|
|
 |
| (GMT+08:00)
2005-09-01 09:50:39
|
 |
|
[ຊິນສີຮົງເຕ]
cri
Author: li
 ກ່ອນຄ.ສ.ປີ 221 ລາຊະວົງຊິນ ເຊິ່ງເປັນລາຊະວົງສັກດິນາທີ່ສູນກາງໂຮມສູນອຳນາດທຳອິດໃນປະຫວັດສາດຈີນໄດ້ກຳເນີດເກີດຂຶ້ນ. ຜູ້ສ້າງພາລະກິດທີ່ຍິ່ງໃຫຍ່ດັ່ງກ່າວກໍແມ່ນເຈົ້າຊີວິດຊິນສີຮົງເຕທີ່ພວກເຮົາຈະແນະນຳໃຫ້ທ່ານຮູ້ໃນຕໍ່ໄປນີ້.
ເຈົ້າຊີວິດຊິນສີຮົງກົງແປວ່າເຈົ້າຊີວິດອົງທຳອິດຂອງລາຊະວົງຊິນ. ນາມສະກຸນຂອງພະອົງແມ່ນອິງ,ຊື່ເຈີ້ງ,ກ່ອນນີ້ແມ່ນເຈົ້າຊີວິດຂອງລັດຊິນ. ໃນເວລາພະອົງສືບລາຊະບັນລັງກ່ອນຄ.ສ.ປີ 246 ນັ້ນມີແຕ່ 13 ພັນສາ,ເວລານັ້ນພວມຢູ່ໃນໄລຍະທ້າຍຂອງສະໄໝຍຸດທະຈັກໃນປະຫວັດສາດຈີນ,ມີຫຼາຍລັດທີ່ເປັນເອກະລາດ,ບັນດາລັດໄດ້ກໍ່ສົງຄາມກວມເອົາກັນເລື້ອຍໆ. ລັດຊິນຕັ້ງຢູ່ແຖບເມືອງຊຽນຢາງແລະເມືອງຊີ່ອ່ານຂອງຈີນໃນປັດຈຸບັນ,ແມ່ນລັດໜຶ່ງທີ່ມີກຳລັງຂ້ອນຂ້າງເຂັ້ມແຂງໃນຄາວນັ້ນ. ຫຼັງຈາກສົມເດັດອິງເຈີ້ງເປັນຜູ້ໃຫຍ່ແລ້ວ,ໄດ້ໃຊ້ຜູ້ສະຫຼາດສະຫຼຽວ,ອອກແຮງພັດທະນາການທະຫານ,ພະອົງມີອຸດົມການເປັນເຈົ້າອຳນາດ. ໃນ 10 ກວ່າປີຫຼັງຈາກນັ້ນ,ລັດຊິນໄດ້ກໍ່ສົງຄາມ,ໃນທີ່ສຸດໄດ້ໂຮມທົ່ວປະເທດເປັນເອກະພາບກັນ. ສົມເດັດອິງເຈີ້ງກໍໄດ້ຈາກເຈົ້າຊີວິດລັດອິງກາຍເປັນເຈົ້າຊີວິດຊີນສີຮົງເຕ.
ລັດຊິນໂຮມປະເທດເປັນເອກະພາບກັນໄດ້ປະກອບສ່ວນແລະມີຄວາມໝາຍຫຼາຍທີ່ສຸດ. ກ່ອນອື່ນ,ໃນດ້ານການເມືອງ,ເຈົ້າຊີວິດຊິນສີຮົງເຕຊົງໄດ້ຍົກເລີກລະບອບພະລາຊະທານດິນນາ,ປະຕິບັດລະບອບແຄວ້ນ,ແບ່ງທົ່ວປະເທດເປັນ 36 ແຄວ້ນ,ຖັດຈາກແຄວ້ນຕັ້ງເມືອງ; ເຈົ້າໜ້າທີ່ຂອງສູນກາງແລະທ້ອງຖິ່ນລ້ວນແຕ່ແມ່ນເຈົ້າຊີວິດຊົງເລືອກແລະແຕ່ງຕັ້ງ,ລູກຫຼານບໍ່ສືບທອດ. ລະບອບແຄວ້ນທີ່ລິເລີ່ມໃນລາຊະວົງຊິນໄດ້ກາຍເປັນລະບອບຖາວອນໃນປະຫວັດສອງພັນກວ່າປີຂອງຈີນ,ຊື່ຂອງຫຼາຍເມືອງຫຼາຍນະຄອນຂອງຈີນໃນປັດຈຸບັນລ້ວນແຕ່ແມ່ນຕົກລົງໃນລາຊະວົງຊິນ.
