|
|
 |
| (GMT+08:00)
2005-08-12 08:51:31
|
 |
|
ຈີນຄົ້ນຄວ້າຊິບຄວາມປອດໄພຂອງຄອມພິວເຕີຢ່າງສຳເລັດຜົນ
cri
 ຕາມຂ່າວCRI: ຫວ່າງກ່ອນນີ້ບໍ່ດົນ,ກຸ່ມເລໂນໂວ ບໍລິສັດຜະລິດຄອມພິວເຕີໃຫຍ່ກວ່າໝູ່ຂອງຈີນໄດ້ຄົ້ນຄວ້າແຜ່ນຊິບຄວາມປອດໄພແຜ່ນທຳອິດຂອງຈີນຢ່າງສຳເລັດຜົນ. ຜູ້ຊ່ຽວຊານຄອມພິວເຕີກ່າວວ່າ,ພາຍຫຼັງຄອມພິວເຕີທີ່ຕິດຕັ້ງແຜ່ນຊິບຄວາມປອດໄພຖືກໄວລັສບຸກໂຈມຕີແລ້ວ,ສາມາດຟື້ນຟູສະພາບເດີມຢ່າງວ່ອງໄວ,ແລ້ວຈະບໍ່ມີປະກົດການທີ່ຖືກບຸກໂຈມຕີແລ້ວກໍຕາຍຫຼືເສຍຫາຍຂໍ້ມູນໃນເມື່ອກ່ອນ.
ເວົ້າສຳລັບຄົນໃນປັດຈຸບັນແລ້ວ,ເກືອບເວົ້າໄດ້ວ່າຄອມພິວເຕີແມ່ນໝູ່ຄູ່ທີ່ຂາດບໍ່ໄດ້,ບໍ່ວ່າເຮັດວຽກ,ຮ່ຳຮຽນຫຼືລື້ນເລີງ,ລ້ວນແຕ່ຫ່າງເຫີນຈາກຄອມພິວເຕີບໍ່ໄດ້. ແຕ່ວ່າ,ໃນຂະນະທີ່ຄອມພິວເຕີຮັບໃຊ້ຄົນທັງຫຼາຍຢ່າງສະດວກແລະວ່ອງໄວນັ້ນ,ກໍໄດ້ອຸກໃຈບາງອັນ.
ຫຼາຍຄົນເຄີຍພົບສະພາບຄອມພິວເຕີຖືກບຸກໂຈມຕີແລ້ວໃຊ້ການບໍ່ໄດ້. ນີ້ຕົ້ນຕໍແມ່ນຍ້ອນວ່າ,ຊອຟແວຂ້າໄວລັສແລະຟີເລໂວມີຈຸດອ່ອນຮ່ວມຄື,ໃນເວລາຖືກໄວລັສບຸກໂຈມຕີນັ້ນ,ມີແຕ່ຕໍ່ຕ້ານຢູ່ໃນທ່າຮັບ. ຕົວຢ່າງຄືຊອຟແວຂ້າໄວລັສ,ບໍລິສັດຜະລິດຊອຟແວເຫຼົ່ານີ້ລ້ວນແຕ່ແມ່ນຫຼັງຈາກປະກົດເຫັນໄວລັສຊະນິດໃໝ່,ແລ້ວຈັດຕັ້ງຜູ້ຊ່ຽວຊານຕ້ານໄວລັສບຸກເບີກເຄື່ອງຂ້າໄວລັສທີ່ມີລັກສະນະແນໃສ່. ຕໍ່ໄວລັສທີ່ປະກົດອອກໃໝ່ຈຳນວນໜຶ່ງ,ບາງທີກໍສຸດວິໃສ.
