|
|
(GMT+08:00)
2005-08-15 22:02:28
|
|
ວົງການສາສະໜາຈີນປະກາດສານສັນຕິພາບລະລຶກສົງຄາມປະຊາຊົນຈີນຕໍ່ຕ້ານຍີ່ປຸ່ນແລະສົງຄາມໂລກຕໍ່ຕ້ານຟັດຊິດໄດ້ຮັບໄຊຊະນະຄົບຮອບ 60 ປີ(ສຽງ)
cri
Author: da
ເພື່ອລະລຶກສົງຄາມປະຊາຊົນຈີນຕໍ່ຕ້ານຍີ່ປຸ່ນແລະສົງຄາມໂລກຕໍ່ຕ້ານຟັດຊິດໄດ້ຮັບໄຊຊະນະຄົບຮອບ 60 ປີ,ວັນທີ 14 ສິງຫາ,ຄະນະກຳມະການສັນຕິພາບວົງການສາສະໜາຈີນໄດ້ຈັດງານສົນທະນາແລະປະກາດ"ສານສັນຕິພາບຂອງວົງການສາສະໜາຈີນ".ສານຂຽນວ່າ,ການລົບລ້າງກົກຮາກຂອງສົງຄາມ,ຕັ້ງໜ້າປົກປັກຮັກສາສັນຕິພາບຂອງໂລກແມ່ນພາລະໜ້າທີ່ທີ່ສັກກາລະບູຊາຂອງຜູ້ເຊື່ອຖືສາສະໜາ,ບັນດາສາສະໜາຄວນເກາະແຂນກັນ,ພ້ອມກັນພະຍາຍາມປົກປັກຮັກສາສັນຕິພາບຂອງມວນມະນຸດ.
ບຸກຄົນທີ່ເຂົ້າຮ່ວມງານສົນທະນາໄດ້ເປັນເອກະສັນກັນເຫັນວ່າ,ສົງຄາມໂລກຕໍ່ຕ້ານຟັດຊິດແມ່ນສົງຄາມອັນເປັນທຳທີ່ຍິ່ງໃຫຍ່ໃນປະຫວັດມວນມະນຸດ,ສົງຄາມອັນເປັນທຳຂອງປະຊາຊົນຂອງບັນດາເຜົ່າທີ່ຕໍ່ຕ້ານການຮຸກຮານຂອງຍີ່ປຸ່ນ ຍາດແຍ່ງໃຫ້ຊົນເຜົ່າຮັບການປົດປ່ອຍນັ້ນແມ່ນພາກປະກອບສ່ວນທີ່ສຳຄັນຂອງສົງຄາມໂລກຕໍ່ຕ້ານຟັດຊິດ.
ໃນເວລາປະກອບຄຳເຫັນ,ທ່ານເຊີ້ງຫຸ່ຍ ຮອງປະທານພຸດທະສະມາຄົມຈີນໄດ້ຊີ້ອອກວ່າ: "ປີນີ້ແມ່ນປີສົງຄາມປະຊາຊົນຈີນຕໍ່ຕ້ານຍີ່ປຸ່ນແລະສົງຄາມໂລກຕ້ານຟັດຊິດໄດ້ຮັບໄຊຊະນະຄົບຮອບ 60 ປີ,ການຫວນຄືນແລະສຳຫຼວດປະຫວັດຕອນນີ້,ມີຄວາມໝາຍສຳຄັນຕໍ່ການເພີ່ມທະວີການສຶກສາລັດທິຮັກຊາດ,ຊຸກຍູ້ຄວາມສາມັກຄີລະຫວ່າງບັນດາຊົນເຜົ່າ ຄວາມປອງດອງກັນລະຫວ່າງບັນດາສາສະໜາ ປົກປັກຮັກສາສະຖຽນລະພາບຂອງຊາດ ຊຸກຍູ້ມິດຕະພາບລະຫວ່າງປະຊາຊົນບັນດາປະເທດ ແລະປົກປັກຮັກສາສັນຕິພາບຂອງໂລກ."
