|
ບໍ່ວ່າຢູ່ປະເທດໃດກໍມີຄົນຈຳນວນໜຶ່ງມັກດື່ມເຫຼົ້າ,ແພດສາດພື້ນເມືອງຈີນເຫັນວ່າ,ຖ້າດື່ມເຫຼົ້າຫຼາຍໂພດຈະໃຫ້ໂທດ,ຖ້າດື່ມໜ້ອຍຈະໃຫ້ຄຸນ.ທັງນີ້ກໍເພາະວ່າຖ້າດື່ມເຫຼົ້າຫຼາຍໂພດ ອານໂກນຢູ່ໃນເຫຼົ້າກໍ່ຈະກະຕຸກແຮງຕໍ່ເຈັ້ຍຫຸ້ມຫຼອດອາຫານແລະຫຼອດກະເພາະລຳໄສ້,ມັກພາໃຫ້ເປັນຝີໃນກະເພາະ,ເປັນມະເຮັງໃນຫຼອດອາຫານ,ມະເຮັງກະເພາະ,ມະເຮັງລຳໄສ້ແລະມະເຮັງຕັບຢູ່ໃນອັດຕາສູງຕັ້ງຫຼາຍສິບເທົ່າກວ່າຜູ້ບໍ່ດື່ມເຫຼົ້າ.ເພດຍີງທີ່ດື່ມເຫຼົ້າຫຼາຍໂພດນັ້ນຍັງມັກເປັນມະເຮັງເຕົ້ານົມ.ດ້ວຍເຫດໃດ,ການດື່ມເຫຼົ້າຈິ່ງພາໃຫ້ຄົນເປັນມະເຮັງ?
ຕາມບັນດາຜູ້ຊ່ຽວຊານເວົ້າວ່າ,ທັງນີ້ກໍເພາະວ່າທາດອານໂກນເອງກໍແມ່ນທາດຊະນິດໜຶ່ງທີ່ຊ່ວຍໃຫ້ເປັນມະເຮັງຢູ່ແລ້ວ.ເຖິງວ່າທາດອານໂກນເອງບໍ່ແມ່ນທາດທີ່ພາໃຫ້ເປັນມະເຮັງກໍຕາມ,ແຕ່ພໍເມື່ອໄປພໍ້ວັດຖຸທີ່ພາໃຫ້ເປັນມະເຮັງແລ້ວ,ມັນກໍມີບົດບາດເລັ່ງລັດໃຫ້ເປັນມະເຮັງໄວແລະແຮງຂຶ້ນ.
ພະຍາດຕັບແຂງກໍ່ແມ່ນຜົນຮ້າຍຢ້ອນຫຼັງຍ້ອນດື່ມເຫຼົ້າຫຼາຍເປັນເວລາຍາວນານນັ້ນເອງ.ຜູ້ເປັນພຍາດຕັບແຂງນັ້ນມີ80ຫາ90%ແມ່ນອາດຈະມີການພົວພັນກັບການດື່ມເຫຼົ້າ.ເພາະວ່າອານໂກນມີຜົນກະທົບເຖິງການປ່ຽນຖ່າຍໄຂມັນຢ່າງເປັນປົກກະຕິໃນຮ່າງກາຍຂອງຄົນເຮົາ,ແລ້ວພາໃຫ້ຕັບມີໄຂມັນຫຼາຍ.ນອກນີ້,ຖ້າຫາກດື່ມເຫຼົ້າເບຍຫຼາຍຢ່າງຍາວນານແລ້ວ,ກໍອາດຈະເຮັດໃຫ້ໄຂມັນໄປອັ່ງໂຮມກັນຢູ່ໃນທ້ອງ,ເຮັດໃຫ້ທ້ອງປຸ້ງຂຶ້ນ,ແລະມັນຍັງຈະເຮັດໃຫ້ໄຂມັນໄປອັ່ງໂຮມຢູ່ອ້ອມໝາກຫົວໃຈ ພາໃຫ້ໝາກຫົວໃຈມີໄຂມັນຫຼາຍຂຶ້ນອີກ.ທັງໝົດເຫຼົ່ານີ້ລ້ວນແຕ່ບໍ່ມີຜົນດີຕໍ່ສຸຂະພາບຂອງຄົນເຮົາທັງນັ້ນ.ຜູ້ເປັນພໍ່ເປັນແມ່ນັ້ນຖ້າຫາກດື່ມເຫຼົ້າຫຼາຍກໍຍັງມີຜົນສະທ້ອນຕໍ່ຄວາມເຕີບໃຫຍ່ຂອງລູກເຕົ້ານຳອີກ.ຜູ້ເປັນແມ່ນັ້ນ,ກ່ອນຈະຖືພາສາມເດືອນຈົນຮອດເວລາປະສູດລູກແລ້ວເຄິ່ງປີ,ໃນໄລຍະນີ້ຖ້າຫາກດື່ມເຫຼົ້າຫຼາຍກໍອາດເຮັດໃຫ້ລູກເປັນຄົນປັນຍາອ່ອນ.
