|
ຫວ່າງກ່ອນນີ້ບໍ່ດົນ, ນາງເມິ້ງຖິງເວີຍ ນັກຮ້ອງໄຕ້ຫວັນຈີນທີ່ຈາກເວທີເພງໄປໄດ້4ປີໄດ້ອັດຊີດີແຜ່ນໃໝ່ອ່ຽມຂອງສ່ວນຕົວທີ່ໃຫ້ຊື່ວ່າຫົງຮວາ ດອກໄມ້ແດງ, ຂອງສ່ວນຕົວທີ່ໃຫ້ຊື່ວ່າແລ້ວອອກມາຮ້ອງເພງເທິງເວທີຄືນໃໝ່ອີກ, ເມື່ອຊີດີແຜ່ນນີ້ສົ່ງປ້ອນຕະຫຼາດແລ້ວ, ກໍໄດ້ຮັບການຍ້ອງຍໍຈາກຝ່າຍຕ່າງໆ. ໃນລາຍການມື້ນີ້, ຂ້າພະເຈົ້າຈະສະເໜີເພງໃນຊີດີແຜ່ນນີ້ຂອງນາງເມິ້ງຖິງເວີຍສູ່ທ່ານຟັງ.
ທີ່ທ່ານພວມຟັງຢູ່ນີ້ແມ່ນເພງຈິ້ງໆເຕີເຊິງມິ້ງມ້ານໆເຕີເຫີ ແປວ່າຊີວິດທີ່ມິດງຽບແລະແມ່ນ້ຳທີ່ໄຫຼຊ້າໆເຊິ່ງເປັນເພງໃນແຜ່ນຊີດີໃໝ່ຂອງນາງ. ນາງເມິ້ງຖິງເວີຍໄດ້ໃຊ້ສຽງຮ້ອງອັນຫວານໆແລະແຈ່ມໃສຂອງນາງສ່ອງແສງໃຫ້ເຫັນຄວາມຮັກຫອມແລະຄວາມເຂົ້າໃຈຕໍ່ຊີວິດ. ເນື້ອເພງຂຽນວ່າ: ນ້ຳຫ້ວຍທີ່ໄຫຼຢູ່ຕໍ່ໜ້າ, ບໍ່ໄວກໍບໍ່ຊ້າ, ໄຫຼຜ່ານທົ່ງນາແລະພູດອຍ, ໄຫຼຊ້າໆຕາມຈັງຫວະຂອງຕົນເອງ. ປານ້ອຍໃນຫ້ວຍ, ລອຍຊ້າໆ, ບໍ່ຟ້າວບໍ່ຟັ່ງ, ບໍ່ວ່າຈະທຸກຫຼືສຸກ, ມັນກໍລອຍຊ້າໆ.
ທີ່ຟັງມານັ້ນແມ່ນເພງ"ຈິ້ງໆເຕີເຊິ່ງມິ້ງມ້ານໆເຕີເຫີ"ໃນແຜ່ນຊີດີໃໝ່ຂອງນາງເມິງຖິງເວີຍ.
ໃນຊຸມປີ90ສະຕະວັດທີ່ແລ້ວ, ນາງເມິ້ງຖິງເວີຍໄດ້ຂຶ້ນຊື່ລືນາມເທິງເວທີເພງໄຕ້ຫວັນຍ້ອນໄດ້ຮ້ອງເພງ "ນີຄ້ານນີຄ້ານແຢ້ລ້ຽງເຕີຫຼ້ຽນ" ແປວ່າ"ເຈົ້າເບິ່ງໃບໜ້າຂອງດວງເດືອນ", ພາຍຫຼັງມາ, ນາງໄດ້ອັດຊີດີອີກ20ກວ່າແຜ່ນເຊັ່ນ: "ໃນຍາມໜາວມາເບິ່ງຝັນຕົກຢູ່ໄຕເປ", ເພງ"ນ້ຳຕາຂອງໃຜ" ແລະເພງ"ໃນສາຍລົມມີປອນເມກທີ່ປະກອບດ້ວຍນ້ຳຝົນ" ເປັນຕົ້ນ, ໄດ້ຮັບຄວາມຊົມເຊີຍຈາກແຟນເພງທັງຫຼາຍ. ປີ2000, ຍ້ອນແຜ່ນຊີດີຂອງນາງຂາຍບໍ່ດີປານໃດ, ນາງຈຶ່ງໄດ້ລາຈາກເວທີເພງໄປຊົ່ວຄາວ. ໃນເວລາ4ປີກວ່າທີ່ຈາກໄປນັ້ນ, ນາງໄດ້ຊອກພົບຄູ່ຮັກຂອງຕົນ, ແລ້ວໄດ້ສ້າງຄອບຄົວ.
