|
ສະບາຍດີທ່ານຜູ່ຟັງທີ່ໂຄລົບ, ຊົມເຊີຍທ່ານເຂົ້າຮ່ວມລາຍການເສັງຄວາມຮູ້ທີ່ພາດຫົວເລື່ອງວ່າ: ໄຕ້ຫວັນ ເກາະປະເສີດຂອງຈີນ. ໃນລາຍການພາກກ່ອນ, ພວກເຮົາໄດ້ແນະນຳປະຫວັດສາດກ່ຽວກັບໄຕ້ຫວັນແມ່ນດິນແດນສ່ວນໜຶ່ງຂອງຈີນແລະຄວາມເປັນມາຂອງບັນຫາໄຕ້ຫວັນ, ໃນລາຍການພາກນີ້, ພວກເຮົາຈະແນະນຳທິດທາງພື້ນຖານແລະຄວາມພະຍາຍາມຂອງລັດຖະບານຈີນໃນການແກ້ໄຂບັນຫາໄຕ້ຫວັນ ເພື່ອໂຮມປະເທດເຂົ້າເປັນເອກະພາບກັນ.
ທ່ານຜູ່ຟັງທີ່ໂຄລົບທີ່ພວມຟັງຢູ່ນີ້ ແມ່ນຕອນສຳຄັນໃນບົດປາໄສຂອງທ່ານຫູຈິນທາວ ປະທານປະເທດຈີນທີ່ກ່າວເມື່ອເດືອນມີນາປີ 2005 ນີ້ກ່ຽວກັບການແກ້ໄຂບັນຫາໄຕ້ຫວັນ. ໃນຄຳປາໄສ, ທ່ານກ່າວວ່າ, ພວກຂ້າພະເຈົ້າຊົມເຊີຍຄວາມພະຍາຍາມຂອງບຸກຄົນໃດໆ ພັກການເມືອງໃດໆຂອງໄຕ້ຫວັນທີ່ໄປຕາມທິດຮັບຮອງຫຼັກການປະເທດຈີນດຽວ. ທະແນມແຕ່ຮັບຮອງຫຼັກການປະເທດຈີນດຽວ, ແລ້ວບໍ່ວ່າແມ່ນບຸກຄົນໃດໆ ພັກການເມືອງໃດໆ, ກໍ່ບໍ່ວ່າພວກເຂົາເຈົ້າເຄີຍເວົ້າຫຍັງ ແລະເຄີຍເຮັດຫຍັງໃນເມື່ອກ່ອນ, ພວກຂ້າພະເຈົ້າລ້ວນແຕ່ຍິນດີເຈລະຈາກັບພວກເຂົາເຈົ້າກ່ຽວກັບບັນຫາຂະຫຍາຍການພົວພັນລະຫວ່າງສອງຝັ່ງ ຊຸກຍູ້ການໂຮມເຂົ້າເປັນເອກະພາບດ້ວຍສັນຕິວິທີ.
ຕັ້ງແຕ່ສາທາລະນະລັດປະຊາຊົນຈີນສ້າງຕັ້ງຂຶ້ນເມື່ອປີ 1949 ເປັນຕົ້ນມາ, ລັດຖະບານຈີນບໍ່ໄດ້ປະລະຄວາມພະຍາຍາມທີ່ສະແຫວງຫາການໂຮມປະເທດເຂົ້າເປັນເອກະພາບກັນຢ່າງສົມບູນໂດຍຕະຫຼອດ. ທິດທາງພື້ນຖານຂອງລັດຖະບານຈີນໃນການແກ້ໄຂບັນຫາໄຕ້ຫວັນແມ່ນ "ໂຮມເຂົ້າເປັນເອກະພາບກັນໂດຍສັນຕິ ປະເທດດຽວສອງລະບອບ". ເນື້ອໃນແກນກາງຂອງທິດທາງນີ້ແມ່ນ: ຍາດແຍ່ງບັນລຸໃຫ້ສອງຝັ່ງໂຮມເຂົ້າເປັນເອກະພາບກັນໂດຍຜ່ານການສົນທະນາສັນຕິພາບ, ພາຍຫຼັງໂຮມເຂົ້າເປັນເອກະພາບກັນແລ້ວ, ອົງປະກອບສຳຄັນແຫ່ງລັດແຜ່ນດິນໃຫຍ່ຂອງຈີນ ຍຶດໝັ້ນລະບອບສັງຄົມນິຍົມ, ສ່ວນໄຕ້ຫວັນຈະຮັກສາລະບອບທຶນນິຍົມທີ່ມີຢູ່ໃນປະຈຸບັນ ແລະບໍ່ປ່ຽນແປງໃນໄລຍະຍາວນານ.