ການດື່ມເຫຼົ້າຫຼາຍໂພດນັ້ນເປັນການໃຫ້ໂທດ,ແຕ່ຖ້າຫາກດື່ມເຫຼົ້າບໍ່ຫຼາຍຫຼືດື່ມພໍດ້າມພໍດີກໍຈະໃຫ້ຄຸນອັນແນ່ນອນຕໍ່ຮ່າງກາຍ.ເພາະວ່າການດື່ມເຫຼົ້າບໍ່ຫຼາຍນັ້ນມັນຈະຊຸກຍູ້ໃຫ້ມີນ້ຳຍ່ອຍອາຫານໃນກະເພາະລຳໄສ້,ເຮັດໃຫ້ມີການຍ່ອຍອາຫານໄດ້ດີ.ການດື່ມເຫຼົ້າບໍ່ຫຼາຍນັ້ນຍັງຈະເພີ່ມທະວີໃຫ້ມີໄຂມັນໂປຼຕິນຖີ່ເຂົ້າໃນລະດັບສູງ,ເພາະສະນັ້ນ,ມັນຈິ່ງມີບົດບາດອັນແນ່ນອນຕໍ່ການປ້ອງກັນບໍ່ໃຫ້ເປັນໂຣກຫົວໃຈ.ການດື່ມເຫຼົ້າແວງແລະເຫຼົ້າເບຍຢ່າງພໍດ້າມພໍດີນັ້ນຍັງສາມາດຕື່ມສານປະເພດມີໜ້ອຍແລະຕື່ມວິຕາມິນຈຳນວນໜຶ່ງອີກດ້ວຍ.
ຈະຄວນດື່ມເຫຼົ້າຕາມຫຼັກວິທະຍາສາດແນວໃດນັ້ນ,ຜູ້ຊ່ຽວຊານກໍໄດ້ໃຫ້ຄວາມເຫັນວ່າ ຄວາມລະວັງສາມຂໍ້ດັ່ງລຸ່ມນີ້ຄື:
ໜຶ່ງ: ດື່ມເຫຼົ້າໃນປະລິມານພໍດ້າມພໍດີ,ບໍ່ຈຳເປັນຈະຕ້ອງດື່ມຄູ່ຄາບເຂົ້າ,ພະຍາຍາມໃຫ້ດື່ມແຕ່ເຫຼົ້າທີ່ບໍ່ປຸກປານໃດຄືເຫຼົ້າແວງ,ເຫຼົ້າສະໂທແລະເຫຼົ້າເບຍ.ສ່ວນເຫຼົ້າປຸກນັ້ນຄວນດື່ມໜ້ອຍໜຶ່ງຫຼືບໍ່ດື່ມກໍຍິ່ງດີ.ບໍ່ຄວນດື່ມເຫຼົ້າໃນຍາມທ້ອງເປົ່າ,ເພາະມັນມັກເມົາງ່າຍ.ທັງນີ້ແມ່ນຍ້ອນວ່າທາດອານໂກນຖືກຮັບເອົາໄວແລະຈະເຮັດໃຫ້ທາດອານໂກນຢູ່ຕາມສາຍເລືອດຫຼາຍຂຶ້ນໄວຈົນເຖິງຂັ້ນພາໃຫ້ເມົາ.ໃນເວລາດື່ມເຫຼົ້ານັ້ນດີແທ້ຕ້ອງມີຂອງແກ້ມ,ຈະດື່ມແກ້ມກັບໝາກໄມ້ກໍໄດ້.
ສອງ: ກ່ອນກິນຢາຫຼືກິນຢາແລ້ວກໍບໍ່ຄວນດື່ມເຫຼົ້າ,ເພາະວ່າເຫຼົ້າຈະເຮັດໃຫ້ທາດຢາມີການປ່ຽນແປງແລະໝົດລິດຂອງມັນໃນການປິ່ນປົວ.
ສາມ: ເພດຍີງແມ່ນບໍ່ຄວນດື່ມເຫຼົ້າຫາຍຢ່າງເປັນປະຈຳ.ເພາະວ່າເຫຼົ້າຈະໃຫ້ໂທດແກ່ສຸຂະພາບຂອງແມ່ຍີງຫຼາຍກວ່າຜູ້ຊາຍ,ຍ້ອນຜົນກະທົບຂອງສານຮອກໂມນຕົວແມ່ແລະຄວາມສາມາດປ່ຽນຖ່າຍທາດອານໂກນຢູ່ໃນຮ່າງກາຍຂອງແມ່ຍິງນັ້ນມັນອ່ອນກວ່າແລະຊ້າກວ່າ.ສະນັ້ນ,ທາດອານໂກນກໍຈະອັ່ງໂຮມຢູ່ໃນຮ່າງກາຍງ່າຍກວ່າແລະພາໃຫ້ຕົນໂຕອ້ວນພີຂຶ້ນໂພດ.ນອກນັ້ນ,ເດັກນ້ອຍທີ່ຍັງບໍ່ທັນເຖິງກະສຽນກໍບໍ່ຄວນດື່ມເຫຼົ້າ.
|
