|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ. ໃນລາຍການພາກນີ້, ຂ້າພະເຈົ້າຈະເລົ່າສຸພາສິດເລື່ອງ "ຈິ່ນຢໍ້ຫານສານ" ສູ່ຟັງ, ຫວັງວ່າທ່ານຄົງຈະມັກ.
ຕູ້ມີ້ເກີດຢູ່ເມືອງຢາງເສີງແຂວງຢິງຊວນ (ປະຈຸບັນແມ່ນເມືອງເຕິງເຟິງແຂວງເຫີໜານ) ໃນສະໄໝລາຊະວົງຮັ້ນຕາເວັນອອກຂອງຈີນ. ເພິ່ນເຄີຍເປັນເຈົ້າແຂວງໄທ້ຊານແລະຕຳແໜ່ງສຳຄັນອື່ນໆ. ໃນໜ້າທີ່ຕຳແໜ່ງ, ຕູ້ມີ້ປະຕິບັດກົດໝາຍຢ່າງເຂັ້ມງວດແລະທ່ຽງທຳ, ຈັບຕົວແລະລົງໂທດລູກຫຼານພວກຂຸນນາງທີ່ກໍ່ກຳທຳເຂັນຕາມລຳພັງໃຈເຫຼົ່ານັ້ນຢ່າງບໍ່ລັ່ງເລໃຈຈັກເມັດ.
ພາຍຫຼັງມາ ຕູ້ມີ້ຖືກປົດຕຳແໜ່ງແລະກັບເມືອບ້ານ. ລິວເຊິ້ງທີ່ດຳລົງຕຳແໜ່ງເຈົ້າແຂວງສູຈິ້ນໃນຄາວນັ້ນກໍລາອອກຈາກຕຳແໜ່ງແລະກັບມາເກັບເນື້ອເກັບຕົວຢູ່ບ້ານ. ພາຍຫຼັງລິວເຊິ້ງກັບເມືອບ້ານແລ້ວ ເພິ່ນປິດປະຕູບໍ່ຄົບຄ້າສະມາຄົມກັບຜູ່ອື່ນ, ບໍ່ສົນໃຈເລື່ອງໃນສັງຄົມ, ເສີຍເມີຍຕໍ່ເລື່ອງລາວທີ່ເກີດຂຶ້ນຢູ່ໃນບ້ານ. ສ່ວນຕູ້ມີ້ພັດຕ່າງກັນ. ໃນຍາມທຳມະດາ ເພິ່ນມັກທ່ຽວໄປມາຢູ່ໃນບ້ານ, ຊອກຮູ້ເລື່ອງລາວນ້ອຍໃຫຍ່ທີ່ເກີດຂຶ້ນໃນບ້ານ. ຕໍ່ຜູ່ທີ່ມີມາລະຍາດແລະໃຈບຸນ, ເພິ່ນກໍຍ້ອງຍໍສັນລະເສີນ; ຕໍ່ຄົນຮ້າຍທີ່ໂຫດຫ້ຽມ, ເພິ່ນກໍຕັກເຕືອນແລະຕິຕຽນ; ຕໍ່ຄອບຄົວທີ່ທຸກຍາກ, ເພິ່ນກໍພະຍາຍາມຊ່ອຍເຫຼືອ. ຍ້ອນຕູ້ມີ້ຈຳແນກຄວາມດີຄວາມຊົ່ວຢ່າງຈະແຈ້ງ ມີໃຈເມດຕາຕໍ່ຜູ່ອື່ນ, ຈຶ່ງໄດ້ຮັບຄວາມຍ້ອງຍໍຈາກຊາວບ້ານ, ເມື່ອມີບັນຫາຫຍັງ, ຄົນທັງຫຼາຍກໍມັກມາຫາລືກັບເພິ່ນ.