60 ປີກ່ອນ,ໂດຍຜ່ານການຕໍ່ສູ້ຢ່າງລຳບາກກາກກຳທີ່ສຸດ,ປະຊາຊົນຈີນໄດ້ຮັບໄຊຊະນະຮອບດ້ານໃນສົງຄາມຕໍ່ຕ້ານການຮຸກຮານຂອງຍີ່ປຸ່ນ,ປະຊາຊົນຈີນກໍໄດ້ປະສົບຄວາມເສຍຫາຍຢ່າງຫຼວງຫຼາຍ,ທະຫານແລະປະຊາຊົນ 35 ລ້ານກວ່າຄົນ ໄດ້ເສຍຊີວິດຫຼືບາດເຈັບ,ຄວາມເສຍຫາຍທາງຊັບສິນແລະການສິ້ນເປືອງໃນສົງຄາມບັນລຸ 560 ຕື້ກວ່າໂດລາສະຫະລັດ.ທ່ານເສີນກວາງຢວນ ປະທານສະມາຄົມພຸດທະສາສະໜາອິສລາມຈີນເຫັນວ່າ,ປະຫວັດສາດໃນ 60 ປີກ່ອນແມ່ນເລື່ອງທີ່ຫຼີກເວັ້ນບໍ່ໄດ້.ທ່ານເວົ້າວ່າ:
"ລັດຖະບານຍີ່ປຸ່ນບໍ່ເອົາຫົວຊານຳຄວາມຄັດຄ້ານຂອງຫາງສຽງໂລກ,ບໍ່ເອົາຫົວຊານຳອາລົມຈິດຂອງປະຊາຊົນຈີນ,ໄປນະມັດສະການວັດຢາຊືຄູນີຕາມລຳພັງໃຈດັດແກ້ແບບຮຽນ,ທັງຢາກລົບລ້າງຄວາມໂທດກຳຂອງຜູ້ຮຸກຮານຂອງຍີ່ປຸ່ນ,ຟື້ນຟູລັດທິລັດຖະທະຫານຍີ່ປຸ່ນ,ແນ່ນອນຕ້ອງຖືກປະຊາຊົນຈີນແລະປະຊາຊົນທົ່ວໂລກທີ່ທະນຸຖະໜົມສັນຕິພາບນັ້ນກ່າວປະນາມຢ່າງຮຸນແຮງ." ໃນງານສົນທະນາ ທ່ານຕິງກວາງຊູນ ປະທານຄະນະກຳມະການສັນຕິພາບວົງການສາສະໜາຈີນ ຮອງປະທານສະພາປຶກສາການເມືອງແຫ່ງຊາດຈີນໄດ້ອ່ານ" ສານສັນຕິພາບຂອງວົງການສາສະໜາຈີນ".ສານສະບັບນີ້ຫວັງໃຫ້ບັນດາສາສະໜາຕ້ອງເສີມຂະຫຍາຍຫຼັກທຳສາສະໜາທີ່ສັນຕິພາບແລະຄວາມກົມກຽວກັນ,ຊຸກຍູ້ການແລກປ່ຽນທາງສາສະໜາລະຫວ່າງຊາດ,ສະໜັບສະໜູນແລະຊຸກຍູ້ການສົນທະນາທີ່ຂ້າມສາສະໜາ,ເພີ່ມທະວີການແລກປ່ຽນແລະຄວາມສາມັກຄີລະຫວ່າງຜູ້ເຊື່ອຖືສາສະໜາຂອງບັນດາປະເທດ.
"ສັນຕິພາບແມ່ນສິ່ງສະແຫວງຫາຮ່ວມຂອງບັນດາສາສະໜາ,ຕ້ອງເສີມຂະຫຍາຍຈຸດດີຂອງໃຜລາວ,ເພີ່ມທະວີການສົນທະນາແລະຄວາມເຂົ້າໃຈກັນບົນພື້ນຖານສະເໝີພາບ ເມດຕາໃຈກວ້າງຂວາງ ໂຄລົບແລະປະນີປະນອມກັນ,ນີ້ຍ່ອມຈະເກີດມີຜົນສະທ້ອນອັນຍາວໄກເລິກເຊິ່ງຕໍ່ສັນຕິພາບຂອງໂລກ."
ເພື່ອສະແດງຄວາມປາຖະໜາຂອງວົງການສາສະໜາຈີນທີ່ຄັດຄ້ານສົງຄາມແລະປົກປັກຮັກສາສັນຕິພາບຖາວອນຂອງມວນມະນຸດ,ແຕ່ວັນທີ 15 ຮອດວັນທີ 20 ສິງຫາ,ພຸດທະສາສະໜາ ສາສະໜາເຕົາ ສາສະໜາອິສລາມ ສາສະໜາໂລມັງກະໂຕລິກແລະສາສະໜາຄຼິສຕຽນຂອງຈີນໄດ້ຈັດການເຄື່ອນໄຫວສັກກາລະບູຊາສັນຕິພາບຢູ່ສະຖານທີ່ເຄື່ອນໄຫວສາສະໜາຕາມຄວາມມູນເຊື້ອຂອງໃຜລາວໃນແຫ່ງຕ່າງໆຂອງຈີນເປັນລຳດັບ.
ຕອນເຊົ້າວັນທີ 15 ສິງຫາ,ວົງການພຸດທະສາສະໜາຈີນໄດ້ຈັດທຳມະພິທີສັນຕິພາບຢູ່ວັດແຫ່ງຕ່າງໆຂອງຈີນ,ລະລຶກສົງຄາມປະຊາຊົນຈີນຕໍ່ຕ້ານຍີ່ປຸ່ນແລະສົງຄາມໂລກຕໍ່ຕ້ານຟັດຊິດເອົາໄຊຊະນະຄົບຮອບ 60 ປີ,ອະທິຖານສັນຕິພາບໃນໂລກ.ຢູ່ວັດຫຼິງກວາງປັກກິ່ງ ສະຖານທີ່ຕົ້ນຕໍຂອງທຳມະພິທີສັນຕິພາບເທື່ອນີ້,ຄູບາອາຈານແລະສາສະນິກະຊົນທີ່ມາຈາກສອງຝັ່ງຊ່ອງແຄບແລະຮົງກົງ ມາກາວຂອງຈີນລວມ 3 ພັນຄົນ,ໄດ້ພ້ອມກັນນົບໄຫວ້ນັກລົບແລະພີ່ນ້ອງຮ່ວມຊາດຂອງຈີນທີ່ເສຍຊີວິດໃນສົງຄາມຕໍ່ຕ້ານການຮຸກຮານຂອງຍີ່ປຸ່ນ,ຫວັງໃຫ້ປະເທດຊາດໂຮມເຂົ້າເປັນເອກະພາບກັນ,ສ້າງສາຈະເລີນຮຸ່ງເຮືອງແລະເຂັ້ມແຂງ,ໃຫ້ໂລກມີສັນຕິພາບຈົນເທົ່າໃດໆ,ປະຊາຊົນມີຄວາມສຸກສຳລານແລະສະຫງົບ.
|
|
|