|
|
 |
| (GMT+08:00)
2005-07-25 18:02:24
|
 |
|
ຄາດຄະເນເບິ່ງກອງປະຊຸມລັດຖະມົນຕີການຕ່າງປະເທດອາຊຽນປະຈຳປີຢ່າງເປັນລະບົບ
cri
Author: da
ຕາມຂ່າວCRI:ບັນດາກອງປະຊຸມລັດຖະມົນຕີການຕ່າງປະເທດອາຊຽນປີ 2005 ຈະຈັດຂຶ້ນຢູ່ວຽງຈັນ ນະຄອນຫຼວງຂອງສ.ປ.ປ.ລາວແຕ່ວັນທີ 26 ຮອດວັນທີ 29 ກໍລະກົດ.ຂະບວນອາຊຽນເຊື່ອມໂຍງເຂົ້າກັນ ຊຸກຍູ້ການພັດທະນາກົນໄກການຮ່ວມມືລະຫວ່າງອາຊຽນກັບຈີນ ຍີ່ປຸ່ນແລະສ.ເກົາຫຼີ ສືບຕໍ່ເພີ່ມທະວີການຮ່ວມມືທາງການເມືອງແລະເສດຖະກິດລະຫວ່າງອາຊຽນກັບປະເທດນອກພາກພື້ນອາຊຽນ ພ້ອມດ້ວຍບັນຫາພາກພື້ນແລະສາກົນຄືໂຈມຕີລັດທິກໍ່ການຮ້າຍເປັນຕົ້ນຈະກາຍເປັນຈຸດໜັກການເຈລະຈາໃນກອງປະຊຸມ.
ລັດຖະມົນຕີການຕ່າງປະເທດຫຼືຜູ້ແທນຂອງ 10 ປະເທດອາຊຽນພ້ອມກັບຈີນ ຍີ່ປຸ່ນ ສ.ເກົາຫຼີ ອາເມລິກາແລະລັດເຊຍເປັນຕົ້ນຈະເຂົ້າຮ່ວມກອງປະຊຸມ.ນອກນີ້,ອາຊຽນແລະອົງການຈັດຕັ້ງສາກົນຄືສະຫະພາບເອີລົບເປັນຕົ້ນກໍຈະແຕ່ງຜູ້ແທນຮ່ວມປະຊຸມ.
ບັນດາກອງປະຊຸມລັດຖະມົນຕີການຕ່າງປະເທດອາຊຽນປີ 2005 ຄັ້ງນີ້ລວມທັງກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 38 ກອງປະຊຸມລັດຖະມົນຕີການຕ່າງປະເທດອາຊຽນກັບຈີນ ຍີ່ປຸ່ນ ສ.ເກົາຫຼີ(ຄື 10 + 3 ) ກອງປະຊຸມອາຊຽນກັບໝູ່ຄູ່ສົນທະນາ ແລະເວທີປາໄສພາກພື້ນອາຊຽນຄັ້ງທີ 12 ເປັນຕົ້ນ. ຫົວຂໍ້ຕົ້ນຕໍອັນໜຶ່ງຂອງກອງປະຊຸມຄັ້ງນີ້ແມ່ນຫາລືກັນເພີ່ມທະວີຄວາມສາມັກຄີພາຍໃນອາຊຽນ,ຊຸກຍູ້ຂະບວນອາຊຽນເຊື່ອມໂຍງເຂົ້າກັນ.ໃນກອງປະຊຸມລັດຖະມົນຕີການຕ່າງປະເທດອາຊຽນທີ່ຈັດຂຶ້ນກ່ອນເພິ່ນ,ລັດຖະມົນຕີການຕ່າງປະເທດຂອງ 10 ປະເທດອາຊຽນຈະຫາລືກັນປະຕິບັດມາດຕະການຂອງໂຄງການປະຕິບັດງານວຽງຈັນທີ່ຜ່ານໃນກອງປະຊຸມສຸດຍອດອາຊຽນໃນປີກາຍນີ້,ເພື່ອຫຼຸດຄວາມໂຕນກັນແຫ່ງການພັດທະນາລະຫວ່າງບັນດາປະເທດສະມາຊິກໃຫ້ໜ້ອຍລົງຕື່ມອີກ,ເລັ່ງລັດຂະບວນເຊື່ອມໂຍງເຂົ້າກັນ.ກອງປະຊຸມຄັ້ງນີ້ຈະເຊັນສັນຍາກ່ຽວກັບການສ້າງຕັ້ງກອງທຶນພັດທະນາອາຊຽນ,ສະໜອງກອງທຶນເຂົ້າໃນການປະຕິບັດໂຄງການປະຕິບັດງານວຽງຈັນ.ນອກນີ້,ກອງປະຊຸມຍັງຈະສຳຫຼວດພິຈາລະນາຮ່າງກົດບັດອາຊຽນແລະວາລະປະຊຸມກອງປະຊຸມສຸດຍອດອາຊີຕາເວັນອອກຄັ້ງປະຖົມມະເລີກແລະລາຍຊື່ປະເທດເຂົ້າຮ່ວມທີ່ຈະຈັດຂຶ້ນຢູ່ກົວລາລຳເບີ ນະຄອນຫຼວງມາເລເຊຍໃນເດືອນທັນວາປີນີ້.
