|
ວັນທີ 25 ກໍລະກົດນີ້, ລາຍການໂດດນ້ຳຂອງງານແຂ່ງຂັນລອຍນ້ຳຊິງຊະນະເລີດໂລກປີ 2005 ໄດ້ສິ້ນສຸດລົງ. ໃນການແຂ່ງຂັນໂດດຄູ່ຈາກແປ້ນສູງສາມແມັດເພດຍິງ, ນາງໂກຈິງຈິງກັບນາງລິຖິງ ນັກກິລາຈີນທີ່ປະກອບໃໝ່ຊິງໄດ້ແຊມປຽນດ້ວຍ 349,8 ຄະແນນ. ສ່ວນທ້າວຫູເຈຍແລະທ້າວຢາງຈິງຮຸຍ ນັກກິລາຈີນອີກຄູ່ໜຶ່ງທີ່ປະກອບໃໝ່ຊິງໄດ້ຮອງຊະນະເລີດໃນການແຂ່ງຂັນໂດດຄູ່ຈາກແທ່ນສູງ 10 ແມັດເພດຊາຍ. ໃນການແຂ່ງຂັນໂດດນ້ຳ 10 ປະເພດຂອງງານແຂ່ງຂັນລອຍນ້ຳຊິງຊະນະເລີດໂລກເທື່ອນີ້, ທີມໂດດນ້ຳຈີນຊິງໄດ້ຫຼຽນຄຳ 5 ຫຼຽນ ຫຼຽນເງິນ 4 ຫຼຽນ ຫຼຽນທອງ 3 ຫຼຽນ.
****** ***** *****
ພາຍຫຼັງຢູ່ປັກກິ່ງ 4 ມື້ແລ້ວ, ວັນທີ 24 ກໍລະກົດນີ້, ທີມບານເຕະຣີອານ ມາດຣິດແຫ່ງແອສປາຍໄດ້ເດີນທາງຈາກນະຄອນຫຼວງປັກກິ່ງໄປໂຕກຽວຍີ່ປຸ່ນ, ໂຕກຽວແມ່ນແຫ່ງທີສອງຂອງການມາຢາມອາຊີຂອງທີມຣີອານ ມາດຣິດເທື່ອນີ້. ຕອນຄ່ຳວັນທີ 23, ທີມຣິອານ ມາດຣິດກັບທີມຮຸນໄດປັກກິ່ງໄດ້ດຳເນີນການແຂ່ງຂັນບານເຕະມິດຕະພາບ, ໃນທີ່ສຸດ ທີມຣີອານ ມາດຣິດໄດ້ຮັບໄຊຊະນະ, ຜົນການແຂ່ງຂັນແມ່ນ 3:2.
****** ****** ******
ວັນທີ 24 ກໍລະກົດນີ້, ທີມບານເຕະແມນເຊສ໌ເຕີ ຢູໄນເຕັດອັງກິດໄດ້ຂີ່ຍົນຈາກຮົງກົງມາຮອດປັກກິ່ງ. ໃນໄລຍະຢ້ຽມຢາມຢູ່ປັກກິ່ງ, ທີມແມນເຊສ໌ເຕີ ຢູໄນເຕັດໄດ້ຖືການຝຶກແອບເປັນຫຼັກ, ການເຄື່ອນໄຫວດ້ານການທຸລະກິດພຽງຈັດໃຫ້ມີເຄິ່ງມື້ທໍ່ນັ້ນ. ຕອນຄ່ຳວັນທີ 26 ກໍລະກົດນີ້, ທີມແມນເຊສ໌ເຕີ ຢູໄນເຕັດໄດ້ແຂ່ງຂັນບານເຕະມິດຕະພາບກັບທີມຮຸນໄດປັກກິ່ງຢູ່ສະໜາມກິລາກຳມະກອນປັກກິ່ງ. ຜົນສຸດທ້າຍແມ່ນ0:3, ທີມແມນເຊສ໌ເຕີ ຢູໄນເຕັດໄດ້ຮັບໄຊຊະນະ.
