|
ສະບາຍດີທ່ານຜູ່ຟັງທີ່ໂຄລົບ, ລາຍການນິທານສຸພາສິດໄດ້ວຽນມາພົບກັບທ່ານອີກຕາມເຄີຍ, ໃນລາຍການພາກນີ້, ຂ້າພະເຈົ້າຈະເລົ່ານິທານ "ເສົາຊົງຊັ່ງຊ້າງ" ສູ່ຟັງ, ຫວັງວ່າທ່ານຄົງຈະມັກ.
ເສົາຊົງແມ່ນລູກຊາຍຫຼ້າຂອງໂຈໂສ ເຈົ້າຊີວິດລັດເວິ້ຍໃນສະໄໝສາມກົ໊ກຂອງຈີນ, ເສົາຊົງເປັນເດັກທີ່ສະຫຼາດພິກໄຫວ, ເມື່ອອາຍຸ 5-6 ຂວບກໍມີພູມປັນຍາເທົ່າກັບຜູ່ໃຫຍ່ແລ້ວ.
ໃນເວລາເສົາຊົງອາຍຸປະມານ 10 ປິ, ມີເທື່ອໜຶ່ງ, ຊຸນກ່ວນ ເຈົ້າຊີວິດລັດອູທີ່ຢູ່ພາກໃຕ້ຈີນໄດ້ສົ່ງຊ້າງໂຕໜຶ່ງມາໃຫ້ໂຈໂສ ເຈົ້າຊີວິດລັດເວິ້ຍ. ຊ້າງດຳລົງຊີວິດໃນປ່າເຂດພາກໃຕ້, ຄົນພາກເໜືອບໍ່ສູ່ມີໂອກາດໄດ້ເຫັນ. ສະນັ້ນ ໂຈໂສຈຶ່ງພາລູກຊາຍທັງຫຼາຍແລະເສນາບໍດີໄປເບິ່ງນຳກັນ.
ຄົນທັງຫຼາຍເບິ່ງໂຕຊ້າງທີ່ໃຫຍ່ມະຫຶມາ ທັງລົມກັນ, ໃຜໆກໍ່ຢາກຮູ້ນ້ຳໜັກຂອງມັນມີເທົ່າໃດ, ແຕ່ຢູ່ໃສມີຊັ່ງໃຫຍ່ປານນີ້?
ໂຈໂສກໍ່ຢາກຮູ້ນ້ຳໜັກຂອງຊ້າງຫຼາຍ, ເລີຍຖາມຕໍ່ເສນາບໍດີທັງຫຼາຍວ່າ: "ພວກເຈົ້າໃຜມີວິທີຊັ່ງຊ້າງໂຕນີ້ໄດ້?"
ເສນາບໍດີທັງຫຼາຍທີ່ຕິດຕາມໂຈໂສມາເບິ່ງຊ້າງຕ່າງເບິ່ງໜ້າກັນ, ໃຜໆກໍ່ຄິດຫາວິທີບໍ່ໄດ້. ໃນເວລານັ້ນ, ເສົາຊົງໄດ້ເວົ້າຕໍ່ໂຈໂສວ່າ: "ພະບິດາ, ຂ້ານ້ອຍມີວິທີໜຶ່ງ, ສາມາດຊັ່ງນ້ຳໜັກຂອງຊ້າງໂຕນີ້ໄດ້."
ໂຈໂສຊົງຮູ້ວ່າເສົາຊົງເປັນເດັກສະຫຼາດ, ໃນຍາມທຳມະດາ ກໍຊົງໂປດເຂົາທີ່ສຸດ, ເລີຍຊົງກ່າວວ່າ: "ເຈົ້າເວົ້າມາເບິ່ງດູ, ໃຊ້ວິທີຫຍັງຈຶ່ງຈະຊັ່ງນ້ຳໜັກຂອງຊ້າງໃຫຍ່ໂຕນີ້ໄດ້?"
ເສົາຊົງເວົ້າວ່າ: "ຈູງຊ້າງໂຕນີ້ລົງເຮືອລຳໃຫຍ່, ແລະໝາຍເສັ້ນກິນນ້ຳເລິກຂອງເຮືອໄວ້, ແລ້ວຈູງຊ້າງຂຶ້ນຝັ່ງ, ແລ້ວຂົນເອົາກ້ອນຫີນຈຳນວນໜຶ່ງລົງເຮືອ, ໃຫ້ເຮືອຈົມລົງຮອດບ່ອນທີ່ຂີດໝາຍໄວ້. ເມື່ອຊັ່ງນ້ຳໜັກຂອງກ້ອນຫີນເຫຼົ່ານີ້ແລ້ວ ກໍ່ຈະຮູ້ວ່າຊ້າງໂຕນີ້ມີນ້ຳໜັກເທົ່າໃດແລ້ວ."
ເມື່ອໂຈໂສຟັງແລ້ວ ກໍຊົງສັນລະເສີນວ່າ: "ໂອຍ ວິທີນີ້ດີແທ້!"
ໂຈໂສເລີຍສັ່ງໃຫ້ຜູ່ອື່ນກຽມເຮືອແລະກ້ອນຫີນໄວ້, ເຮັດຕາມວິທີຂອງເສົາຊົງ, ບໍ່ພໍຄາວກໍຊັ່ງໄດ້ນ້ຳໜັກຂອງຊ້າງໂຕນີ້.
ພາຍຫຼັງມາ, ຄົນທັງຫຼາຍໄດ້ໃຊ້ນິທານ "ເສົາຊົງຊັ່ງຊ້າງ" ມາສັນລະເສີນຜູ່ໃດຜູ່ໜຶ່ງສະຫຼາດກວ່າຜູ່ອື່ນແຕ່ຍາມຍັງນ້ອຍ.
|
