|
ປີນີ້ແມ່ນສົງຄາມຈີນຕໍ່ຕ້ານຍີ່ປຸ່ນແລະສົງຄາມຕ້ານຟັດຊິດໂລກໄດ້ຮັບໄຊຊະນະຄົບຮອບ60ປີ.ໃນຂະນະທີ່ຄົນທັງຫຼາຍຈັດການເຄື່ອນໄຫວລະລຶກດ້ວຍຮູບການຕ່າງໆ, ກໍໄດ້ຮັບຮູ້ອີກເທື່ອໜຶ່ງຕໍ່ສົງຄາມບັ້ນນັ້ນເຊິ່ງບໍ່ພຽງແຕ່ເຮັດໃຫ້ປະເທດຖືກຮຸກຮານປະສົບໄພພິບັດແລະກໍໄດ້ເຮັດໃຫ້ປະຊາຊົນປະເທດຜູ້ຮຸກຮານປະສົບເຄາະຮ້າຍເຊັ່ນດຽວກັນ,ຮັບຮູ້ຜົນສະທ້ອນຂອງສົງຄາມຮຸກຮານແລະຕ້ານການຮຸກຮານລະຫວ່າງຈີນຍີ່ປຸ່ນທີ່ມີຕໍ່ການພົວພັນຈີນຍີ່ປຸນ. ພວກເຮົາຈະສະເໜີຊາວໜຸ່ມຈີນແມ່ນຮັບຮູ້ສົງຄາມບັ້ນນັ້ນແນວໃດ,ແລະມີທັດສະນະແນວໃດຕໍ່ຜົນສະທ້ອນຕໍ່ການພົວພັນຈີນຍີ່ປຸ່ນຂອງສົງຄາມບັ້ນນັ້ນ.
ແຕ່ເຫດການຂົວລູໂກ່ວສ້ຽວເມື່ອວັນທີ7ກໍລະກົດປີ1937ເຊິ່ງຍີ່ປຸ່ນກໍ່ສົງຄາມຮຸກຮານຈີນຢ່າງຮອບດ້ານ,ຕະຫຼອດຮອດຍີ່ປຸ່ນປະກາດຍອມຈຳນົນຢ່າງບໍ່ມີເງື່ອນໄຂໃນວັນທີ15ສິງຫາປີ1945,ປະຊາຊົນຈີນໄດ້ດຳເນີນການຕໍ່ສູ້ຢ່າງລຳບາກກາກກຳເປັນເວລາ8ປີ,ໄດ້ເສຍຄ່າຕອບແທນອັນໜັກໜ່ວງ.ຕາມສະຖິຕິ,ໃນໄລຍະສົງຄາມຕໍ່ຕ້ານຍີ່ປຸ່ນ,ຈີນມີທະຫານແລະປະຊາຊົນ35ລ້ານກວ່າຄົນຕາຍແລະບາດເຈັບ,ຄວາມເສຍຫາຍດ້ານຊັບສິນແລະການສິ້ນເປືອງໃນສົງຄາມບັນລຸ560ຕື້ກວ່າໂດລາສະຫະລັດ.ເຖິງວ່າສົງຄາມໄດ້ຜ່ານໄປເປັນເວລາ60ປີແລ້ວ,ແຕ່ວ່າບາດແຜສົງຄາມຂອງປະຊາຊົນຈີນຄືວ່າຍັງບໍ່ທັນໄດ້ຮຳໃຫ້ດີເທົ່າທີ່ຄວນ.
ທ້າວຊົ້ງຈ່ຽງນານ ນັກສຶກສາປີທີສາມຂອງມະຫາວິທະຍາໄລອຸດສາຫະກຳການຊ່າງນານກິ່ງເຫັນວ່າ,ສົງຄາມບັ້ນນັ້ນແມ່ນສົງຄາມລອງລິດກັນລະຫວ່າງຄວາມເປັນທຳກັບຄວາມຊົ່ວຮ້າຍ.ທ້າວຊົ້ງຈ່ຽງນານກ່າວວ່າ:"ສົງຄາມບັ້ນນັ້ນແມ່ນຄົນຈີນຜູ້ໃດກໍບໍ່ຄວນຫຼົງລືມ.ເຖິງວ່າຂ້ອຍບໍ່ໄດ້ປະສົບສົງຄາມບັ້ນນັ້ນ,ແຕ່ຜ່ານຈາກໂທລະພາບ,ຮູບເງົາແລະປຶ້ມໜັງສື,ຂ້ອຍໄດ້ຮັບຮູ້ວ່າປະຫວັດສາດຕອນນັ້ນເປັນໜ້າສັງເວດ.ໃນນາມເປັນຊາວໜຸ່ມຍຸກປັດຈຸບັນ, ພວກເຮົາຄວນຈື່ຈຳປະຫວັດສາດໄວ້ໃຫ້ດີ."