ໃນຫຼາຍປີມານີ້, ລັດຖະບານຈີນຕັ້ງໜ້າຊຸກຍູ້ໃຫ້ການພົວພັນລະຫວ່າງສອງຝັ່ງຂະຫຍາຍຕົວ. ໃຕ້ຄວາມພະຍາຍາມພ້ອມກັນຂອງສອງຝັ່ງຊ່ອງແຄບ, ເມື່ອທ້າຍຊຸມປີ 80 ສະຕະວັດທີ່ແລ້ວ, ສະພາບທີ່ສອງຝັ່ງຊ່ອງແຄບບໍ່ໄປມາຫາສູ່ກັນເປັນເວລາເກືອບ 40 ປີໄດ້ຖືກທັບມ້າງ, ການແລກປ່ຽນທາງເສດຖະກິດ ວັດທະນະທຳແລະການໄປມາຫາສູ່ກັນດ້ານບຸກຄະລາກອນລະຫວ່າງສອງຝັ່ງໄດ້ມີການພັດທະນາຢ່າງໃຫຍ່. ຕາມສະຖິຕິ, ໃນ 10 ກວ່າປີມານີ້, ນັບລວມແລ້ວ ມູນຄ່າການຄ້າລະຫວ່າງສອງຝັ່ງໄດ້ບັນລຸ 400 ຕື້ໂດລາສະຫະລັດ, ໃນນັ້ນ ຝ່າຍໄຕ້ຫວັນເກີນດຸນປະມານ 300 ຕື້ໂດລາສະຫະລັດ. ຝ່າຍແຜ່ນດິນໃຫຍ່ຍັງຕັ້ງໜ້າສ້າງເງື່ອນໄຂໃຫ້ແກ່ພີ່ນ້ອງຮ່ວມຊາດໄຕ້ຫວັນມາ ຢາມພີ່ນ້ອງ ທ່ອງທ່ຽວແລະດຳເນີນທຸລະກິດຢູ່ແຜ່ນດິນໃຫຍ່. ປະຈຸບັນ ມີຄົນໄຕ້ຫວັນຫຼາຍແສນຄົນເຮັດວຽກ ຮ່ຳຮຽນຫຼືຕັ້ງພູມລຳເນົາຢູ່ແຜ່ນດິນໃຫຍ່. ເພື່ອປົກປັກຮັກສາສິດແລະຜົນປະໂຫຍດອັນຊອບທຳຂອງຄົນໄຕ້ຫວັນຢູ່ແຜ່ນດິນໃຫຍ່, ອົງການນິຕິບັນຍັດ ລັດຖະບານກາງແລະອົງການປົກຄອງທ້ອງຖິ່ນຂອງແຜ່ນດິນໃຫຍ່ຈີນໄດ້ສ້າງກົດໝາຍ ກົດບັນຍັດຫຼາຍສະບັບ, ແລະປະຕິບັດຢ່າງແທ້ຈິງ. ພ້ອມກັນນັ້ນ ລັດຖະບານຈີນຍັງພະຍາຍາມຊຸກຍູ້ສອງຝັ່ງດຳເນີນການສົນທະນາທາງການເມືອງ.
