|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ, ໃນລາຍການພາກນີ້, ຂ້າພະເຈົ້າຈະເລົ່າສຸພາສິດເລື່ອງ "ຝາງເວິຍຕູ້ຈ້ຽນ" ສູ່ຟັງ, ສຸພາສິດນີ້ໄດ້ເຫັນໃນ "ໂຮ້ວຮັ້ນຊູ່" ທີ່ແຕ່ງໂດຍຟ້ານເຢ້ໃນລາຊະວົງໃຕ້ຂອງຈີນ, ໝາຍເຖິງປ້ອງກັນໄພອັນຕະລາຍແຕ່ຫົວທີ, ປ້ອງກັນບໍ່ໃຫ້ເກີດເຫດໃນແຕ່ຕົ້ນ.
ຮ້ອງເຕ້ຈ່າງຕີ້ຂອງລາຊະວົງຮັ້ນຕາເວັນອອກຊົງໂປດພະມະເຫສີຕະກູນໂຕ້ວທີ່ສຸດ, ແຕ່ພະມະເຫສີຕະກູນໂຕ້ວພັດບໍ່ມີລາຊະໂອລົດ. ສະນັ້ນ ໃນວັງຫຼວງ ຖ້ານາງສະໜົມຜູ່ໃດມີລາຊະໂອລົດ, ພະມະເຫສີກໍຢາກທຳຮ້າຍຜູ່ນັ້ນ. ນາງສະໜົມຕະກູນຊົ້ງມີລາຊະໂອລົດຜູ່ໜຶ່ງຊື່ລິວຊິ້ງ, ພາຍຫຼັງມາຖືກແຕ່ງຕັ້ງເປັນອົງມົງກຸດລາຊະກຸມານ. ພະມະເຫສີໂຕ້ວອິດສາທີ່ສຸດ, ມື້ໃດກໍເວົ້າຈັ່ງຊັ້ນຈັ່ງຊີ້ຢູ່ຕໍ່ໜ້າຮ້ອງເຕ້, ໃສ່ຮ້າຍປ້າຍສີສະໜົມຊົ້ງ, ໃນທີ່ສຸດບີບບັງຄັບໃຫ້ສະໜົມຊົ້ງຕ້ອງຂ້າຕົວຕາຍ, ອົງມົງກຸດລາຊະກຸມານຖືກຍຸບ.
ແຕ່ຍ້ອນພະມະເຫສີໂຕ້ວບໍ່ມີລາຊະໂອລົດ, ຕໍ່ມາມື້ໜຶ່ງ, , ຮ້ອງເຕ້ຈ່າງຕີ້ໄດ້ແຕ່ງຕັ້ງລາຊະໂອລົດຂອງສະໜົມລຽງເປັນອົງມົງກຸດລາຊະກຸມານເຊິ່ງພາຍຫຼັງມາໄດ້ຂຶ້ນຄອງລາຊະບັນລັງແລະຖືກເອີ້ນເປັນເຫີຕີ້ຮ້ອງເຕ້. ແນ່ນອນແລ້ວ ພະມະເຫສີໂຕ້ວບໍ່ຍິນຍອມ, ເພິ່ນໃຫ້ຄົນຂຽນຈົດໝາຍສົນເທກ້ານໜຶ່ງ ໃສ່ຮ້າຍປ້າຍສີລຽງສົງ ພະບິດາຂອງສະໜົມລຽງ, ແລະຍັງສວຍໂອກາດກຳເລີບເສີບສານຢູ່ຕໍ່ໜ້າຮ້ອງເຕ້. ໃນທີ່ສຸດ ລຽງສົງຖືກຂ້າຕາຍ, ສະໜົມລຽງກໍ່ຕາຍຍ້ອນຄວາມເຈັບແຄ້ນແໜ້ນໃຈ. ຫຼັງຈາກນັ້ນ ຢູ່ໃນວັງຫຼວງກໍ່ບໍ່ມີອິດທິກຳລັງເປັນປໍລະປັກອີກແລ້ວ. ພາຍຫຼັງມາ ພະມະເຫສີໂຕ້ວຖືອົງມົງກຸດລາຊະກຸມານເປັນລູກຄິງຂອງຕົນ, ເພື່ອກຽມຊິງເອົາອຳນາດໃນອະນາຄົດ.