ກໍແມ່ນຍ້ອນແນວນັ້ນ,ໃນຫຼາຍປີມານີ້,ຄຽງຄູ່ກັບໄວລັສຄອມພິວເຕີແຜ່ຂະຫຍາຍຢ່າງກວ້າງຂວາງ,ບັນຫາຄວາມປອດໄພຂອງຄອມພິວເຕີນັບມື້ນັບຖືກເອົາໃຈໃສ່ໃນທົ່ວໂລກ,ການບຸກເບີກແຜ່ນຊິບຄວາມປອດໄພທີ່ສາມາດຕ້ານທານໄວລັສຕ່າງໆຢ່າງບັງເກີດຜົນນັ້ນໄດ້ຖືກລັດຖະບານແລະວິສາຫະກິດນັບມື້ນັບຫຼາຍເອົາໃຈໃສ່ນຳ. ທ່ານເຫວີຍເວີ້ຍ ຮອງຫົວໜ້າສະຖາບັນຄົ້ນຄວ້າກຸ່ມເລໂນໂວ ວິສາຫະກິດຜະລິດຄອມພິວເຕີໃຫຍ່ກວ່າໝູ່ຂອງຈີນເວົ້າວ່າ,ການຕິດຕັ້ງແຜ່ນຊິບຄວາມປອດໄພແມ່ນວິທີກົກຮາກໃນການທັບມ້າງຄວາມສ່ຽງຂອງຄອມພິວເຕີ. ທ່ານເວົ້າວ່າ,
"ຄອມພິວເຕີທີ່ໄດ້ຕິດຕັ້ງແຜ່ນຊິບຄວາມປອດໄພສາມາດກວດພົບການດັດແກ້ໃດໆຂອງຜູ້ບຸກໂຈມຕີທີ່ມີຕໍ່ຄອມພິວເຕີ,ແລ້ວໃຊ້ຊອຟແວສ້ອມແປງໃນແຜ່ນຊິບຄວາມປອດໄພເຮັດໃຫ້ຄອມພິວເຕີຟື້ນຟູຮອດສະພາບປົກກະຕິ."
ກຸ່ມເລໂນໂວແມ່ນເລີ່ມຄົ້ນຄວ້າແຜ່ນຊິບຄວາມປອດໄພໃນປີ 2003,ມີພະນັກງານຄົ້ນຄວ້າວິທະຍາສາດຮ້ອຍກວ່າຄົນເຂົ້າຮ່ວມວຽກງານລາຍນີ້,ຫວ່າງມໍ່ໆນີ້ ການຄົ້ນຄວ້າລາຍນີ້ໄດ້ສຳເລັດຜົນ,ຈັ່ງຊີ້ຈີນກໍໄດ້ກາຍເປັນປະເທດໜຶ່ງທີ່ກຳເຕັກນິກລາຍນີ້ເຊິ່ງຖັດຈາກອາເມລິກາແລະຍີ່ປຸ່ນ.
ໃນເວລາເອົາຂ່າວ,ນັກຂ່າວໄດ້ຊາບວ່າ,ແຜ່ນຊິບຄວາມປອດໄພທີ່ກຸ່ມເລໂນໂວຄົ້ນຄວ້າຜະລິດນັ້ນໃຫຍ່ສ່ຳໝາກຖົ່ວເຫຼືອງ,ມັນຕ້ອງປະສານສົມທົບກັບແຜ່ນຊິບອື່ນໆໃນຄອມພິວເຕີຈຶ່ງມີບົດບາດໄດ້. ປັດຈຸບັນ,ແຜ່ນຊິບຄວາມປອດໄພຈະຕິດຕັ້ງໃນເວລາຜະລິດຄອມພິວເຕີ,ຄອມພິວເຕີທີ່ໄດ້ອອກໂຮງງານແລ້ວນັ້ນຈະຕິດຕັ້ງບໍ່ໄດ້. ຍ້ອນວ່າລາຄາຂອງແຜ່ນຊິບຄວາມປອດໄພບໍ່ແພງປານໃດ,ສະນັ້ນ ຜູ້ບໍລິໂພກຊື້ຄອມພິວເຕີທີ່ຕິດຕັ້ງແຜ່ນຊິບຄວາມປອດໄພແລ້ວນັ້ນ,ບໍ່ຮູ້ສຶກລາຄາຂອງມັນແຕກຕ່າງກັບຄອມພິວເຕີທີ່ບໍ່ໄດ້ຕິດຕັ້ງແຜ່ນຊິບຄວາມປອດໄພແນວນີ້.
ທ່ານເຊ້ຍເວີ່ຍ ຜູ້ຮັບຜິດຊອບໜ່ວຍໂຄງການຄົ້ນຄວ້າແຜ່ນຊິບຄວາມປອດໄພຂອງສະຖາບັນຄົ້ນຄວ້າຂອງກຸ່ມເລໂນໂວຊີ້ອອກວ່າ,ປັດຈຸບັນ,ແຜ່ນຊິບຄວາມປອດໄພທີ່ກຸ່ມດັ່ງກ່າວຄົ້ນຄວ້າຜະລິດນັ້ນໄດ້ຖືກນຳໃຊ້ແລ້ວ.