ແຕ່ກົງກັນຂ້າມ, ຝ່າຍໄຕ້ຫວັນຊ້ຳພັດວາງອຸປະສັກຫຼວງຫຼາຍຂັດຂວາງຄົນແຜ່ນດິນໃຫຍ່ໄປຢາມພີ່ນ້ອງ ທັດສະນາຈອນແລະເຮັດທຸລະກິດຢູ່ໄຕ້ຫວັນ, ເປັນສິ່ງກີດຂວາງຕໍ່ການແລກປ່ຽນຕື່ມອີກລະຫວ່າງພີ່ນ້ອງຮ່ວມຊາດທັງສອງຝັ່ງ. ໂດຍສະເພາະແມ່ນໃນຫຼາຍປີມໍ່ໆມານີ້, ຄຽງຄູ່ກັບພັກກົກມິນຕັງຈີນເສຍສິດນຳພາສູງສຸດຢູ່ໄຕ້ຫວັນ, ອິດທິກຳລັງແບ່ງແຍກຢູ່ເກາະໄຕ້ຫວັນໄດ້ດຳເນີນການເຄື່ອນໄຫວຮຸນແຮງຂຶ້ນຢ່າງບໍ່ຢຸດຢັ້ງ, ຜູ່ຄອງອຳນາດອອກແຮງປະຕິບັດນະໂຍບາຍທີ່ມີຈຸດປະສົງແຍກໄຕ້ຫວັນອອກຈາກຈີນໃຫ້ເປັນເອກະລາດ, ບໍ່ຮັບຮອງໄຕ້ຫວັນແມ່ນສ່ວນໜຶ່ງຂອງຈີນ, ພາໃຫ້ການພົວພັນລະຫວ່າງສອງຝັ່ງປະກົດມີສະຖານະພາບເຄັ່ງຕຶງຂຶ້ນ.
ເຖິງຈະເປັນແນວນີ້ກໍ່ຕາມ, ລັດຖະບານຈີນຍັງບໍ່ປະລະຄວາມພະຍາຍາມທີ່ສະແຫວງຫາການໂຮມສອງຝັ່ງເຂົ້າເປັນເອກະພາບກັນໂດຍສັນຕິ. ໃນຄຳປາໄສກ່ຽວກັບການແກ້ໄຂບັນຫາໄຕ້ຫວັນທີ່ກ່າວເມື່ອເດືອນມີນາປີ 2005 ນີ້, ທ່ານຫູຈິນທາວ ປະທານປະເທດຈີນກ່າວວ່າ: ແຜ່ນດິນໃຫຍ່ຈະບໍ່ປະລະຄວາມພະຍາຍາມທີ່ຍາດແຍ່ງໂຮມສອງຝັ່ງເຂົ້າເປັນເອກະພາບກັນໂດຍສັນຕິ. ທະແນມແຕ່ແມ່ນເລື່ອງທີ່ມີຜົນດີຕໍ່ພີ່ນ້ອງຮ່ວມຊາດໄຕ້ຫວັນ, ທະແນມແຕ່ແມ່ນເລື່ອງທີ່ມີຜົນດີຕໍ່ການຊຸກຍູ້ການແລກປ່ຽນລະຫວ່າງສອງຝັ່ງ, ທະແນມແຕ່ແມ່ນເລື່ອງທີ່ມີຜົນດີຕໍ່ການປົກປັກຮັກສາສັນຕິພາບເຂດຊ່ອງແຄບທະເລໄຕ້ຫວັນ, ທະແນມແຕ່ແມ່ນເລື່ອງທີ່ມີຜົນດີຕໍ່ການໂຮມປະເທດຊາດເຂົ້າເປັນເອກະພາບກັນໂດຍສັນຕິ, ຝ່າຍແຜ່ນດິນໃຫຍ່ຈະພະຍາຍາມຈົນສຸດຂີດ, ແລະຈະພະຍາຍາມເຮັດໃຫ້ດີຢ່າງເດັດຂາດ.