ຈ່າງຕີ້ຮ້ອງເຕ້ມີພະຊົນມາຍຸພຽງ 33 ພັນສາກໍສິ້ນພະຊົນແລ້ວ, ເຫີຕີ້ຮ້ອງເຕ້ທີ່ອາຍຸພຽງ 10 ພັນສາໄດ້ຂຶ້ນຄອງລາຊະບັນລັງ. ຫຼັງຈາກນັ້ນ, ອຳນາດການປົກຄອງກໍຕົກຢູ່ໃນກຳມືຂອງພະມະເຫສີໂຕ້ວ. ພະມະເຫສີໂຕ້ວມີອ້າຍຜູ່ໜຶ່ງ ມີນ້ອງສອງຄົນ, ຜູ່ໃດກໍມີອຳນາດແລະແຜງລິດແຜງແດດ. ວົງຕະກູນໂຕ້ວໄດ້ກຳອຳນາດສູງສຸດໃນລາຊະສຳນັກ, ເປັນການຂົ່ມຂູ່ເຖິງອຳນາດຂອງຮ້ອງເຕ້. ເສນາບໍດີທັງຫຼາຍໃນລາຊະສຳນັກໃຜໆກໍ່ບໍ່ກ້າເວົ້າຫຍັງ.
ເມື່ອປີທີ 4 ຂອງລາຊະການເຫີຕີ້ຮ້ອງເຕ້ ໄດ້ເກີດຈັນທະຄາດ. ຄົນບູຮານຈີນເຊື່ອຖືງົມງວາຍ, ຖືວ່າແມ່ນສະຫວັນໃສ່ໂທດ. ເສນາບໍດີຕິງຫົງສວຍໂອກາດນີ້ບັງຄົມທູນຕໍ່ຮ້ອງເຕ້ເຫີຕີ້, ໃນຈົດໝາຍຂອງເພິ່ນໄດ້ຂຽນວ່າ: ຈັນທະຄາດແມ່ນສະຫວັນກ່າວເຕືອນ, ບອກຄົນທັງຫຼາຍວ່າ, ໃນໂລກມະນຸດມີປະກົດການທີ່ຂຸນນາງຂົ່ມເຫັງຮ້ອງເຕ້. ພະບາດສົມເດັດບໍ່ລະມັດລະວັງບໍ່ໄດ້. ໃນຈົດໝາຍຍັງໄດ້ຂຽນວ່າ: ນ້ຳຖ້ວມລົ້ນຝັ່ງ ແມ່ນມາຈາກແມ່ນ້ຳລຳເຊທີ່ໄຫຼລິນ; ນ້ຳຢອດຈົນກ້ອນຫີນຊອດ ຕ້ອງຢອດເປັນວັນເປັນຄືນ. ຕົ້ນໄມ້ທີ່ມີໃບດົກໜາເປັນຫົ່ມ ແມ່ນມາຈາກໜໍ່ນ້ອຍໆ. ຄົນທັງຫຼາຍມັກເບິ່ງຂ້າມຄວາມຜິດພາດເລັກນ້ອຍ, ພັດບໍ່ຮູ້ວ່າຖ້າບໍ່ປ້ອງກັນເລື່ອງຮ້າຍເລັກໆນ້ອຍໆເຫຼົ່ານີ້ ກໍຍ່ອມຈະກາຍເປັນໄພອັນຕະລາຍ. ຖ້າພະບາດສົມເດັດສາມາດກັ້ນກາງບໍ່ໃຫ້ເກີດມີຄວາມຜິດພາດເລັກໆນ້ອຍໆ ປ້ອງກັນໄພອັນຕະລາຍແຕ່ຍາມຫົວທີແລ້ວ, ກໍຈະລົບລ້າງໄພອັນຕະລາຍໄດ້ ແລະເຫຼືອແຕ່ຄວາມໂຊກລາບແລ້ວ.
ຄຳບັງຄົມທູນຂອງຕິງຫົງໄດ້ຖືກຍື່ນໃຫ້ຮ້ອງເຕ້, ພໍດີເລື່ອງທີ່ວົງຕະກູນໂຕ້ວຄິດຢາກກໍ່ເຫດຊິງເອົາອຳນາດນັ້ນຖືກເຜີຍແບ. ຮ້ອງເຕ້ໜຸ່ມແລະເສນາບໍດີໃກ້ຊິດຫຼາຍຄົນໄດ້ວາງແຜນຢ່າງລະອຽດຮອບຄອບ, ຖືໂອກາດປົດອຳນາດການເມືອງແລະການທະຫານຂອງວົງຕະກູນໂຕ້ວ, ບັງຄັບໃຫ້ພວກເຂົາເຈົ້າຂ້າໂຕຕາຍ.
|
