|
|
 |
| (GMT+08:00)
2005-08-30 16:36:48
|
 |
|
ນາງເຈິ່ງຊິນ ຜູ້ເຜີຍແຜ່ສິລະປະວັດທະນະທຳ
cri
Author: MO
|
ຢູ່ຈີນ, ມີຜູ້ເຜີຍແຜ່ສິລະປະວັດທະນະທຳຈຳນວນໜຶ່ງ, ພວກເຂົາເຈົ້າມີປະສົບການອັນອຸດົມສົມບູນ, ຄວາມສົນໃຈກວ້າງຂວາງ, ທັງເປັນຜູ້ຊຸກຍູ້ໃຫ້ສິລະປະວັດທະນະທຳຂອງຈີນໃຫ້ຂະຫຍາຍຕົວຢ່າງຕັ້ງໜ້າ. ນາງເຈິ່ງຊິນກໍແມ່ນຜູ້ໜຶ່ງ.
ນາງເຈິ່ງຊິນແມ່ນເຈົ້າຂອງຂອງສູນສິລະປະຮາທ໌ໃນເຂດສິລະປະຕ້າຊານຈືປັກກິ່ງ, ນາງໄດ້ໃຫ້ນິຍາມສູນສິລະປະຂອງຕົນເປັນແທ່ນແລກປ່ຽນສິລະປະປະເພດຕ່າງໆ, ຕັ້ງໜ້າເຜີຍແຜ່ຮູບການສິລະປະຕ່າງໆເຊັ່ນ ຮູບເງົາສະເພາະ ລະຄອນເວົ້າທົດລອງ, ແລະການສະແດງຕາມຄວາມບັນດານໃຈເປັນຕົ້ນ. ນາງເຈິ່ງຊິນເວົ້າວ່າ, ແຕ່ລະຄ່ຳຄືນ, ຄວາມຄິດໃໝ່ໆແລະຮູບການສິລະປະໃໝ່ໄດ້ປະກົດຕົວຢ່າງຟົດຟຟື້ນຢູ່ສູນສິລະປະຂອງນາງ, ເວທີແລະຜ້າສາກໄດ້ກາຍເປັນພາກສ່ວນທີ່ຂາດເຂີນບໍ່ໄດ້ໃນຊີວິດຕົວຈິງຂອງນາງແລ້ວ.
ທີ່ຈິງແລ້ວ, ຕົວສະແດງຂອງນາງໃນສັງຄົມໃນເວລາຫາກໍຮຽນຈົບແມ່ນຕ່າງກັບດຽວນີ້ຫຼາຍ. ນາງຮຽນວິຊາການຄ້າຕ່າງປະເທດ, ເຄີຍເປັນພາສີດ່ານຝ່າຍການຄ້າຕ່າງປະເທດ. ປີ 2002, ນາງເຈິ່ງຊິນໄດ້ໄປເຮັດວຽກຢູ່ຝຣັ່ງ, ເປັນຜູ້ແປພາສາແລະຜູ້ຕິດຕໍ່ພົວພັນໃຫ້ແກ່ງານວາງສະແດງຮູບແຕ້ມຂອງຈີນ, ຢູ່ຝຣັ່ງ 3 ເດືອນໄດ້ມີຜົນສະທ້ອນອັນໃຫຍ່ຫລວງຕໍ່ນາງ. ນາງບອກນັກຂ່າວວ່າ, ເວລານັ້ນ, ນາງພັກຢູ່ເຮືອນໝູ່, ຕອນຄ່ຳ, ໝູ່ນາງໄປເຮັດການຢູ່ໂຮງໄປສະນີ, ກາງເວັນກໍພານາງໄປເບິ່ງລະຄອນເວົ້າ, ເຂົ້າຮ່ວມຊາລົງຕ່າງໆເຊັ່ນງານອ່ານກາບກອນ, ແລະການສະແດງຕ່າງໆ. ຕອນນັ້ນ, ນາງເຈິ່ງຊິນໄດ້ເຂົ້າຮ່ວມການເຄື່ອນໄຫວທີ່ມ່ວນໆຫຼາຍຢ່າງ, ຕ່າງກັນຫລາຍກັບຮູບການດຳລົງຊີວິດຢູ່ຈີນ. ນາງເຈິ່ງຊິນຮູ້ສຶກວ່າ, ຊາວຈີນຄວນມີຊີວິດດ້ານຈິດໃຈອັນອຸດົມສົມບູນ. ນາງເວົ້າວ່າ:
ວິທີການດຳລົງຊີວິດຂອງຄົນຝຣັ່ງໄດ້ມີຜົນສະທ້ອນຫລາຍຕໍ່ຂ້າພະເຈົ້າ, ຊີວິດແບບສິລະປະຂອງຊາວຝຣັ່ງກໍອາດຈະແມ່ນສິ່ງທີ່ຊາວຈີນພວມສະແຫວງຫາໃນປັດຈຸບັນ. ຂ້າພະເຈົ້າກໍເຄີຍເບິ່ງການສະແດງຕາມຄວາມບັນດານໃຈແລະລະຄອນກ້ອມຂອງເຂົາເຈົ້າ, ຂ້າພະເຈົ້າຮູ້ສຶກວ່າ, ສິ່ງເຫຼົ່ານີ້ ຄົນຈີນກໍຕ້ອງການຄືກັນ.
