|
ປັດຈຸບັນ ໂທລະສັບມືຖືໄດ້ກາຍເປັນເຄື່ອງມືອັນສຳຄັນທີ່ຂາດບໍ່ໄດ້ໃນຊີວິດການເປັນຢູ່ຂອງຄົນທັງຫຼາຍ,ຄົນເຮົາໃຊ້ມັນມາໂທລະສັບ,ຝາກຂໍ້ຄວາມສັ້ນ,ຖ່າຍຮູບ,ສະສົມເບີໂທລະສັບແລະອື່ນໆ,ຄຽງຄູ່ກັບການພັດທະນາຂອງວິທະຍາສາດເຕັກນິກ,ປັດຈຸບັນ,ເວົ້າສຳລັບຄົນຈີນແລ້ວ,ໂທລະສັບມືຖືໄດ້ມີສັບພະຄຸນໃໝ່ອີກລາຍໜຶ່ງ,ນັ້ນກໍຄືໃຊ້ມັນເບິ່ງລາຍການໂທລະພາບໄດ້ແລ້ວ.
ທີ່ຟັງມານັ້ນແມ່ນສຽງຂອງລາຍການໂທລະພາບເລື່ອງໜຶ່ງທີ່ພວມແຜ່ພາບໃນໂທລະສັບມືຖືຈຳນວນໜຶ່ງຂອງຈີນໃນສະເພາະໜ້ານີ້,ເລື່ອງນີ້ຊື່ວ່າ"ນັດກັນ",ແມ່ນຖ່າຍທຳເພື່ອແຜ່ພາບໃນໂທລະສັບມືຖືໂດຍຈຳເພາະ,ເລື່ອງນີ້ຍາວປະມານ 25 ນາທີ,ລວມມີ 5 ເລື່ອງ,ແຕ່ລະເລື່ອງຍາວປະມານ 5 ນາທີ.
ຜູ້ລົງທຶນສ້າງລາຍການໂທລະພາບເລື່ອງ"ນັດກັນ"ແມ່ນບໍລິສັດສື່ມວນຊົນເລີ້ຊື້ປັກກິ່ງທີ່ພັດທະນາລາຍການໂທລະພາບສຳລັບໂທລະສັບມືຖືໂດຍຈຳເພາະ,ທ່ານລິວຮົງ ຜູ້ອຳນວຍການໃຫຍ່ບໍລິສັດດັ່ງກ່າວແນະນຳວ່າ:
ເລື່ອງນັດກັນແຕ່ລະເລື່ອງຍາວ 5 ນາທີແມ່ນກຳນົດຕາມສະພາບຕົວຈິງໃນການເບິ່ງລາຍການໂດຍຜ່ານຈາກໂທລະສັບມືຖື. ຍ້ອນວ່າໜ້າຈໍຂອງໂທລະສັບມືຖືຂ້ອນຂ້າງນ້ອຍ,ຖ້າເບິ່ງໜ້າຈໍຂອງໂທລະສັບມືຖືດົນເກີນໄປ,ຕາຈະເມື່ອຍ,ສະນັ້ນ ພວກຂ້າພະເຈົ້າຄິດວ່າແຕ່ລະເລື່ອງຍາວປະມານ 5 ນາທີແມ່ນເໝາະສຳລັບຜູ້ໃຊ້ໂທລະສັບມືຖືໃນການຊົມເບິ່ງ."
