|
ຕາມຂ່າວCRI:ວັນທີ 28 ສິງຫາ,ສະພາຂ້າມຜ່ານຂອງອີຣັກໄດ້ຮັບເອົາຮ່າງລັດຖະທຳມະນູນສະບັບໃໝ່ທີ່ຄະນະກຳມະການຮ່າງລັດຖະທຳມະນູນຍື່ນໃຫ້ໃນມື້ດຽວກັນ,ແຕ່ວ່າ,ນິກາຍຊຸນນິດຍັງຄົງປະຕິເສດບໍ່ຮັບເອົາຮ່າງລັດຖະທຳມະນູນສະບັບດັ່ງກ່າວ.
ວັນທີ 28 ສິງຫາ,ສະພາຂ້າມຜ່ານບໍ່ໄດ້ລົງຄະແນນສຽງຕໍ່ຮ່າງລັດຖະທຳມະນູນ.ໃນງານຖະແຫຼງການທີ່ຈັດຂຶ້ນຫຼັງຈາກນັ້ນ,ທ່ານທາລາປານີ ປະທານາທິບໍດີອີຣັກເວົ້າວ່າ,ຮ່າງລັດຖະທຳມະນູນອີຣັກໄດ້ຮ່າງອອກຢ່າງເປັນທາງການແລ້ວ,ບໍ່ຕ້ອງລົງຄະແນນສຽງ,ອີຣັກຈະເອົາປະຊາມະຕິທົ່ວປວງຊົນກ່ຽວກັບຮ່າງລັດຖະທຳມະນູນສະບັບດັ່ງກ່າວໃນກາງເດືອນຕຸລາຕາມເວລາກຳນົດ.ທ່ານທາລາປານີກ່າວວ່າ,ນິກາຍຊຸນນິດສະຫງວນຄວາມເຫັນຂອງຕົນທີ່ມີຕໍ່ຮ່າງລັດຖະທຳມະນູນນັ້ນ,ພຽງແຕ່ແມ່ນພາກສ່ວນໜຶ່ງຂອງຂະບວນວິວັດປະຊາທິປະໄຕເທົ່ານັ້ນ,ທ່ານຮຽກຮ້ອງໃຫ້ປະຊາຊົນອີຣັກຮັບເອົາຮ່າງລັດຖະທຳມະນູນສະບັບດັ່ງກ່າວ,ເພື່ອເຮັດໃຫ້ຂະບວນວິວັດທາງການເມືອງກ້າວເຂົ້າສູ່ໄລຍະໃໝ່ຢ່າງສະດວກ.
ວັນທີ 28 ສິງຫາ,ທ່ານບຸສ ປະທານາທິບໍດີອາເມລິກາໄດ້ຍ້ອງຍໍໃນລະດັບສູງວ່າ,ຮ່າງລັດຖະທຳມະນູນສະບັບໃໝ່ຂອງອີຣັກໄດ້ຮ່າງອອກນັ້ນແມ່ນອີຣັກໄດ້ຢ່ວງບາດກ້າວໜຶ່ງໄປສູ່ປະຊາທິປະໄຕລ້ວນໆ.ທ່ານຮຽກຮ້ອງໃຫ້ຊາວອີຣັກຕັ້ງໜ້າເຂົ້າຮ່ວມຂະບວນວິວັດທາງການເມືອງໃນບາດກ້າວຕໍ່ໄປ,ແລະທຳການຕົກລົງຢ່າງສະຫລາດໃນການເອົາປະຊາມະຕິທົ່ວປວງຊົນຕໍ່ຮ່າງລັດຖະທຳມະນູນທີ່ຈະຈັດຂຶ້ນໃນເດືອນຕຸລາ.