ພາຍຫລັງກັບເມືອຮອດປັກກິ່ງແລ້ວ, ນາງເຈິ່ງຊິນກໍເລີຍມີຄວາມຄຶດຢາກສ້າງຊາລົງຄືຄົນຝຣັ່ງ ຄືຕັ້ງສູນສິລະປະຂອງຕົນຂຶ້ນ. ປີ 2003, ນາງເຈິ່ງຊິນໄດ້ສ້າງສູນສິລະປະຮາທ໌ຢູ່ຖະໜົນບາເຫຼົ້າຊານລີຖຸນທີ່ມີຊື່ສຽງຢູ່ປັກກິ່ງ. ສູນສິລະປະຮາທ໌ໄດ້ກາຍເປັນວາລະສານທີ່ມີຊີວິດຢ່າງໄວວາ. ອັນທີ່ວ່າ"ວາລະສານທີ່ມີຊີວິດ"ກໍໝາຍຄວາມວ່າ, ການເຄື່ອນໄຫວຢູ່ໃນສູນແຫງນີ້ມີຮູບການຫລາຍຢ່າງຫລາຍແນວ, ອຸດົມສົມບູນທີ່ສຸດ, ບໍ່ວ່າການກິນ ການຢູ່ ການນຸ່ງຖື ການໃຊ້ສອຍ, ການເດີນທາງ, ການເບິ່ງຊົມການຟັງ, ມີໝົດທຸກຢ່າງ. ຕົວຢ່າງຄື: ຊົມຮູບແຕ້ມພູຜາແລະແມ່ນ້ຳໃນສະໄໝບູຮານຂອງຈີນ, ການເຄື່ອນໄຫວຢູ່ນອກບ້ານ, ຍັງມີການຊົມຮູບເງົາທີ່ຖ່າຍທຳດ້ວຍDVຂອງຕົນເອງ, ແລະຟັງດົນຕີເປັນຕົ້ນ. ພາຍຫຼັງມາ, ທ່ານເຈິ່ງຊິນໄດ້ຍ້າຍສູນສິລະປະນີນີ້ໄປຕັ້ງຢູ່ເຂດສິລະປະຕ້າຊ່ານຈືທີ່ພາກຕາເວັນອອກສຽງເໜືອປັກກິ່ງ. ຢູ່ແຫ່ງນັ້ນ, ນາງບໍ່ພຽງແຕ່ໄດ້ເຜີຍແຜ່ຮູບການສິລະປະໃໝ່ຄືຮູບເງົາທີ່ຖ່າຍທຳໂດຍທຶນສ່ວນຕົວຂອງຈີນ ລະຄອນເວົ້າທົດລອງ ການສະແດງຕາມຄວາມບັນດານໃຈເປັນຕົ້ນ, ຍັງໄດ້ຈັດການເຄື່ອນໄຫວຫລາຍຢ່າງທີ່ເອົາໃຈໃສ່ນຳສິລະປະໂດຍສະເພາະ. ເຊັ່ນ, ເດືອນແລກປ່ຽນວັດທະນະທຳຈີນແມັກຊິກ, ງານວາງສະແດງຮູບເງົາເລື່ອງສັ້ນສາກົນ"ໃສ່ໃຈອາຊີ", ສັບປະດາຮູບເງົາທຶນຖ່າຍທຳສ່ວນຕົວຂອງຝຣັ່ງ, ແລະງານສະແດງລະຄອນເວົ້າໃນປີວັດທະນະທຳຝຣັ່ງເປັນຕົ້ນ.
