|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ. ໃນລາຍການພາກນີ້, ຂ້າພະເຈົ້າຈະເລົ່າສຸພາສິດເລື່ອງ "ຄຸ້ນໂຊ້ວໂຢວໂຕ້ວ" ແປວ່າ "ສັດຖືກຂັງຍັງດິ້ນຮົນ" ສູ່ຟັງ. ຄຳສຸພາສິດນີ້ໄດ້ມີໃຫ້ເຫັນໃນໜັງສື "ໂຈຈ້ວນ" ເຊິ່ງເປັນໜັງສືບັນທຶກປະຫວັດສາດທີ່ຮຽບຮຽງໃນສະໄໝຊຸນຊິວຂອງຈີນ, ໃຊ້ມາອຸປະມາຜູ່ຄົນທີ່ຕົກຢູ່ໃນສະພາບຈົນຕາແຈແຕ່ຍັງບໍ່ຍອມເສຍໄຊ ຍັງພະຍາຍາມສູ້ຊົນຈົນເຖິງນະທີສຸດທ້າຍ.
ໃນສະໄໝຊຸນຊິວຂອງຈີນ, ມີເທື່ອໜຶ່ງ ກອງທະຫານລັດຈິ້ນໄດ້ຂ້າມແມ່ນ້ຳເຫຼືອງໄປຫຼອນໂຈມຕີກອງທະຫານລັດສູ, ໃນທີ່ສຸດພັດເສຍໄຊຢ່າງສາຫັດ. ສິນລິນຟູ ແມ່ທັບກອງທະຫານລັດຈິ້ນຮູ້ສຶກວ່າຕົນເອງຈະໜີຈາກໂທດກຳບໍ່ໄດ້, ເລີຍໄປຂໍຮັບໂທດນຳເຈົ້າຊີວິດຈິງກົ່ງຂອງລັດຈິ້ນຢ່າງເປັນເຈົ້າການ.
ເມື່ອຈິງກົ່ງໄດ້ຮັບຂ່າວວ່າກອງທະຫານລັດຈິ້ນປະສົບຄວາມປະລາໄຊ ກໍຊົງພະພິໂລດທີ່ສຸດ, ພະອົງຊົງຂຶງພະເນດ, ຊີ້ດ່າສິນລິນຟູວ່າ: "ແມ່ທັບຄືເຈົ້ານີ້ຈັ່ງແມ່ນໂງ່ແທ້! ໃນປາງກ່ອນ ລັດຈິ້ນເປີດເສິກກັບລັດສູ, ລັດຈິ້ນໄດ້ຮັບໄຊຊະນະເລື້ອຍໆ, ແຕ່ດຽວນີ້ ເຈົ້າພັດເສຍໄຊ, ເຈົ້າຍັງມີໜ້າມາເຂົ້າເຝົ້າພະອົງເຮົາຫວະ! ມື້ນີ້ພະອົງເຮົາຈະໃຫ້ເຈົ້າສົມຫວັງ, ເຈົ້າໄປຕາຍສາ!" ສິນລິນຟູທີ່ຄຸເຂົ່າຢູ່ທັງມີນ້ຳຕາໄຫຼອາບແກ້ມ ເວົ້າດ້ວຍສຽງສັ່ນວ່າ: "ຂອບພະໄທນຳພະບາດສົມເດັດທີ່ພະລາຊະທານໃຫ້ຕາຍ". ເວົ້າແລ້ວກໍຄ່ອຍໆລຸກຢືນຂຶ້ນ. ໃນເວລານີ້, ຊື້ຮຸ້ຍ ເສນາບໍດີລັດຈິ້ນໄດ້ຮ້ອງໃສ່ວ່າ: "ຟ້າວກ່ອນ!" ແລ້ວແລ່ນໄປປະນົມມືຕໍ່ຈິງກົ່ງວ່າ: "ພະບາດສົມເດັດ, ຂ້ານ້ອຍເຫັນວ່າຈະລົງໂທດນາຍພົນສິນລິນຟູຄືແນວນີ້ບໍ່ໄດ້. ແຕ່ກ່ອນ ໃນຄາວພະບາດສົມເດັດເວິນກົ່ງຍັງຊົງມີຊີວິດຢູ່ນັ້ນ, ລັດຈິ້ນກັບລັດສູໄດ້ສູ້ກັນຢູ່ດຸເດືອດຢູ່ເສິງຜູ, ໃນທີ່ສຸດ ກອງທະຫານລັດຈິ້ນໄດ້ຮັບໄຊຊະນະຢ່າງໃຫຍ່, ພຽງແຕ່ຂົນເອົາສະບຽງອາຫານທີ່ກອງທະຫານລັດສູປະໄວ້ກໍໃຊ້ເວລາ 3 ມື້. ພະບາດສົມເດັດ, ນີ້ຈັ່ງແມ່ນໄຊຊະນະໃຫຍ່ແທ້! ແຕ່ພະບາດສົມເດັດເວິນກົ່ງພັດບໍ່ໄດ້ປື້ມພະໄທ, ພະບາດສົມເດັດເວິນກົ່ງຊົງກ່າວວ່າ: ເຖິງວ່າມື້ນີ້ກອງທະຫານລັດຈິ້ນໄດ້ເອົາຊະນະກອງທະຫານລັດສູຢ່າງໃຫຍ່ກໍ່ຕາມ, ແຕ່ທະແນມແຕ່ຈືອີ້ ມະຫາອຸປະຫຼາດລັດສູຍັງມີຊີວິດຢູ່, ຂ້າພະບາດກໍຈະຫາຍຄວາມເປັນຫ່ວງບໍ່ໄດ້. ສັດຖືກຂັງຢູ່ກໍ່ຍັງດິ້ນຮົນຢ່າງໜຽວແໜ້ນ, ຍິ່ງບໍ່ຕ້ອງເວົ້າເຖິງມະຫາອຸປະຫຼາດຂອງລັດໃຫຍ່ລັດໜຶ່ງ! ພາຍຫຼັງມາ, ຈືອີ້ ມະຫາອຸປະຫຼາດລັດສູຖືກປະຫານຊີວິດ, ພະບາດສົມເດັດເວິນກົ່ງຈຶ່ງຊົງປື້ມພະໄທ, ເຫັນວ່າບັດນີ້ບໍ່ມີໃຜມາທຳຮ້າຍລັດຈິ້ນໄດ້ອີກແລ້ວ. ດຽວນີ້ລັດຈິ້ນປະສົບຄວາມປະລາໄຊ, ຖ້າພະບາດສົມເດັດຂ້ານາຍພົນສິນລິນຟູ, ຈະບໍ່ເຮັດໃຫ້ລັດຈິ້ນເສຍນາຍພົນຜູ່ອົງອາດກ້າຫານໄປອີກຜູ່ໜຶ່ງຫວະ, ແລະຈະບໍ່ເປັນການຊ່ອຍລັດສູຫວະ? ໃນຄາວນັ້ນ, ພະບາດສົມເດັດເວິນກົ່ງບໍ່ປື້ມພະໄທຍ້ອນໄດ້ຮັບໄຊຊະນະຊົ່ວຄາວ, ຂ້ານ້ອຍເຫັນວ່າ, ພະບາດສົມເດັດກໍ່ບໍ່ຄວນຊົງພະພິໂລດຍ້ອນຄວາມປະລາໄຊຊົ່ວຄາວ, ຄວນສະຫຼຸບບົດຮຽນທາງບວກແລະທາງລົບຢ່າງຕັ້ງໜ້າ, ເພື່ອກຽມສູ້ເອົາໃໝ່, ນາຍພົນສິນລິນຟູເປັນຄົນຊື່ສັດ ຈົງຮັກພັກດີ, ສູ້ລົບຢ່າງອົງອາດກ້າຫານ, ສົມຊື່ເປັນຂື່ເປັນແປຂອງລັດຈິ້ນ, ເທື່ອນີ້ເຂົາເສຍໄຊ, ກໍເໝືອນດັ່ງສຸລິຍະຄາດແລະຈັນທະຄາດ, ບໍ່ຫ່ອນຈະລົດວົງລັດສະໝີຂອງພະອາທິດແລະພະຈັນ, ຂໍໃຫ້ພະບາດສົມເດັດຈົ່ງຄຶດຫງຳແລ້ວຈຶ່ງທຳການຕົກລົງ."
ເຈົ້າຊີວິດຈິງກົ່ງລັດຈິ້ນເຫັນວ່າຄຳເວົ້າຂອງເສນາບໍດີຊື້ຮຸ້ຍມີເຫດມີຜົນ, ເລີຍນີລະໂທດການປະຫານຊີວິດໃຫ້ແກ່ສິນລິນຟູ.
|
