|
|
 |
| (GMT+08:00)
2005-07-22 11:31:06
|
 |
|
ຈີນຈັດງານວາງສະແດງຂະໜາດໃຫຍ່ລະລຶກທ່ານເຈິ້ງເຫີເດີນມະຫາສະໝຸດເປັນຄັ້ງທຳອິດຄົບຮອບ 600 ປີ(ສຽງ)
cri
Author: mo
|
600 ປີກ່ອນ, ທ່ານເຈິ້ງເຫີ ນັກເດີນທະເລບູຮານຈີນໄດ້ນຳພາຂະບວນເຮືອຂະໜາດໃຫຍ່ເດີນມະຫາສະໝຸດເປັນຄັ້ງທຳອິດ, (ຂອບເຂດຕົ້ນຕໍແມ່ນມະຫາສະໝຸດອິນເດຍໃນປັດຈຸບັນ). ໃນລະຫວ່າງ 28 ປີ, ທ່ານເຈິ້ງເຫີໄດ້ເດີນມະຫາສະໝຸດ 7 ເທື່ອ, ໄປຮອດ 30 ກວ່າປະເທດອາຊີແລະອາຟຼິກາ, ແມ່ນການເຄື່ອນໄຫວເດີນທະເລກ່ອນໝູ່ ມີຂະໜາດໃຫຍ່ກວ່າໝູ່ ມີເຕັກນິກກ້າວໜ້າກວ່າໝູ່ແລະຂອບເຂດເຄື່ອນໄຫວກວ້າງກວ່າໝູ່ໃນປະຫວັດເດີນທະເລບູຮານໂລກ. ເພື່ອລະລຶກການເຄື່ອນໄຫວອັນສະຫງ່າລາສີດັ່ງກ່າວ, ຫໍພິພິທະພັນແຫ່ງຊາດຈີນໄດ້ຈັດງານວາງສະແດງລະລຶກເຈິ້ງເຫີເດີນມະຫາສະໝຸດຄົບຮອບ 600 ປີ.
ວັນທີ 11 ກໍລະກົດປີນີ້ແມ່ນວັນລະລຶກທ່ານເຈິ້ງເຫີເດີນມະຫາສະໝຸດເປັນຄັ້ງທຳອິດຄົບຮອບ 600 ປີ, ເພື່ອລະລຶກທ່ານເຈິ້ງເຫີເດີນມະຫາສະໝຸດ 7 ເທື່ອທີ່ໄດ້ປະກອບສ່ວນອັນມະຫາສານເຂົ້າໃນປະຫວັດສາດເດີນທະເລຂອງໂລກ, ໃນຫລາຍມື້ມານີ້, ແຫ່ງຕ່າງໆຂອງຈີນໄດ້ຈັດການເຄື່ອນໄຫວລະລຶກທີ່ມີຮູບການຕ່າງໆ, ສ່ວນງານວາງສະແດງທີ່ຫໍພິພິທະພັນແຫ່ງຊາດຈີນຈັດຂຶ້ນເທື່ອນີ້ແມ່ນງານວາງສະແດງວັດຖຸບູຮານທີ່ມີຫົວຂໍ້ສະເພາະເຈິ້ງເຫີເດີນມະຫາສະໝຸດທີ່ມີຂະໜາດໃຫຍ່ກວ່າໝູ່ ມີວັດຖຸບູຮານຄົບຖ້ວນກວ່າໝູ່ຂອງຈີນຈົນຮອດປັດຈຸບັນ. ໃນພິທີເປີດງານວາງສະແດງ, ທ່ານຮວງຊຽນຢ້າວ ຮອງລັດຖະມົນຕີກະຊວງຄົມມະນາຄົມຈີນແນະນຳວ່າ:
ການກະທຳອັນສະຫງ່າລາສີທີ່ເຈິ້ງເຫີເດີນມະຫາສະໝຸດເມື່ອ 600 ປີກ່ອນໄດ້ສະເທືອນໂລກ, ໄດ້ສະແດງໃຫ້ເຫັນເຕັກນິກເດີນທະເລທີ່ກ້າວໜ້າແລະລະດັບການຜະລິດເຮືອທີ່ດີເລີດຂອງຈີນໃນຄາວນັ້ນ. ມາຮອດປັດຈຸບັນ, ບາງປະເທດອາຊີອາຄະເນຍັງຄົງຮັກສາແລະເກັມມ້ຽນຮ່ອງຮອຍແລະວັດຖຸບູຮານກ່ຽວກັບທ່ານເຈິ້ງເຫີເດີນມະຫາສະໝຸດ, ແລະໄດ້ລະລຶກທ່ານເຈິ້ງເຫີ ທູດສັນຕິພາບທີ່ເຜີຍແຜ່ອາລະຍະທຳຜູ້ນີ້ດ້ວຍຮູບການຕ່າງກັນ, ພວກເຮົາຕ້ອງຜ່ານງານວາງສະແດງເທື່ອນີ້ແລະການເຄື່ອນໄຫວລະລຶກຕ່າງໆ, ໂຄສະນາມູນເຊື້ອອັນດີເລີດຂອງປະຊາຊາດຈີນທີ່ຮັກຫອມສັນຕິພາບ ເປັນບ້ານໃກ້ເຮືອນຄຽງທີ່ດີຕໍ່ກັນ ແລະມີໄມຕີຈິດ.