ການປະກອບສ່ວນອັນສຳຄັນອີກຢ່າງໜຶ່ງຂອງລາຊະວົງຊິນໃນການໂຮມຈີນເຂົ້າເປັນເອກະພາບກັນແມ່ນໄດ້ໃຊ້ຕົວໜັງສືຢ່າງດຽວ. ກ່ອນລາຊະວົງຊິນ,ແຕ່ລະລັດມີໜັງສືຂອງຕົນ,ເຖິງວ່າໜັງສືເຫຼົ່ານີ້ມີແຫຼ່ງດຽວ,ແລະບໍ່ຕ່າງຫຼາຍໃນການຂີດຂຽນ,ແຕ່ການເຜີຍແຜ່ແລະແລກປ່ຽນວັດທະນະທຳແມ່ນບໍ່ສະດວກທີ່ສຸດ. ຫຼັງຈາກລາຊະວົງຊິນໂຮມທົ່ວປະເທດເປັນເອກະພາບກັນແລ້ວ,ໄດ້ກຳນົດໜັງສືສຽວຈ້ວນຂອງລັດຊິນເປັນໜັງສືທີ່ໃຊ້ໃນທົ່ວປະເທດ. ຈາກນັ້ນໄປ,ການປ່ຽນແປງຂອງໜັງສືຈີນຈຶ່ງມີຫຼັກລະບຽບ,ທັງນີ້ມີຄວາມໝາຍທີ່ຄາດຄະເນບໍ່ໄດ້ຕໍ່ການຈໍ່ຕົວຂອງປະຫວັດສາດແລະການສືບທອດວັດທະນະທຳຂອງຈີນ.
ນອກນີ້ ເຈົ້າຊີວິດຊິນສີຮົງເຕຍັງໄດ້ໃຊ້ລະບອບຊັ່ງແທກຜອງຕວງຢ່າງດຽວໃນທົ່ວປະເທດ. ກໍເຊັ່ນດຽວກັບໜັງສື,ກ່ອນໂຮມເຂົ້າເປັນເອກະພາບກັນ,ຫົວໜ່ວຍຄວາມຍາວ,ບໍລິມາດແລະນ້ຳໜັກຂອງບັນດາລັດແມ່ນຕ່າງກັນ,ອັນໄດ້ເປັນສິ່ງກົດໜ່ວງການພັດທະນາເສດຖະກິດຢ່າງໜັກໜ່ວງ. ພ້ອມກັນນັ້ນ ເຈົ້າຊີວິດຊິນສີຮົງເຕຍັງໄດ້ໃຊ້ເງິນຕາແລະກົດໝາຍຢ່າງເອກະພາບ,ອັນໄດ້ສ້າງເງື່ອນໄຂໃຫ້ແກ່ການພັດທະນາເສດຖະກິດທົ່ວປະເທດ,ກໍໄດ້ເພີ່ມທະວີຖານະຂອງອຳນາດສູນກາງໃຫ້ເຂັ້ມແຂງ.
ເຈົ້າຊີວິດຊິນສີຮົງເຕສົມຊື່ເປັນຜູ້ຍິ່ງໃຫຍ່ໃນປະຫວັດສາດຈີນ,ແຕ່ວ່າ,ທາລຸນກຳຂອງພະອົງກໍຄືກັນກັບຄຸນງາມຄວາມດີໄດ້ບັນທຶກໄວ້ໃນປຶ້ມປະຫວັດສາດຈີນ.
