|
ປັດຈຸບັນ ຄອມພິວເຕີໄດ້ກາຍເປັນເຄື່ອງຈຳເປັນໃນການເຮັດວຽກ,ຮ່ຳຮຽນແລະຊີວິດການເປັນຢູ່ຂອງຄົນທັງຫຼາຍແລ້ວ. ເຖິງວ່າຄອມພິວເຕີມີຫຼາຍຢ່າງຫຼາຍແນວເຮັດໃຫ້ຄົນລາຍຫູລາຍຕາກໍຕາມ,ແຕ່ຢາກຊື້ຄອມພິວເຕີທີ່ຜູ້ໃຫຍ່ໃຊ້ໄດ້,ເດັກນ້ອຍກໍໃຊ້ໄດ້,ພັດບໍ່ແແມ່ນເລື່ອງງ່າຍ. ຫວ່າງມໍ່ໆນີ້ ຈີນໄດ້ຄົ້ນຄວ້າຜະລິດຄອມພິວເຕີສອງລະບົບສຳລັບຜູ້ໃຫຍ່ແລະເດັກນ້ອຍ,ເຮັດໃຫ້ຜູ້ບໍລິໂພກຕ້ອງລິງຄານນຳບັນຫາດັ່ງກ່າວອີກແລ້ວ.
ຄອມພິເຕີຊະນິດນີ້ແມ່ນອອກແບບໂດຍກຸ່ມວິທະຍາສາດຟາງເຕີ ບໍລິສັດຜະລິດຄອມພິວເຕີທີ່ມີຊື່ສຽງຂອງຈີນກັບບໍລິສັດອິນເທວ,ຕົ້ນຕໍແມ່ນສຳລັບເດັກນ້ອຍທີ່ອາຍຸແຕ່ 3 ປີຮອດ 16 ປີ. ພໍ່ແມ່ສາມາດໃຊ້ວິທີງ່າຍໆປົກປິດຂໍ້ມູນຂ່າວສານທີ່ບໍ່ດີໃນເວລາເດັກນ້ອຍໃຊ້ຄອມພິວເຕີເຂົ້າທ່ອງອິນເຕີເນັດ,ພ້ອມທັງຮັບປະກັນການຮ່ຳຮຽນຂອງເດັກນ້ອຍ.
ທ່ານນາງອູຈູນ ຜູ້ອຳນວຍການພະແນກຂາຍຍ່ອຍຂອງກຸ່ມວິທະຍາສາດຟາງເຕີແນະນຳໃຫ້ນັກຂ່າວຮູ້ວ່າ:
"ຈຸດໜັກຂອງຄອມພິວເຕີສຳລັບເດັກນ້ອຍແມ່ນຮ່ຳຮຽນແລະລື້ນເລີງ,ເຮັດແນວໃດຊັກນຳການຮ່ຳຮຽນແລະການລື້ນເລີງໄປສູ່ສະພາບຂະຫຍາຍຕົວຢ່າງປອດໄສ,ທັງເຮັດໃຫ້ເດັກນ້ອຍສົນໃຈ,ນີ້ແມ່ນຈຸດເລີ່ມຕົ້ນຂອງພວກເຮົາໃນການພັດທະນາຄອມພິວເຕີເຄື່ອງນີ້."