ລະດູໃບໄມ້ລົ່ນປີ2004, ນາງເມິ້ງຖິງເວີຍກັບສາມີໄດ້ໄປທັດສະນາຈອນຢູ່ເຂດພູດອຍພາກຕາເວັນຕົກສຽງເໜືອຂອງຈີນ. ຊີວິດການເປັນຢູ່ອັນລຳບາກຂອງພວກເດັກນ້ອຍໃນເຂດພູດອຍເຮັດໃຫ້ນາງຄຶດອີຕົນຫຼາຍ, ນາງຈຶ່ງຕັດສິນໃຈອອກມາຮ້ອງເພງອີກ, ແລ້ວເອົາລາຍໄດ້ຈາກການຂາຍແຜ່ນຊີດີບໍລິຈາກໃຫ້ພວກເດັກນ້ອຍທີ່ທຸກຍາກເຫຼົ່ານັ້ນ. ສະນັ້ນ ນາງໄດ້ແຕ່ງເພງ"ດອກໄມ້ແດງ"ເອົາເອງ, ອວຍພອນໃຫ້ດິນແດນທີ່ຮົກເຮື້ອຜືນນີ້ຈົ່ງມີດອກໄມ້ທີ່ສວຍງາມບານເຮື່ອເຮືອງ.
ທີ່ທ່ານພວມຟັງຢູ່ນີ້ກໍແມ່ນເພງ"ຫົງຮວາ"ແປວ່າ"ດອກໄມ້ແດງ" ເພງເອກໃນແຜ່ນຊີດີໃໝ່. ຢູ່ເຂດຕາເວັນຕົກສຽງເໜືອຂອງຈີນ, ດອກໄມ້ແດງຖືກຖືເປັນສັນຍາລັກແຫ່ງຄວາມລ້ຳຄ່າແລະຄວາມບໍລິສຸດຜຸດຜ່ອງ, ນາງເອົາດອກໄມ້ແດງມາປຽບເປັນສອງພວງແກ້ມທີ່ແດງອ່ອງຕ່ອງຂອງພວກເດັກນ້ອຍໃນເຂດພູດອຍ, ເມື່ອເດັກນ້ອຍເຫຼົ່ານີ້ຍິ້ມແຍ້ມດ້ວຍຄວາມຫວັງແລະຄວາມເບີກບານມ່ວນຊື່ນນັ້ນ ກໍຄ້າຍຄືດອກໄມ້ແດງບານເຮື່ອເຮືອງເທິງດິນແດນທີ່ໜາວກະດ້າງຕອນນີ້.
ເນື້ອເພງມີຢູ່ວ່າ: ລົມພັດມາ, ຕົ້ນໄມ້ໄກວໂອ້ນເອ້ນ, ຄວາມຝັນໃກ້ເຂົ້າມາແລ້ວ. ຢູ່ເທິງດິນແດນທີ່ກວາງໄກ, ຂ້ອຍໄດ້ຍິນສຽງເຈົ້າພວມຮຽກເອີ້ນ. ດອກໄມ້ທີ່ຍິ້ມແຍ້ມ ພານ້ອງເຕີບໃຫຍ່. ໃບໜ້າເຈົ້າ ງາມດັ່ງແສງຕາເວັນລົງແລງ.
ທີ່ຟັງມານັ້ນແມ່ນເພງ"ຫົງຮວາ" ດອກໄມ້ແດງ ເພງເອກໃນຊີດີໃໝ່ຂອງນາງເມິ້ງຖິງເວີຍ.