ບັນຫາປະຫວັດສາດໄດ້ກ່ຽວພັນກັບບັນຫາຮັບຮູ້ສົງຄາມບັ້ນນັ້ນທີ່ນຳເອົາໄພພິບັດອັນໜັກໜ່ວງມາສູ່ປະຊາຊົນຈີນແລະຍີ່ປຸ່ນ,ຍິ່ງກ່ຽວພັນກັບຄວາມຮັກແພງປະຊາຊາດຂອງປະຊາຊົນຈີນ.ການສຳຫຼວດລາຍໜຶ່ງຂອງເວບໄຊໂຊຮູ ເຊິ່ງເປັນໜຶ່ງໃນເວບໄຊພາສາຈີນທີ່ມີຄົນເຂົ້າຊົມຫຼາຍກວ່າໝູ່ໃນໂລກສະແດງໃຫ້ເຫັນວ່າ,ຜູ້ເຂົ້າຮ່ວມການສຳຫຼວດ66%ຂຶ້ນໄປເຫັນວ່າຈະປະຕິບັດຕໍ່ບັນຫາປະຫວັດສາດແນວໃດແມ່ນປັດໄຈສຳຄັນທີ່ກະທົບກະເທືອນການຂະຫຍາຍຕົວຂອງການພົວພັນຈີນຍີ່ປຸ່ນ.ການສຳຫຼວດຍັງສະແດງໃຫ້ເຫັນວ່າ,ຜູ້ເຂົ້າຮ່ວມການສຳຫຼວດຫຼາຍກວ່າ97%ຄັດຄ້ານຢ່າງຮຸນແຮງຕໍ່ຜູ້ນຳຍີ່ປຸ່ນທີ່ໄປນະມັດຊະການວັດຢາຊືຄູນິທີ່ບູຊາປ້າຍດວງວິນຍານຂອງອາຊະຍາກອນຂັ້ນກ.ໃນສົງຄາມໂລກຄັ້ງທີສອງ.
ທ້າວຫານປິ່ນຈ້າວ ນັກສຶກສາປີທີສອງຂອງວິທະຍາໄລສ້າງຄູອານຢາງແຂວງເຮີນານ ພາກກາງຂອງຈີນແມ່ນໜຶ່ງໃນຊາວໜຸ່ມຈຳນວນຫຼວງຫຼາຍທີ່ຜ່ານຈາກອິນເຕິເນັດກ່າວປະນາມແລະປະທ້ວງທ່ານໂຄອີຈູມີຈູນີຊີໂລ ນາຍົກລັດຖະມົນຕີຍີ່ປຸ່ນໄປນະມັດສະການວັດຢາຊືຄູນິແລະພວກປີກຂວາສ່ວນໜ້ອຍຂອງຍີ່ປຸ່ນເຈດຕະນາບິດເບືອນປະຫວັດການຮຸກຮານຈີນ.ທ້າວຫານປິ່ນຈ້າວກ່າວວ່າ,ຕາບໃດຄົນຍີ່ປຸ່ນສ່ວນໜ້ອຍບິດເບືອນແລະປະຕິເສດບໍ່ຮັບຮູ້ປະຫວັດການຮຸກຮານຈີນ,ເຂົາກັບພວກໝູ່ຮຽນລ້ວນແຕ່ຈະສືບຕໍ່ປະກອບຄຳຄິດຄຳເຫັນໃນອິນເຕິເນັດສາກົນ,ກ່າວປະນາມແລະປະທ້ວງຕໍ່ຄົນຍີ່ປຸ່ນເຫຼົ້ານີ້.ທ້າວຫານປິ່ນຈ້າວກ່າວວ່າ:
"ການກະທຳຂອງຄົນຍີ່ປຸ່ນສ່ວນໜ້ອຍເຫຼົ່ານັ້ນແມ່ນຕົວະຕົນເອງທັງຫຼອກຕົ້ມຜູ້ອື່ນ,ຫຼັກຖານປະຫວັດສາດຫຼາຍຢ່າງຈົນຮອດປັດຈຸບັນກໍບໍ່ສາມາດລຶບລ້າງໄດ້,ເຊິ່ງລວມທັງການສັງຫານໂຫດທີ່ນານກິ່ງ,ລູກລະເບີດອາຍພິດທີ່ກອງທະຫານຍີ່ປຸ່ນຜູ້ຮຸກຮານຈີນປະຖິ້ມຢູ່ເມືອງສີສີຮາເອີພາກຕາເວັນອອກສຽງເໜືອຈີນເຊິ່ງທຳຮ້າຍປະຊາຊົນຈີນໃນປັດຈຸບັນ,ຍັງມີລູກລະເບີດອາຍພິດຂອງກອງທະຫານຍີ່ປຸ່ນຜູ້ຮຸກຮານຈີນທີ່ປະຖິ້ມຢູ່ແຂວງກວາງຕຸ້ງໄດ້ທຳຮ້າຍປະຊາຊົນຈີນໃນຫວ່າງມໍ່ໆນີ້.ເລື່ອງຈິງເຫຼົ່ານີ້,ພວກເຂົາເຈົ້າຈະລຶບລ້າງບໍ່ໄດ້ເລີຍ."