ທ່ານເຈິ້ງເຫີຊື່ເດີມມາຊານປາວ, ເກີດໃນຄອບຄົວເຜົ່າຮຸຍຂອງແຂວງຢຸນນານເມື່ອປີ 1371, ເຊື່ອຖືສາສະໜາອິສລາມ. ພາຍຫລັງມາ, ທ່ານເຈິ້ງເຫີກາຍເປັນຂັນທີຢູ່ຂ້າງເຈົ້າຊີວິດຈູຕີ້ຂອງລາຊະວົງມິງ, ຍ້ອນໄດ້ສ້າງຄຸນງາມຄວາມດີ, ເຈົ້າຊີວິດຊົງພະລາຊະທານນາມສະກຸນເຈິ້ງໃຫ້ທ່ານ, ແລ້ວປ່ຽນຊື່ເປັນເຈິ້ງເຫີ. ປີ 1405, ທ່ານເຈິ້ງເຫີຮັບຄຳສັ່ງຈາກເຈົ້າຊີວິດຈູ່ຕີ້, ແລ້ວນຳພາຂະບວນເຮືອເດີນມະຫາສະໝຸດ.
ງານວາງສະແດງທີ່ຈັດໂດຍຫໍພິພິທະພັນແຫ່ງຊາດຈີນເທື່ອນີ້ໄດ້ໂຮມສູນວັດຖຸ 80 ກວ່າເຄື່ອງ, ຮູບພາບເກືອບ 200 ແຜ່ນ, ແຍກອອກແນະນຳຊີວິດປະຫວັດຂອງທ່ານເຈິ້ງເຫີ, ສະພາບເບື້ອງຫລັງປະຫວັດສາດ ຂະບວນວິວັດແລະຜົນສະທ້ອນຂອງທ່ານເຈິ້ງເຫີເດີນມະຫາສະໝຸດ.
ເທື່ອນີ້, ຫໍພິພິທະພັນແຫ່ງຊາດຈີນໄດ້ວາງສະແດງເສົາເຮືອທີ່ສູງ 11 ແມັດ. ທ່ານນາງວາງຢົງຫົງ ຜູ້ຮັບຜິດຊອບທີ່ກ່ຽວຂ້ອງແນະນຳວ່າ:
ວັດຖຸບູຮານທີ່ກ່ຽວພັນກັບທ່ານເຈິ້ງເຫີໂດຍກົງນັ້ນມີໜ້ອຍທີ່ສຸດ, ເສົາເຮືອນີ້ແມ່ນຂຸດອອກຈາກຮ່ອງຮອຍໂຮງງານຕໍ່ເຮືອນານກິ່ງ ເຊິ່ງເປັນບ່ອນຕໍ່ເຮືອໃຫ້ທ່ານເຈິ້ງເຫີເດີນມະຫາສະໝຸດ, ນີ້ໄດ້ສະແດງໃຫ້ເຫັນວ່າ, ເຮືອປະເສີດຂອງທ່ານເຈິ້ງເຫີຍັງອາດຈະຄົງຕົວຢູ່.
