|
ໃນຊູ່ມື້ນີ້ທີ່ເສດຖະກິດພັດທະນາຢ່າງໄວພະລັນ,ຄອມພິວເຕີມືຖືນັບມື້ນັບກາຍເປັນສິ່ງຕິດຕົວທີ່ຂາດບໍ່ໄດ້ຂອງຊັ້ນຄົນຄໍຂາວຈຳນວນໜຶ່ງ. ແຕ່ວ່າ,ໃນຂະນະທີ່ທ່ານເປີດຄອມພິວເຕີມືຖືນັ້ນທ່ານເຄີຍຄິດບໍ່ວ່າມັນຈະກະທົບກະເທືອນເຖິງສຸຂະພາບຂອງທ່ານ?
 ປັດຈຸບັນ,ຄົນນັບມື້ນັບຫຼາຍໄດ້ໃຊ້ຄອມພິວເຕີມືຖືເປັນພາຫະນະເຮັດການ,ພ້ອມກັນນັ້ນ ຄອມພິວເຕີຊະນິດນີ້ກໍໄດ້ນຳເອົາຄວາມເຈັບໄຂ້ທີ່ລຳຄານໃຈມາໃຫ້ພວກເຂົາເຈົ້າ. ຕົວຢ່າງຄືຄໍແລະຄໍ່ມືມັກເຈັບ,ກະດູກເສື່ອມລົງໄວກວ່າເກົ່າ.
ເມື່ອທຽບກັບຄອມພິວເຕີຕັ້ງໂຕະແລ້ວ,ຄອມພິວເຕີມືຖືມີຂໍ້ບົກພ່ອງໃນການອອກແບບຢ່າງເດັ່ນຊັດ,ໃນນັ້ນ ຂໍ້ຂາດຕົກບົກພ່ອງທີ່ແກ້ໄຂຍາກແມ່ນຄີບອດຫ່າງຈາກໜ້າຈໍໃກ້ໂພດ. ຜູ້ຊ່ຽວຊານຂອງສະມາຄົມກິດຈະການເຄື່ອງຈັກມະນຸດຂອງອາເມລິກາເວົ້າວ່າ,"ໃນເວລາທ່ານໃຊ້ຄອມພິວເຕີມືຖືນັ້ນ,ທ່ານຫວັງໃຫ້ຫົວແລະຄໍຂອງທ່ານຮັກສາທ່າສະບາຍຫຼືທ່ານສາມາດເຮັດໃຫ້ແຂນຂອງທ່ານສະບາຍ,ແຕ່ວ່າໃນເວລາໃຊ້ຄອມພິວເຕີມືຖືນັ້ນ ຢາກເຮັດທັງສອງຢ່າງດັ່ງກ່າວພ້ອມກັນແມ່ນເປັນໄປບໍ່ໄດ້."
ປີ 2004 ຈຳນວນຄອມພິວເຕີມືຖືທີ່ຈຳໜ່າຍໃນທົ່ວໂລກແມ່ນ 49 ລ້ານເຄື່ອງ,ເກືອບເປັນ 2 ເທົ່າຂອງປີ 2000. ບຸກຄົນວິເຄາະຄາດວ່າ,ເມື່ອຮອດປີ 2008,ຈຳນວນຈຳໜ່າຍຄອມພິວເຕີມືຖືຈະລື່ນກາຍຄອມພິວເຕີຕັ້ງໂຕະ.
ນັກຄົ້ນຄວ້າຂອງສະຖາບັນຄົ້ນຄວ້າກິດຈະການເຄື່ອງຈັກມະນຸດແຫ່ງມະຫາວິທະຍາໄລລັດໂອໄຮໂອເວົ້າວ່າ,"ປັດຈຸບັນຍັງບໍ່ໄດ້ລົງເລິກຄົ້ນຄວ້າຜົນສະທ້ອນຂອງຄອມພິວເຕີມືຖືທີ່ມີຕໍ່ສຸຂະພາບ,ແຕ່ການຄົ້ນຄວ້າລາຍໜຶ່ງໃນປີ 2002 ສະແດງໃຫ້ເຫັນວ່າ,ຈຳນວນຄົນໃຊ້ຄອມພິວເຕີມືຖືທີ່ຈົ່ມວ່າເຈັບຮ່າງກາຍພ້ອມດ້ວຍບ່ອນເຈັບຫຼາຍກວ່າຜູ້ໃຊ້ຄອມພິວເຕີຕັ້ງໂຕະ."
ນີ້ແມ່ນຍ້ອນວ່າ,ຜູ້ໃຊ້ຄອມພິວເຕີຕັ້ງໂຕະສາມາດປັບຄວາມສູງຂອງໜ້າຈໍໃຫ້ຢູ່ບ່ອນສູງດຽວກັນກັບຕາ,ແລະວາງຄີບອດຢູ່ລຸ່ມໜ້າຈໍປະມານ 20 ນິ້ວ,ເມື່ອເປັນແນວນີ້ ການໃຊ້ຄອມພິວເຕີກໍສາມາດຮັກສາທ່າທີ່ຂ້ອນຂ້າງສະບາຍ. ຜູ້ຊ່ຽວຊານເຕັກນິກກ່າວວ່າ,"ຜູ້ໃຊ້ຄອມພິວເຕີຕັ້ງໂຕະກໍມີຫຼາຍໆຄົນຈົ່ມວ່າເຈັບກ້າມເນື້ອແລະກະດູກ,ແຕ່ຂໍ້ຂາດຕົກບົກພ່ອງໃນການອອກແບບຄອມພິວເຕີມືຖືແຮ່ງພົ້ນເດັ່ນ,ແລະເປັນໂທດຕໍ່ສຸຂະພາບຮ້າຍແຮງກວ່າ." ຜູ້ຊ່ຽວຊານດ້ານວິທະຍາສາດກິດຈະການເຄື່ອງຈັກມະນຸດກ່າວວ່າ,ເພື່ອແກ້ໄຂຄວາມບໍ່ສົມເຫດສົມຜົນໃນການອອກແບບຄອມພິວເຕີມືຖື,ໃນເວລາແກ້ໄຂນັ້ນ ຄວນຖອດຖອນບົດຮຽນຂອງຄອມພິວເຕີຕັ້ງໂຕະ,ໃຫ້ຜູ້ໃຊ້ຄອມພິວເຕີມືຖືສາມາດຮັກສາທ່າຄ່ອງແຄ້ວໃນເວລາໃຊ້ຄອມພິວເຕີມືຖື.
