|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ, ໃນລາຍການພາກນີ້, ຂ້າພະເຈົ້າຈະສະເໜີປະມວນຂ່າວກິລາສູ່ທ່ານຟັງ.
ວັນທີ 8 ສິງຫານີ້, ຄະນະກຳມະການຈັດຕັ້ງງານກິລາໂອລິມປິກປັກກິ່ງປະກາດວ່າ, ເພື່ອເຜີຍແຜ່ເນື້ອໃນແລະທັດສະນະຄະຕິຂອງຄຳຂວັນງານກິລາໂອລິມປິກປັກກິ່ງປີ 2008 ຄື ໂລກໜ່ວຍດຽວກັນ ຄວາມຝັນດຽວກັນ ຫຼື One world, One dream ໄປສູ່ທົ່ວໂລກ, ເລີ່ມແຕ່ທ້າຍເດືອນສິງຫາເປັນຕົ້ນໄປ, ຄະນະກຳມະການຈັດຕັ້ງງານກິລາໂອລິມປິກປັກກິ່ງຈະຂໍປະພັນການຂຽນງາມແລະໂຄສະນາຄຳຂວັນງານກິລາໂອລິມປິກປັກກິ່ງໃນຂອບເຂດທົ່ວໂລກ.
ວັນທີ 8 ສິງຫານີ້, ງານແຂ່ງຂັນຂໍແຜນການຮູບແກະສະຫຼັກງານກິລາໂອລິມປິກປັກກິ່ງປີ 2008 ເຊິ່ງແມ່ນຄະນະກຳມະການຈັດຕັ້ງງານກິລາໂອລິມປິກປັກກິ່ງເປັນຜູ່ຈັດຕັ້ງນັ້ນ ໄດ້ເລີ່ມຕົ້ນຢ່າງເປັນທາງການ, ງານແຂ່ງຂັນຈະຂໍແຜນການນຳວົງການແກະສະຫຼັກແລະວົງການອອກແບບທົ່ວໂລກ, ໃນທີ່ສຸດຈະປະກວດປະພັນຮູບສະຫຼັກ 29 ອັນເພື່ອມອບລາງວັນ.
ວັນທີ 7 ສິງຫານີ້ ງານແຂ່ງຂັນບານເຕະຊິງຊະນະເລີດອາຊີຕາເວັນອອກຄັ້ງທີສອງທີ່ຈັດຂຶ້ນຢູ່ເມືອງດາເກແຫ່ງສ.ເກົາຫຼີເປັນເວລາ 9 ມື້ນັ້ນ ໄດ້ສິ້ນສຸດລົງ. ໃນການແຂ່ງຂັນບານເຕະເພດຊາຍຂອງງານແຂ່ງຂັນເທື່ອນີ້, ທີມຈີນໄດ້ເຕະສະເໝີກັບທີມສ.ເກົາຫຼີດ້ວຍຄະແນນ 1:1 ສະເໝີກັບທີມຍີ່ປຸ່ນດ້ວຍຄະແນນ 2:2 ແລະເອົາຊະນະທີມສ.ປ.ປ.ເກົາຫຼີດ້ວຍຄະແນນ 2:0, ແລ້ວຊິງໄດ້ແຊມປຽນເພດຊາຍ; ໃນການແຂ່ງຂັນເພດຍິງ, ລີລາການສະແດງຂອງທີມບານເຕະເພດຍິງຈີນບໍ່ດີປານໃດ, ແຂ່ງຂັນສາມນັດສະເໝີນັດໜຶ່ງ ເສຍສອງນັດ, ເປັນທີ 4, ທີມສ.ເກົາຫຼີຊິງໄດ້ແຊມປຽນເພດຍິງ.ທີມ ບານເຕະຍິງຊາຍແຫ່ງຊາດຂອງ 4 ປະເທດຄື ຈີນ ສ.ປ.ປ.ເກົາຫຼີ ສ.ເກົາຫຼີແລະຍີ່ປຸ່ນໄດ້ເຂົ້າຮ່ວມງານແຂ່ງຂັນເທື່ອນີ້.