ວັນທີ 28 ສິງຫາ,ເຖິງວ່າຄະນະກຳມະການຮ່າງລັດຖະທຳມະນູນຈະປັບປຸງເນື້ອໃນສ່ວນໜຶ່ງອີກກ່ອນຍື່ນຮ່າງລັດຖະທຳມະນູນໃຫ້ສະພາກໍ່ຕາມ,ແຕ່ຜູ້ແທນນິກາຍຊຸນນິດ 15 ຄົນຂອງຄະນະກຳມະການຮ່າງລັດຖະທຳມະນູນຍັງຄົງເຫັນວ່າ,ການປັບປຸງໃນສຸດທ້າຍຍັງບໍ່ສາມາດເຮັດໃຫ້ນິກາຍຊຸນນິດພໍໃຈ.ທ່ານຢາວາ ຜູ້ນຳທາງການເມືອງນິກາຍຊຸນນິດ ຮອງປະທານາທິບໍດີແລະທ່ານຮາຊັນນີ ປະທານສະພາບໍ່ໄດ້ເຂົ້າຮ່ວມກອງປະຊຸມຂອງສະພາຂ້າມຜ່ານໃນວັນທີ 28 ສິງຫາ.ພາຍຫລັງສະພາຂ້າມຜ່ານຮັບເອົາຮ່າງລັດຖະທຳມະນູນແລ້ວ,ຜູ້ແທນຄະນະກຳມະການຮ່າງລັດຖະທຳມະນູນສັງກັດນິກາຍຊຸນນິດໄດ້ອອກຖະແຫລງການ,ປະກາດປະຕິເສດບໍ່ຮັບເອົາຮ່າງລັດຖະທຳມະນູນສະບັບນີ້.
ບຸກຄົນວິເຄາະເຫັນວ່າ,ຍ້ອນມີສາຍເຫດຕ່າງໆ,ເຖິງວ່າຮ່າງລັດຖະທຳມະນູນສະບັບໃໝ່ນີ້ໄດ້ປະກາດຢ່າງເປັນທາງການແລ້ວກໍ່ຕາມ,ແຕ່ອະນາຄົດເປັນແນວໃດຍັງບໍ່ຮູ້ເທື່ອ.
ກ່ອນອື່ນ,ຮ່າງລັດຖະທຳມະນູນສະບັບນີ້ບໍ່ໄດ້ແກ້ໄຂບັນຫາລະບອບສະຫະພັນ ເຊິ່ງເປັນຈຸດສຸມຂອງຄວາມຂັດແຍ່ງກັນລະຫວ່າງນິກາຍຊິອິດ ຊາວເຄິດແລະນິກາຍຊຸນນິດ,ຫາກແມ່ນເລື່ອນເວລາຕົກລົງບັນຫາຈະປະຕິບັດລະບອບສະຫະພັນຢ່າງລະອຽດແນວໃດຫຼືສ້າງຕັ້ງເຂດປົກຄອງຕົນເອງແນວໃດເປັນຕົ້ນ ໄປຮອດພາຍຫຼັງການເລືອກຕັ້ງສະພາໃນທ້າຍປີນີ້.ທັງນີ້ໄດ້ຝັງ"ໝາກໝີ່ນ"ໃຫ້ຂະບວນການສ້າງສາອີຣັກທາງການເມືອງຄືນໃໝ່ໃນຂ້າງໜ້າ.