ກອງປະຊຸມລັດຖະມົນຕີການຕ່າງປະເທດ 10 + 3 ທີ່ຈັດຂຶ້ນຕາມຫຼັງນັ້ນ,ຈະຫາລືການເພີ່ມທະວີແລະລົງເລິກຮ່ວມມືດ້ານເສດຖະກິດລະຫວ່າງບັນດາປະເທດສະມາຊິກອາຊີຕາເວັນອອກ ທິດຂະຫຍາຍຕົວຂອງກົນໄກຮ່ວມມືລະຫວ່າງ 10 + 3 ໃນອະນາຄົດແລະບັນຫາອື່ນໆ.ໃນຖານເປັນຮູບການຈຸດໜັກຂອງການຮ່ວມມືດ້ານເສດຖະກິດໃນພາກພື້ນ,ການສ້າງສາເຂດການຄ້າເສລີລະຫວ່າງອາຊຽນກັບຈີນ ຍີ່ປຸ່ນ ສ.ເກົາຫຼີໄດ້ຮັບຄວາມຄືບໜ້າ.ວັນທີ 20 ກໍລະກົດ,ເຂດການຄ້າເສລີຈີນອາຊຽນໄດ້ເລີ່ມຕົ້ນຢ່າງເປັນທາງການ;ເດືອນເມສາປີນີ້,ສັນຍາຂອບລະຫວ່າງອາຊຽນສ.ເກົາຫຼີກ່ຽວກັບເຂດການຄ້າເສລີໄດ້ກ້າວເຖິງຂັ້ນຕົກລົງກັນໃນດ້ານຫຼັກການ,ສອງຝ່າຍຈະເຊັນສັນຍາຢ່າງເປັນທາງການໃນໄລຍະກອງປະຊຸມສຸດຍອດອາຊຽນທີ່ຈະຈັດຂຶ້ນໃນທ້າຍປີນີ້;ສ່ວນອາຊຽນກັບຍີ່ປຸ່ນກໍກຳລັງຫາລືກັນກ່ຽວກັບການສ້າງເຂດການຄ້າເສລີ.
ໃນຖານເປັນກົນໄກສຳຄັນແຫ່ງການສົນທະນາແລະການຮ່ວມມືລະຫວ່າງອາຊຽນກັບປະເທດແລະອົງການຈັດຕັ້ງສາກົນນອກພາກພື້ນ,ກອງປະຊຸມອາຊຽນກັບຄູ່ສົນທະນາຈະແລກປ່ຽນຄວາມເຫັນກ່ຽວກັບການຊຸກຍູ້ການຮ່ວມມືລະຫວ່າງອາຊຽນກັບຄູ່ສົນທະນາໃນດ້ານເສດຖະກິດແລະຄວາມປອດໄພການເມືອງ.ຕາມຂ່າວແຈ້ງວ່າ,ຫວ່າງມໍ່ໆນີ້ ປະເທດສະມາຊິກສ່ວນໜຶ່ງໃນອາຊຽນໄດ້ປະກົດມີທ່ວງທ່າ ດູດດຶງທຶນຕ່າງປະເທດໄດ້ຫຼຸດໜ້ອຍລົງ,ຈົນກະທັ້ງບາງປະເທດໄດ້ຫຼຸດໜ້ອຍລົງ 50%,ສະນັ້ນ,ບັນຫາອາຊຽນຈະດູດດຶງທຶນຕ່າງປະເທດຫຼາຍຂຶ້ນແນວໃດນັ້ນຈະກາຍເປັນຈຸດໜັກທີ່ຜູ້ຮ່ວມປະຊຸມສົນໃຈນຳ.ນອກນີ້,ອາຊຽນກັບນູແວນເລຣັງແລະມົງໂກນຈະເຊັນສັນຍາໄມຕີຈິດຮ່ວມມືອາຊີອາຄະເນໃນກອງປະຊຸມອາຊຽນກັບຄູ່ສົນທະນາ.
ນອກນີ້,ການໂຈມຕີລັດທິກໍ່ການຮ້າຍແລະບັນຫານິວເຄຼຍແຫຼມເກົາຫຼີກໍຈະແມ່ນຫົວຂໍ້ສຳຄັນໃນກອງປະຊຸມຄັ້ງນີ້.
ຕາມຮູ້ວ່າ,ໃນໄລຍະໄຂກອງປະຊຸມຄັ້ງນີ້,ອາຊຽນຈະແຍກກັນກັບສ.ເກົາຫຼີ ນູແວນເຊຣັງແລະປາກີສະຖານເຊັນສັນຍາຮ່ວມກັນຕ້ານລັດທິກໍ່ການຮ້າຍ.ໃນຖານເປັນກົນໄກສົນທະນາຄວາມປອດໄພຫຼາຍຝ່າຍອັນພຽງດຽວຂອງພາກພື້ນອາຊີປາຊິຟິກໃນສະເພາະໜ້ານີ້,ເວທີປາໄສພາກພື້ນອາຊຽນກໍຈະສົນໃຈບັນຫາຄວາມປອດໄພທີ່ບໍ່ແມ່ນດັ້ງເດີມ ຊື່ງລວມທັງລັດທິກໍ່ການຮ້າຍ ຊື້ຂາຍຢາເສບຕິດເຖື່ອນແລະໜີພາສີເປັນຕົ້ນ.
|
|
|