****** ****** ******
ວັນທີ 26 ກໍລະກົດນີ້, ງານແຂ່ງຂັນບານບ້ວງຊິງແຊມປຽນລະດັບທະວີບສະຕັງໂຄວິກຄັ້ງທຳອິດໄດ້ຈັດຂຶ້ນຢູ່ສະໜາມກິລານະຄອນຫຼວງປັກກິ່ງ. ທີມບານບ້ວງທີ່ເຂົ້າຮ່ວມງານແຂ່ງຂັນແມ່ນທີມແຊມປຽນຂອງບັນດາທະວີບ, ລວມມີ ທີມລີຕົວນີ ທີມອາກຊັງຕິນ ທີມອົສຕຼາລີ ທີມ ປອກໂຕລີໂກ ທີມອັງໂກລາແລະທີມຈີນ. ການແຂ່ງຂັນຈະໃຊ້ລະບອບໝູນວຽນທິດດຽວ, ອີງຕາມກະຕິກາຂອງສະຫະພັນບານບ້ວງສາກົນ, ການແຂ່ງຂັນເກມໜຶ່ງແບ່ງເປັນ 4 ນັດ, ນັດລະ 10 ນາທີ, ເງິນລາງວັນແຊມປຽນແມ່ນ 1 ແສນໂດລາສະຫະລັດ.
****** ****** ******
ວັນທີ 24 ກໍລະກົດນີ້, ງານກິລາໂລກຄັ້ງທີ 7 ທີ່ຈັດຂຶ້ນຢູ່ເຢຍລະມັນໄດ້ສິ້ນສຸດລົງ. ໃນການແຂ່ງຂັນເພາະກາຍໝູ່ຄະນະ 6 ຄົນ, ທີມກິລາເພາະກາຍຈີນຊິງໄດ້ແຊມປຽນ, ນີ້ແມ່ນແຊມປຽນຫຼຽນທຳອິດທີ່ທີມກິລາເພາະກາຍຈີນຊິງໄດ້ໃນການແຂ່ງຂັນລະດັບໂລກ. ໃນການແຂ່ງຂັນສະນຸກເກີຮອບຊິງຊະນະເລີດ, ທ້າວຕິງຈຸ້ນຮຸຍ ນັກກິລາຈີນເສຍໃຫ້ນັກກິລາອຽກລັງເໜືອ, ເປັນຮອງຊະນະເລີດ. ໃນງານກິລາໂລກເທື່ອນີ້, ທີມຈີນຊິງໄດ້ຫຼຽນຄຳ 4 ຫຼຽນ ຫຼຽນເງິນ 5 ຫຼຽນ.
****** ****** ******
ຕອນບ່າຍວັນທີ 25 ກໍລະກົດນີ້, ງານແຂ່ງຂັນລົດຖີບແລ່ນຕາມທາງຫຼວງອ້ອມໜອງຊິງໄຫສາກົນຄັ້ງທີ 4 ທີ່ຈັດຂຶ້ນຢູ່ນະຄອນຊີໜິງແຂວງຊິງໄຫ ທາງພາກຕາເວັນຕົກຂອງຈີນໄດ້ສິ້ນສຸດລົງ. ເມື່ອໄດ້ແຂ່ງຂັນຢ່າງດຸເດືອດເປັນເວລາ 9 ມື້ ເຊິ່ງແບ່ງເປັນ 9 ໄລຍະທາງ, ທ້າວມາທິນ ມາເຣັສ ນັກກິລາຂອງທີມແຊັດວີວີແຊັດ(ZVVZ)ຂອງເຊັກຊິງໄດ້ແຊມປຽນລວມ. ປະຈຸບັນ ງານແຂ່ງຂັນລົດຖີບແລ່ນຕາມທາງຫຼວງອ້ອມໜອງຊິງໄຫສາກົນໄດ້ກາຍເປັນງານແຂ່ງຂັນລົດຖີບແລ່ນຕາມທາງຫຼວງສາກົນທີ່ລະດັບສູງສຸດແລະມີຂະໜາດໃຫຍ່ກວ່າໝູ່ໃນອາຊີ, ກໍແມ່ນການແຂ່ງຂັນລົດຖີບແລ່ນຕາມທາງຫຼວງສາກົນທີ່ຈັດຂຶ້ນຢູ່ບ່ອນທີ່ສູງກວ່າລະດັບນ້ຳທະເລຫຼາຍທີ່ສຸດໃນໂລກ. ທີມລົດຖີບ 20 ທີມທີ່ມາຈາກ 5 ທະວີບໃນໂລກ ນັກກິລາ 100 ກວ່າຄົນໄດ້ເຂົ້າຮ່ວມງານແຂ່ງຂັນ.
