|
ທີ່ນີ້, ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງທີ່ເຄົາລົບ, ຍິນດີຕ້ອນຮັບທ່ານຮັບຟັງລາຍການຢ່ອນອາລົມໃນວັນເສົາ, ຂ້າພະເຈົ້າແມ່ນແສງແກ້ວ. ວັນທີ 15 ສິງຫາປີ 2005, ແມ່ນວັນລະລຶກສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນ ແລະສົງຄາມຕ້ານຟັດຊິດຂອງໂລກໄດ້ຮັບໄຊຊະນະຄົບຮອບ 60 ປີ. ໃນຫລາຍມື້ມານີ້, ແຫ່ງຕ່າງໆໃນໂລກໄດ້ທະຍອຍກັນຈັດການເຄື່ອນໄຫວລະລຶກ, ຫວນຄືນປະຫວັດສາດຕອນນັ້ນ, ທະນຸຖະໜອມສັນຕິພາບໃນຊູ່ມື້ນີ້ທີ່ໄດ້ມາບໍ່ແມ່ນງ່າຍ. ໃນລາຍການມື້ນີ້, ພວກເຮົາຈະຈັດເພງເກົ່າທີ່ເປັນເພງປະຕິວັດປະມວນໜຶ່ງສູ່ຟັງ.
ພາຍຫລັງເຫດການ 18 ກັນຍາປີ 1931 ແລ້ວ, ສາມແຂວງພາກຕາເວັນອອກສຽງເໜືອຂອງຈີນຖືກທະຫານຍີ່ປຸ່ນຍຶດຄອງ, ຈີນໄດ້ຖືກພວກຮຸກຮານຢຽບຢ່ຳຍ່ຳຍີ, ປະຊາຊົນພັດເຊພະເນຈອນ, ບໍ່ມີບ່ອນເພິ່ງພາອາໄສ, ປະສົບຄວາມທຸກທໍລະມານຈົນເຫຼືອພັນລະນາ, ຕໍ່ໄປເຊີນຟັງເພງ"ຊົງຮວາຈ່ຽງຊັ້ງ"---ເທິງແມ່ນ້ຳຊົງຮວາຈ່ຽງ.
ແມ່ນ້ຳເຫຼືອງແມ່ນແມ່ນ້ຳມານດາຂອງຈີນ, ແມ່ນແຫຼ່ງກຳເນີດຂອງປະຊາຊາດຈີນ, ໃນໄລຍະສົງຄາມຕໍ່ຕ້ານຍີ່ປຸ່ນ, ຜູ້ຮຸກຮານໄດ້ຕີມາຮອດເຂດລ້ອງແມ່ນ້ຳເຫຼືອງ, ສະຖານະການຄັບຂັນອັນຕະລາຍທີ່ສຸດ. ໃນເວລານັ້ນ, ປະຊາຊົນຈີນບາກບັ່ນລຸກຂຶ້ນຕໍ່ຕ້ານຢ່າງກ້າຫານ, ໄດ້ເປັ່ງສຽງຮ້ອງວ່າ" ພິທັກບ້ານເກີດ, ພິທັກແມ່ນ້ຳເຫຼືອງ, ພິທັກທົ່ວປະເທດຈີນ". ເຊີນຟັງເພງ"ປາວເວີ້ຍຫວງເຫີ"---ພິທັກແມ່ນ້ຳເຫຼືອງ.
ທີ່ຟັງມານັ້ນແມ່ນເພງ"ປາວເວີ້ຍຫວງເຫີ"---ພິທັກແມ່ນ້ຳເຫຼືອງ, ເຊິ່ງແມ່ນເພງທີ 8 ໃນປະມວນເພງ"ຮ້ອງຮວມໝູ່ແມ່ນ້ຳເຫຼືອງ", ເພງນີ້ໄດ້ວາດພາບອັນຍິ່ງໃຫຍ່ສະຫງ່າຢ່າງມີຊີວິດຊີວາໃນເວລາທະຫານກອງຫຼອນມຸ່ງໜ້າໄປສູ່ສະໜາມລົບ, ພິທັກຮັກສາແມ່ນ້ຳເຫຼືອງ ພິທັກຮັກສາທົ່ວປະເທດຈີນ. ຕໍ່ໄປເຊີນຟັງເພງຮ້ອງດ່ຽວອີກເພງໜຶ່ງໃນປະມວນເພງ"ຮ້ອງຮວມໝູ່ແມ່ນ້ຳເຫຼືອງ"ຄືເພງ"ຫວງເຫີຊົ້ງ", ສັນລະເສີນແມ່ນ້ຳເຫຼືອງ.
ເພງ"ສັນລະເສີນແມ່ນ້ຳເຫຼືອງ" ແມ່ນເພງທີ 3 ໃນປະມວນເພງຮ້ອງຮວມໝູ່ແມ່ນ້ຳເຫຼືອງ. ເນື້ອເພງມີຄວາມໝາຍວ່າ: ແມ່ນ້ຳເຫຼືອງ, ເຈົ້າຈັ່ງແມ່ນເຂັ້ມແຂງຍິ່ງໃຫຍ່, ປະກົດຕົວຢູ່ທົ່ງພຽງອາຊີເໝືອນດັ່ງມະນຸດມະຫາສານ, ຮ່າງກາຍອັນລ້ຳສັນວິລະອາດຫານຂອງເຈົ້າ, ແມ່ນສິ່ງກັ້ງບັງຂອງປະຊາຊາດເຮົາ. ໂອ້, ແມ່ນ້ຳເຫຼືອງ, ເຈົ້າແສນທະນົງອົງອາດ, ໄຫຼຟາດຟົ້ງ ກະທົບໄກແສນໂຍດ, ວາແຂນເຫຼັກແຂນທອງຂອງເຈົ້າໂອບອຸ້ມສອງຝັ່ງເໜືອໃຕ້. ເພງນີ້ໄດ້ສະແດງໃຫ້ເຫັນພາບອັນຍິ່ງໃຫຍ່ສະຫງ່າຂອງແມ່ນ້ຳເຫຼືອງ, ໄດ້ເຊີດຊູກຳລັງໃຈນັກລົບຢ່າງແຂງແຮງ.
