|
ການໂຕ້ຖຽງກັນກ່ຽວກັບໂທລະສັບມືຖືຈະເປັນໂທດຕໍ່ຮ່າງກາຍຫຼືບໍ່ນັ້ນໄດ້ມີມາດົນນານແລ້ວ,ຈຸດສຸມໃນການໂຕ້ຖຽງກັນແມ່ນ,ໂທລະສັບມືຖືແຜ່ລັງສີຈະມີບົດບາດທາງລົບຕໍ່ຮ່າງກາຍຄົນເຮົາຫຼືບໍ່. ທຳມະດາແລ້ວ,ການຄົ້ນຄວ້າຂອງນັກວິທະຍາສາດແມ່ນໂຮມສູນໃນດ້ານຜົນສະທ້ອນຂອງໂທລະສັບມືຖືທີ່ມີຕໍ່ສະໝອງແລະຫູ,ແຕ່ຫວ່າງມໍ່ໆນີ້ ນັກວິທະຍາສາດອິສຣາແອນໄດ້ຄົ້ນຄວ້າໃນດ້ານໃໝ່ເຊິ່ງສະແດງໃຫ້ເຫັນວ່າ,ການແຜ່ລັງສີຂອງໂທລະສັບມືຖືກໍເປັນໂທດຕໍ່ຕາຂອງຄົນເຮົາ,ນອກຈາກກະທົບກະເທືອນເຖິງຕາຕ້ອມເຂົ້າເປັນຈຸດດຽວແລ້ວ,ຍັງອາດຈະພາໃຫ້ເປັນພະຍາດຕາເຂົ້າເຝື້ອອີກດ້ວຍ.
ຫວ່າງມໍ່ໆນີ້ ນັກວິທະຍາສາດໄດ້ກ່າວເຕືອນວ່າ,ໃຊ້ໂທລະສັບມືຖືດົນເກີນໄປອາດຈະເປັນໂທດຕໍ່ຕາຢ່າງຖາວອນ. ພວກເຂົາເຈົ້າໄດ້ຄົ້ນຄວ້າເຫັນວ່າ,ລັງສີໄມໂຄຼເວບຂອງໂທລະສັບມືຖືສາມາດເຮັດໃຫ້ເນື້ອເຍື້ອຂອງຕາ"ພອງຂຶ້ນ",ນີ້ແມ່ນລາງຂອງພະຍາດຕາເຂົ້າເຝື້ອ,ພ້ອມກັນນັ້ນ ໂທລະສັບມືຖືກໍອາດຈະລົບກວນຄວາມສາມາດຕ້ອມເຂົ້າເປັນຈຸດດຽວຂອງຕາ.
ໜ່ວຍຄົ້ນຄົ້ນທີ່ນຳໂດຍທ່ານເລວີ ເຊີຮິດ ນັກວິທະຍາສາດອິສຣາແອນກ່າວເຕືອນວ່າ:"ຜົນການຄົ້ນຄວ້າຂອງພວກຂ້າພະເຈົ້າສະແດງໃຫ້ເຫັນວ່າ,ລັງສີໄມໂຄຼເວບສາມາດທຳລາຍຕາຢ່າງກູ້ຄືນບໍ່ໄດ້. ພວກຂ້າພະເຈົ້າສະເໜີໃຫ້ຄົນທັງຫຼາຍທີ່ມີໂທລະສັບມືຖືວ່າ,ໃຕ້ກໍລະນີທີ່ມີໂທລະສັບຕັ້ງໂຕະຢູ່ຄຽງຂ້າງນັ້ນ,ຢ່າໃຊ້ໂທລະສັບມືຖື."
ໃນຕົ້ນປີນີ້ ລັດຖະມົນຕີຜູ້ໜຶ່ງຂອງອັງກິດເຄີຍເຕືອນໃຫ້ພໍ່ແມ່ທັງຫຼາຍເອົາໃຈໃສ່ນຳເວລາໃຊ້ໂທລະສັບມືຖືຂອງລູກເຕົ້າຕົນ. ສ່ວນການຄົ້ນພົບໃໝ່ດັ່ງກ່າວອາດຈະພາໃຫ້ຄົນທັງຫຼາຍປຶກສາຫາລືກັນອີກກ່ຽວກັບຄວາມປອດໄພຂອງໂທລະສັບມືຖື.
ບັນດານັກວິທະຍາສາດຂອງສະພາບັນດິດວິສະວະກຳອິສຣາແອນໄດ້ໃຊ້ແກ້ວຕາຂອງງົວຜູ່ມາເຮັດການທົດລອງລາຍໜຶ່ງ. ມູນເຫດທີ່ບັນດານັກວິທະຍາສາດເລືອກເອົາຕາຂອງງົວຜູ່ນັ້ນແມ່ນ,ຕາຂອງງົວຜູ່ໃນອາຍຸ 2 ປີນັ້ນຄືກັນກັບຕາຂອງຄົນທີ່ສຸດ.