ແນ່ນອນແລ້ວ, ໂດຍແນໃສ່ການກະທຳຂອງເຈົ້າໜ້າທີ່ໄຕ້ຫວັນທີ່ເຈດຕະນາແຍກໄຕ້ຫວັນອອກເປັນເອກະລາດໄດ້ເລື່ອນຂັ້ນຢ່າງບໍ່ຢຸດຢັ້ງ ແລະເຈດຕະນາຂອງບາງອິດທິກຳລັງຕ່າງປະເທດທີ່ແຊກແຊງການໂຮມເຂົ້າເປັນເອກະພາບກັນຂອງຈີນ, ລັດຖະບານຈີນກໍໄດ້ປະກາດຢ່າງເຄັ່ງຂຶມຫຼາຍເທື່ອວ່າ, ເພື່ອປົກປັກຮັກສາຄວາມເປັນເອກະພາບແຫ່ງຊາດ, ລັດຖະບານຈີນບໍ່ຮັບປາກຈະປະລະການໃຊ້ກຳລັງອາວຸດ. ໃນບົດປາໄສຂອງທ່ານຫູຈິນທາວ ປະທານປະເທດຈີນກ່ຽວກັບການແກ້ໄຂບັນຫາໄຕ້ຫວັນທີ່ກ່າວເມື່ອເດືອນມີນາປີ 2005 ນີ້, ທ່ານໄດ້ກ່າວລື້ມຫຼັກໝັ້ນອັນໝັ້ນໜຽວດັ່ງກ່າວອີກ. ທ່ານເວົ້າວ່າ: ການປົກປັກຮັກສາອະທິປະໄຕແລະຜືນແຜ່ນດິນອັນຄົບຖ້ວນແຫ່ງຊາດ, ແມ່ນຜົນປະໂຫຍດແກນກາງຂອງລັດ. ຜູ່ໃດຢາກທຳລາຍອະທິປະໄຕແລະຜືນແຜ່ນດິນອັນຄົບຖ້ວນຂອງຈີນ, ປະຊາຊົນຈີນ 1 ຕື້ 300 ລ້ານຄົນຈະບໍ່ຍອມຢ່າງເດັດຂາດ. ໃນບັນຫາຫຼັກການສຳຄັນທີ່ຄັດຄ້ານການແບ່ງແຍກປະເທດນັ້ນ, ພວກຂ້າພະເຈົ້າຈະບໍ່ລັ່ງເລໃຈ ບໍ່ປະນີປະນອມຈັກເມັດຢ່າງເດັດຂາດ. ຈີນແມ່ນເປັນຂອງປະຊາຊົນຈີນ 1 ຕື້ 300 ລ້ານຄົນ ເຊິ່ງລວມທັງພີ່ນ້ອງຮ່ວມຊາດໄຕ້ຫວັນ 23 ລ້ານຄົນ, ບັນຫາໃດໆທີ່ກ່ຽວພັນເຖິງອະທິປະໄຕແລະຜືນແຜ່ນດິນອັນຄົບຖ້ວນຂອງຈີນ, ຕ້ອງຕົກລົງໂດຍປະຊາຊົນທົ່ວປະເທດຈີນ 1 ຕື້ 300 ລ້ານຄົນ.
ກໍ່ແມ່ນໃນເດືອນມີນາປີ 2005 ນີ້, ອົງການອຳນາດແຫ່ງຊາດສູງສຸດຂອງຈີນຍັງໄດ້ສ້າງກົດໝາຍທີ່ພາດຫົວເລື່ອງວ່າ "ກົດໝາຍຕ້ານການແບ່ງແຍກປະເທດ", ແລ້ວໄດ້ຕົກລົງທິດທາງພື້ນຖານໃນການແກ້ໄຂບັນຫາໄຕ້ຫວັນແລະຄວາມຕັດສິນໃຈຕ້ານການແບ່ງແຍກຂອງລັດຖະບານຈີນດ້ວຍຮູບແບບກົດໝາຍ.