****** ****** ******
ວັນທີ 24 ກໍລະກົດນີ້, ໃນການແຂ່ງຂັນສາຍ A ຂອງງານແຂ່ງຂັນບານສົ່ງເພດຍິງ U-20 ປີຊິງຊະນະເລີດໂລກ, ທີມຈີນແຂ່ງຂັນກັບທີມໂດມີນີແກນຢ່າງດຸເດືອດ, ໃນທີ່ສຸດ ທີມຈີນໄດ້ຮັບໄຊຊະນະແບບຫວຸດຫວິດດ້ວຍຄະແນນ 3:2, ແລະໄດ້ຮັບໄຊຊະນະສອງເກມຢ່າງຕໍ່ເນື່ອງກັນ. ງານແຂ່ງຂັນໄດ້ຈັດຂຶ້ນຢູ່ອັງກາລາ ນະຄອນຫຼວງຕວກກີ, ໃນເກມທຳອິດ, ທີມຈີນໄດ້ເອົາຊະນະທີມເອຢິບດ້ວຍຄະແນນ 3:0. ລວມມີ 12 ທີມເຂົ້າຮ່ວມງານແຂ່ງຂັນບານສົ່ງເພດຍິງ U-20 ປີຊິງຊະນະເລີດໂລກເທື່ອນີ້.
****** ****** ******
ໃນການແຂ່ງຂັນຮອບທີສອງໃນສາຍ B ຂອງງານແຂ່ງຂັນບານສົ່ງເພດຍິງ U-18 ປີຊິງຊະນະເລີດໂລກຄັ້ງທີ 9 ທີ່ຈັດຂຶ້ນຢູ່ມາກາວໃນວັນທີ 24 ກໍລະກົດນີ້, ທີມຈີນໄດ້ເອົາຊະນະທີມອູແກຼນ ທີມເກັ່ງເອີລົບຕາເວັນອອກແບບຫວຸດຫວິດດ້ວຍຄະແນນ 3:2. ໃນການແຂ່ງຂັນອີກເກມໜຶ່ງໃນສາຍ B, ທີມສ.ເກົາຫຼີໄດ້ເອົາຊະນະທີມໂອດຼິສດ້ວຍຄະແນນ 3:0, ແຂ່ງຂັນສອງເກມຊະນະສອງເກມ, ເປັນທີໜຶ່ງໃນສາຍ B. ທີມຈີນເປັນທີສອງ.
****** ****** ******
ວັນທີ 24 ກໍລະກົດນີ້ ງານແຂ່ງຂັນລົດຖີບແລ່ນອ້ອມຝຣັ່ງຄັ້ງທີ 92 ໄດ້ສິ້ນສຸດລົງຢູ່ປາຣີ. ຜົນງານລວມຂອງທ່ານລານສ໌ ອາມສ໌ຕຼອງ ນັກກິລາລົດຖີບທີ່ຊື່ດັງຂອງອາເມລິກາເປັນທີໜຶ່ງ, ນີ້ແມ່ນທ່ານຊິງໄດ້ແຊມປຽນຂອງງານແຂ່ງຂັນລົດຖີບທີ່ມີຊື່ສຽງໃນໂລກລາຍນີ້ 7 ເທື່ອລຽນຕິດເຊິ່ງເລີ່ມແຕ່ປີ 1999 ເປັນຕົ້ນມາ. ທ່ານອາມສ໌ຕຼອງປີນີ້ອາຍຸ 33 ປີ, ຊິງໄດ້ແຊມປຽນງານແຂ່ງຂັນລົດຖີບແລ່ນຕາມທາງຫຼວງໂລກປີ 1998 ແຊມປຽນງານແຂ່ງຂັນລົດຖີບນັບເວລາໂລກ ແລະແຊມປຽນງານແຂ່ງຂັນລົດຖີບແລ່ນອ້ອມລຸກຊຳບວກຕາມໆກັນ.
****** ****** ******
ວັນທີ 22 ກໍລະກົດນີ້, ໃນງານແຂ່ງຂັນແລ່ນແລະລານຊິງລາງວັນອັງກິດທີ່ຈັດຂຶ້ນຢູ່ລອນດອນ, ນາງແຢແລນາ ອິຊິນບາແຢວາ ນັກກິລາເຕັ້ນສັກໄມ້ທໍ່ຣັດເຊຍທີ່ມີຊື່ສຽງ ແຊມປຽນງານກິລາໂອລິມປິກອາແຕນໄດ້ເຕັ້ນຂ້າມຮາວຂວາງສູງ 5 ແມັດ, ກາຍເປັນນັກກິລາເຕັ້ນສັກໄມ້ທໍ່ເພດຍິງຜູ່ທຳອິດໃນປະຫວັດສາດທີ່ເຕັ້ນຂ້າມ 5 ແມັດ. ຕັ້ງແຕ່ທຳລາຍສະຖິຕິໂລກເປັນຄັ້ງທຳອິດເມື່ອ 2 ປີກ່ອນຈົນຮອດປະຈຸບັນ, ນາງໄດ້ທຳລາຍສະຖິຕິທີ່ຕົນສ້າງຂຶ້ນ 17 ເທື່ອລຽນຕິດ.
|
