|
|
 |
| (GMT+08:00)
2005-08-16 21:00:44
|
 |
|
ຄວາມຮູ້ກ່ຽວກັບນ້ຳມັນກິນ
cri
ທຸກຄົນຄົງຮູ້ດີວ່າ, ໃນເວລາເຮັດກິນນັ້ນຈະຕ້ອງໃຊ້ນ້ຳມັນເປັນປະຈຳ,ເພາະວ່ານ້ຳມັນເຮັດໃຫ້ອາຫານຫອມແລະແຊບຕື່ມ,ທັງເປັນແຫຼ່ງພະລັງງານສຳຄັນຢ່າງໜຶ່ງສຳລັບເຮັດໃຫ້ຮ່າງກາຍຂອງຄົນເຮົານີ້ມີເຫື່ອມີແຮງເຄື່ອນໄຫວ.ຖ້າຄົນເຮົາຫາກບໍ່ກິນນ້ຳມັນດົນຕາມດົນ,ຜິວໜັງກໍຈະແຫ້ງ,ຜົມກໍແຫ້ງແລະຜ່ອຍທັງມັກລົ່ນເລື່ອຍໆເຫຼົ່ານີ້ເປັນຕົ້ນ.ສະນັ້ນ,ນ້ຳມັນຈຶ່ງເປັນວັດຖຸແນວໜຶ່ງສຳລັບບຳລຸງຮ່າງກາຍຂອງຄົນເຮົາຢ່າງຂາດບໍ່ໄດ້.
ນ້ຳມັນທີ່ຄົນເຮົາກິນນັ້ນມີນ້ຳມັນພືດແລະນ້ຳມັນສັດ.
ໂດຍທົ່ວໄປແລ້ວ,ຄົນທັງຫຼາຍເຫັນວ່າກິນນ້ຳມັນພືດດີກວ່າກິນນ້ຳມັນສັດ.ບາງຄົນກໍຮິນ້ຳມັນສັດປານໜູນຢ້ານແມວເອົາໂລກ.ດົນຕາມດົນເລີຍກາຍເປັນນິດໄສຈົນນ້ຳມັນສັດຢອດດຽວກໍບໍ່ກ້າແຈະ.ທີ່ຈິງແລ້ວ ນ້ຳມັນພືດກັບນ້ຳມັນສັດກໍມີຈຸດດີຈຸດອ່ອນຕ່າງກັນ,ຈະຕັ້ງຕໍ່ກິນແຕ່ນ້ຳມັນແນວນີ້ຫຼືຮິແນວນັ້ນກໍລ້ວນແຕ່ບໍ່ເໝາະສົມ.
ກ່ອນອື່ນ,ຂໍອະທິບາຍກ່ຽວກັບນ້ຳມັນພືດ,ໃນນ້ຳມັນພືດທຸກຊະນິດນັ້ນລ້ວນແຕ່ມີກົດໄຂມັນທີ່ບໍ່ເຕັມຂີດຫຼາຍຢ່າງ.ໃນນັ້ນມີບາງຢ່າງຮ່າງກາຍຂອງຄົນເຮົາແມ່ນບໍ່ສາມາດປະສົມເອົາເອງໄດ້.ມີແຕ່ຕ້ອງຮັບເອົາຈາກນ້ຳມັນກິນຫຼືໃນຂອງກິນທີ່ມີນ້ຳມັນທໍ່ນັ້ນ.ຖ້າຄົນເຮົາຫາກກິນນ້ຳມັນພືດໜ້ອຍໂພດ,ກໍຈະພາໃຫ້ຮ່າງກາຍຂາດກົດໄຂມັນທີ່ບໍ່ເຕັມຂີດ.ຜູ້ກ່ຽວກໍຈະຈ່ອຍຜອມ,ຜິວໜັງກໍຈະແຫ່ວແຫ້ງບໍ່ນຸ້ມນວນ.ແຕ່ວ່າໃນນ້ຳມັນພືດນັ້ນເຖິງຈະມີທາດບຳລຸງທີ່ຮ່າງກາຍຂອງຄົນເຮົາຂາດມັນບໍ່ໄດ້ກໍຕາມ,ແຕ່ຖ້າກິນຫຼາຍໂພດກໍບໍ່ດີຄືກັນ,ເພາະວ່າກົດໄຂມັນທີ່ບໍ່ເຕັມຂີດທີ່ປົນຢູ່ໃນນ້ຳມັນພືດນັ້ນອາດຈະມີວັດຖຸທີ່ຈະພາໃຫ້ເກີດພະຍາດມະເຮັງກໍເປັນໄດ້.ສ່ວນນ້ຳມັນສັດສ່ວນໃຫຍ່ແມ່ນນ້ຳມັນໝູເຊິ່ງລ້ວນແຕ່ມີກົດໄຂມັນເຕັມຂີດເກືອບທັງນັ້ນ,ຖ້າກິນນ້ຳມັນສັດຫຼາຍໂພດກໍຈະເຮັດໃຫ້ໄຂມັນໃນເລືອດຫຼາຍຂຶ້ນ,ແລ້ວເຮັດໃຫ້ສາຍເລືອດແດງແຂງ,ເລືອດດັນສູງແລະເປັນໂລກຫົວໃຈ.ແຕ່ກໍບໍ່ແມ່ນວ່ານ້ຳມັນສັດຈະບໍ່ມີແນວດີຫຍັງຈັກຢ່າງ.ຜູ້ໜຸ່ມຜູ້ນ້ອຍທີ່ມັກເຕັ້ນມັກດີດຫຼືກຳມະກອນຊາວນາທີ່ເຮັດວຽກໜັກແລະໃນຍາມໜາວນັ້ນ,ກໍມີຄວາມຈຳເປັນຈະຕ້ອງກິນນ້ຳມັນສັດໃຫ້ພໍດີພໍຄວນ.
