|
|
 |
| (GMT+08:00)
2005-07-21 11:42:42
|
 |
|
ຈີນອາຊຽນກ້າວເຂົ້າສູ່ໄລຍະໃໝ່ທີ່ສອງຝ່າຍຕ່າງໃຫ້ຜົນປະໂຫຍດແກ່ກັນແລະໄດ້ຮັບຜົນປະໂຫຍດນຳກັນ(ສຽງ)
cri
Author: da
|
ແຕ່ວັນທີ 20 ກໍລະກົດເປັນຕົ້ນໄປ,ຈີນອາຊຽນຈະເລີ່ມຫຼຸດພາສີໃຫ້ຜະລິດຕະພັນ 7 ພັນກວ່າຊະນິດຂອງຝ່າຍກົງກັນຂ້າມ,ຈາກນີ້ໄປ,ຈີນອາຊຽນຈະກ້າວເຂົ້າສູ່ໄລຍະໃໝ່ທີ່ສອງຝ່າຍຕ່າງໃຫ້ຜົນປະໂຫຍດແກ່ກັນແລະໄດ້ຮັບຜົນປະໂຫຍດນຳກັນ.
ໃນຫຼາຍປີມານີ້,ການກໍ່ສ້າງເຂດການຄ້າເສລີຈີນອາຊຽນໄດ້ມີການພັດທະນາຢ່າງວ່ອງໄວ.
ແຜນການ"ຮັບຜົນໄລຍະຕົ້ນ"ທີ່ເລີ່ມປະຕິບັດແຕ່ເດືອນມັງກອນປີ 2004 ໄດ້ຮັບຜົນອຸດົມສົມບູນແລ້ວ,ຍອດມູນຄ່າການຄ້າຂອງຜະລິດຕະພັນແຜນການ"ຮັບຜົນໄລຍະຕົ້ນ"ລະຫວ່າງຈີນກັບອາຊຽນໄດ້ບັນລຸ 2 ຕື້ໂດລາສະຫະລັດ.ພາຍຫຼັງຈີນກັບໄທເລີ່ມຍົກເວັ້ນພາສີໝາກໄມ້ແລະຜັກ 188 ຊະນິດຂອງຝ່າຍກົງກັນຂ້າມແຕ່ເດືອນຕຸລາປີ 2003 ແລ້ວ, ຍອດມູນຄ່າການຄ້າໝາກໄມ້ແລະຜັກລະຫວ່າງຈີນໄທກໍໄດ້ເພີ່ມຂຶ້ນຢ່າງຫຼວງຫຼາຍ.
ຈົນຮອດປີ 2010,ຈີນກັບ 6 ປະເທດສະມາຊິກອາຊຽນຄື ໄທ ອິນໂດເນເຊຍ ມາເລເຊຍ ຟີລິບປິນ ສິງກະໂປແລະບຼູໄນຈະຍົກເວັ້ນພາສີຜະລິດຕະພັນສ່ວນຫຼາຍ,ສ້າງເປັນເຂດການຄ້າເສລີ. 4 ປະເທດສະມາຊິກອາຊຽນໃໝ່ຄືກຳປູເຈຍ ລາວ ມຽນມາແລະຫວຽດນາມຈະມີໄລຍະຂ້າມຜ່ານ 5 ປີ,ຈົນຮອດປີ 2015,ການຄ້າລະຫວ່າງຈີນກັບ 4 ປະເທດດັ່ງກ່າວຈຶ່ງເປັນການຄ້າເສລີ.
ປະຈຸບັນ,ສິນຄ້າຕົ້ນຕໍທີ່ຈີນນຳເຂົ້າຈາກອາຊຽນມີຜະລິດຕະພັນເອເລັກໂຕຼນິກ ນ້ຳມັນດິບ ອາຍແກັສ ແລະນ້ຳມັນພືດເປັນຕົ້ນ;ສິນຄ້າຕົ້ນຕໍທີ່ສົ່ງອອກໄປອາຊຽນມີຜະລິດຕະພັນກົນຈັກແລະເຄື່ອງໄຟຟ້າ ສິ່ງປັ່ນທໍ ເຄື່ອງນຸ່ງ ນ້ຳມັນສຳເລັດຮູບແລະທັນຍາຫານ.