ນາງຢາງຊ່ານທີ່ເຮັດວຽກຢູ່ວິສາຫະກິດທຶນຕ່າງປະເທດຫຼັງໜຶ່ງຂອງປັກກິ່ງໄດ້ໃຊ້ໂທລະສັບມືຖືຂອງຕົນເບິ່ງເລື່ອງ"ນັດກັນ"ແລ້ວ. ນາງເວົ້າວ່າ,ເມື່ອທຽບກັບລາຍການໂທລະພາບດັ້ງເດີມແລ້ວ,ເວລາຂອງເລື່ອງ"ນັດກັນ"ອ່າວສັ້ນ,ໂຄງເລື່ອງກໍງ່າຍແດ່,ແຕ່ພາບງາມຫຼາຍ,ນັກສະແດງກໍທັນສະໄໝທີ່ສຸດ,ສະນັ້ນ ຫຼັງຈາກເບິ່ງແລ້ວໆຮູ້ສຶກວ່າດີຢູ່. ນອກນີ້ ນາງບອກນັກຂ່າວວ່າ:
"ຂ້າພະເຈົ້າຮູ້ສຶກວ່າ,ເວົ້າສຳລັບຂ້າພະເຈົ້າແລ້ວ,ສິ່ງສຳຄັນກວ່າໝູ່ຂອງການໃຊ້ໂທລະສັບມືຖືເບິ່ງລາຍການໂທລະພາບແມ່ນສາມາດເບິ່ງໃນເວລາຫວ່າງໄດ້ທຸກເວລາເຊັ່ນຖ້າລົດແລະຖ້າຍົນເປັນຕົ້ນ. ເຮັດເປັນແນວນີ້ ສາມາດຂ້າເວລາ,ເຮັດໃຫ້ຊີວິດການເປັນຢູ່ອຸດົມສົມບູນກວ່າເກົ່າ."
ຢູ່ຈີນ,ການໃຊ້ໂທລະສັບມືຖືເບິ່ງລາຍການໂທລະພາບແມ່ນເລີ່ມປະກົດມີແຕ່ທ້າຍປີກາຍມານີ້,ປັດຈຸບັນ,ຍັງແມ່ນເລື່ອງໃໝ່ຢູ່ຈີນ,ຜູ້ໃຊ້ຕົ້ນຕໍແມ່ນຊາວໜຸ່ມທີ່ລ້ຳຍຸກລ້ຳສະໄໝໃນຕົວເມືອງໃຫຍ່ຕ່າງໆເຊັ່ນປັກກິ່ງ,ຊຽງໄຮ້ແລະກວາງໂຈວເປັນຕົ້ນ,ນອກຈາກສາມາດເບິ່ງລະຄອນໂທລະສັບມືຖືແລ້ວ,ຍັງເບິ່ງຂ່າວ,ການພະຍາກອນອາກາດແລະ MTV ເປັນຕົ້ນໄດ້ຄືກັນ,ລາຍການເຫຼົ່ານີ້ລ້ວນແຕ່ແມ່ນວິສາຫະກິດທີ່ພັດທະນາລາຍການໂທລະພາບສຳລັບໂທລະສັບມືຖືຫຼືບໍລິສັດສ້າງລາຍການສະໜອງໃຫ້,ບາງລາຍການແມ່ນສ້າງເພື່ອແຜ່ພາບໃນໂທລະສັບມືຖື,ບາງລາຍການແມ່ນຕັດຕໍ່ມາຈາກລາຍການໂທລະພາບ.
ນາງຊ່ຽວລີ້ມັກໃຊ້ໂທລະສັບມືຖືເບິ່ງ MTV ທີ່ສຸດ,ນາງເວົ້າວ່າ:
"ຖ້າຢາກໃຊ້ໂທລະສັບມືຖືເບິ່ງ MTV ຂອງເພງໃດເພງໜຶ່ງ,ສາມາດເຂົ້າເວບໄຊຈຳເພາະ,ເບິ່ງຊ່ອງ MTV ຈຳເພາະ,ເຂົ້າໄປແລ້ວກໍສາມາດເຫັນເພງ MTV ຈຳນວນຫຼວງຫຼາຍ,ແລ້ວໄປເລືອກ, ມັກເພງໃດແລ້ວຈຶ່ງດາວໂຣດ,ເຮັດແນວນີ້ສາມາດປະຢັດຊ່ອງຫວ່າງຂອງໂທລະສັບມືຖືຢ່າງຫຼວງຫຼາຍ."