ວັນທີ 6 ສິງຫານີ້, ງານແຂ່ງຂັນແລ່ນແລະລານຊິງຊະນະເລີດໂລກຄັ້ງທີ 10 ໄດ້ຈັດຂຶ້ນຢູ່ແຮນຊິງກີ ຕົວເມືອງທີ່ມີຊື່ສຽງດົ່ງດັງຂອງແຟງລັງ. ງານແຂ່ງຂັນເທື່ອນີ້ໄດ້ສ້າງສະຖິຕິເຊິ່ງມີຄະນະນັກກິລາເຂົ້າຮ່ວມການແຂ່ງຂັນປະເພດດ່ຽວລະດັບໂລກຫຼາຍທີ່ສຸດໃນປະຫວັດສາດ, ມີ 209 ປະເທດແລະເຂດແຄ້ວນໄດ້ສົ່ງນັກກິລາໄປເຂົ້າຮ່ວມການແຂ່ງຂັນ. ເທື່ອນີ້ ຈີນໄດ້ສົ່ງນັກກິລາ 35 ຄົນໄປເຂົ້າຮ່ວມການແຂ່ງຂັນ. ໃນການແຂ່ງຂັນທີ່ຈັດຂຶ້ນໃນວັນທີ 7, ນາງອີວານໂນວາ ນັກກິລາຣັດເຊຍໄດ້ສ້າງສະຖິຕິໂລກໃນການແຂ່ງຂັນຍ່າງທົນ 20 ກິໂລແມັດເພດຍິງດ້ວຍຜົນງານ 1 ຊົ່ວໂມງ 25 ນາທີ 41 ວິນາທີ; ທ້າວເກັດທ໌ລິນ ນັກກິລາອາເມລິກາໄດ້ຮັບໄຊຊະນະໃນການແຂ່ງຂັນແລ່ນໄວ 100 ແມັດເພດຊາຍດ້ວຍຜົນງານ 9 ນາທີ 88 ວິນາທີ.
ໃນການແຂ່ງຂັນ 5 ລາຍການຍຸກປະຈຸບັນຊິງຊະນະເລີດໂລກປີ 2005 ທີ່ຈັດຂຶ້ນຢູ່ນະຄອນວັກໂຊວີແຫ່ງໂປໂລຍໃນວັນທີ 6 ສິງຫານີ້, ທ້າວສຽນເຈີ້ນຮວາ ນັກກິລາຈີນຊິງໄດ້ຫຼຽນຄຳໃນການແຂ່ງຂັນປະເພດດ່ຽວເພດຊາຍ. ນີ້ແມ່ນນັກກິລາອາຊີຊິງໄດ້ຫຼຽນຄຳເປັນຄັ້ງທຳອິດໃນການແຂ່ງຂັນ 5 ລາຍການຍຸກປະຈຸບັນລະດັບໂລກຈົນຮອດປະຈຸບັນ.
ໃນການແຂ່ງຂັນຊິງຄຸນວຸດທິເຂດອາຊີຂອງງານແຂ່ງຂັນບານສົ່ງເພດຍິງຊິງຊະນະເລີດໂລກປີ 2006 ທີ່ຈັດຂຶ້ນຢູ່ເມືອງນິງໂປ ທາງພາກຕາເວັນອອກຂອງຈີນໃນວັນທີ 7 ສິງຫານີ້, ທີມບານສົ່ງເພດຍິງຈີນໄດ້ເອົາຊະນະທີມໄຕເປຈີນດ້ວຍຄະແນນ 3:0, ໃນງານແຂ່ງຂັນເທື່ອນີ້ ທີມຈີນເຂົ້າຮ່ວມການແຂ່ງຂັນ 4 ນັດໄດ້ຊະນະ 4 ນັດ, ແລ້ວຊິງໄດ້ຄຸນວຸດທິເຂົ້າຮ່ວມບັ້ນຊິງຊະນະເລີດຂອງງານແຂ່ງຂັນບານສົ່ງເພດຍິງຊິງຊະນະເລີດໂລກປີ 2006.