ຄອມພິວເຕີເຄື່ອງນີ້ຖືກເອີ້ນເປັນຄອມພິວເຕີສອງລະບົບ,ແມ່ນຍ້ອນມັນໄດ້ອອກແບບກະແຈຊະນິດໜຶ່ງ,ຜູ້ໃຊ້ບໍ່ຕ້ອງໄຂຫຼືປິດເຄື່ອງ,ກໍສາມາດປ່ຽນເປັນລະບົບຜູ້ໃຫຍ່ຫຼືລະບົບເດັກນ້ອຍ,ມັນງ່າຍແລະສະດວກຄືປ່ຽນຊ່ອງໂທລະພາບ. ທ່ານນາງປາຍຊ້ຽງຊູນ ຮອງຜູ້ອຳນວຍການໃຫຍ່ສູນຜະລິດຕະພັນຂອງກຸ່ມວິທະຍາສາດຟາງເຕີໄດ້ແນະນຳສັບພະຄຸນນີ້ວ່າ:
ຢູ່ໜ້າຈໍຄອມພິວເຕີໄດ້ມີກະແຈສຳລັບປ່ຽນລະບົບ,ກົດກະແຈໄປຂ້າງໜຶ່ງແມ່ນລະບົບເດັກນ້ອຍ,ກົດໄປອີກຂ້າງໜຶ່ງກໍກາຍເປັນແບບຜູ້ໃຫຍ່. ເມື່ອກົດໄປລະບົບເດັກນ້ອຍແລ້ວ,ພໍ່ແມ່ສາມາດຖອນລູກກະແຈອອກ,ເມື່ອເປັນແນວນີ້ ເດັກນ້ອຍກໍສາມາດຫຼິ້ນຄອມພິວເຕີເຄື່ອງນີ້ຢ່າງປອດໃສພາຍໃນຂອບເຂດທີ່ພໍ່ແມ່ຄວບຄຸມໄດ້ໃນລະບົບເດັກນ້ອຍ."
ຕາມສະເໜີວ່າ,ໃນຄອມພິວເຕີເຄື່ອງນີ້,ພໍ່ແມ່ສາມາດໃຊ້ຊອຟແວມາຈຳກັດສິດເຂົ້າທ່ອງອິນເຕີເນັດໃຫ້ເດັກນ້ອຍ,ກຳນົດເວບໄຊທີ່ເຂົ້າໄດ້,ເພື່ອປົກປິດຂໍ້ມູນຂ່າວສານທີ່ບໍ່ດີໃນອິນເຕີເນັດ,ປ້ອງກັນບໍ່ໃຫ້ເດັກນ້ອຍເຂົ້າຊົມເວບໄຊທີ່ມີກຳລັງຮຸນແຮງຫຼືລາມົກ,ຫຼືມົວເມົານຳເກມອິນເຕີເນັດຫຼືລົມກັນໃນອິນເຕີເນັດ,ຫຼີກເວັ້ນການລົບກວນຂອງຂໍ້ມູນຂ່າວສານທີ່ບໍ່ດີ,ພວກເດັກນ້ອຍກໍສາມາດເຂົ້າທ່ອງອິນເຕີເນັດຢ່າງປອດໄສແລະປອດໄພໄດ້.
ເພື່ອຕອບສະໜອງຄວາມຕ້ອງການຂອງເດັກນ້ອຍໃນການນຳໃຊ້,ຄອມພິວເຕີສອງລະບົບໄດ້ໃຊ້ໜ້າຈໍສຳຜັດທີ່ຊັດເຈນແລະບໍ່ແຜ່ລັງສີທີ່ມີວິທະຍາສາດເຕັກນິກສູງທີ່ສຸດ. ສໍສຳຜັດທີ່ປະດິດສ້າງເອງສາມາດຂຽນຢູ່ໜ້າຈໍໂດຍກົງແລະສົ່ງຂໍ້ມູນຂ່າວສານໄດ້,ໄດ້ເຂົ້າແທນສັບພະຄຸນຄິຼກຂອງມາວສ໌ແລະສັບພະຄຸນດີດພິມໜັງສືຂອງຄີບອດ,ອັນໄດ້ແກ້ໄຂບັນຫາຕ່າງໆເຊັ່ນເດັກນ້ອຍໃຊ້ຄີບອດແລະມາວສ໌ບໍ່ສະດວກເປັນຕົ້ນ. ນອກນີ້ ຍ້ອນວ່າໄດ້ຕິດຕັ້ງຂາຕັ້ງທີ່ເດັກນ້ອຍໃຊ້ງ່າຍ,ສາມາດປັບຄວາມສູງແລະມຸມຂອງໜ້າຈໍໄດ້ຕາມໃຈ,ເພື່ອໃຫ້ສອດຄ່ອງກັບຄວາມຊີນເຄີຍຂອງເດັກນ້ອຍໃຫ້ດີກວ່າເກົ່າ,ເຮັດໃຫ້ພວກເຂົາເຈົ້າມີທ່າຂຽນທີ່ຖືກຕ້ອງ.