ປັດຈຸບັນ,ຊາວໜຸ່ມຈີນຈຳນວນຫຼວງຫຼາຍລ້ວນແຕ່ໄດ້ຜ່ານຈາກເວທີປາໄສເທິງເວັບໄຊ,ເວັບໄຊລະລຶກສົງຄາມຕໍ່ຕ້ານຍີ່ປຸ່ນແລະເວັບໄຊຕ່າງໆ,ປະກາດຄວາມເຫັນສ່ວນຕົວຢູ່ເທິງອິນເຕີເນັດ.ເວັບໄຊຂໍ້ມູນປະຫວັດສາດກ່ຽວກັບເຫດການສັງຫານໂຫດທີ່ນານກິ່ງແມ່ນເວັບໄຊແຫ່ງໜຶ່ງໃນເວັບໄຊລະລຶກສົງຄາມຕໍ່ຕ້ານຍີ່ປຸ່ນຈຳນວນຫຼວງຫຼາຍຂອງຈີນ.ຕາມໄດ້ຊາບ,ເວັບໄຊດັ່ງກ່າວຫາກໍ່ສ້າງຂຶ້ນໃນຕົ້ນເດືອນກໍລະກົດ,ພາຍໃນເວລາບໍ່ຮອດໜຶ່ງເດືອນ,ກໍມີ5ແສນເທື່ອຄົນເຂົ້າຊົມເວັບໄຊຕໍ່ມື້.
ຍີ່ປຸ່ນບໍ່ຮັບຮູ້ແລະຊຳລະບັນຫາປະຫວັດສາດຢ່າງຖືກຕ້ອງເຊິ່ງເປັນມູນເຫດໂດຍກົງທີ່ພາໃຫ້ຊາວໜຸ່ມຈີນຂັດໃຈຕໍ່ຍີ່ປຸ່ນທີ່ຢາກກາຍເປັນປະເທດມົນຕີຖາວອນຂອງສະພາຄວາມໝັ້ນຄົງສະຫະປະຊາຊາດ.ນາງວາງອິງ ນັກສຶກສາປະລິຍາໂທປີທີສາມຂອງມະຫາວິທະຍາໄລສ້າງຄູປັກກິ່ງໄດ້ໃຫ້ສຳພາດຕໍ່ນັກຂ່າວໂດຍກ່າວວ່າ:
"ປະເທດໜຶ່ງທີ່ຢາກຕາງໜ້າອາຊີ,ເສີມຂະຫຍາຍບົດບາດຫຼາຍກວ່າເກົ່າໃນສະຫະປະຊາຊາດ,ແຕ່ຊ້ຳພັດບໍ່ສາມາດຊຳລະການພົວພັນກັບປະເທດໃກ້ຄຽງເປັນຢ່າງດີ,ຄັນຊັ້ນ,ລັກສະນະຕົວແທນຂອງປະເທດນັ້ນໃນສະຫະປະຊາຊາດແມ່ນເປັນໜ້າສົງໃສ.ປີນີ້ຄ້ອມພໍດີແມ່ນຍີ່ປຸ່ນປະລາໄຊໃນສົງຄາມໂລກຄັ້ງທີສອງຄົບຮອບ60ປີ,ເວົ້າສຳລັບຍີ່ປຸ່ນແລ້ວ,ພໍດີແມ່ນໂອກາດດີທີ່ສຸດສຳລັບເຂົາຊຳລະບັນຫາປະຫວັດສາດຂອງຕົນໃຫ້ດີ."
