນນັ້ນ, ນາງອູຢຸນພ້ອມກັນກັບພວກລູກກຳພອຍຍີ່ປຸ່ນທີ່ຖືກປະໄວ້ຢູ່ຈີນນັ້ນເຫັນວ່າຕົນແມ່ນຜູ້ໂຊກດີຫຼາຍ,ເພາະວ່າຈີນໄດ້ໃຫ້ພວກເຂົາເຈົ້າມີພໍ່ແມ່ແທ້ຈິງ ,ໃຫ້ພວກເຂົາເຈົ້າຮູ້ສຶກຄວາມອົບອຸ່ນຂອງຄອບຄົວ.
1 2
|
|
|
