|
|
 |
| (GMT+08:00)
2005-08-16 15:57:00
|
 |
|
ລັດຖະບານອິນໂດເນເຊຍກັບ " ຂະບວນການອາເຈະເສລີ " ເຊັນສັນຍາສັນຕິພາບຢ່າງເປັນທາງການ
cri
Author: zhangshuo
ວິທະຍຸສາກົນແຫ່ງປະເທດຈີນລາຍງານວ່າ,ວັນທີ 15 ສິງຫາ,ຢູ່ແຮນຊິງກີ ນະຄອນຫຼວງແຟງລັງ,ຜູ້ແທນຂອງລັດຖະບານອິນໂດເນເຊຍແລະຂອງຂະບວນການອາເຈະເສລີ ອົງການລັດທິແບ່ງແຍກອາເຈະໄດ້ເຊັນສັນຍາສັນຕິພາບຢ່າງເປັນທາງການ. ບຸກຄົນວິເຄາະເຫັນວ່າ,ເຖິງວ່າການປະຕິບັດເນື້ອໃນລະອຽດຂອງສັນຍາຢ່າງແທ້ຈິງຍັງແມ່ນໜ້າທີ່ອັນລຳບາກກໍຕາມ,ແຕ່ການເຊັນສັນຍາສັນຕິພາບດັ່ງກ່າວມີຫວັງນຳເອົາສັນຕິພາບຖາວອນມາໃຫ້ເຂດອາເຈະ.
ອີງຕາມສັນຍາສັນຕິພາບ,ຂະບວນການອາເຈະເສລີທີ່ໄດ້ໃຫ້ຄຳໝັ້ນສັນຍາວ່າ ຈະປະລະຄວາມຮຽກຮ້ອງເປັນເອກະລາດນັ້ນຈະປົດອາວຸດໝົດແລະມອບອາວຸດ ກ່ອນວັນທີ 31 ທັນວາປີນີ້, ພ້ອມກັນນັ້ນ ລັດຖະບານກໍຖອນກອງທະຫານແລະຕຳຫຼວດສ່ວນໜຶ່ງອອກຈາກເຂດອາເຈະ; ຫຼັງຈາກນັ້ນ ລັດຖະບານຈະນີລະໂທດໃຫ້ສະມາຊິກຂະບວນການອາເຈະເສລີທີ່ບໍ່ໄດ້ເຂົ້າຮ່ວມການຕ້ອງໂທດອາຍາ,ແລະອະນຸຍາດໃຫ້ພວກເຂົາເຈົ້າກັບຄືນສູ່ສັງຄົມ.
ເຂດອາເຈະຕັ້ງຢູ່ພາກຕາເວັນຕົກສຸດຂອງອິນໂດເນເຊຍ,ມີຊັບພະຍາກອນທຳມະຊາດຫຼາຍຢ່າງເຊັ່ນນ້ຳມັນເຊື້ອໄຟແລະອາຍແກັສທຳມະຊາດເປັນຕົ້ນຢ່າງອຸດົມສົມບູນ,ແມ່ນແຂວງໜຶ່ງທີ່ມີຊັບພະຍາກອນອຸດົມສົມບູນກວ່າໝູ່ຂອງອິນໂດເນເຊຍ. ຂະບວນການອາເຈະເສລີທີ່ສ້າງຕັ້ງຂຶ້ນເມື່ອປີ 1976 ໄດ້ຮຽກຮ້ອງເປັນເອກະລາດໂດຍອ້າງວ່າການຈັດສັນຊັບພະຍາກອນແຫ່ງລັດບໍ່ສະໝ່ຳສະເໝີກັນ.
ການເຄື່ອນໄຫວຂອງລັດທິແບ່ງແຍກອາເຈະບໍ່ພຽງແຕ່ແມ່ນບັນຫາຊົນເຜົ່າທີ່ໄດ້ລົບກວນອິນໂດເນເຊຍເປັນເວລາດົນນານແລ້ວທໍ່ນັ້ນ,ຫາກຍັງໄດ້ມີຜົນກະສະທ້ອນທາງລົບຕໍ່ການເຄື່ອນໄຫວແບ່ງແຍກທ້ອງຖິ່ນຂອງປະເທດອ້ອມຂ້າງອີກດ້ວຍ.ສະນັ້ນ,ປະຊາຄົມໂລກຈຶ່ງໄດ້ຢືນຢັນຢ່າງເຕັມທີ່ແລະຕີລາຄາຢ່າງຕັ້ງໜ້າຕໍ່ການເຊັນສັນຍາສັນຕິພາບທີ່ມີຄວາມໝາຍປະຫວັດການສະບັບນີ້.ສື່ມວນຊົນທ້ອງຖິ່ນຂອງອິນໂດເນເຊຍໄດ້ຕີລາຄາຢ່າງຕັ້ງ ໜ້າຕໍ່ການເຊັນສັນຍາສັນຕິພາບ,ເຫັນວ່າ,ການເຊັນສັນຍາສະບັບນີ້ຈະນຳເອົາສັນຕິພາບຖາວອນໃຫ້ອາເຈະ.