ໂອກາດການທຸລະກິດອັນໃຫຍ່ຫຼວງທີ່ຈີນອາຊຽນຫຼຸດຜ່ອນເງື່ອນໄຂການຄ້າໄດ້ເຮັດໃຫ້ນັກທຸລະກິດຈີນມີຄວາມສົນໃຈ,ຫຼາຍວິສາຫະກິດຂອງແຂວງກວາງຕຸ້ງ ເຂດກວາງຊີແລະແຂວງຢຸນນານຈີນທີ່ມໍ່ກັບອາຊຽນໄດ້ລົງມືຄົ້ນຄວ້າການປ່ຽນແປງຂອງຕະຫຼາດອາຊຽນໃນອະນາຄົດແລ້ວ,ບາງບໍລິສັດເລີ່ມວາງແຜນຕະຫຼາດຄືນໃໝ່,ໝາຍຈະຂະຫຍາຍໂກຕາຂອງວິສາຫະກິດຢູ່ຕະຫຼາດອາຊຽນ;ບາງບໍລິສັດພິຈາລະນາທ່າແຮງພູມີພາກແລະຊັບພະຍາກອນຄືນໃໝ່,ໝາຍສະແຫວງຫາຂົງເຂດຮ່ວມມືແລະວິທີຮ່ວມມືໃໝ່.
ເຂດກວາງຊີແລະແຂວງຢຸນນານທີ່ຢູ່ເຂດຊາຍແດນພາກຕາເວັນຕົກສຽງໃຕ້ຂອງຈີນກັບປະເທດອາຊຽນຕ່າງມີທ່າແຮງໃນດ້ານອົງປະກອບຊັບພະຍາກອນແລະອຸດສາຫະກຳ,ມີຊ່ອງຫວ່າງຮ່ວມມືທີ່ກວ້າງໃຫຍ່ໃນດ້ານການຄ້າສິນຄ້າ ການຮ່ວມມືລົງທຶນແລະການຄ້າບໍລິການ.ແຕ່ກ່ອນ ພາສີສິນຄ້າສູງຫຼາຍ,ອັນໄດ້ຜູກມັດການລົງທຶນແລະການຄ້າຂອງສອງຝ່າຍເປີດກວ້າງຕື່ມອີກໃນລະດັບໃດໜຶ່ງ.ຄຽງຄູ່ກັບການຫຼຸດພາສີໃນເຂດການຄ້າເສລີຈີນອາຊຽນເລັ່ງໄວເຂົ້າ,ມັນມີຜົນດີໃຫ້ວິສາຫະກິດຈີນທີ່ມີຄວາມສາມາດແລະມີທ່າແຮງງວດໜຶ່ງໄປລົງທຶນຕັ້ງໂຮງງານຢູ່ຕ່າງປະເທດແລະດູດດຶງທຶນຕ່າງປະເທດມາຮ່ວມມືນຳກັນ,ເພື່ອເສີມຂະຫຍາຍທ່າແຮງຂອງຕະຫຼາດແລະຊັບພະຍາກອນພາຍໃນປະເທດແລະຕ່າງປະເທດຢ່າງເຕັມທີ່.
ເຂດການຄ້າເສລີຈີນອາຊຽນແມ່ນເຂດການຄ້າເສລີແຫ່ງທຳອິດທີ່ຈີນກັບປະເທດອື່ນກຳລັງກໍ່ສ້າງ.ແຕ່ຈີນສະເໜີໃຫ້ສ້າງເຂດການຄ້ານີ້ເມື່ອປີ 2001,ທີ່ຈິງກໍເປັນການເປີດສາກການກໍ່ສ້າງເຂດການຄ້າເສລີຈີນແລ້ວ.
ພາຍຫຼັງເລີ່ມກໍ່ສ້າງເຂດການຄ້າເສລີຈີນອາຊຽນແລ້ວ,ຈີນຍັງໄດ້ຈັດການເຈລະຈາກ່ຽວກັບເຂດການຄ້າເສລີກັບສະຫະພັນພາສີອາຟຼີກາພາກໃຕ້ ຄະນະກຳມະການຮ່ວມມືອ່າວເປີເຊຍ ຈີເລແລະນູແວນເຊລັງ.ຈີນໄດ້ເລີ່ມຈັດການເຈລະຈາກ່ຽວກັບເຂດການຄ້າເສລີກັບ 23 ປະເທດ ຊື່ງລວມທັງ 10 ປະເທດອາຊຽນ.
