|
ໃນລາຍການພາກນີ້, ຂ້າພະເຈົ້າຈະເລົ່າສຸພາສິດເລື່ອງ "ຈີ່ອ່ານຊືເວິ່ຍ" ສູ່ຟັງ, ສຸພາສິດນີ້ໝາຍເຖິງ "ຍາມສະໜຸກຢ່າລືມອຸບາດ ຍາມໄດ້ລາບໃຫ້ຄຳນຶງໂພຍໄພ".
ໃນສະໄໝຊຸນຊິວຍຸດທະຈັກຂອງຈີນ, ລັດເຈິ້ງທີ່ກຳລັງອ່ອນໄດ້ຢູ່ລະຫວ່າງລັດຈິ້ນແລະລັດສູ ເຊິ່ງແມ່ນສອງລັດທີ່ເຂັ້ມແຂງ, ຈຶ່ງຕົກຢູ່ໃນສະພາບລຳບາກທີ່ສຸດ.ເພື່ອປົກປັກຮັກສາຕົນເອງ, ເຈົ້າຊີວິດລັດເຈິ້ງໄດ້ຊົງຮຽກເສນາບໍດີທັງຫຼາຍມາປຶກສາຫາລືກັນ, ໃນທີ່ສຸດໄດ້ຕົກລົງປະຕິບັດແຜນການຊົ່ວຄາວ ຄືເຂົ້າຂ້າງລັດຈິ້ນທີ່ເຂັ້ມແຂງກວ່າໝູ່ຢ່າງເຖິງຖອງ.
ເຈົ້າຊີວິດລັດເຈິ້ງເລີຍແຕ່ງຄົນໃຫ້ສິນບົນແກ່ລັດຈິ້ນຢ່າງຫຼວງຫຼາຍ. ພວກເຂົາເຈົ້າໄດ້ຄັດເລືອກນາງສາວທີ່ງາມກວ່າໝູ່ແລະຊ່າງຮ້ອງຊ່າງລຳກວ່າໝູ່ໃນລັດເຈິ້ງ 16 ຄົນ,ຄັດເລືອກນັກດົນຕີທີ່ມີຊື່ສຽງກວ່າໝູ່ໃນທົ່ວລັດເຈິ້ງ 3 ຄົນສົ່ງໃຫ້ລັດຈິ້ນ, ຍັງມີເຄື່ອງດົນຕີຫຼາຍຊະນິດ ແລະລົດສູ້ລົບທີ່ປະກອບດ້ວຍເກາະ100ຄັນແລະອາວຸດຊະນິດອື່ນໆ.ຈິ້ນຕ້າວກົ່ງ ເຈົ້າຊີວິດລັດຈິ້ນໄດ້ຮັບຂອງຂວັນຈຳນວນຫຼວງຫຼາຍຄືແນວນີ້ຈາກລັດເຈິ້ງ ເຊິ່ງເປັນລັດນ້ອຍໆ, ເລີຍດີພະໄທທີ່ສຸດ.ພະອົງຊົງຕົກລົງພ້ອມກັນກັບເສນາບໍດີເວິຍຈ້ຽງ ສະເຫວີຍຂອງຂວັນເຫຼົ່ານີ້ ນຳກັນ,ພະອົງພະລາຊະທານນາງຮ້ອງໃຫ້ເພິ່ນ 8 ຄົນ, ແລະຊົງເວົ້າວ່າ: ໃນຫຼາຍປີມານີ້, ເຈົ້າຊ່ອຍພະອົງເຮົາວາງແຜນສ້າງນະໂຍບາຍ,ຄາດການແມ່ນຢຳເໝືອນເທວະດາ, ສູ້ເໜືອສູ້ໃຕ້, ຈັ່ງແມ່ນແຂນຂາຂອງພະອົງເຮົາແທ້, ເຈົ້າກັບພະອົງເຮົາໄດ້ຮ່ວມມືກັນເປັນຢ່າງດີທີ່ສຸດ, ເໝືອນດັ່ງຮ້ອງເພງກັບການບັນເລງ ປະສົມປະສານກັນໄດ້ດີຫຼາຍ. ເຈົ້າກັບພະອົງເຮົາພ້ອມກັນຜ່ານຜ່າຄວາມລຳບາກກາກກຳ, ພ້ອມກັນຜ່ານຜ່າຄວາມຫຍຸ້ງຍາກ, ກໍຄວນສະເຫວີຍພ້ອມກັນ.
ເວິຍຈ້ຽງໄດ້ປະຕິເສດການພະລາຊະທານຂອງຈິ້ນຕ້າວກົ່ງດ້ວຍຄວາມອ່ອນຫວານ, ແລະສວຍໂອກາດເຕືອນຈິ້ນຕ້າວກົ່ງໂດຍກົງວ່າ: ປະເທດເຮົາປົກຄອງໄດ້ເຂັ້ມແຂງຄືແນວນີ້,ຊີວິດການເປັນຢູ່ຂອງສາມັນຊົນກໍມີຄວາມສະຫງົບຄືແນວນີ້, ກ່ອນອື່ນແມ່ນຍ້ອນພະບາດສົມເດັດສະຫຼາດສອ່ງໃສ, ປົກຄອງລັດໄດ້ດີ, ຖັດມາແມ່ນຍ້ອນເສນາບໍດີທັງຫຼາຍສາມັກຄີກັນ. ຄົນທັງຫຼາຍສາມັກຄີເປັນຈິດໜຶ່ງໃຈດຽວກັນແມ່ນເພື່ອເປົ້າໝາຍອັນໜຶ່ງອັນດຽວກັນ, ນັ້ນກໍຄື ເຫັນພ້ອມພະບາດສົມເດັດປົກຄອງປະເທດໃຫ້ດີ.ຂ້ານ້ອຍຜູ່ດຽວມີກຳລັງເບົາບາງ, ມີຄຸນງາມຄວາມດີຫຍັງແດ່? ຂ້ານ້ອຍພຽງແຕ່ຫວັງໃຫ້ພະບາດສົມເດັດຈົ່ງຄຳນຶງເຖິງວ່າປະເທດເຮົາຍັງມີຫຼາຍໆວຽກຕ້ອງເຮັດໃນຂະນະສະເຫວີຍຄວາມສຳລານ, ຕ້ອງລະມັດລະວັງຄວາມອັນຕະລາຍແລະບ່ອນຫວ່າງທີ່ແຝງຢູ່. ໃນໜັງສືບູຮານມີຄຳເວົ້າໜຶ່ງເວົ້າໄດ້ດີແທ້: ຍາມສະໜຸກຢ່າລືມອຸບາດ ຍາມໄດ້ລາບໃຫ້ຄຳນຶງໂພຍໄພ, ຄຳນຶງເຖິງກ່ອນແລ້ວຈຶ່ງຈະກະກຽມໄວ້ກ່ອນໄດ້, ກຽມໄວ້ກ່ອນແລ້ວຈຶ່ງບໍ່ມີໄພອັນຕະລາຍ. ຂ້ານ້ອຍຂໍເຕືອນພະບາດສົມເດັດດ້ວຍຄຳເວົ້າດັ່ງກ່າວ.
ຈິ້ນຕ້າວກົ່ງຮັບເອົາຄຳເຕືອນຂອງເວິຍຈ້ຽງ, ແລະຊົງປະລະຄວາມຄຶດສະເຫວີຍຄວາມສຸກສຳລານໃນຍາມສັນຕິ.
|
