|
|
 |
| (GMT+08:00)
2005-08-19 13:35:58
|
 |
|
ຄວນປ້ອງກັນພະຍາດຄອມພິວເຕີແນວໃດ
cri
Author: li
 ການຄົ້ນຄົ້ວວິທະຍາສາດສະແດງໃຫ້ເຫັນວ່າ,ການໃຊ້ຄອມພິວເຕີເປັນເວລາຍາວນານຈະກະທົບກະເທືອນເຖິງຕາ,ກ້າມເນື້ອແລະລະບົບປະສາດຂອງຄົນໃນລະດັບໃດໜຶ່ງ,ແລ້ວເກີດອາການຕ່າງໆເຊັ່ນເມື່ອຍຕາ,ສາຍຕາອ່ອນລົງ,ກ້າມເນື້ອເຈັບປວດ,ເຈັບຫົວແລະປວດຮາກເປັນຕົ້ນ,ນີ້ກໍ່ແມ່ນພະຍາດຄອມພິວເຕີ"ທີ່ຄົນທັງຫຼາຍເວົ້າເລື້ອຍໆ.
ສາມາດເວົ້າໄດ້ວ່າ,ຄອມພິວເຕີແມ່ນການປະດິດສ້າງຢ່າງໜຶ່ງທີ່ໃຫຍ່ກວ່າໜູ່ໃນສັດຕະຫວັດທີ່ແລ້ວ,ຄຽງຄູ່ກັບການເຜີຍແຜ່ອິນເຕີເນັດ,ຄົນທັງຫຼາຍນັບມື້ນັບອາໃສຄອມພິວເຕີ. ແຕ່ວ່າ,ໃນຂະນະທີ່ຄອມພິວເຕີນຳເອົາຄວາມສະດວກຕ່າງໆມາໃຫ້ຄົນເຮົານັ້ນ, ມັນກໍ່ເກີດຜົນສະທ້ອນທາງລົບບາງຢາງຕໍ່ສຸຂະພາບຂອງຄົນເຮົາ.
ອາການທົ່ວໄປຂອງ"ພະຍາດຄອມພິວເຕີ"ແມ່ນເມື່ອຍຕາ,ຕາຝາດ. ຜູ້ເປັນໜັກສາຍຕາອາດຈະອ່ານລົງ.ນີ້ແມ່ນຍ້ອນວ່າ,ໃນເວລາຄົນເຮົາໃຊ້ຄອມພິວເຕີນັ້ນ,ສາຍຕາແມ່ນຕ້ອມຢູ່ແຕ່ໜ້າຈໍທີ່ນ້ອຍໆ,ໄລຍະຫ່າງລະຫວ່າງຕາກັບໜ້າຈໍກໍ່ປ່ຽນແປງ. ເມື່ອເປັນແນວນີ້,ຖ້າໃຊ້ຄອມພິວເຕີດົນແລ້ວ,ຕາກໍ່ຈະຫາບແບກເກີນສ່ວນຢ່າງບໍ່ຮູ້ສຶກຕົວ,ແລ້ວພາໃຫ້ເມື່ອຍຕາ.
