|
|
 |
| (GMT+08:00)
2005-08-19 14:15:49
|
 |
|
ຍົນອະວະກາດດິສໂຄເວີຣີໄດ້ສ້າງ"ພັບຕາດຽວທີໜຶ່ງ"ຫຼາຍເທື່ອໃນປະຫວັດການບິນອະວະກາດ
cri
 ໃນວັນອັງຄານອາທິດແລ້ວນີ້,ຍົນອະວະກາດດິສໂຄເວີຣີຂອງອາເມລິກາໄດ້ລົງຈອດຢູ່ຖານທັບອາກາດເອັດເວີສ໌ອາເມລິກາຢ່າງປອດໄພ,ອັນໄດ້ສຳເລັດການບິນອະວະກາດຄັ້ງທຳອິດຂອງຍົນອະວະກາດອາເມິລກາແຕ່ຍົນອະວະກາດ"ໂກລົມບີ"ເກີດອຸບັດເຫດມານີ້. ການບິນອະວະກາດຂອງຍົນອະວະກາດດິສໂຄເວີຣີເທື່ອນີ້ເຕັມໄປດ້ວຍຄວາມຄົດລ້ຽວແລະຄວາມຫວາດສຽວ. ທຳອິດ,ຍ້ອນວ່າເຄື່ອງສົ່ງສັນຍານຕິດຂັດ,ຍົນອະວະກາດດິສໂຄເວີຣີໄດ້ເລື່ອນເວລາຍິງຂຶ້ນສູ່ອະວະກາດ,ຫຼັງຈາກນັ້ນ,ໃນເວລາຂຶ້ນສູ່ອະວະກາດ,ຟອງກັນຮ້ອນກ້ອນໃຫຍ່ຫຼົ່ນລົງ,ນັກບິນອະວະກາດຈຳເປັນຕ້ອງສ້ອມແປງໂດຍດ່ວນຢູ່ເທິງອະວະກາດ,ໃນທີ່ສຸດ,ໄດ້ເລື່ອນເວລາກັບຄືນໜ້າດິນເທື່ອແລ້ວເທື່ອອີກ,ເຮັດໃຫ້ຄົນເປັນຫ່ວງນຳ. ແຕ່ວ່າ,ໃນການບິນອະວະກາດຄືນໃໝ່ເປັນເວລາ 14 ມື້ເທື່ອນີ້,ຍົນອະວະກາດດິສໂຄເວີຣີໄດ້ສ້າງພັບຕາດຽວທີໜຶ່ງຫຼາຍເທື່ອໃນປະຫວັດການບິນອະວະກາດ.
ຈັບມືກັນເທື່ອທຳອິດ. ເວລາ 20 ໂມງ 54 ນາທີຂອງວັນທີ 29 ກໍລະກົດເວລາປັກກິ່ງ,ທ່ານ ຟິລິບສ໌ ນັກບິນອະວະກາດຂອງອາເມລິກາໃນສະຖານີອະວະກາດສາກົນໄດ້ເດ່ມືໄປສູ່ທ່ານ ໂຄລິມສ໌ ຜູ້ບັນຊາການໃຫຍ່ຂອງຍົນອະວະກາດດິສໂຄເວີຣີ,ເພື່ອສະແດງຄວາມຍິນດີຕ້ອນຮັບ. ນີ້ແມ່ນນັກບິນອະວະກາດໃນສະຖານີອະວະກາດກັບນັກບິນອະວະກາດໃນຍົນອະວະກາດຈັບມືກັນຢູ່ເທິງອະວະກາດເທື່ອທຳອິດແຕ່ທ້າຍປີ 2002 ມານີ້. ໃນ 9 ມື້ຫຼັງຈາກນັ້ນ,ນັກບິນອະວະກາດໃນຍົນດິສໂຄເວີຣີກັບນັກບິນອະວະກາດໃນສະຖານີອະວະກາດໄດ້ສ້າງມິດຕະພາບຢ່າງເລິກເຊິ່ງ,ນັກບິນອະວະກາດ 9 ຄົນຍັງໄດ້ພ້ອມກັນໄວ້ອາໄລເຖິງດວງວິນຍານຂອງພະນັກງານໜ່ວຍບິນໃນຍົນອະວະກາດໂກລົມບີທີ່ເກີດອຸບັດເຫດພ້ອມດ້ວຍຄົນຮຸ່ນກ່ອນຂອງພາລະກິດການບິນອະວະກາດທີ່ເສຍສະຫຼະຊີວິດ.
ຕີລັງກາໄປທາງຫຼັງເທື່ອທຳອິດ. ເວລາ 20 ໂມງປາຍຂອງວັນທີ 29 ກໍລະກົດເວລາປັກກິ່ງ,ຍົນອະວະກາດດິສໂຄເວີຣີໄດ້ບິນຮອດບ່ອນໃຕ້ສະຖານີອະວະກາດສາກົນ 183 ແມັດ,ທ່ານ ໂຄລິມສ໌ ຜູ້ບັນຊາການໃຫຍ່ໄດ້ຂັບຍົນອະວະກາດຕີລັງກາເທື່ອໜຶ່ງ,ເຮັດໃຫ້ທ້ອງຍົນຫັນໄປສູ່ສະຖານີອະວະກາດ. ນີ້ແມ່ນຍົນອະວະກາດຕີລັງກາໄປທາງຫຼັງຢູ່ເທິງອາກາດເທື່ອທຳອິດໃນປະຫວັດການບິນອະວະກາດ. ການກະທຳທີ່ບໍ່ທຳມະດາເທື່ອນີ້ແມ່ນເພື່ອໃຫ້ນັກບິນອະວະກາດໃນສະຖານີອະວະກາດຖ່າຍຮູບໃຫ້ທ້ອງຍົນ,ເພື່ອກວດກາກະເບື້ອງກັນຮ້ອນຢູ່ໜ້າຍົນອະວະກາດໄດ້ຖືກທຳລາຍຫຼືບໍ່.
