|
|
 |
| (GMT+08:00)
2005-07-29 17:18:45
|
 |
|
ເຕັກນິກຕໍ່ເຮືອຂອງຈີນທີ່ປະດິດສ້າງໃໝ່ເລື້ອຍໆ
cri
Author: li
 ລາຊະວົງມິງຂອງຈີນໃນຕົ້ນສະຕະວັດທີ 15 ມີເຕັກນິກຕໍ່ເຮືອທີ່ກ້າວໜ້າກວ່າໝູ່ແລະມີຂະບວນເຮືອເດີນມະຫາສະໝຸດທາງໄກທີ່ໃຫຍ່ກວ່າໝູ່ໃນໂລກ. ຂະບວນເຮືອປະກອບດ້ວຍເຮືອໃບຂະໜາດໃຫຍ່ທີ່ເຮັດດ້ວຍໄມ້ 260 ກວ່າລຳ,ພາຍໃຕ້ການນຳພາຂອງເຈົ້າໜ້າທີ່ຜູ້ໜຶ່ງຊື່ວ່າ"ເຈີ້ງເຮີ" ໄດ້ອອກເດີນທາງຈາກແຄມທະເລພາກຕາເວັນອອກຂອງຈີນຕັ້ງ 7 ເທື່ອ,ເດີນທະເລໄປທິດໃຕ້ແລະທິດຕາເວັນຕົກ,ເຜີຍແຜ່ວັດທະນະທຳແລະມິດຕະພາບຂອງຈີນຢູ່ 30 ກວ່າປະເທດແລະເຂດແຄວ້ນຂອງອາຊີແລະອາຟິຼກາທີ່ເດີນຜ່ານ,ໄດ້ສະແດງໃຫ້ເຫັນເຕັກນິກຕໍ່ເຮືອແລະຄວາມສາມາດເດີນທະເລອັນຍອດຢ້ຽມຂອງຈີນ. ຈີນເອີ້ນການເດີນທະເລເທື່ອນີ້ແມ່ນ"ເຈີ້ງເຮີເດີນທະເລໄປຕາເວັນຕົກ",ຫ່າງຈາກປັດຈຸບັນພໍດີ 600 ປີແລ້ວ.
ຄັນຊັ້ນ ເຕັກນິກຕໍ່ເຮືອຂອງຈີນທີ່ມີປະຫວັດອັນກ້ານກຸ່ງຮຸ່ງເຮືອງມີລະດັບແນວໃດໃນປັດຈຸບັນ?
ທີ່ຈິງແລ້ວ,ກ່ອນເຈີ້ງເຮີເດີນທະເລໄປຕາເວັນຕົກ,ເຕັກນິກຕໍ່ເຮືອຂອງຈີນກໍກ້າວໜ້າຢູ່ແລ້ວ,ຕົວຢ່າງຄືຢູ່ລາຊະວົງຊົ້ງທີ່ກ່ອນເຈີ້ງເຮີເດີນທະເລໄປຕາເວັນຕົກ 400 ປີ,ຈີນກໍສາມາດຕໍ່ເຮືອໃຫຍ່ທີ່ເດີນທະເລໄດ້ແລ້ວ. ຮອດສະໄໝທີ່ເຈີ້ງເຮີດຳລົງຊີວິດຢູ່ນັ້ນ,ເຕັກນິກຕໍ່ເຮືອໃບທີ່ເຮັດດ້ວຍໄມ້ຂອງຈີນແມ່ນນຳໜ້າໝູ່ໃນໂລກ.
ແຕ່ຮອດສະໄໝມໍ່,ເຕັກນິກຕໍ່ເຮືອຂອງຈີນພັດຫຼ້າຫຼັງຢ່າງເດັ່ນຊັດ. ນີ້ແມ່ນຍ້ອນວ່າເຮືອທີ່ຕໍ່ໃນສະໄໝບູຮານຂອງຈີນຕົ້ນຕໍແມ່ນເຮືອໃບທີ່ໃຊ້ລົມເປັນພະລັງແມ່ແຮງ,ແຕ່ເຮືອທີ່ປະກົດອອກພາຍຫຼັງການປະຕິວັດອຸດສາຫະກຳຂອງຝ່າຍຕາເວັນຕົກພັດແມ່ນໃຊ້ເຄື່ອງຈັກອາຍນ້ຳແລະເຄື່ອງຈັກນ້ຳມັນກາຊວນເປັນພະລັງແມ່ແຮງ,ເຄື່ອງຈັກເຫຼົ່ານີ້ລ້ວນແຕ່ແມ່ນປະເທດຝ່າຍຕາເວັນຕົກປະດິດສ້າງ,ສະນັ້ນໃນ 100 ປີກວ່າກ່ອນ,ຈີນຕົ້ນຕໍແມ່ນຮຽນເຕັກນິກຕໍ່ເຮືອຂອງຝ່າຍຕາເວັນຕົກ.