"ປັດຈຸບັນ,ແຜ່ນຊິບຄວາມປອດໄພຂອງກຸ່ມເລໂນໂວສາມາດຕິດຕັ້ງໃນຄອມພິວເຕີຕັ້ງໂຕະແລະຄອມພິວເຕີມືຖື,ໃນອະນາຄົດ,ສາມາດໃຊ້ໃນເຄື່ອງເສີເວີ. ປັດຈຸບັນ ຄອມພິວເຕີທີ່ໄດ້ຕິດຕັ້ງແຜ່ນຊິບຄວາມປອດໄພຂອງກຸ່ມພວກຂ້າພະເຈົ້າໄດ້ຜະລິດອອກມາແລ້ວ,ໃນທ້າຍປີນີ້ ພວກຂ້າພະເຈົ້າຈະຜະລິດຄອມພິວເຕີມືຖືທີ່ຕິດຕັ້ງແຜ່ນຊິບຄວາມປອດໄພ."
ຍ້ອນວ່າແຜ່ນຊິບຄວາມປອດໄພທີ່ກຸ່ມເລໂນໂວຜະລິດນັ້ນບໍ່ພຽງແຕ່ໃຊ້ໃນຄອມພິວເຕີທີ່ວິສາຫະກິດຕົນຜະລິດນັ້ນໄດ້,ຍັງສາມາດຕິດຕັ້ງໃນຄອມພິວເຕີທີ່ຜະລິດໂດຍໂຮງງານອື່ນໆ. ດັ່ງນັ້ນ ປັດຈຸບັນ ໂຮງງານຜະລິດຄອມພິວເຕີຫຼາຍຫຼັງຂອງຈີນພວມປືກສາຫາລືກັບກຸ່ມເລໂນໂວກ່ຽວກັບບັນຫາຊື້ແຜ່ນຊິບຄວາມປອດໄພ.
ບົນພື້ນຖານສະຫຼຸບບົດຮຽນຄົ້ນຄວ້າຜະລິດແຜ່ນຊິບຄວາມປອດໄພໃນສອງປີມານີ້,ກຸ່ມເລໂນໂວພວມຄົ້ນຄວ້າຜະລິດແຜ່ນຊິບຮຸ່ນໃໝ່. ທ່ານເຫວີຍເວີ້ຍ ຮອງຫົວໜ້າສະຖາບັນຄົ້ນຄວ້າຂອງກຸ່ມດັ່ງກ່າວເວົ້າວ່າ:
"ຍ້ອນວ່າໃນ 5 ປີຂ້າງໜ້ານີ້,ຄອມພິວເຕີທີ່ມີແຜ່ນຊິບຄວາມປອດໄພຈະຄ່ອຍໆກາຍເປັນກະແສສຳຄັນ,ແລະກາຍເປັນມາດຖານຂອງຄອມພິວເຕີສ່ວນຕົວ. ສະນັ້ນ ພວກຂ້າພະເຈົ້າຈະອີງຕາມຄວາມຕ້ອງການຂອງຕະຫຼາດແລະທ່ວງທ່າພັດທະນາເຕັກນິກ ແລ້ວພັດທະນາເຕັກນິກທີ່ກ່ຽວຂ້ອງ."
ທ່ານຍັງເຜີຍໃຫ້ຮູ້ວ່າ,ໃນຂະນະທີ່ຄົ້ນຄວ້າແຜ່ນຊິບຄວາມປອດໄພນັ້ນ ກຸ່ມເລໂນໂວຍັງຈະພັດທະນາຊອຟແວປ້ອງກັນແລະຊອຟແວຄຸ້ມຄອງເປັນຕົ້ນ,ກຽມສ້າງລະບົບປ້ອງກັນຄວາມປອດໄພຄົບຊຸດ,ເພື່ອປົກປ້ອງຄວາມປອດໄພຂອງຄອມພິວເຕີຢ່າງບັງເກີດຜົນກວ່າເກົ່າ.
|
|
|
