|
|
 |
| (GMT+08:00)
2005-07-29 18:00:38
|
 |
|
ວິທີປ້ອງກັນພະຍາດຫຼາຍຊະນິດທີ່ເດັກນ້ອຍເປັນຫຼາຍໃນຍາມຮ້ອນ
cri
 ໃນລະດູຮ້ອນ,ອາກາດຮ້ອນຈັດ,ເວົ້າສຳລັບເດັກນ້ອຍແລ້ວ,ມັກຈະເປັນພະຍາດບາງຢ່າງ. ໃນລາຍການສຸກສາລາພາກນີ້ ຂ້າພະເຈົ້າຂໍແນະທຳວິທີປ້ອງກັນພະຍາດທີ່ມີເດັກນ້ອຍເປັນຫຼາຍໃນຍາມຮ້ອນ.
ໃນລະດູຮ້ອນ,ອາກາດອົບເອົ້າ,ທັງປຽກຊຸ່ມ,ເດັກນ້ອຍຊ້ຳພັດມັກເໜັງຕີງຈຶ່ງມີເຫື່ອອອກງ່າຍ. ຖ້າເດັກນ້ອຍອອກເຫື່ອແລ້ວບໍ່ໄດ້ເຊັດໃຫ້ໂລກຫຼືຈົນຮູຂົນຖືກຕັນ,ເຫື່ອອອກບໍ່ສະດວກ,ຢູ່ອ້ອມຮູຂົນກໍຈະອັກເສບ,ກາຍເປັນຝົດເຫື່ອ. ເມື່ອເດັກນ້ອຍເປັນຝົດເຫື່ອແລ້ວ,ຍ້ອນວ່າຄັນ,ອົດບໍ່ໄດ້ຈຶ່ງເກົາມັນ,ຖ້າເກົາຈົນຜິວລອກກໍອາດຈະພາໃຫ້ອັກເສບໄດ້.
ສະນັ້ນ ຖ້າບໍ່ຢາກໃຫ້ເດັກນ້ອຍເປັນຝົດເຫື່ອ,ກ່ອນອື່ນ ຕ້ອງຮັກສາໃຫ້ອາກາດໃນເຮືອນລຸລ່ວງແລະແຫ້ງ,ພະຍາຍາມຫຼຸດອຸນຫະພູມໃນຫ້ອງໃຫ້ຕ່ຳລົງ,ເພື່ອບໍ່ໃຫ້ເດັກນ້ອຍອອກເຫື່ອຫຼາຍ. ຖັດມາ,ແມ່ນຄວນອາບນ້ຳໃຫ້ເດັກນ້ອຍເລື້ອຍໆ,ຮັກສາໃຫ້ຜິວໜັງສະອາດ. ອາບນ້ຳໃຫ້ເດັກນ້ອຍຄວນໃຊ້ນ້ຳອຸ່ນ,ດີທີ່ສຸດຢ່າໃຊ້ສະບູ່ທາດແຂງຫຼາຍເພື່ອບໍ່ໃຫ້ກະຕຸກຜິວໜັງ. ເມື່ອອາບນ້ຳແລ້ວໆ,ຕ້ອງເຊັດໃຫ້ແຫ້ງໃນທັນທີ,ແລ້ວທາແປ້ງກຸ່ມແກ້ຝົດ. ຖັດມາ,ຄວນປ່ຽນເສື້ອເລື້ອຍໆ,ຢ່າໃຫ້ເດັກນ້ອຍນຸ່ງເສື້ອທີ່ຖືກນ້ຳເຫື່ອຈົນປຽກ,ເສື້ອຜ້າຄວນແມ່ນເສື້ອຝ້າຍ,ເພາະວ່າມັນຊັບເຫື່ອໄດ້ດີແລະບໍ່ອັບ. ສຸດທ້າຍ,ຍັງຕ້ອງຕັດເລັບມືໃຫ້ເດັກນ້ອຍເລື້ອຍໆ,ປ້ອງກັນບໍ່ໃຫ້ເດັກນ້ອຍເກົາຜິວຈົນລອກແລະອັກເສບຍ້ອນຊຶ້ມເຊື້ອ.
