|
|
(GMT+08:00)
2005-07-29 17:05:24
|
|
ຜູ້ນຳຈີນອິນໂດເນເຊຍກ້າວເຖິງຂັ້ນມີຄວາມຮັບຮູ້ຄືກັນທີ່ສຳຄັນກ່ຽວກັບການເພີ່ມທະວີການຮ່ວມມືສອງຝ່າຍຕື່ມອີກ
cri
Author: da
ຕາມຂ່າວສານຊິນຮວາ: ຕອນບ່າຍວັນທີ 28 ກໍລະກົດ,ທ່ານຫູຈີນທາວ ປະທານປະເທດຈີນໄດ້ເຈລະຈາກັບທ່ານຊູຊີໂລ ປະທານາທິບໍດີອິນໂດເນເຊຍຢູ່ຫໍສະພາປະຊາຊົນປັກກິ່ງ.ປະມຸກລັດສອງປະເທດໄດ້ແລກປ່ຽນຄວາມເຫັນກ່ຽວກັບການພົວພັນລະຫວ່າງສອງຝ່າຍ ບັນຫາສາກົນແລະພາກພື້ນທີ່ສົນໃຈນຳກັນຢ່າງເລິກເຊິ່ງ,ທັງກ້າວເຖິງຂັ້ນມີຄວາມຮັບຮູ້ຄືກັນທີ່ສຳຄັນກ່ຽວກັບການເພີ່ມທະວີການຮ່ວມມືໃນຂົງເຂດສອງຕໍ່ສອງແລະຂົງເຂດຫຼາຍຝ່າຍຕື່ມອີກ,ພ້ອມກັນຊຸກຍູ້ການພົວພັນຄູ່ຂາຍຸດທະສາດລະຫວ່າງສອງປະເທດຂະຫຍາຍຕົວຢ່າງບໍ່ຢຸດຢັ້ງ.
ທ່ານຫູຈີນທາວຕີລາຄາສູງຕໍ່ການພົວພັນລະຫວ່າງຈີນອິນໂດເນເຊຍ.ທ່ານເວົ້າວ່າ,ປີນີ້ແມ່ນປີຈີນອິນໂດເນເຊຍສ້າງສາຍສຳພັນການທູດຄົບຮອບ 55 ປີ.ໃນ 55 ປີມານີ້,ການພົວພັນລະຫວ່າງຈີນອິນໂດເນເຊຍໄດ້ມີການຂະຫຍາຍຕົວຢ່າງໃຫຍ່ຫຼວງ.ໂດຍສະເພາະແມ່ນໃນຫຼາຍປີມານີ້,ຜູ້ນຳສອງປະເທດຢ້ຽມຢາມຕໍ່ເນື່ອງກັນ,ຄວາມເຂົ້າໃຈກັນແລະມິດຕະພາບກໍລົງສູ່ລວງເລິກ.ການແລກປ່ຽນແລະການຮ່ວມມືລະຫວ່າງສອງຝ່າຍໃນຂົງເຂດການເມືອງ ເສດຖະກິດການຄ້າ ວັດທະນະທຳແລະການສຶກສາ ການທະຫານແລະຄວາມໝັ້ນຄົງເປັນຕົ້ນໄດ້ເພີ່ມທະວີຂຶ້ນຢ່າງຮອບດ້ານ,ທັງປະສານງານແລະປະສານສົມທົບຢ່າງສະໜິດແໜ້ນໃນວຽກງານສາກົນແລະພາພື້ນ.ຈີນຍ້ອງຍໍລັດຖະບານອິນໂດເນເຊຍຍຶດໝັ້ນນະໂຍບາຍຈີນດຽວ,ຈີນສະໜັບສະໜູນອິນໂດເນເຊຍໂຈມຕີລັດທິແບ່ງແຍກແລະລັດທິກໍ່ການຮ້າຍ,ປົກປັກຮັກສາຄວາມສາມັກຄີແລະສະຖຽນລະພາບຂອງປະເທດ,ຊຸກຍູ້ການພັດທະນາເສດຖະກິດ.