ນາງຊ່ຽວລີ້ຍັງເວົ້າວ່າ,ເຖິງວ່າພາບແລະຄຸນນະພາບສຽງໃນໂທລະສັບມືຖືບໍ່ດີຄືໃນຄອມພິວເຕີຫຼືໂທລະພາບກໍຕາມ,ແຕ່ຍ້ອນວ່າໂທລະສັບມືຖືແມ່ນຕິດຕົວໄດ້,ສະນັ້ນ ຈຶ່ງເບິ່ງໃນທຸກເວລາໄດ້,ທັງນີ້ມີຄວາມໝາຍຫຼາຍຕໍ່ນາງທີ່ມັກຮ້ອງເພງ.
ຕາມຊາບວ່າ,ໃນອະນາຄົດ,ຄຽງຄູ່ກັບການນຳໃຊ້ເຕັກນິກໂທລະຄົມເຄື່ອນທີ່ຮຸ້ນທີສາມຢູ່ຈີນ,ຄວາມໄວສົ່ງຕໍ່ຂອງເຄືອຂ່າຍໂທລະຄົມຈະໄວເຂົ້າຢ່າງຫຼວງຫຼາຍ,ຄຸນນະພາບຂອງລາຍການໃນໂທລະສັບມືຖືກໍຈະດີຂຶ້ນຢ່າງເດັ່ນຊັດ,ນີ້ຈະຊຸກຍູ້ການພັດທະນາທຸລະກິດລາຍການໂທລະພາບສຳລັບໂທລະສັບມືຖືຕື່ມອີກ.
ນອກນີ້ ບຸກຄົນໃນວົງການຍັງຊີ້ອອກວ່າ,ໃນພາຍໜ້າ,ລາຄາໂທລະສັບມືຖືກໍຈະບໍ່ແມ່ນປັດໄຈທີ່ຜູກມັດການພັດທະນາທຸລະກິດລາຍການໂທລະພາບສຳລັບໂທລະສັບມືຖືຢູ່ຈີນອີກ,ທ່ານລິວຮົງ ຜູ້ອຳນວຍການໃຫຍ່ຂອງບໍລິສັດສື່ມວນຊົນເລີ້ຊື້ປັກກິ່ງໄດ້ວິເຄາະຊີ້ອອກວ່າ:
"ຄົນຈີນປ່ຽນໂທລະສັບມືຖືໄວຫຼາຍ. ເມື່ອສອງປີກ່ອນ,ຢູ່ຈີນ,ໂທລະສັບມືຖືຈໍສີຍັງເຫັນໜ້ອຍ,ລາຄາກໍແພງ. ແຕ່ຫຼັງຈາກນັ້ນ 2 ປີ,ອັດຕາກວມໂກຕາຕະຫຼາດຂອງໂທລະສັບມືຖືທີ່ມີຈໍສີແລະກ້ອງຖ່າຍຮູບນັ້ນໄດ້ເພີ່ມຂຶ້ນຫຼາຍ,ລາຄາກໍປະມານ 2 ພັນຢວນທໍ່ນັ້ນ. ສະນັ້ນ ຂ້າພະເຈົ້າເຊື່ອວ່າ,ໂທລະສັບມືຖືຮຸ້ນໃໝ່ສ່ວນຫຼາຍທີ່ຂາຍໃນພາຍໜ້າລ້ວນແຕ່ເບິ່ງລາຍການໂທລະພາບໄດ້,ລາຄາກໍຈະຕ່ຳລົງຢ່າງຫຼວງຫຼາຍ. ຫຼັງຈາກນັ້ນບໍ່ດົນ,ການເບິ່ງລາຍການໂທລະພາບຕ່າງໆໃນໂທລະສັບມືຖືຈະກາຍເປັນຄວາມຊິນເຄີຍແບບໜຶ່ງໃນຊີວິດປະຈຳວັນຂອງຄົນຈີນ.
|