ນາງເຈິ່ງຊິນບອກນັກຂ່າວວ່າ, ໃນສູນສິລະປະຂອງນາງ, ເດືອນໃດ, ຢ່າງໜ້ອຍກໍຕ້ອງສາຍຮູບເງົາທີ່ຖ່າຍທຳໂດຍຜູ້ກຳກັບການສະແດງຂອງຈີນສອງສາມເລື່ອງ, ນາງຢາກເຮັດໃຫ້ຄົນຕ່າງປະເທດຫລາຍກວ່າເກົ່າຮູ້ຈັກຜູ້ກຳກັບການສະແດງຂອງຈີນແລະຮູບເງົາທີ່ຖ່າຍໂດຍທຶນສ່ວນຕົວຂອງພວກເຂົາເຈົ້າ. ດຽວນີ້, ນາງເຈິ່ງຊິນ ໄດ້ມີການພົວພັນແລະຮ່ວມມືກັບນັກຖ່າຍທຳຮູບເງົາໂດຍທຶນສ່ວນຕົວຂອງຈີນຮ້ອຍກວ່າທ່ານ, ນາງໄດ້ເອົາຮູບເງົາເລື່ອງໃໝ່ໆຂອງພວກເຂົາເຈົ້າມາສາຍຢູ່ສູນສິລະປະເລື້ອຍໆ. ນາງເວົ້າວ່າ:
ຊາວຕ່າງປະເທດ, ໂດຍສະເພາະແມ່ນຊາວເອີລົບມັກໄປເບິ່ງຮູບເງົາອາທິດລະສອງສາມຮອບ, ເພື່ອຢາກຊອກເບິ່ງຮູບເງົາທີ່ສ່ວນຕົວຖ່າຍທຳເອງທີ່ສ່ອງແສງສະພາບປັດຈຸບັນຂອງຈີນ.
ນາງເຈິ່ງຊິນຍັງໄດ້ສ້າງແທ່ນແລກປ່ຽນໃຫ້ຮູບເງົາດີເລີດທີ່ຖ່າຍທຳໂດຍທຶນສ່ວນຕົວຂອງຈີນອອກໄປສູ່ໂລກ. ປັດຈຸບັນ, ນາງເຈິ່ງຊິນໄດ້ຮັກສາການພົວພັນຢ່າງສະໜິດແໜ້ນກັບພະແນກວັດທະນະທຳຂອງສະຖານທູດປະເທດຈຳນວນໜຶ່ງປະຈຳຈີນ, ສະມາຊິກຄະນະຈັດຕັ້ງງານປະກວດຮູບເງົາຫລາຍທ່ານກໍໄດ້ຜ່ານອົງການເຫຼົ່ານີ້ມາຊອກຫາຮູບເງົານຳສູນສິລະປະຂອງນາງເຈິ່ງຊິນ. ນາງເຈິ່ງຊິນເວົ້າວ່າ:
ຜູ້ກຳກັບການສະແດງຈີນທີ່ຖ່າຍທຳຮູບເງົາໂດຍທຶນສ່ວນຕົວເຫຼົ່ານີ້, ສ່ວນຫລາຍສະພາບເສດຖະກິດດີສົມຄວນ, ແຕ່ຍັງມີສ່ວນໜ້ອຍຍັງຂັດຂ້ອງນຳທຶນສ້າງຟິມ, ຄຶດຍາກນຳການຈຳໜ່າຍ. ສະນັ້ນ ຂ້າພະເຈົ້າຈຶ່ງຄຶດຢາກຊອກຫາໂອກາດໃຫ້ພວກເຂົາເຈົ້າ, ເພາະດຽວນີ້, ຂ້າພະເຈົ້າຄ່ອຍໆມີການພົວພັນກັບມູນນິທິຂອງຕ່າງປະເທດແລະງານປະກວດຮູບເງົາຂອງຕ່າງປະເທດຈຳນວນໜຶ່ງ, ຂ້າພະເຈົ້າຢາກໃຫ້ຜູ້ກຳກັບການສະແດງທຸກຄົນໄດ້ມີໂອກາດຕິດຕໍ່ພົວພັນກັບອົງການເຫຼົ່ານີ້ໂດຍກົງ. ພ້ອມກັນນັ້ນ, ຂ້າພະເຈົ້າກໍຢາກໃຫ້ຂອງດີໆຂອງພວກເຂົາເຈົ້າມີຜູ້ໄດ້ຊົມຫລາຍກວ່າເກົ່າ.
|
|
|