ການສ້ອມແປງຢູ່ເທິງອະວະກາດເທື່ອທຳອິດ. ເວລາປະມານ 20 ໂມງ 40 ນາທີຂອງວັນທີ 3 ສິງຫາເວລາປັກກິ່ງ,ທ່ານ ໂຣບິນເຊີນ ນັກບິນອະວະກາດຂອງຍົນດິສໂຄເວີຣີໄດ້ຖືກແຂນກົນຈັກຂອງສະຖານີອະວະກາດຍົກຂຶ້ນຮອດທ້ອງຍົນ,ໃຊ້ເວລາພຽງບໍ່ທໍ່ໃດວິນາທີກໍໄດ້ດຶງອຸປະກອນສອງແຜ່ນທີ່ຍັດໃສ່ຮູກະເບື້ອງກັນຮ້ອນນັ້ນອອກມາ. ນີ້ແມ່ນການສ້ອມແປງຍົນອະວະກາດຢູ່ເທິງອະວະກາດເປັນຄັ້ງທຳອິດໃນປະຫວັດການບິນ 24 ປີຂອງຍົນອະວະກາດ. ການສ້ອມແປງເທື່ອນີ້ໄດ້ກຳຈັດຄວາມອັນຕະລາຍໃຫ້ແກ່ຍົນອະວະກາດດິສໂຄເວີຣີເຂົ້າສູ່ຊັ້ນອາກາດໜ່ວຍໂລກ.
ນອກນີ້ ຍົນອະວະກາດດິສໂຄເວີຣີຍັງໄດ້ນຳເອົາລະບົບລີໂມດສະແກນທີ່ຍາວປະມານ 15 ແມັດນັ້ນຂຶ້ນສູ່ອະວະກາດເປັນຄັ້ງທຳອິດ. ມັນສາມາດເຊື່ອມຕໍ່ກັບແຂນກົນຈັກຂອງຍົນອະວະກາດ,ເຮັດໃຫ້ມັນສາມາດຍື່ນໄປຮອດທ້ອງຍົນອະວະກາດ,ໃຫ້ກ້ອງຖ່າຍຮູບທີ່ຕິດຢູ່ສົ້ນປາຍຖ່າຍຮູບໃຫ້ຍົນອະວະກາດ.
ຍົນດິສໂຄເວີຣີຍັງແມ່ນຍົນອະວະກາດທີ່ປະກົດຕົວຢູ່ໜ້າກ້ອງຫຼາຍກວ່າໝູ່ໃນປະຫວັດການບິນອະວະກາດທີ່ນັບມາຮອດປັດຈຸບັນ. ໃນເວລາຍິງສົ່ງຍົນອະວະກາດດິສໂຄເວີຣີ,ຢູ່ແທ່ນຍິງສົ່ງແລະອ້ອມຂ້າງກໍມີກ້ອງຖ່າຍວິດີໂອແລະກ້ອງຖ່າຍຮູບ 107 ເຄື່ອງ,ຢູ່ຖັງວັດຖຸເຊື້ອໄຟ,ເຄື່ອງຊຸກລູກສອນໄຟຍານສົ່ງວັດຖຸເຊື້ອໄຟທາດແຂງແລະເຄື່ອງໂຄຈອນກໍໄດ້ຕິດຕັ້ງກ້ອງຖ່າຍວິດີໂອ,ຢູ່ໝົດຕົວຍົນດິສໂຄເວີຣີຍັງໄດ້ຕິດຕັ້ງກ້ອງຖ່າຍວິດິໂອດີຈີຕອນ 110 ເຄື່ອງ,ນັກບິນອະວະກາດໃນສະຖານີອະວະກາດກໍໄດ້ຖ່າຍເອົາຮູບມັນເພື່ອກວດກາ,ຜູ້ຄວບຄຸມຢູ່ໜ້າດິນໄດ້ວິໄຈຮູບຖ່າຍທີ່ສົ່ງຄືນເພື່ອກວດກາໜ້າຍົນໄດ້ຖືກທຳລາຍຫຼືບໍ່. ຍົນອະວະກາດດິສໂຄເວີຣີປະກົດຕົວຢູ່ໜ້າກ້ອງທົ່ວທຸກທິດເທື່ອນີ້ໄດ້ສ້າງແບບຢ່າງໃຫ້ແກ່ການບິນຂອງຍົນອະວະກາດໃນພາຍໜ້າ,ການຖ່າຍວິດີໂອເພື່ອຕິດຕາມກວດກາແລະການວິໄຈຮູບຖ່າຍແມ່ນມາດຕະການຮັກສາຄວາມປອດໄພທີ່ສຳຄັນທີ່ຮັບປະກັນໃຫ້ຍົນອະວະກາດບິນຢ່າງປອດໄພ.
|
|
|