ທ່ານຊູຊີໂລເວົ້າວ່າ,ລັດຖະບານອິນໂດເນເຊຍຍຶດໝັ້ນນະໂຍບາຍຈີນດຽວ,ຂອບໃຈນຳຈີນໄດ້ສະໜັບສະໜູນຄວາມພະຍາຍາມຂອງລັດຖະບານອິນໂດເນເຊຍໃນການປົກປັກຮັກສາປະຊາທິປະໄຕແຫ່ງຊາດແລະຜືນແຜ່ນດິນອັນຄົບຖ້ວນ.ລັດຖະບານອິນໂດເນເຊຍຈະຕັ້ງໜ້າອອກແຮງເພີ່ມທະວີແລະປົວແປງການພົວພັນໝູ່ຄູ່ຍຸດທະສາດກັບຈີນຢ່າງບໍ່ຢຸດຢັ້ງ.
ທ່ານຫູຈິນທາວສະເໜີໃຫ້ເພີ່ມທະວີການໄປມາຫາສູ່ຊັ້ນສູງ ການສົນທະນາແລະການຫາລືກັນທາງຍຸດທະສາດລະຫວ່າງສອງປະເທດ; ຊຸກຍູ້ການຮ່ວມມືກັນໃນຂົງເຂດຈຸດໜັກທາງເສດຖະກິດການຄ້າຄື ພື້ນຖານໂຄງລ່າງ ພັດທະນາພະລັງງານແລະຊັບພະຍາກອນ ໂທລະຄົມ ຂະແໜງການກະສິກຳປ່າໄມ້ແລະການປະມົງເປັນຕົ້ນ ພ້ອມດ້ວຍການກໍ່ສ້າງໂຄງການຂະໜາດໃຫຍ່; ປົວແປງກົນໄກຮ່ວມມືເທິງທະເລ ຊຶ່ງລວມທັງຄວາມປອດໄພການເດີນເຮືອ ການອະນຸລັກສິ່ງແວດລ້ອມມະຫາສະໝຸດ ແລະຄວາມປອດໄພເທິງທະເລເປັນຕົ້ນ; ເລີ່ມກົນໄກຫາລືວຽກງານປ້ອງກັນ; ເພີ່ມທະວີການຮ່ວມມືກັນໃນດ້ານການສ້າງຄືນໃໝ່ຫຼັງໄພພິບັດ ປ້ອງກັນແລະຫຼຸດໄພພິບັດ ການສຶກສາທາງວັດທະນະທຳແລະການທ່ອງທ່ຽວ.
ທ່ານຊູຊີໂລເຫັນດີນຳຄຳເຫັນຂອງທ່ານຫູຈີນທາວຢ່າງເຕັມສ່ວນ,ໂດຍເຫັນວ່າ ຍອດມູນຄ່າການຄ້າລະຫວ່າງສອງຝ່າຍໄດ້ເພີ່ມຂຶ້ນຢ່າງວ່ອງໄວ ຂົງເຂດການຮ່ວມມືເປີດກວ້າງອອກຢ່າງບໍ່ຢຸດຢັ້ງໄດ້ສ່ອງແສງໃຫ້ເຫັນຊີວິດຊີວາແລະກຳລັງບົ່ມຊ້ອນແຫ່ງການພົວພັນໄມຕີຈິດລະຫວ່າງສອງປະເທດ.ທ່ານເວົ້າວ່າ,ເງິນກູ້ຢືມດອກເບ້ຍຕ່ຳແລະການຊ່ອຍເຫຼືອລ້າທີ່ຈີນສະໜອງນັ້ນໄດ້ສະໜັບຊ່ອຍເຫຼືອການພັດທະນາສັງຄົມເສດຖະກິດແລະການສ້າງສາເຂດປະສົບໄພຄືນໃໝ່ຂອງອິນໂດເນເຊຍຢ່າງແຂງແຮງ.ລັດຖະບານອິນໂດເນເຊຍຈະພ້ອມກັນກັບຈີນ ທຳຄວາມພະຍາຍາມເພີ່ມທະວີການຮ່ວມມືຢ່າງມີໄມຕີຈິດລະຫວ່າງສອງປະເທດຢ່າງຮອບດ້ານໃນຂົງເຂດການເມືອງ ເສດຖະກິດການຄ້າ ການລົງທຶນ ທ່ອງທ່ຽວ ການສຶກສາ ວັດທະນະທຳແລະວຽກງານສາກົນເປັນຕົ້ນ.