ສອງ,ອີງຕາມຂໍ້ກຳນົດໃນລັດຖະທຳມະນູນຊົ່ວຄາວ,ໃນການເອົາປະຊາມະຕິທົ່ວປວງຊົນທີ່ຈະຈັດຂຶ້ນໃນເດືອນຕຸລາປີນີ້,ຖ້າວ່າຜູ້ມີສິດເລືອກຕັ້ງສອງສ່ວນສາມຂອງ 3 ແຂວງໃດໃນ 18 ແຂວງຂອງອີຣັກໄດ້ປ່ອນບັດຄັດຄ້ານແລ້ວ,ຮ່າງລັດຖະທຳມະນູນກໍຈະໄດ້ຖືກຢັບຢັ້ງ.ປະຈຸບັນ ຊາວອາລັບນີກາຍຊຸນນິດກວມຈຳນວນສ່ວນຫຼາຍທີ່ສຸດໃນ 4 ແຂວງຂອງອີຣັກ.ວັນທີ 28 ສິງຫາ,ທ່ານຮູເຊັນ ອານ ຟາລູຈີ ຜູ້ແທນຮ່າງລັດຖະທຳມະນູນຂອງນິກາຍຊຸນນິດເວົ້າວ່າ,ນິກາຍຊຸນນິດຈະປະຕິເສດຮ່າງລັດຖະທຳມະນູນສະບັບນີ້ໃນການເອົາປະຊາມະຕິທົ່ວປວງຊົນ.ໃນຂະນະດຽວກັນ,ມື້ດຽວກັນ ຜູ້ແທນຝ່າຍການເມືອງທີ່ນຳໂດຍທ່ານມຸກທາດາ ອານ ຊາເດີ ຜູ້ນຳຫົວຈັດນິກາຍຊິອິດກໍປະກາດວ່າ,ພວກເຂົາເຈົ້າຈະປ່ອນບັດຄັດຄ້ານ ຮ່າງລັດຖະທຳມະນູນສະບັບນີ້ໃນການເອົາປະຊາມະຕິທົ່ວປວງຊົນ.
ສາມ,ພາຍຫຼັງຈັດການເລືອກຕັ້ງທົ່ວໄປໃນທ້າຍເດືອນມັງກອນປີນີ້ແລ້ວ,ໂດຍສວຍໃຊ້ຄວາມບໍ່ພໍໃຈຂອງປວງຊົນນິກາຍຊຸນນິດຍ້ອນຖືໂດດດ່ຽວທາງການເມືອງ,ກອງປະກອບອາວຸດຂອງນິກາຍຊຸນນິດໄດ້ກໍ່ການເຄື່ອນໄຫວຫຼອນໂຈມຕີດ້ວຍກຳລັງຮຸນແຮງຢ່າງຕໍ່ເນື່ອງ,ເຮັດໃຫ້ສະຖານະພາບຄວາມສະຫງົບຊຸດຮ້າຍລົງຢ່າງບໍ່ຢຸດຢັ້ງ,ການສ້າງສາເສດຖະກິດຄືນໃໝ່ກໍຢຸດຊະງັກ.ຖ້າຂະບວນການທາງການເມືອງໃນຕໍ່ມາຍັງບໍ່ສາມາດເຮັດໃຫ້ນິກາຍຊຸນນິດພໍໃຈ,ສະຖານະພາບຄວາມສະຫງົບ,ຂະບວນການສ້າງສາການເມືອງແລະເສດຖະກິດຄືນໃໝ່ຂອງອີຣັກບໍ່ພຽງແຕ່ບໍ່ສາມາດໄດ້ຮັບການປົວແປງໃຫ້ດີຂຶ້ນທໍ່ນັ້ນ,ຫາກຍັງຈະຊຸດຮ້າຍລົງຕື່ມອີກ.
ຈາກນີ້ເຫັນໄດ້ວ່າ,ເຖິງວ່າອີຣັກໄດ້ຮ່າງລັດຖະທຳມະນູນສະບັບໃໝ່ແລ້ວກໍ່ຕາມ,ແຕ່ຍັງມີຄວາມບໍ່ຄັກແນ່ຢູ່.ເຖິງວ່າເປັນແນວນີ້ກໍ່ຕາມ,ປະຊາຄົມໂລກຍັງຫວັງໂດຍທົ່ວໄປໃຫ້ບັນດາຝ່າຍຂອງອີຣັກຈົ່ງຖືຄວາມສາມັກຄີຊາດເປັນເດີມພັນ,ສືບຕໍ່ຫາລືກັນ,ຊຸກຍູ້ຂະບວນວິວັດທາງການເມືອງ,ເພື່ອບັນລຸໃຫ້"ຊາວອີຣັກປົກຄອງອີຣັກ"ຢ່າງແທ້ຈິງໂດຍໄວ.
|