ບົນພື້ນຖານດັ່ງກ່າວ,ຈີນໄດ້ພັດທະນາອຸດສາຫະກຳຕໍ່ເຮືອສະໄໝມໍ່. ເມື່ອໄດ້ພັດທະນາມາເປັນເວລາສະຕະວັດກວ່າ,ຮອດຕົ້ນຊຸມປີ 90 ສະຕະວັດທີ 20,ເຕັກນິກຕໍ່ເຮືອຂອງຈີນໄດ້ມີຄວາມກ້າວໜ້າຢ່າງຫຼວງຫຼາຍ,ແຕ່ລະດັບບໍ່ສູງປານໃດ. ຫຼັງຈາກນັ້ນ ພາຍໃຕ້ການເອົາໃຈໃສ່ໃນລະດັບສູງຂອງລັດຖະບານຈີນ,ເຕັກນິກຕໍ່ເຮືອຈຶ່ງໄດ້ພັດທະນາຢ່າງໄວພະລັນ,ປັດຈຸບັນ,ໄດ້ບັນລຸລະດັບກ້າວໜ້າຂອງໂລກແລ້ວ.
ບໍລິສັດກຸ່ມອຸດສາຫະກຳຕໍ່ກ່ຳປັ່ນຈີນແມ່ນກຸ່ມວິສາຫະກິດຂະໜາດໃຫຍ່ທີ່ຮັບຜິດຊອບວຽກງານຕໍ່ກ່ຳປັ່ນພາກໃຕ້ຈີນ,ທ່ານນາງຊາວຮຸ້ຍຊູນຂອງພະແນກສາກົນບໍລິສັດດັ່ງກ່າວແນະນຳວ່າ,
"ພວກເຮົານອກຈາກສາມາດຕໍ່ກ່ຳປັ່ນແບບທຳມະດາແລ້ວ,ຍັງສາມາດຕໍ່ກ່ຳປັ່ນທີ່ມີເຕັກນິກສູງແລະມີມູນຄ່າເພີ່ມສູງ,ຕົວຢ່າງຄືກ່ຳປັ່ນບັນທຸກສິນຄ້າຂະໜາດໃຫຍ່,ກ່ຳປັ່ນອະນຸລັກສິ່ງແວດລ້ອມ,ກ່ຳປັ່ນບັນທຸກຜູ້ໂດຍສານແລະສິນຄ້າທີ່ມີຄວາມໄວສູງເປັນຕົ້ນ,ກ່ຳປັ່ນເຫຼົ່ານີ້ລ້ວນແຕ່ມີເຕັກນິກສູງສົມຄວນ."
ໃນຂະນະທີ່ຕໍ່ກ່ຳປັ່ນແບບທຳມະດາຊະນິດຕ່າງໆ,ຈີນຍັງສາມາດຕໍ່ກ່ຳປັ່ນພິເສດຈຳນວນໜຶ່ງຕາມຄວາມຕ້ອງການ. ຕົວຢ່າງຄືກ່ຳປັ່ນຕິດຕັ້ງກັງຫັນລົມຢູ່ເທິງທະເລພຽງລຳດຽວໃນໂລກປັດຈຸບັນກໍແມ່ນຈີນຕໍ່ໃຫ້ອັງກິດ,ຕົ້ນຕໍແມ່ນໃຊ້ໃນການຕິດຕັ້ງກັງຫັນລົມຜະລິດໄຟຟ້າເທິງທະເລ. ປີນີ້ ກ່ຳປັ່ນດັ່ງກ່າວໄດ້ຖືກອັງກິດປະກວດເປັນໜຶ່ງໃນ 10 ກ່ຳປັ່ນທີ່ມີຄຸນນະພາບສູງໃນໂລກ.