ນອກນີ້ ໃນເວລາໃຊ້ຄອມພິວເຕີ,ຕາຕ້ອງຈ້ອງເບິ່ງຕົວໜັງສື,ເຄື່ອງໝາຍຫຼືພາບທີ່ມາບແມບໃນໜ້າຈໍ,ຈຶ່ງເຮັດໃຫ້ພັບຕາໜ້ອຍລົງ,ນີ້ກໍ່ແມ່ນສາຍເຫດສຳຄັນທີ່ພາໃຫ້ຕາແຫ້ງ. ຕາມໄດ້ຊາບ,ພັບຕາສາມາດເຮັດໃຫ້ນໍ້າຕາຊືມອອກ,ຖ້າພັບຕາໜ້ອຍລົງ,ຕາກໍ່ຈະແຫ້ງຝາດແລະປວດ. ຖ້າຕາຢູ່ໃນສະພາບເມື່ອຍຫືຼແຫ້ງແລ້ວ,ສາຍຕາກໍ່ຈະອ່ອນລົງຊັກໄຊ້
ເຖິງວ່າການໃຊ້ຄອມພິວເຕີເປັນເວລາດົນນານຈະເປັນໂທດຕໍ່ຕາຫຼາຍຢ່າງ,ແຕ່ໂທດເລົ່ານີ້ສາມາດຜ່ອນຄາຍຫຼືຫັບຫາຍໄປໄດ້ຖ້າໃຊ້ວິທີຮັກສາບາງຢ່າງ. ທ່ານເຈີ້ງເຮີຊິ່ນ ຜູ້ຊ່ຽວຊານໃນດ້ານປ້ອງກັນແລະປົວພະຍາດອາຊີບຂອງສູນປ້ອງກັນແລະຄວບຄຸມພະຍາດນະຄອນປັກກິ່ງເວົ້າວ່າ:
"ທົ່ວໄປແລ້ວ,ວິທີປ້ອງກັນກໍ່ງ່າຍສົມຄວນ. ຖ້າໃຊ້ຄອມພິວເຕີເປັນເວລາດົນນານ,ຄວນໃຫ້ຕາພັກຜ່ອນຢ່າງເໝາະສົມ. ສົມມຸດວ່າ,ເຮັດວຽກໄດ້ຊົ່ວໂມງໜຶ່ງສອງຊົ່ວໂມງແລ້ວ,ກໍຄວນພັກຜ່ອນຈັກ 10 ຮອດ 15 ນາທີ. ເຊັ່ນນັ່ງລັບຕາບຶດໜຶ່ງກໍ່ໄດ້,ຫຼືເບິ່ງຕົ້ນໄມ້ຫຼືພືດສີຂຽວຢູ່ບ່ອນໄກກໍ່ໄດ້."
ຜູ້ຊ່ຽວຊານແນະນຳວ່າ,ໃນເວລາໃຊ້ຄອມພິວເຕີນນັ້ນຍັງຄວນລະວັງຫຼາຍຂໍ້ດັ່ງລຸ່ມນີ້ຄື: ຄວາມສະຫວ່າງດີທີ່ສຸດຂອງໜ້າຈໍຄວນເປັນສາມເທົ່າຂອງແສງສະຫວ່າງສິ່ງແວດລ້ອມ,ຢ່າໃຫ້ແສງຢູ່ນອກປ່ອງຢ້ຽມຫຼືແສງໄຟຟ້າໃນຫ້ອງສະທ້ອງຢູ່ໜ້າຈໍ;ສາຍຕາສອງເບື້ອງຄວນສະເໝີກັບໜ້າຈໍຫຼືສູງກວ່າໜ້ອຍໜຶ່ງ; ໄລຍະຫ່າງລະຫວ່າງຕາກັບໜ້າຈໍຕ້ອງຄວນໄກກັນ 60 ຊັງຕີແມັດ. ນອກນີ້ ໃນເວລາໃຊ້ຄອມພິວເຕີ,ໃຫ້ພິບຕາເລື້ອຍໆແດ່ຫືຼຢອດຢາຕາແນວເປັນນໍ້າເພື່ອເຮັດໃຫ້ຕາຊຸ່ມຊື່ນ. ວິທີເຫົ່ຼານີ້ລ້ວນແຕ່ຈະຊ່ວຍຜ່ອນຄາຍຄວາມບໍ່ສະບາຍຕາໃນເວລາໃຊ້ຄອມພິວເຕີ.
ນອກຈາກກະທົບກະເທືອນເຖິງຕາ, ການໃຊ້ຄອມພິວເຕີຍາວນານ,ກໍ່ຈະເຮັດໃຫ້ຄົນສ່ວນໜຶ່ງຮູ້ສຶກເຈັບປວດກ້າມເນື້ອ,ມູນເຫດສຳຄັນແມ່ນ,ໃນເວລາດີດຄອມພິວເຕີນັ້ນ,ຈະເຮັດແຕ່ທ່າດຽວບໍ່ສູ້ເປັນທ່າອື່ນ,ຈຶ່ງພາໃຫ້ກ້າມເນື້ອອິດເມື່ອຍ,ດົນແລ້ວກໍ່ເຈັບປວດຕາມຂໍ້ມື,ແຂນ,ບ່າໄຫຼ່ແລະກ້າມຄໍເປັນຕົ້ນ.