ໃນໄລຍະສົງຄາມຕໍ່ຕ້ານຍີ່ປຸ່ນ, ກອງທັບສາຍທີ 8 ແລະກອງທັບທີ 4 ໃໝ່ທີ່ນຳໂດຍພັກກອມມູນິດຈີນໄດ້ດຳເນີນການສູ້ລົບຢ່າງທໍລະຫົດອົດທົນໃນສະໜາມລົບແນວຫລັງສັດຕູ, ໄດ້ປະກອບສ່ວນອັນໃຫຍ່ຫລວງເຂົ້າໃນສະໜາມລົບຕ້ານຟັດຊິດດ້ວຍເລືອດເນື້ອຂອງຕົນເອງ. ເພງເດີນກອງທັບສາຍທີ 8 ແຕ່ງໃນສະໄໝຕໍ່ຕ້ານຍີ່ປຸ່ນ, ສະໄໝນັ້ນ, ຝ່າຍສັດຕູມີກຳລັງແຂງແຮງກວ່າຝ່າຍເຮົາ. ເພງນີ້ເຕັມໄປດ້ວຍອາລົມຟົດຟື້ນຫ້າວຫັນ, ສະແດງໃຫ້ເຫັນຄວາມກ້າຫານບຸກໜ້າບືນຕົວຂອງນັກລົບທັງຫຼາຍ, ແລະສະແດງໃຫ້ເຫັນຄວາມໝັ້ນໃຈຂອງນັກແຕ່ງເພງທີ່ເຊື່ອໝັ້ນວ່າ ສົງຄາມຕໍ່ຕ້ານຍ່ອມຈະໄດ້ຮັບໄຊຊະນະ. ພາຍຫລັງມາ, ເພງນີ້ໄດ້ປ່ຽນຊື່ເປັນ"ເພງເດີນກອງທັບປົດປ່ອຍປະຊາຊົນຈີນ". ຕໍ່ໄປເຊີນຟັງໄດ້ເລີຍ.
ໃນສົງຄາມຕໍ່ຕ້ານ, ກອງທັບທີ 4 ໃໝ່ຂອງຈີນແມ່ນຖັນແຖວທີ່ເຂັ້ມແຂງ, ພວກເຂົາເຈົ້າຂ້າສັດຕູຢ່າງພິລະອາດຫານ, ກາຍເປັນກຳລັງເຂັ້ມແຂງກອງໜຶ່ງໃນຖັນແຖວການຕໍ່ຕ້ານຍີ່ປຸ່ນຂອງຈີນ. ເຊີນຟັງເພງ"ກອງທັບທີ 4 ໃໝ່".
ຕໍ່ໄປເຊີນຟັງເພງ"ຢິວຈີ່ຕຸ້ຍເກີ່"----ເພງກອງຫຼອນ. ເນື້ອເພງມີຢູ່ວ່າ: "ບໍ່ມີຂອງກິນ, ບໍ່ມີເຄື່ອງນຸ່ງ, ສັດຕູຫາກຈະສົ່ງມາໃຫ້; ບໍ່ມີປືນ, ບໍ່ມີລະເບີດ, ສັດຕູຫາກຈະຜະລິດໃຫ້ພວກເຮົາ. ພວກເຮົາເກີດແລະເຕີບໃຫຍ່ຢູ່ແຫ່ງນີ້, ດິນແດນທຸກຂໍ້ມືແມ່ນຂອງພວກເຮົາ, ບໍ່ວ່າຜູ້ໃດມາຍຶດຄອງ, ພວກເຮົາກໍຈະສູ້ລົບກັບເຂົາຈົນເຖິງທີ່ສຸດ." ເພງກອງຫຼອນທີ່ແຕ່ງເມື່ອ 60 ປີກ່ອນເຄີຍປຸກລະດົມໃຫ້ຊາວໜຸ່ມທີ່ຮັກຊາດທັງຫລາຍໄປສູ່ແນວໜ້າຕໍ່ຕ້ານຍີ່ປຸ່ນ, ສູ້ລົບກັບສັດຕູຢ່າງພິລະອາດຫານ, ຈົນຮອດຊູ່ມື້ນີ້ ເພງນີ້ກໍຍັງເຜີຍແຜ່ໃນໝູ່ມວນຊົນຢ່າງກວ້າງຂວາງ. ຕໍ່ໄປເຊີນຟັງເພງນີ້ໄດ້ເລີຍ:
ເອົາລະ ທ່ານຜູ້ຟັງທີ່ເຄົາລົບ, ລາຍການຢ່ອນອາລົມໃນວັນເສົາພາກນີ້ຂໍຈົບລົງພຽງທໍ່ນີ້, ຂອບໃຈທ່ານທີ່ຮັບຟັງ, ສະບາຍດີ.
|