ບາຊົ່ວໄລຍະໜື່ງ ຕູ້ມີ້ກໍໄປຢາມເຈົ້າແຂວງຫວັງຢີ້, ເທື່ອໃດກໍ່ເລົ່າເລື່ອງດີຄົນເດັ່ນ ເລື່ອງຮ້າຍຄົນຮ້າຍສູ່ເຈົ້າແຂວງຟັງ, ແລະປະກອບຄວາມເຫັນຂອງຕົນຢ່າງຈະແຈ້ງ, ຫວັງໃຫ້ເຈົ້າແຂວງລົງໂທດຄົນຮ້າຍສົ່ງເສີມຄົນດີ. ເຈົ້າແຂວງເຄົາລົບຕູ້ມີ້ທີ່ສຸດ, ເຫັນວ່າຄຳເວົ້າຂອງເພິ່ນມີເຫດຜົນຫຼາຍ, ແລະມີຜົນດີຫຼາຍຕໍ່ວຽກງານຂອງຕົນ. ມີເທື່ອໜຶ່ງ ເຈົ້າແຂວງລົມກັບຕູ້ມີ້, ເມື່ອລົມເຖິງລິວເຊິ້ງທີ່ເກັບຕົວຢູ່ບ້ານ, ເຈົ້າແຂວງຫວັງຢີ້ອຸທານວ່າ:"ທ່ານລິວເຊິ້ງກໍແມ່ນຜູ່ເກັບຕົວທີ່ສູງສົ່ງຜູ່ໜຶ່ງແທ້." ຕູ້ມີ້ຟັງແລ້ວ ກໍເວົ້າຕໍ່ເຈົ້າແຂວງວ່າ:"ຂ້າພະເຈົ້າບໍ່ຊົມເຊີຍການກະທຳຂອງລິວເຊິ້ງ. ໃນຖານະເພິ່ນເປັນຂຸນນາງ, ຄົນທັງຫຼາຍປະຕິບັດຕໍ່ເພິ່ນໃນຖານະເປັນແຂກຜູ່ມີກຽດ, ແຕ່ເພິ່ນພັດບໍ່ກ້າສະເໜີເລື່ອງດີຄົນເດັ່ນ, ບໍ່ກ້າຕິຕຽນເລື່ອງຊົ່ວຄົນຮ້າຍ. ເພື່ອປົກປ້ອງຕົນເອງ, ເພິ່ນເຮັດຕິບໍ່ຮູ້ບໍ່ເຫັນຫຍັງ, ເໝືອນຈັກຈັ່ນໃນຍາມໜາວ, ຮ້ອງບໍ່ໄດ້ອີກ. ດຽວນີ້ ຂ້າພະເຈົ້າມີແຕ່ແຈ້ງຄົນດີຄົນຊົ່ວໃຫ້ທ່ານຊາບ ເພື່ອໃຫ້ທ່ານລົງໂທດຄົນຊົ່ວສົ່ງເສີມຄົນດີຢ່າງຈະແຈ້ງ." ເມື່ອຫວັງຢີ້ຟັງແລ້ວຮູ້ສຶກລະອາຍໃຈທີ່ສຸດ ແລະກໍຍິ່ງເຄົາລົບຕູ້ມີ້ກວ່າເກົ່າ.
ເມື່ອໄດ້ຟັງມາຮອດນີ້ ຂ້າພະເຈົ້າຄິດວ່າຜູ່ຟັງທັງຫຼາຍຄົງຈະເຂົ້າໃຈຄວາມໝາຍຂອງສຸພາສິດ "ຈິ່ນຢໍ້ຫານສານ" ນີ້ແລ້ວ, ນັ້ນກໍ່ຄື ບໍ່ປາກບໍ່ຕີງເໝືອນຈັກຈັ່ນໃນຍາມອາກາດໜາວ. ໃຊ້ມາອຸປະມາຄົນຂີ້ຢ້ານ ບໍ່ກ້າຕຳນິສົ່ງຂ່າວຜູ່ອື່ນ.
|