ຜູ້ຄົ້ນຄວ້າໄດ້ໃຫ້ແກ້ວຕາຂອງງົວຜູ່ຈຳນວນໜຶ່ງເຜີຍຢູ່ໃນອຸນຫະພູມອັນເໝາະສົມ,ອຸນຫະພູມດັ່ງກ່າວທໍ່ກັບອຸນຫະພູມຍ້ອນໃຊ້ໂທລະສັບມືຖືດົນເກີນໄປ,ພ້ອມກັນນັ້ນ ຜູ້ຄົ້ນຄວ້າຍັງໄດ້ໃຫ້ແກ້ວຕາອີກຈຳນວນໜຶ່ງເຜີຍຢູ່ໃຕ້ລັງສີໄມໂຄຼເວບທີ່ທໍ່ກັບການແຜ່ລັງສີຂອງໂທລະສັບມືຖື. ຫຼັງຈາກນັ້ນສອງອາທິດ,ຜູ້ຄົ້ນຄວ້າໄດ້ເອົາແກ້ວຕາເຫຼົ່ານີ້ປຽບທຽບກັບແກ້ວຕາປົກກະຕິ.
ນັກວິທະຍາສາດປະກົດເຫັນວ່າ,ຫຼັງຈາກແກ້ວຕາສຳຜັດກັບໂທລະສັບມືຖືແລ້ວ,ບໍ່ສາມາດຕ້ອມແສງເຂົ້າເປັນຈຸດດຽວຢ່າງຊັດເຈນ,ນີ້ຈະພາໃຫ້ສາຍຕາມົວ. ແຕ່ຫຼັງຈາກແກ້ວຕາບໍ່ສຳຜັດກັບໂທລະສັບມືຖືແລ້ວ,ອາການດັ່ງກ່າວກໍຈະຫາຍໄປຢ່າງອັດຕະໂນມັດ. ນອກນີ້ ແກ້ວຕາສຳຜັດກັບໂທລະສັບມືຖືຍັງຈະພາໃຫ້ເນື້ອເຍື້ອພອງຂຶ້ນ,ແລະຈະບໍ່ຫາຍໄປຕາມເວລາທີ່ຜ່ານໄປ,ອາການດັ່ງກ່າວແມ່ນອາການລ່ວງໜ້າຂອງພະຍາດຕາເຂົ້າເຝື້ອ ພະຍາດຖາວອນໃນຕາ.
ທ່ານເຊີຮິດເວົ້າວ່າ,"ປັດຈຸບັນມີຫຼາຍໆຄົນພວມຄົ້ນຄວ້າວ່າໂທລະສັບມືຖືຈະພາໃຫ້ເປັນມະເຮັງຫຼືເປັນໂທດຕໍ່ສະໝອງຫຼືບໍ່,ແຕ່ຍັງບໍ່ທັນມີຄົນຄົ້ນຄວ້າຜົນສະທ້ອນຂອງໂທລະສັບມືຖືທີ່ມີຕໍ່ສາຍຕາ." ຕາມຊາບວ່າ,ອີກບໍ່ດົນ,ການຄົ້ນຄວ້າລາຍນີ້ຈະພິມລົງໃນວາລະສານ"ວິທະຍາສາດແມ່ເຫຼັກຊີວະຊາດ". ນອກນີ້,ບັນດານັກວິທະຍາສາດຍັງຈະຖືກເຊີນໄປຄະນະກຳມາທິການອະນາໄມທີ່ຂຶ້ນກັບລັດຖະສະພາອິສຣາແອນເພື່ອບັນລະຍາຍໝາກຜົນຄົ້ນຄວ້າຂອງພວກເຂົາເຈົ້າ.
ປີກາຍນີ້ ຄະນະກຳມະການແຜ່ລັງສີສາກົນໄດ້ສະຫຼຸບການຄົ້ນຄວ້າທັງໝົດກ່ຽວກັບໂທລະສັບມືຖື,ພວກເຂົາເຈົ້າເຫັນວ່າ,ການໃຊ້ໂທລະສັບມືຖືບໍ່ມີການພົວພັນຫຍັງກັບບົດບາດທາງລົບຕໍ່ຮ່າງກາຍ,ບໍ່ມີຫຼັກຖານທີ່ເຊື່ອຖືໄດ້ສາມາດຢືນຢັນວ່າໂທລະສັບມືຖືມີສ່ວນກ່ຽວຂ້ອງກັບສຸຂະພາບຂອງຄົນ.
ທ່ານໄມເຄິນ ຄຼາກ ເຈົ້າໜ້າທີ່ກະຊວງສາທາລະນະສຸກເວົ້າວ່າ,"ວຽກງານລາຍນີ້ດີຫຼາຍ,ພວກເຮົາຈະເອົາໃຈໃສ່ນຳເລື່ອງນີ້. ຖ້າໃນອະນາຄົດຍັງມີໝາກຜົນຄົ້ນຄວ້າທີ່ຄືກັນຫຼືຄ້າຍຄືກັນນີ້,ຮີດສາທາລະນະສຸກອາດຈະຕ້ອງສຳຫຼວດຄືນໃໝ່."
|
