|
ຕາມຂ່າວສານຊິນຮວາ: ວັນທີ 12 ສິງຫາ ທ່ານຂົງຊວນ ໂຄສົກກະຊວງການຕ່າງປະເທດຈີນໄດ້ໃຫ້ສຳພາດກ່ຽວກັບບັນຫາທີ່ວ່າໄຕ້ຫວັນເຂົ້າຮ່ວມອົງການສະຫະປະຊາຊາດ ໂດຍຊີ້ອອກວ່າ, ທາດແທ້ຂອງການກະທຳດັ່ງກ່າວຂອງເຈົ້າໜ້າທີ່ໄຕ້ຫວັນແມ່ນສືບຕໍ່ເປີດປ່າວທິດສະດີ "ສອງປະເທດຈີນ" ແລະ "ຈີນໜຶ່ງໄຕ້ຫວັນໜຶ່ງ" "ໄຕ້ຫວັນເປັນເອກະລາດ" ຢູ່ໃນໂລກ, ແລະຕັ້ງແກ້ງກໍ່ສະຖານະການອັນເຄັ່ງຕຶງຢູ່ຊ່ອງແຄບໄຕ້ຫວັນ.
ທ່ານຂົງຊວນກ່າວວ່າ, ແຕ່ປີ 1993 ເປັນຕົ້ນມາ, ຄະນະກຳມະການວຽກງານທົ່ວໄປຂອງສະມັດຊາໃຫຍ່ອົງການສະຫະປະຊາຊາດໄດ້ປະຕິເສດຈັດເອົາຍັດຕິອັນທີ່ວ່າໄຕ້ຫວັນເຂົ້າຮ່ວມອົງການສະຫະປະຊາຊາດເຂົ້າໃນວາລະປະຊຸມຂອງສະມັດຊາໃຫຍ່ສະຫະປະຊາຊາດເປັນເວລາ 12 ປີລຽນຕິດ. ທັງນີ້ໄດ້ສະແດງໃຫ້ເຫັນຢ່າງເຕັມສ່ວນວ່າ ປະຊາຄົມໂລກໄດ້ມີຄວາມຮັບຮູ້ຄືກັນໂດຍທົ່ວໄປໃນບັນຫາດັ່ງກ່າວ ນັ້ນກໍ່ຄື ໃນໂລກນີ້ມີແຕ່ປະເທດຈີນດຽວ, ໄຕ້ຫວັນໃນຖານະເປັນພາກສ່ວນໜຶ່ງຂອງຈີນ, ບໍ່ມີຄຸນວຸດທິເຂົ້າຮ່ວມອົງການສະຫະປະຊາຊາດທີ່ປະກອບດ້ວຍປະເທດອະທິປະໄຕ ໂດຍບໍ່ວ່າໃນນາມໃດໆແລະຮູບການໃດໆ.
ໃຕ້ການຍຸຍົງຂອງເຈົ້າໜ້າທີ່ໄຕ້ຫວັນ, ວັນທີ 12 ສິງຫາ ປະເທດສ່ວນໜ້ອຍທີ່ສຸດ ຄື ຈາດເປັນຕົ້ນໄດ້ຝາກຈົດໝາຍໄປຍັງທ່ານອານນານ ເລຂາທິການໃຫຍ່ອົງການສະຫະປະຊາຊາດ, ຮຽກຮ້ອງໃຫ້ຈັດເອົາຍັດຕິອັນທີ່ວ່າບັນຫາ "ສິດຕົວແທນຂອງໄຕ້ຫວັນຢູ່ໃນອົງການສະຫະປະຊາຊາດ" ແລະ "ຍັດຕິປົກປັກຮັກສາສັນຕິພາບຢູ່ທະເລໄຕ້ຫວັນ" ເຂົ້າໃນວາລະເພີ່ມເຕີມໃນສະມັດຊາໃຫຍ່ສະຫະປະຊາຊາດສະໄໝທີ 60.
|