ຜູ້ຊ່ຽວຊານແນະນຳວ່າ,ເພື່ອຫຼົບຫຼີກບັນຫານີ້,ວິທີທີ່ໄດ້ຜົນແມ່ນຕ້ອງມີທ່າຖືກຕ້ອງໃນເວລາໃຊ້ຄອມພິວເຕີ,ຕົວຢ່າງຄືໃນເວລາດີດຄີບອດ,ຮັກສາໃຫ້ແຂນສອກພຽງກັບຄີບອດ,ຕີນທັງສອງຢູ່ໜ້າດິນ,ນັ່ງແອວຊື່ອີງໃສ່ພະນັກເກົ້າອີ້,ເລືອກເອົາເກົ້າອີ້ທີ່ປັບຄວາມສູງຕໍ່າແລະມຸມແຈໄດ້.
ໂທດຊະນິດທີ່ສາມຂອງການໃຊ້ຄອມພິວເຕີດົນນານແມ່ນຄອມພິວເຕີແຜ່ລັງສີຕໍ່ລະບົບປະສາດ. ເຖິງວ່າການແຜ່ລັງສີຕ່າງໆຈາກໜ້າຈໍຈະປອດໄພກໍ່ຕາມ, ແຕ່ຖືກລັງສີເປັນເວລາດົນນານກໍ່ຈະກະທົບກະເທືອນເຖິງລະບົບປະສາດຂອງຄົນຄືກັນ,ພາໃຫ້ມີອາການຕ່າງໆເຊັ່ນ ເຈັບຫົວ,ປວດຮາກ,ອຶດອັດ,ອອ່ນເພຍແລະນອນບໍ່ລັບເປັນຕົ້ນ.ຕໍ່ຜົນສະທ້ອນເຫຼົ່ານີ້,ຜູ້ຊ່ຽວຊານຊີ້ອອກວ່າ,ວິທີ່ດີທີ່ສຸດແມ່ນຫ່າງໄກຈາກຄອມພິວເຕີຄາວໜຶ່ງ,ເພື່ອຫົຼບຫຼີກລັງສີຜູ້ມີອາການໜັກຄວນກີນຢາສົມທົບ,ອາການກໍ່ຈະຄ່ອຍທຸເລົາລົງແລະຫາຍໄປ.
ນອກຈາກຜົນຮ້າຍຫຼາຍຢ່າງທີ່ກ່າວມາຂ້າງເທິງນີ້ແລ້ວ,ວົງການແພດສາດພວມຄົ້ນຄວ້າບັນຫາທີ່ວ່າຄອມພິວເຕີຈະມີຜົນສະທ້ອນຕໍ່ລູກໃນທ້ອງຫຼືບໍ່.ທ່ານເຈິ້ງຮືຊິ່ນທີ່ສູນປ້ອງກັນແລະຄວບຄຸມພະຍາດນະຄອນປັກກິ່ງເວົ້າວ່າ,ລັງສີແມ່ເຫັຼກໄຟຟ້າທີ່ເກີດຄອມພິວເຕີແມ່ນອ່ອນທີ່ສຸດ,ແຕ່ກໍ່ຍັງຄວນລະວັງ,ທ່ານເວົ້າວ່າ:
"ໃນສາມເດືອນຕົ້ນ,ລູກໃນທ້ອງຢູ່ໃນໄລຍະສະດຸ້ງໄວ,ໃນໄລຍະນີ້,ຜົນສະທ້ອນໃດໆຂອງປັດໃຈຕ່າງໆ,ເຊັ່ນຊີວະຊາດ,ຟີຊິກແລະເຄມີ,ລ້ວນແຕ່ອາດຈະພາໃຫ້ລູກໃນທ້ອງວິຮູບຫຼືເປັນໄປແນວອື່ນ. ສະນັ້ນ ໃນໄລຍະຖືພາສາມເດືອນຕົ້ນຈຶ່ງສະເໜີໃຫ້ແມ່ມານພະຍາຍາມໃຊ້ຄອມພິວເຕີໃຫ້ໜ້ອຍຫືຼບໍ່ຍິ່ງດີ.
|
|
|