ຫຼັງຈາກຊິນສີຮົງເຕຊົງໂຮມຈີນເຂົ້າເປັນເອກະພາບກັນແລ້ວ,ເພື່ອປ້ອງກັນການຮຸກຮານລົບກວນຂອງຊົນເຜົ່າທ່ຽວລ້ຽງສັດຢູ່ພາກເໜືອ,ເລີຍໄດ້ໃຊ້ນະໂຍບາຍກົດໜີບຢ່າງແຂງແຮງບັງຄັບແຮງງານຈຳນວນຫຼວງຫຼາຍກໍ່ສ້າງກຳແພງເມືອງຈີນຍາວຫຼາຍພັນຫຼັກ. ກຳແພງເມືອງຈີນທິດຕາເວັນຕົກເລີ່ມຈາກທະເລຊາຍ,ທິດຕາເວັນອອກຮອດທະເລ,ໄດ້ຜ່ານພູເຂົາທີ່ກັນດານ. ຍ້ອນແຮງງານ,ກຳລັງວັດຖຸແລະລະດັບວິທະຍາສາດເຕັກນິກໃນຄາວນັ້ນມີຈຳກັດ,ແຮງງານທີ່ເປັນສາມັນຊົນໄດ້ຕາຍແລະບາດເຈັບຢ່າງຫຼວງຫຼາຍ. ນອກນີ້ ເຈົ້າຊີວິດຊີນສີຮົງເຕຍັງໄດ້ແຕ່ງຄົນສ້າງພະລາຊະວັງເອີພາງທີ່ຫຼູຫຼາແລະສຸສານຂອງຕົນຢູ່ພູລີຊ່ານ. ແຕ່ວ່າກຳແພງເມືອງຈີນແລະຮູບປັ້ນທະຫານແລະມ້າໃນສຸສານຊິນສີຮົງເຕໃນປັດຈຸບັນລ້ວນແຕ່ແມ່ນມໍລະດົກວັດທະນະທຳຂອງໂລກທີ່ຊື່ດັງ,ແຕ່ລະມື້ມີຄົນທ່ຽວຈົນນັບບໍ່ຖ້ວນ; ແຕ່ເມື່ອສອງພັນປີກ່ອນ,ພວກມັນພັດເຕັມໄປດ້ວຍເລືອດແລະນ້ຳຕາ,ໄດ້ບັນທຶກຄວາມອາຄາດບາດໝາງທີ່ບໍ່ສ້ຽງສຸດຂອງປະຊາຊົນຕໍ່ທາລຸນກຳຂອງເຈົ້າຊີວິດຊີນສີຮົງເຕ,ແລະໃນທີ່ສຸດ,ພາໃຫ້ລາຊະວົງຊິນໄດ້ຖືກໂຄ່ນລົ້ມຫຼັງຈາກປົກຄອງປະເທດພຽງ 15 ປີທໍ່ນັ້ນ.
ເຫດການອີກເລື່ອງໜຶ່ງທີ່ພາໃຫ້ເຈົ້າຊີວິດຊິນສີຮົງເຕບໍ່ມີຊື່ງາມນັ້ນແມ່ນການເຜົາປຶ້ມໜັງສືຝັງນັກຮຽນຮູ້. ເພື່ອເພີ່ມທະວີການປົກຄອງຜະເດັດການໃນດ້ານແນວຄິດ,ກ່ອນຄ.ສ.ປີ 213,ເຈົ້າຊີວິດຊິນສີຮົງເຕຊົງໄດ້ສັ່ງໃຫ້ເຜົາປຶ້ມປະຫວັດສາດລັດອື່ນເວັ້ນແຕ່"ປະຫວັດສາດລາຊະວົງຊິນ"ທີ່ຝ່າຍທາງການເກັບຮັກສາໄວ້ແລະປຶ້ມບູຮານຂອງແນວຄິດປັດຊະຍາຂົງຈື,ຈົນກະທັ້ງຂ້າຄົນທີ່ເກັບມ້ຽນແລະເຜີຍແຜ່ປຶ້ມບູຮານເຫຼົ່ານີ້. ເຫດການທຳລາຍວັດທະນະທຳຢ່າງປ່າເຖື່ອນດັ່ງກ່າວໄດ້ພາໃຫ້ເກີດຫຼາຍເລື່ອງທີ່ບໍ່ທັນໄດ້ແກ້ຕົກຢ່າງຫຼວງຫຼາຍໃນການຄົ້ນຄວ້າປະຫວັດສາດໃນຊູ່ມື້ນີ້.
ເຈົ້າຊີວິດຊິນສີຮົງເຕຊົງໂຮມທົ່ວປະເທດເຂົ້າເປັນເອກະພາບກັນໄດ້ເຮັດໃຫ້ສະພາບແຕກແຍກເປັນເວລາຍາວນານໃນປະຫວັດສາດຈີນນັ້ນສິ້ນສຸດລົງ,ໄດ້ສ້າງປະເທດຈັກກະພັດສັກດິນາທີ່ມີຫຼາຍຊົນເຜົ່າທີ່ຖືຊົນເຜົ່າຮັ້ນເປັນຫຼັກແຫຼ່ງທີ່ເຂັ້ມແຂງ,ປະຫວັດສາດຈີນຈຶ່ງໄດ້ເປີດໜ້າໃໝ່.
|
|
|