ທ່ານຮວງຈູ້ນໝິນ ຜູ້ຮັບຜິດຊອບບໍລິສັດກຸ່ມອຸດສາຫະກຳໜັກກ່ຳປັ່ນຈີນທີ່ຕໍ່ກ່ຳປັ່ນລຳນີ້ບອກນັກຂ່າວວ່າ:
"ທົ່ວບໍລິສັດພວກເຮົາມີສະຖາບັນຄົ້ນຄວ້າວິທະຍາສາດ 28 ແຫ່ງ. ຫວ່າງມໍ່ໆນີ້ ພວກເຮົາຍັງໄດ້ເພີ່ມຄວາມແຮງໃນການຮ່ວມມືດ້ານເຕັກນິກກັບຕ່າງປະເທດ,ອຸປະກອນຄົບຊຸດຢ່າງຫຼວງຫຼາຍຂອງພວກເຮົາແມ່ນໃຊ້ວິທີຊື້ສິດທິບັດແລະຮ່ວມມືຄົ້ນຄວ້າ,ສະນັ້ນ ລະດັບຕໍ່ເຮືອຂອງພວກເຮົາໃນປັດຈຸບັນໄດ້ສູງຂຶ້ນຢ່າງຫຼວງຫຼາຍ."
ປັດຈຸບັນ,ກ່ຳປັ່ນຂົນສົ່ງອາຍແກັສທາດນ້ຳແມ່ນກ່ຳປັ່ນທີ່ມີເຕັກນິກສູງສຸດໃນໂລກ,ວິສາຫະກິດຕໍ່ກ່ຳປັ່ນຂອງຈີນຕໍ່ກ່ຳປັ່ນແນວນີ້ໄດ້,ແລ້ວໄດ້ເຂົ້າຕະຫຼາດຕໍ່ກ່ຳປັ່ນອາຍແກັສທຳມະຊາດທາດນ້ຳສາກົນຢ່າງສຳເລັດຜົນ.
ຕໍ່ລະດັບເຕັກນິກຕໍ່ກ່ຳປັ່ນກວມລວມຂອງຈີນໃນປັດຈຸບັນ,ທ່ານຈ່າງກວາງຊິ່ນ ຮອງປະທານຄະນະກຳມະການອຸດສາຫະກຳວິທະຍາສາດເຕັກນິກປ້ອງກັນປະເທດ ເຊິ່ງເປັນພາກສ່ວນຊີ້ນຳອຸດສາຫະກຳຕໍ່ກ່ຳປັ່ນຂອງຈີນໄດ້ຕີລາຄາວ່າ:
"ປັດຈຸບັນ,ນອກຈາກກ່ຳປັ່ນສ່ວນໜ້ອຍເຊັ່ນກ່ຳປັ່ນທ່ອງທ່ຽວຫຼູຫຼາເປັນຕົ້ນແລ້ວ,ຈີນສາມາດຕໍ່ກ່ຳປັ່ນທີ່ສອດຄ່ອງກັບແບບແຜນສາກົນແລະເດີນຢູ່ເຂດທະເລໃດໆໄດ້."
ຍ້ອນມີເຕັກນິກຕໍ່ກ່ຳປັ່ນສູງ,ອຸດສາຫະກຳຕໍ່ກ່ຳປັ່ນຂອງຈີນໄດ້ພັດທະນາຢ່າງວ່ອງໄວ. ເມື່ອ 10 ປີກ່ອນ,ປະລິມານຕໍ່ກ່ຳປັ່ນຂອງຈີນໄດ້ຖັດຈາກສ.ເກົາຫຼີແລະຍີ່ປຸ່ນ,ກາຍເປັນປະເທດຕໍ່ກ່ຳປັ່ນໃຫຍ່ທີສາມຂອງໂລກ,ແລະໄດ້ຮັກສາການລຽງລຳດັບນີ້ຮອດຊູ່ມື້ນີ້. ອຸດສາຫະກຳຕໍ່ກ່ຳປັ່ນຂອງຈີນທີ່ພັດທະນາຢ່າງຟົດຟື້ນໄດ້ດຶງດູດເອົາເຈົ້າຂອງກ່ຳປັ່ນຂອງຫຼາຍປະເທດມາຈອງຊື້ກ່ຳປັ່ນ,ກ່ຳປັ່ນຂອງຈີນໄດ້ສົ່ງອອກໄປຂາຍຢູ່ 60 ກວ່າປະເທດໃນໂລກແລ້ວ.
ຄຽງຄູ່ກັບເຕັກນິກກ້າວໜ້າເລື້ອຍໆ,ອຸດສາຫະກຳຕໍ່ກ່ຳປັ່ນຂອງຈີນພວມສ້າງຄວາມສະຫງ່າລາສີໃໝ່ແລະປະກອບສ່ວນຂອງຕົນເຂົ້າໃນອຸດສາຫະກຳຂົນສົ່ງທາງນ້ຳສາກົນ.
|
|
|