ແຜ່ນຊີດີດອກໄມ້ແດງໄດ້ລວບລວມເພງໃໝ່ຂອງນາງ10ເພງ ໃນນັ້ນມີ6ເພງແມ່ນແຕ່ງໃໝ່. ຕໍ່ໄປ ເຊີນຊົມເພງ"ຫູພໍ້" ແກ້ວອຳພັນ.(ປ່ອຍເພງ)
ເພງນີ້ແມ່ນເພງສະຫຼັບໃນລະຄອນເວົ້າເລື່ອງໃໝ່ຊື່ວ່າ"ຫູພໍ້" ແກ້ວອຳພັນ ທີ່ສະແດງຢູ່ແຜ່ນດິນໃຫຍ່ຈີນໃນປີ2005ຈົນມີຊື່ສຽງດົງດັງ, ເນື້ອເພງເຕັມໄປດ້ວຍເຫດຜົນປັດຊະຍາ. ບັນລະຍາຍເລື່ອງຮັກໂລມັງຕິກ, ບັນຍາຍຄວາມຮັກດຽວໃຈດດຽວແລະຄວາມຮັກອະມະຕະຂອງພະເອກນາງເອກຢ່າງເປັນໜ້າກະຕຸ້ນໃຈທີ່ສຸດ.
ເນື້ອເພງມີຄວາມໝາຍວ່າ: ສຸດທີ່ຮັກຂອງຂ້ອຍ, ເຈົ້າໝັ້ນໜຽວແຕ່ອ່ອນໂຍນ, ຜຸດຜ່ອງເໝືອນດັ່ງແກ້ວອຳພັນ, ງາມຢ່າງບໍ່ມີວັນພຸໂດກ. ສຸດທີ່ຮັກຂອງຂ້ອຍ, ໃນເວລາພັບຕາດຽວ, ແກ້ວອຳພັນໄດ້ຈາລຶກຄວາມເຈັບປວດແລະຄວາມມ່ວນຊື່ນທີ່ຈະລືມໄລນັ້ນໄວ້ຢ່າງອະມະຕະ.
ທີ່ຟັງມານັ້ນແມ່ນ"ຫູພໍ້" ແກ້ວອຳພັນໃນແຜ່ນຊີດີ"ດອກໄມ້ແດງ" ຂອງນາງ
ເມິ້ງຖິງເວີຍ.
ນອກຈາກ6ເພງທີ່ແຕ່ງໃໝ່ນັ້ນແລ້ວ, ຊີດີໃໝ່ຍັງໂຮມເອົາ4ເພງທີ່ມີເອກະລັກຂອງນາງໂດຍສະເພາະ ຄືເພງ"ເຈົ້າເບິ່ງໜ້າຂອງດວງເດືອນ", ເພງໃນຍາມໜາວມາເບິ່ງຝົນຕົກຢູ່ໄຕເປ, ເພງດອກກຸຫຼາບທີ່ໜ້າອາຍບານຢ່າງມິດງຽບ, ແລະເພງອື່ນໆ. ນາງເມິ້ງຖິງເວີຍໄດ້ຮຽບຮຽງແລະຮ້ອງເພງເກົ່າເຫຼົ່ານີ້ຄືນໃໝ່ດ້ວຍຈິດໃຈໃໝ່ອ່ຽມ, ໄດ້ປະກົດມີສະເໜອັນຈັບໃຈຄົນ. ຕໍ່ໄປເຊີນຟັງເພງ"ເຈົ້າເບິ່ງໃບໜ້າຂອງດວງເດືອນ" ເພງທີ່ເຮັດໃຫ້ນາງຂື້ນຊື່ລືນາມແລະແມ່ນເພງທີ່ນາງຮຽບຮຽງໃໝ່.
ຕໍ່ໄປເຊີນຟັງອີກເພງໜຶ່ງທີ່ເຮັດໃຫ້ນາງມີຊື່ສຽງຄືກັນ, ຄືເພງໃນຍາມໜາວມາເບິ່ງຝົນຕົກຢູ່ໄຕເປ.
|