ບຸກຄົນວິເຄາະຊີ້ອອກວ່າ,ການເຊັນສັນຍາສັນຕິພາບທາງການພຽງແຕ່ແມ່ນບາດກ້າວທຳອິດທີ່ເຮັດໃຫ້ອາເຈະບັນລຸສັນຕິພາບຖາວອນ,ໜ້າທີ່ອັນລຳບາກກາກກຳກວ່າເກົ່າແມ່ນສອງຝ່າຍຕ້ອງປະຕິບັດຕາມຂໍ້ມາດຕາທີ່ກຳນົດໄວ້ໃນສັນຍາຢ່າງແທ້ຈິງ.ກ່ອນອື່ນ, ຜູ້ນຳສ່ວນຫຼາຍຂອງຂະບວນການອາເຈະເສລີອາໄສຢູ່ຕ່າງປະເທດເປັນເວລາຍາວນານ,ແຕ່ພວກປະກອບອາວຸດທີ່ຕ້ານລັດຖະບານແຈກຢາຍອາໄສຢູ່ເຂດພູດອຍອັນກວ້າງໃຫຍ່ ໄພສານປົນກັນກັບປະຊາຊົນທ້ອງຖິ່ນ, ພວກເຂົາເຈົ້າຈະຕອບສະໜອງແລະປະຕິບັດຕາມສັນຍາທີ່ຜູ່ນຳຂອງເຂົາເຈົ້າເຊັນນັ້ນຫຼືບໍ່ກໍຍັງບໍ່ຮູ້ເທື່ອ.
ສອງ,ເຮັດແນວໃດປະຕິບັດແຜນການຊົດໃຊ້ທາງເສດຖະກິດໃຫ້ແກ່ສະມາຊິກຂອງຂະບວນການອາເຈະເສລີທີ່ຖືກນີລະໂທດພິເສດກໍ່ແມ່ນບັນຫາຍາກ.ພາຍຫຼັງຄົນເຫຼົ່ານີ້ກັບຄືນສູ່ສັງຄົມແລ້ວ,ຖ້າບໍ່ໄດ້ຮັບຜົນປະໂຫຍດແທ້ຈິງ,ພວກເຂົາເຈົ້າແມ່ນຈະກັບຄືນສູ່ສັງຄົມ ຢ່າງແທ້ຈິງຍາກຫຼາຍ.
ສາມ,ຂະບວນການອາເຈະສລີກໍພວມສັງເກດເບິ່ງວ່າລັດຖະບານຈະນິລະໂທດແລະຟື້ນຟູສິດການເມືອງຂອງສະມາຊິກຂອງພວກເຂົາເຈົ້າແນວໃດຈະສ້າງສາອາເຈະແນວໃດແລະຖອນທະຫານອອກຈາກອາເຈະແນວໃດ.ຖ້າວ່າມີຝ່າຍໃດຝ່າຍໜຶ່ງບໍ່ປະຕິບັດຕາມສັນຍາ,ຂະບວນການສັນຕິພາບກໍຈະຖືກກີດຂວາງ.
ບັນຫາຍາກບັນຫາສຸດທ້າຍແມ່ນຄວນເຮັດແນວໃດປົດອາວຸດຂອງຂະບວນການອາເຈະເສລີ.ແຕ່ກ່ອນ,ລັດຖະບານອິນໂດເນເຊຍກັບຂະບວນການອາເຈະເສລີເຄີຍເຊັນສັນຍາຢຸດຍິງສອງເທື່ອແຕ່ປະຕິບັດບໍ່ໄດ້ຍ້ອນມີຄວາມເຫັນຂັດກັນໃນບັນຫາປົດອາວຸດ.ແຕ່ຫາງສຽງເຫັນໂດຍທົ່ວໄປວ່າ,ທະແນມແຕ່ລັດຖະບານອິນໂດເນເຊຍກັບອິດທິກຳລັງທຸກຝ່າຍຂອງອາເຈະເຮັດຖືກໃຈປະຊາຊົນ,ປະຕິບັດເນື້ອໃນລະອຽດຂອງສັນຍາຢ່າງຈິງໃຈແລ້ວ,ກໍຈະນຳເອົາສັນຕິພາບຖາວອນໃຫ້ປະຊາຊົນອາເຈະທີ່ປະສົບຄວາມທຸກທໍລະມານຍ້ອນເສິກສົງຄາມຍາວນານ.
|
|
|