ເຄື່ອງປະກອບຂອງຄອມພິວເຕີມືຖືທີ່ໝາຍຈະປ່ຽນແປງສະພາບທີ່ກິດຈະການເຄື່ອງຈັກມະນຸດບໍ່ສົມເຫດສົມຜົນນັ້ນກໍໄດ້ປະກົດອອກມາເລື້ອຍໆ. ໃນດ້ານນີ້,ມາວສ໌ແລະຄີບອດບໍ່ມີສາຍທີ່ບໍລິສັດໂລກີເທັກອາເມລິກາຜະລິດນັ້ນໄດ້ນຳໜ້າຜູ້ເຮັດວຽກງານຂະແໜງດຽວກັນ. ໂຮງງານຜະລິດບາງຫຼັງຍັງໄດ້ຜະລິດຂາຕັ້ງຄອມພິວເຕີມືຖື. ບໍລິສັດເທໂບໂທເທໄດ້ຈຳໜ່າຍຂາຕັ້ງປຼາສ໌ຕິກທີ່ມີຂາຫົດຫູ່ໄດ້,ລາຄາ 50 ໂດລາສະຫະລັດ,ຫຼັງຈາກພັບເຂົ້າແລ້ວ,ໃຫຍ່ສ່ຳຄອມພິວເຕີມືຖື,ໜັກ 3 ປອນ. ແຕ່ບຸກຄົນວິເຄາະຕະຫຼາດຈຳນວນໜຶ່ງເຫັນວ່າ,ຜະລິດຕະພັນເຫຼົ່ານີ້ບໍ່ມີປະໂຫຍດຫຍັງຕໍ່ຜູ້ໃຊ້ຄອມພິວເຕີມີຖືທີ່ເຮັດວຽກຢູ່ນອກປະຈຳ.
ບໍລິສັດຜະລິດຄອມພິວເຕີສຳຄັນຈຳນວນໜຶ່ງກໍເລີ່ມເອົາໃຈໃສ່ນຳການແກ້ໄຂບັນຫາດັ່ງກ່າວ. ໃນຕົ້ນປີນີ້ ບໍລິສັດໂທຊີບາຍີ່ປຸ່ນປະກາດວ່າ,ຈະຜະລິດຄອມພິວເຕີມືຖືທີ່ແບ່ງໜ້າຈໍກັບຄີບອດເປັນສອງພາກສ່ວນ,ຜູ້ໃຊ້ຄອມພິວເຕີດັ່ງກ່າວຈະສາມາດຮັກສາທ່າຄ່ອງແຄ້ວກວ່າເກົ່າ. ບາງບໍລິສັດພວມທົດລອງຄີບອດລາແຊຊະນິດໜຶ່ງ,ສາມາດສ່ອງແສງພາບຂອງຄີບອດຢູ່ໜ້າພຽງໃດໆ,ເຮັດໃຫ້ຜູ້ໃຊ້ສາມາດໃຊ້ຄອມພິວເຕີຢ່າງສະບາຍ,ປ່ຽນແປງຄວາມບໍ່ສົມເຫດສົມຜົນໃນການອອກແບບຄອມພິວເຕີມືຖື. ເຕັກນິກລາຍນີ້ນັບມື້ນັບສຸກງອມແລ້ວ.
ບັນດາຜູ້ຊ່ຽວຊານກ່າວວ່າ,ເຕັກນິກລາຍນີ້ປະກົດຕົວອອກມາຍິ່ງໄວຍິ່ງດີ,ເພາະວ່າພວກເຂົາເຈົ້າໄດ້ສັງເກດເຫັນແລ້ວວ່າ, ຄອມພິວເຕີມືຖືມີຜົນສະທ້ອນທາງລົບຕໍ່ພວກເດັກນ້ອຍນັບມື້ນັບໜັກໜ່ວງ. ສິ່ງຮ້າຍແຮງກວ່ານັ້ນແມ່ນ,ຫຼາຍຄົນເປັນຫ່ວງວ່າ,ຜູ້ທີ່ສອດຄ່ອງກັບຄອມພິວເຕີມືຖືທີ່ມີຂໍ້ຂາດຕົກບົກພ່ອງຢ່າງເດັ່ນຊັດໃນດ້ານອອກແບບໃນຄາວຍັງໜຸ່ມນັ້ນ ຕໍ່ໄປພາຍໜ້າຈະປະກົດເຫັນວ່າຢາກປ່ຽນແປງທ່າທາງຂອງຕົນແມ່ນເລື່ອງຍາກທີ່ສຸດ.
|