ວັນທີ 7 ສິງຫານີ້, ງານແຂ່ງຂັນເທັນນິສອາຄູຣາຄຼາຊິກອາເມລິກາໄດ້ເຂົ້າຮອບຮອງຊະນະເລີດ, ນາງເຜິງຊວ້າຍ ນັກກິລາຈີນທີ່ອາຍຸ 19 ປີໄດ້ເສຍໃຫ້ນາງເປຍສ໌ ນັກກິລາທີ່ມີຊື່ສຽງດົ່ງດັງຂອງຝຣັ່ງດ້ວຍຄະແນນ 0:2, ແລ້ວຕົກຮອບຊິງຊະນະເລີດ, ແຕ່ໃນງານແຂ່ງຂັນເທື່ອນີ້, ນາງເຜິງຊວ້າຍທີ່ຍັງໜຸ່ມໄດ້ເອົາຊະນະນັກກິລາລະດັບຍອດຢ້ຽມໃນໂລກສອງຄົນຄື ນາງແດແມນຕີເອວາແລະນາງຄຼິສ໌ເຕີສ໌, ໄດ້ສະແດງເຖິງກຳລັງບົ່ມຊ້ອນອັນໃຫຍ່ຫຼວງຂອງນາງ.
ວັນທີ 5 ສິງຫານີ້, ທ່ານລິນມິງເວິຍ ຄູໄວໜຸ່ມນະຄອນເຊິນເຈິ້ນຈີນໄດ້ອອກເດີນທາງຈາກເມືອງໂປສ໌ທີ່ຢູ່ແຄມທະເລຕາເວັນຕົກຂອງອົສຕຼາລີ, ເລີ່ມເດີນຜ່ານອົສຕຼາລີທີ່ຈະໃຊ້ເວລາ 20 ມື້. ຖ້າແຜນການຂອງທ່ານໄດ້ຮັບຜົນສຳເລັດ, ທ່ານຈະແມ່ນຄົນຈີນຜູ່ທຳອິດເດີນຜ່ານແຜ່ນດິນໃຫຍ່ອົສຕຼາລີ.
ເມື່ອໄດ້ແຂ່ງຂັນກັນຢ່າງດຸເດືອດເປັນເວລາ 4 ມື້, ວັນທີ 7 ສິງຫານີ້, ງານແຂ່ງຂັນຊວງເຮືອຊິງຊະນະເລີດໂລກຄັ້ງທີ 7 ທີ່ຈັດຂຶ້ນຢູ່ນະຄອນແບກແລງແຫ່ງເຢຍລະມັນໄດ້ສິ້ນສຸດລົງ. ໃນການແຂ່ງຂັນປະເພດດ່ຽວ 8 ລາຍການທັງໝົດຂອງຜູ່ໃຫຍ່, ທີມ ຈີນຊິງໄດ້ຜົນງານດີເດັ່ນ ຄືຊິງໄດ້ຫຼຽນຄຳ 7 ຫຼຽນ ຫຼຽນເງິນໜຶ່ງຫຼຽນ, ແລະຊິງໄດ້ແຊມປຽນຜົນງານລວມໃນຈຸດັ່ງກ່າວ.
ງານແຂ່ງຂັນເຄື່ອງຈຳລອງເດີນທະເລຊິງຊະນະເລີດໂລກຄັ້ງທີ 14 ທີ່ຈັດຂຶ້ນຢູ່ເມືອງບູເດໂຈວິກ ທາງພາກໃຕ້ເຊັກເປັນເວລາ 6 ມື້ນັ້ນໄດ້ສິ້ນສຸດລົງ, ນັກກິລາ 300 ກວ່າຄົນທີ່ມາຈາກ 14 ປະເທດແລະເຂດແຄວ້ນໃນໂລກໄດ້ເຂົ້າຮ່ວມການແຂ່ງຂັນເທື່ອນີ້. ໃນການແຂ່ງຂັນເທື່ອນີ້, ທີມຈີນຊິງໄດ້ຫຼຽນຄຳ 2 ຫຼຽນ ຫຼຽນເງິນ 1 ຫຼຽນ ຫຼຽນທອງ 2 ຫຼຽນ.
|