ພະຍາດຕາແດງແມ່ນພະຍາດເຍື້ອຫຸ້ມຕາອັກເສບກະທັນຫັນຍ້ອນເຊື້ອພະຍາດ. ທຳມະດາແລ້ວ ພະຍາດນີ້ມັກເປັນໃນລະດູຮ້ອນແລະລະດູໃບໄມ້ຫຼົ່ນ,ຕິດແປດໄວທີ່ສຸດ. ຖ້າເດັກນ້ອຍດີໆແຕະຕ້ອງເຄື່ອງໃຊ້ຂອງເດັກນ້ອຍທີ່ເປັນພະຍາດເຊັ່ນຜ້າເຊັດໜ້າ,ຊາມລ້າງໜ້າແລະຂອງຫຼິ້ນເປັນຕົ້ນກໍຈະຕິດແປດໂລດ. ວິທີປ້ອງກັນພະຍາດຕາແດງ ສຳຄັນແມ່ນຕ້ອງມີຄວາມຊິນເຄີຍອະນາໄມທີ່ດີໃນຍາມປົກກະຕິ,ແຕ່ລະຄົນຕ້ອງມີຜ້າເຊັດໜ້າຂອງຕົນເອງ,ຢ່າໃຊ້ມືເປື້ອນແລະຜ້າຂົນໜູທີ່ເປື້ອນເຊັດຕາຫຼືຍ່ອງຕາ. ເດັກນ້ອຍຖ້າເປັນພະຍາດຕາແດງແລ້ວ,ຄວນພັກຜ່ອນຢູ່ໃນເຮືອນແລະປິ່ນປົວ,ທັງເອົາຜ້າເຊັດໜ້າແລະແພມົນທີ່ເດັກນ້ອຍໃຊ້ແລ້ວນັ້ນໄປຕົ້ມໃຫ້ຟົດເພື່ອດັບເຊື້ອ.
ໃນຍາມຮ້ອນ,ເດັກນ້ອຍຍັງຕ້ອງປ້ອງກັນໄຂ້ຍາມຮ້ອນ,ທຳມະດາແລ້ວ,ພະຍາດນີ້ມັກເປັນໃນຫຼາຍເດືອນທີ່ອາກາດຮ້ອນທີ່ສຸດ,ມີອາການຄືເປັນໄຂ້ຍາວນານ,ອຸນຫະພູມຄີງຢູ່ໃນລະຫວ່າງ 38 ຮອດ 40 ອົງສາ,ອາດຈະໄຂ້ເດືອນໜຶ່ງຮອດ 3 ເດືອນ,ເມື່ອຮອດຍາມອາກາດເຢັນລົງ,ອຸນຫະພູມຄີງກໍຈະຕ່ຳລົງ; ບໍ່ມີເຫື່ອຫຼືເຫື່ອອອກໜ້ອຍ; ເດັກນ້ອຍທີ່ເປັນໄຂ້ກິນນ້ຳຫຼາຍຍ່ຽວກໍຫຼາຍ. ເມື່ອກວດເບິ່ງແລ້ວ,ມີແຕ່ຕົວຮ້ອນທໍ່ນັ້ນ ບໍ່ມີແນວອື່ນທີ່ຜິດປົກກະຕິ. ປັດຈຸບັນ ເຫັນວ່າພະຍາດດັ່ງກ່າວອາດຈະກ່ຽວພັນເຖິງລະບົບປະສາດສູນກາງຂອງເດັກນ້ອຍເຕີບໂຕບໍ່ສົມບູນ. ຫຼັງຈາກເດັກນ້ອຍເປັນພະຍາດຄີງຮ້ອນແລ້ວ,ຈະໃຊ້ວິທີຟິຊິກມາຫຼຸດອຸນຫະພູມຄີງກໍໄດ້,ຕົວຢ່າງຄືອາບນ້ຳອຸ່ນ,ໃຊ້ເຫຼົ້າເກົ້າສິບເຊັດໂຕເປັນຕົ້ນ.
ນອກນີ້ ພະຍາດເປັນຝິຫົມໜອງກໍແມ່ນພະຍາດທີ່ເດັກນ້ອຍຕ້ອງປ້ອງກັນໃນຍາມຮ້ອນ. ພະຍາດນີ້ສ່ວນຫຼາຍມັກເປັນໃນຍາມຮ້ອນໆທີ່ອາກາດ ປຽກຊຸ່ມຫຼາຍ,ເດັກນ້ອຍກ່ອນໄວຮຽນມັກເປັນ. ຝີຫົມໜອງຕິດແປດແຮງທີ່ສຸດ,ສຳຄັນແມ່ນຖ້າບາຍຖືກຫຼືໃຊ້ຂອງທີ່ແປດເປື້ອນຂອງຜູ້ເປັນ. ເດັກນ້ອຍທີ່ເປັນຝີນີ້ບາງຄົນອາດຈະເກີດໝາກໄຂ່ຫຼັງອັກເສບກະທັນຫັນຫຼັງຈາກເປັນພະຍາດນີ້ແລ້ວພາຍໃນ 1 ຮອດ 3 ອາທິດ. ດັ່ງນັ້ນ ເມື່ອເດັກນ້ອຍເປັນຝີຫົມໜອງ,ພໍ່ແມ່ຄວນພາເດັກນ້ອຍໄປປົວຢູ່ໂຮງໝໍໂດຍໄວ,ຖ້າອາການບໍ່ໜັກ,ກໍມີແຕ່ທາຢາຫຼືປົວແຕ່ພາກສ່ວນກໍໄດ້ແລ້ວ,ຖ້າອາການອ່າວໜັກ,ກໍຕ້ອງປົວດ້ວຍຢາຕ້ານເຊື້ອໝົດຮ່າງກາຍ.
|
|
|