ເຖິງແມ່ນວ່າຖ້າກິນນ້ຳມັນສັດຫຼາຍມັນມັກຈະເຮັດໃຫ້ສາຍເລືອດແດງແຂງກໍຕາມ,ແຕ່ຜູ້ທີ່ກິນນ້ຳມັນພືດຫຼາຍມັນພັດອາດຈະເປັນມະເຣັງລຳໄສ້ແລະມະເຮັງຕ່ອມນົມງ່າຍກວ່າຜູ້ທີ່ກິນນ້ຳມັນສັດ,ສະນັ້ນ,ຖ້າຢາກໃຫ້ຮ່າງກາຍສົມບູນ,ນ້ຳມັນຫຍັງກໍຕ້ອງກິນຈັກເລັກຈັກໜ້ອຍຈະດີກວ່າ.
ສອງບັນຫາທີ່ຄວນລະວັງໃນເວລາກິນນ້ຳມັນພືດຫຼືນ້ຳມັນສັດ.ຄືໜຶ່ງ ຢ່າປະໃຫ້ນ້ຳມັນປ່ຽນທາດ,ສອງແມ່ນຢ່າກິນມັນໂພດ.
ນ້ຳມັນກິນຖ້າຮັກສາບໍ່ດີກໍມັກຈະປ່ຽນທາດເຊື່ອມພິດຫຼືບູດເໜົ່າ,ຄັນກິນນ້ຳມັນແນວນີ້ກໍຈະເປັນຜົນສະທ້ອນບໍ່ດີຕໍ່ສຸກຂະພາບຂອງຜູ້ກ່ຽວ.ວິທີຮັກສານ້ຳມັນໄວ້ຢ່າງງາຍໆມີດັ່ງນີ້: ແມ່ນໃຫ້ເອົານ້ຳມັນໃສ່ໄວ້ໃນພາດຊະນະທີ່ເຮັດດ້ວຍດິນເຜົາເຄືອບຫຼືເຫຼັກເຄືອບຫຼືເຮັດດ້ວຍແກ້ວ.ດີທີ່ສຸດແມ່ນຢ່າໃສ່ໄວ້ໃນເຄື່ອງປຼັດສະຕິກ.ສອງແມ່ນໃນນ້ຳມັນກິໂລໜຶ່ງໃຫ້ຢອດວິດຕາມິນແອໃສ່ຈັກ3,4ຢອດ.ຫຼືຖິ້ມໃສ່ທັງເມັດກໍໄດ້,ແຕ່ວ່າກ່ອນຈະໃສ່ນັ້ນ,ໃຫ້ເອົາເຂັມແທງເປືອກຢາງວິດຕາມິນໃຫ້ມັນຊອດກ່ອນ,ເພື່ອໃຫ້ວິດຕາມິນຊຶມເຂົ້າໄປໃນນ້ຳມັນ.ສາມແມ່ນເອົາໝາກແຄນລົງຈືນໃນນ້ຳມັນຈົນອອກກິ່ນຫອມ,ເມື່ອນ້ຳມັນເຢັນແລ້ວຈິ່ງຄ່ອຍຫ່າຍໃສ່ໄວ້ໃນພາດຊະນະນັ້ນ.ການກິນນ້ຳມັນກໍມີຫຼັກວິທະຍາສາດຂອງມັນ,ຖ້າຝືນກົດເກນ,ມັນກໍບໍ່ພຽງແຕ່ຈະບໍ່ມີຜົນດີຕໍ່ຄົນເຮົາທໍ່ນັ້ນ,ຫາກຍັງຈະເປັນຜົນຮ້າຍຕໍ່ສຸກຂະພາບຂອງຄົນເຮົາອີກຊ້ຳ.ຢູ່ໃນນັ້ນ,ມີສອງຂໍ້ທີ່ຄວນລະວັງຄື,ໜຶ່ງ,ຢ່າງກິນມັນຫຼາຍ,ເວລາຂົ້ວຜັກຢ່າໃສ່ນ້ຳມັນຫຼາຍໂພດ.ສອງແມ່ນຢ່າຂ້ຽວນ້ຳມັນດ້ວຍໄຟແຮງຫຼາຍຫຼົບຫຼາຍຕ່າວ,ດີທີ່ສຸດກໍຢ່າໃຊ້ນ້ຳມັນທີ່ຈືນຂອງຫຼາຍເທື່ອແລ້ວນັ້ນຄືນອີກ.
|
|
|