ຕາມໜັງສືປະຫວັດສາດບັນທຶກໄວ້ວ່າ, ທ່ານເຈິ້ງເຫີເດີນມະຫາສະໝຸດທຸກເທື່ອໃຊ້ເຮືອຫລາຍຮ້ອຍລຳ, ໃນນັ້ນ, ເຮືອເລກໜຶ່ງຂອງທ່ານເຈິ້ງເຫີ ເຮືອບັນຊາຍາວປະມານ 126 ແມັດ, ກວ້າງ 51 ແມັດ, ປະລິມານຂັບນ້ຳ 15 ພັນໂຕນ, ບັນທຸກນ້ຳໜັກ 7 ພັນໂຕນ.
ງານວາງສະແດງເທື່ອນີ້ຍັງໄດ້ຜ່ານວັດຖຸບູຮານແລະຮູບພາບຫລວງຫລາຍ, ສະແດງໃຫ້ເຫັນຢ່າງຮອບດ້ານກ່ຽວກັບຂະບວນການເດີນມະຫາສະໝຸດຂອງທ່ານເຈິ້ງເຫີມີການຊຸກຍູ້ການແລກປ່ຽນວັດທະນະທຳແລະການຄ້າສາກົນກັບປະເທດຕ່າງໆ. ເຖິງວ່າໃນຄາວນັ້ນ, ລາຊະວົງມິງມີກຳລັງແຫ່ງຊາດເຂັ້ມແຂງ, ແຕ່ຂະບວນເຮືອຂອງທ່ານເຈິ້ງເຫີເດີນມະຫາສະໝຸດ 7 ເທື່ອ, ໄດ້ໄປຮອດ 30 ກວ່າປະເທດ, ແຕ່ບໍ່ໄດ້ຍຶດເອົາດິນແດນຈັດແມັດ, ໄດ້ເຜີຍແຜ່ມິດຕະພາບທີ່ເຄົາລົບຢ່າງສະເໝີພາບກັນຕໍ່ຜູ້ທີ່ເຊື່ອຖືວັດທະນະທຳຕ່າງກັນ. ຈາກຮູບພາບດັ່ງກ່າວ, ຜູ້ຊົມອາດສັງເກດໄດ້ວ່າ, ຢູ່ປະເທດໄທ ມາເລເຊຍແລະອິນໂດເນເຊຍເປັນຕົ້ນລ້ວນແຕ່ສ້າງວັດຊານປາວ, ທ່ານເຈິ້ງເຫີໄດ້ກາຍເປັນເທວະທູດແຫ່ງສັນຕິພາບ, ຖືກປະດິດສະຖານໃນວັດສຳລັບໃຫ້ຄົນທັງຫລາຍໄປນະມັດສະການ.
ທ່ານເຈິ້ງເຫີໃນຖານເປັນນັກເດີນທະເລທີ່ມີຊື່ສຽງໃນປະຫວັດສາດຈີນ, ຢູ່ຈີນ, ໃຜໆກໍຮູ້ກັນໂດຍທົ່ວໄປ. ງານວາງສະແດງທີ່ຈັດໂດຍຫໍພິພິທະພັນແຫ່ງຊາດຈີນເທື່ອນີ້ໄດ້ດູດດຶງຜູ້ຊົມຫລວງຫລາຍມາຊົມ. ນາງປາຍຈິ້ງ ນັກຮຽນມັດທະຍົມມາຈາກເມືອງຮາເອີປິນ ພາກຕາເວັນອອກສຽງເໜືອຂອງຈີນ, ນາງບອກນັກຂ່າວວ່າ, ງານວາງສະແດງເທື່ອນີ້ໄດ້ເຮັດໃຫ້ຕົນເອງຮູ້ຈັກນັກເດີນທະເລຜູ້ນີ້ຫລາຍກວ່າເກົ່າ.
ທ່ານເຈິ້ງເຫີນຳພາຄົນຫລາຍປານນີ້ເດີນມະຫາສະໝຸດ, ເຜີຍແຜ່ວັດທະນະທຳຈີນ, ແລ້ວນຳເອົາວັດທະນະທຳຕ່າງປະເທດເຂົ້າມາ, ເປັນຜູ້ຍິ່ງໃຫຍ່ທີ່ສຸດ.
|
|
|