ໂລກໃນປະຈຸບັນ,ການເຈລະຈາຮອບອູລຸຍກວາຍໄດ້ປະສົບຄວາມຫຍຸ້ງຍາກ,ຂະບວນວິວັດການຄ້າເສລີຖືກສະກັດກັ້ນ;ລັດທິກໍ່ການຮ້າຍກາຍເປັນການຂົ່ມຂູ່ໃໝ່.ຢູ່ໃຕ້ສະຖານະການດັ່ງກ່າວ,ການເພີ່ມທະວີການຮ່ວມມືກັນໃນພາກພື້ນແມ່ນທາງທີ່ຈຳເປັນຕ້ອງຜ່ານໃນການຮັບມືກັບການທ້າທາຍແລະບັນລຸຄວາມຈະເລີນພ້ອມກັນ.
ໃນຖານເປັນການຈັດວາງການຄ້າພາກພື້ນ, ຈຸດດີທີ່ສຸດຂອງເຂດການຄ້າເສລີແມ່ນຢູ່ບ່ອນວ່າ,ບັນດາສະມາຊິກເຊັນສັນຍາກັນໂດຍຜ່ານການເຈລະຈາ,ອຳນວຍນະໂຍບາຍພິເສດທາງການຄ້າແລະການລົງທຶນທີ່ດີກວ່າຂໍ້ກຳນົດຂອງອົງການການຄ້າໂລກ,ຊຶ່ງລວມທັງຫຼຸດພາສີນຳເຂົ້າ,ຫຼຸດກຳແພງມໍ່ແມ່ນພາສີ,ເປີດກວ້າງການອະນຸຍາດເຂົ້າຕະຫຼາດໃນດ້ານສິນຄ້າ ການບໍລິການແລະທຶນ,ຊຸກຍູ້ໃຫ້ການຄ້າແລະການລົງທຶນສະດວກກວ່າເກົ່າ,ແລ້ວຫຼຸດຕົ້ນທຶນການຄ້າໃຫ້ຕ່ຳລົງ.
ໃນກອງປະຊຸມຜູ້ນຳອາຊຽນກັບຈີນ ຍີ່ປຸ່ນແລະສ.ເກົາຫຼີຄັ້ງທີ 8 ທີ່ໄຂຂຶ້ນໃນເດືອນພະຈິກປີ 2004,ທ່ານເວີນເຈຍປາວ ນາຍົກລັດຖະມົນຕີຈີນເວົ້າວ່າ,ຈີນຈະຊຸກຍູ້ການກໍ່ສ້າງເຂດການຄ້າເສລີອາຊີຕາເວັນອອກຢ່າງໜັກແໜ້ນ.ທ່ານເວົ້າວ່າ,ການກໍ່ສ້າງເຂດການຄ້າເສລີແມ່ນໄລຍະທີ່ຂ້າມຜ່ານບໍ່ໄດ້ໃນຂະບວນວິວັດເສດຖະກິດເຊື່ອມໂຍງເຂົ້າກັນ.
ຄຽງຄູ່ກັບເຂດການຄ້າເສລີຈີນອາຊຽນໄດ້ເລີ່ມກໍ່ສ້າງຢ່າງຮອບດ້ານແລະການຮ່ວມມືເສດຖະກິດໃນອະນຸພາກພື້ນນັບມຶ້ນັບລົງສູ່ລວງເລິກ,ໂດຍສະເພາະແມ່ນການລົງທຶນແລະການຄ້າໃນອະນຸພາກພື້ນມີຄວາມສະດວກຫຼາຍກວ່າເກົ່າຢ່າງບໍ່ຢຸດຢັ້ງ,ຕະຫຼາດຂອງບັນດາປະເທດຈະເປີດໃຫ້ກວ້າງອອກກວ່າເກົ່າ,ການລົງທຶນແລະການຄ້າຂ້າມຊາດຈະສະດວກກວ່າເກົ່າ,ການພົວພັນທາງເສດຖະກິດການຄ້າກໍຈະແໜ້ນແຟ້ນກວ່າເກົ່າ.
|
|
|