ເຖິງວ່າແນວນັ້ນກໍຕາມ,ຊາວໜຸ່ມຈີນສ່ວນຫຼາຍຍັງຄົງຖືທ່າທີທີ່ອ່າວມີສະຕິສຳປະຊັນຍະໃນດ້ານກວມລວມຕໍ່ການຂະຫຍາຍການພົວພັນຈີນຍີ່ປຸ່ນ.ການສຳຫຼວດຂອງໜັງສືພິມສະຕະວັດທີ21ຂອງຈີນສະແດງໃຫ້ເຫັນວ່າ,ມີຜູ້ເຂົ້າຮ່ວມການສຳຫຼວດ51%ຂຶ້ນໄປກ່າວວ່າ,ຍິນດີໄປມາຫາສູ່ກັນກັບຊາວໜຸ່ມເຍົາວະຊົນຍີ່ປຸ່ນແລະເປັນເພື່ອນກັນ.
ທ້າວຫານປິ່ນຈ້າວກ່າວວ່າ,ດຽວນີ້ແມ່ນຍຸກສະໄໝສັນຕິພາບ,ເຊື່ອວ່າມວນຊົນຍີ່ປຸ່ນສ່ວນຫຼາຍທີ່ສຸດແມ່ນເຫັນດີເຫັນພ້ອມນຳຈີນຍີ່ປຸ່ນສ້າງການພົວພັນໄມຕີຈິດ.ທ້າວຫານປິ່ນຈ້າວກ່າວວ່າ:"ຊາວໜຸ່ມໄດ້ເປັນເຈົ້າຂອງອະນາຄົດໃນລະດັບສ່ວນ ຫຼາຍ,ຈີນຍີ່ປຸ່ນຄວນເພີ່ມທະວີການໄປມາຫາສູ່ກັນລະຫວ່າງຊາວໜຸ່ມ,ໃຫ້ຊາວໜຸ່ມທຳຄວາມເຂົ້າໃຈກັນໃນການແລກປ່ຽນ,ແລະຖືປະຫວັດສາດເປັນແວ່ນແຍງ,ອວ່າຍໜ້າໄປສູ່ອະນາຄົດຢ່າງຖືກຕ້ອງ."
ຕໍ່ບັນຫາທີ່ປະກົດອອກມາໃນການພົວພັນຈີນຍີ່ປຸ່ນ,ຜູ້ເຂົ້າຮ່ວມການສຳຫຼວດສ່ວນຫຼາຍລ້ວນແຕ່ໄດ້ປະຕິບັດຕໍ່ຢ່າງຖືກຕ້ອງ.ໃນເວລາໃຫ້ສຳພາດຕໍ່ນັກຂ່າວ,ທ່ານນາງວາງຫາຍອິງ ພະນັກງານຈີນຂອງກຸ່ມບໍລິສັດດຼາກັອນ ສີສ໌(Dragon Ease Groop ) ສາຂາຊຽງໄຮ້ເຫັນວ່າ:
"ການແລກປ່ຽນດ້ານເສດຖະກິດລະຫວ່າງຈີນຍີ່ປຸ່ນໄດ້ນຳເອົາຜົນປະໂຫຍດຕົວຈິງຈຳນວນຫຼວງຫຼາຍມາໃຫ້ປະຊາຊົນທັງສອງປະເທດ,ການແລກປ່ຽນເສດຖະກິດແນວນີ້ແມ່ນເຮັດໃຫ້ສອງຝ່າຍຕ່າງໄດ້ຮັບຜົນປະໂຫຍດ,ຫວັງວ່າການພົວພັນເສດຖະກິດການຄ້າລະຫວ່າງຈີນຍີ່ປຸ່ນຈົ່ງຂະຫຍາຍຕົວຢ່າງປອດໃສແລະໝັ້ນທ່ຽງ.ພ້ອມກັນນັ້ນ,ຂ້າພະເຈົ້າເຫັນວ່າພາຍໃຕ້ການຊຸກຍູ້ຂອງການພົວພັນເສດຖະກິດການຄ້າແລະການພົວພັນພື້ນເມືອງລະຫວ່າງຈີນຍີ່ປຸ່ນ,ການພົວພັນທາງການເມືອງລະຫວ່າງຈີນຍີ່ປຸນຍ່ອມຈະພົ້ນຈາກເງົາມືດຂອງບັນຫາປະຫວັດສາດ."
|