ເພື່ອສະແຫວງຫາສັນຕິພາບແລະສະຖຽນລະພາບຂອງເຂດຊ່ອງແຄບທະເລໄຕ້ຫວັນ, ຊຸກຍູ້ໃຫ້ການພົວພັນລະຫວ່າງສອງຝັ່ງຂະຫຍາຍຕົວ, ໃນ 6 ເດືອນຕົ້ນປີນີ້, ພັກກອມມູນິດຈີນແລະທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນໄດ້ເຊື້ອເຊີນທ່ານລຽນຈ້ານ ປະທານພັກກົກມິນຕັງຈີນ ເຊິ່ງແມ່ນພັກບໍ່ຄອງອຳນາດໃຫຍ່ກວ່າໝູ່ຂອງໄຕ້ຫວັນມາຢ້ຽມຢາມແຜ່ນດິນໃຫຍ່. ທ້າຍເດືອນເມສາ, ຜູ່ນຳສູງສຸດຂອງສອງພັກໄດ້ເຈລະຈາກັນເປັນຄັ້ງທຳອິດຢູ່ປັກກິ່ງ ຕັ້ງແຕ່ລະຫວ່າງສອງຝັ່ງໄດ້ຕົກຢູ່ສະພາບການເປັນປໍລະປັກກັນໃນ 56 ປີມານີ້, ສອງຝ່າຍໄດ້ກ້າວເຖິງຂັ້ນມີຄວາມຮັບຮູ້ຄືກັນອັນກວ້າງຂວາງໃນການຊຸກຍູ້ສອງຝັ່ງຟື້ນຟູການປຶກສາຫາລືກັນຢ່າງສະເໝີພາບໂດຍໄວບົນພື້ນຖານຍຶດໝັ້ນຫຼັກ ການປະເທດຈີນດຽວ ແລະບັນຫາອື່ນໆ. ພາຍຫຼັງປະທານພັກກົກມິນຕັງມາຢ້ຽມຢາມແຜ່ນດິນໃຫຍ່ແລ້ວ, ປະທານຂອງພັກບໍ່ຄອງອຳນາດອີກສອງພັກຄື ພັກຊິນມິນແລະພັກຊິນຕັງກໍ່ມາຢ້ຽມຢາມແຜ່ນດິນໃຫຍ່ຢ່າງຕໍ່ເນື່ອງກັນ, ແລະໄດ້ກ້າວເຖິງຂັ້ນມີຄວາມຮັບຮູ້ຄືກັນທີ່ຄ້າຍຄືກັນກັບທ່ານຫູຈິນທາວ.
ໃນຕອນມ້ວນທ້າຍລາຍການພາກນີ້, ພວກເຮົາໄດ້ຕັ້ງຄຳຖາມສອງຂໍ້ຄືດັ່ງລຸ່ມນີ້: ໜຶ່ງ ທິດທາງພື້ນຖານຂອງລັດຖະບານຈີນໃນການແກ້ໄຂບັນຫາໄຕ້ຫວັນແມ່ນຫຍັງ? ສອງ ເມື່ອເດືອນມີນາປີນີ້, ອົງການອຳນາດແຫ່ງຊາດສູງສຸດຂອງຈີນໄດ້ສ້າງກົດໝາຍສຳຄັນສະບັບໜຶ່ງ, ໄດ້ຕົກລົງທິດທາງພື້ນຖານຂອງລັດຖະບານຈີນໃນການແກ້ໄຂບັນຫາໄຕ້ຫວັນແລະຄວາມຕັດສິນໃຈຕ້ານການແບ່ງແຍກດ້ວຍຮູບແບບກົດໝາຍ. ຂໍຖາມວ່າກົດໝາຍສະບັບນີ້ມີຫົວຂໍ້ແນວໃດ? ຕໍ່ໄປຂໍອ່ານສອງຄຳຖາມດັ່ງກ່າວອີກເທື່ອໜຶ່ງ: ໜຶ່ງ ທິດທາງພື້ນຖານຂອງລັດຖະບານຈີນໃນການແກ້ໄຂບັນຫາໄຕ້ຫວັນແມ່ນຫຍັງ? ສອງ ເມື່ອເດືອນມີນາປີນີ້, ອົງການອຳນາດແຫ່ງຊາດສູງສຸດຂອງຈີນໄດ້ສ້າງກົດໝາຍສຳຄັນສະບັບໜຶ່ງ, ໄດ້ຕົກລົງທິດທາງພື້ນຖານຂອງລັດຖະບານຈີນໃນການແກ້ໄຂບັນຫາໄຕ້ຫວັນແລະຄວາມຕັດສິນໃຈຕ້ານການແບ່ງແຍກດ້ວຍຮູບແບບກົດໝາຍ. ຂໍຖາມວ່າກົດໝາຍສະບັບນີ້ມີຫົວຂໍ້ແນວໃດ?
|