ທ່ານຫູຈິນທາວເວົ້າວ່າ,ການຈັດກອງປະຊຸມສຸດຍອດອາຊີອາຟຼີກາປີ 2005 ແລະການເຄື່ອນໄຫວລະລຶກກອງປະຊຸມບານດົງຄົບຮອບ 50 ປີຢ່າງສຳເລັດຜົນນັ້ນ,ໄດ້ເກີດມີຊີວິດຊີວາໃໝ່ຕໍ່ການຊຸກຍູ້ການຮ່ວມມືໃຕ້ໃຕ້.ຈີນຍິນດີພ້ອມກັນກັບບັນດາຝ່າຍ ຊຶ່ງລວມທັງອິນໂດເນເຊຍ,ປະຕິບັດຄຳຖະແຫຼງການກ່ຽວກັບການພົວພັນໝູ່ຄູ່ຍຸດທະສາດແບບໃໝ່ອາຊີອາຟຼີກາ,ຊຸກຍູ້ການຮ່ວມມືກັນລະຫວ່າງບັນດາປະເທດອາຊີອາຟຼີກາໃນຂົງເຂດການເມືອງ ເສດຖະກິດ ສັງຄົມແລະວັດທະນະທຳເປັນຕົ້ນ,ທຳຄວາມພະຍາຍາມຢ່າງບໍ່ລົດລະເພື່ອສັນຕິພາບ ສະຖຽນລະພາບແລະການພັດທະນາ ຄວາມຈະເລີນຮຸ່ງເຮືອງຂອງພາກພື້ນອາຊີອາຟຼີກາ.
ທ່ານຊູຊີໂລຂອບໃຈນຳຝ່າຍຈີນທີ່ໄດ້ສະໜັບສະໜູນຕໍ່ກອງປະຊຸມສຸດຍອດອາຊີອາຟຼີກາຢ່າງແຂງແຮງ.ທ່ານເວົ້າວ່າ,ອາຊຽນຕີລາຄາສູງຕໍ່ບົດບາດອັນຕັ້ງໜ້າຂອງຈີນໃນວຽກງານສາກົນແລະພາກພື້ນ,ສອງຝ່າຍເພີ່ມທະວີການຮ່ວມມືກັນຢ່າງບໍ່ຢຸດຢັ້ງ,ມີຜົນດີຕໍ່ສັນຕິພາບ ສະຖຽນລະພາບແລະການພັດທະນາຂອງພາກພື້ນອາຊີ.
ສອງຝ່າຍຍັງໄດ້ແລກປ່ຽນຄວາມເຫັນແລະກ້າວເຖິງຂັ້ນມີຄວາມຮັບຮູ້ຄືກັນຢ່າງກວ້າງຂວາງກ່ຽວກັບບັນຫາສາກົນທີ່ສຳຄັນໃນສະເພາະໜ້ານີ້.
ຫຼັງການເຈລະຈາ,ປະມຸກລັດທັງສອງປະເທດໄດ້ເຂົ້າຮ່ວມພິທີລົງນາມໃນເອກະສານຮ່ວມມືສອງຕໍ່ສອງເຊັ່ນສັນຍາຮ່ວມມືເສດຖະກິດເຕັກນິກເປັນຕົ້ນ.
|
|
|