ຄອມພິວເຕີຊະນິດນີ້ຍັງໄດ້ໃຊ້ການອອກແບບສາຍກາບດຽວທີ່ໃໝ່ອ່ຽມກວ່າໝູ່ໃນໂລກ,ຈາກຄອມພິວເຕີຮອດໜ້າຈໍມີແຕ່ສາຍກາບດຽວ,ສາມາດສົ່ງຕົວເລກແລະໄຟຟ້າພ້ອມກັນ,ອັນໄດ້ຫຼີກເວັ້ນຄວາມອັນຕະລາຍໃນການໃຊ້ໄຟຟ້າຂອງເດັກນ້ອຍ.
ນອກນີ້ ຄອມພິວເຕີສອງລະບົບຍັງໄດ້ຕິດຕັ້ງຊອຟແວການສຶກສາແລະຊອຟແວລື້ນເລີງທີ່ເໝາະສຳລັບເດັກນ້ອຍທີ່ອາຍຸຕ່າງກັນ. ເດັກນ້ອຍບໍ່ພຽງແຕ່ສາມາດໃຊ້ຊອຟແວເຫຼົ່ານີ້ມາຮຽນຫຼັກສູດພາສາຈີນ,ຄະນິດສາດແລະພາສາອັງກິດເປັນຕົ້ນເທົ່ານັ້ນ,ຍັງສາມາດຫຼິ້ນເກມຄອມພິວເຕີຢ່າງຫຼວງຫຼາຍ. ຊອຟແວເຫຼົ່ານີ້ມີຮູບກາຕູນ,ຕິດໃຈແລະຖືກໃຈເດັກນ້ອຍທີ່ສຸດ.
ທ່ານນາງປາຍຊ້ຽງຊູ່ນ ຮອງຜູ້ອຳນວຍການໃຫຍ່ຂອງສູນຜະລິດຕະພັນກຸ່ມວິທະຍາສາດເຕັກນິກຟາງເຕີກ່າວວ່າ,ພວກເຂົາເຈົ້າຍັງຈະດັດແປງເຕັກນິກເລື້ອຍໆ,ຄົ້ນຄວ້າຜະລິດຄອມພິວເຕີທີ່ຍິ່ງສອດຄ່ອງກັບຄວາມຕ້ອງການຂອງເດັກນ້ອຍ.
"ນີ້ແມ່ນຄອມພິວເຕີສຳລັບເດັກນ້ອຍຮຸ່ນທີໜຶ່ງທີ່ພວກເຮົາຄົ້ນຄວ້າຜະລິດ,ຕໍ່ໄປພາຍໜ້າ,ພວກເຮົາຍັງຈະຄົ້ນຄວ້າຜະລິດຮຸ່ນທີສອງ,ຮຸ່ນທີສາມ. ພວກເຮົາຈະເຮັດໃຫ້ມັນໃຊ້ໄດ້ງ່າຍກວ່າເກົ່າ,ແລະກໍຈະຮ່ວມມືກັບບໍລິສັດຊອຟແວຍິ່ງຫຼາຍ. ນອກນີ້ ພວກເຮົາຍັງຈະຮ່ວມມືກັບເວບໄຊເດັກນ້ອຍ,ເຜີຍແຜ່ສິ່ງທີ່ປອດໄສໃຫ້ເດັກນ້ອຍແລະພໍ່ແມ່ໂດຍຜ່ານຈາກຄອມພິວເຕີເດັກນ້ອຍ."
|
