|
|
 |
| (GMT+08:00)
2005-09-14 18:38:24
|
 |
|
ຈີນໃຊ້ມາດຕະການທີ່ສົມບູນກວ່າເກົ່າຊ່ອຍເຫຼືອນັກສຶກສາຜູ້ທຸກຍາກເຂົ້າຮຽນ(ສຽງ)
cri
Author: da
|
ພາຍຫຼັງກ້າວເຂົ້າສູ່ເດືອນກັນຍາເປັນຕົ້ນມາ,ນັກສຶກສາຊຸດໃໝ່ຂອງຈີນເລີ່ມທະຍອຍກັນໄປສະໜີຕົວຢູ່ໂຮງຮຽນ.ປີນີ້ ມີນັກສຶກສາຊຸດໃໝ່ 4 ລ້ານກວ່າຄົນເຂົ້າຮຽນໂຮງຮຽນຊັ້ນສູງ.
ປະຈຸບັນ ການສຶກສາຊັ້ນສູງຂອງຈີນແມ່ນການສຶກສາແບບບໍ່ບັງຄັບ.ນັກສຶກສາຜູ້ໜຶ່ງຕ້ອງຈ່າຍຄ່າຮຽນ 6 ພັນຢວນຕໍ່ປີ,ບວກກັບຄ່າຫ້ອງນອນແລະຄ່າກິນຄ່າໃຊ້,ປີໜຶ່ງຕ້ອງການຈ່າຍເງິນ 1 ໝື່ນຢວນ,ເວົ້າສຳລັບຄອບຄົວຜູ້ທຸກຍາກ ໂດຍສະເພາະແມ່ນຄອບຄົວໃນຊົນນະບົດສ່ວນໜຶ່ງແລ້ວ ຈະເປັນພາລະຫາບແບກບໍ່ໄດ້.
ປີນີ້ ນາງລິວອີ້ ທີ່ຢູ່ຊົນນະບົດແຂວງອ່ານຫຸ່ຍໄດ້ເສັງເຂົ້າມະຫາວິທະຍາໄລຄົມມະນາຄົມປັກກິ່ງ.ໃນເວລາຮັບໃບແຈ້ງເຂົ້າຮຽນມະຫາວິທະຍາໄລ ນາງທັງດີໃຈ ທັງກະວົນກະວາຍ,ຍ້ອນວ່າ ຄອບຄົວລາວທຸກຍາກຫຼາຍ,ມີເອື້ອຍອ້າຍນ້ອງ 4 ຄົນກຳລັງຮຽນຢູ່,ພໍ່ແມ່ບໍ່ມີເງິນອັນພຽງພໍໄປຈ່າຍຄ່າຮຽນອີກ.
ແຕ່ໃນເວລາຮັບໃບແຈ້ງເຂົ້າຮຽນມະຫາວິທະຍາໄລ,ໃນຊອງຈົດໝາຍຍັງມີໃບໜຶ່ງບອກລາວວ່າ,ສາມາດກູ້ຢືມເງິນນຳລັດຖະບານ ແກ້ໄຂບັນຫາຄ່າຮຽນ.ນາງເວົ້າວ່າ:
"ເວລາໄປສະເໜີຕົວຢູ່ໂຮງຮຽນ ຂ້ອຍບອກອາຈານວ່າບໍ່ມີຄ່າຮຽນ,ໂຮງຮຽນກໍໃຫ້ຂ້ອຍໄປຕາມ"ຊ່ອງທາງສີຂຽວ"ໝາຍຄວາມວ່າ ບໍ່ຕ້ອງເສຍຄ່າຮຽນຄ່າຫ້ອງນອນ ແຕ່ຈົດທຳນຽນແລະເຂົ້າຮຽນກ່ອນ,ແລ້ວຮ້ອງຂໍເງິນກູ້ຢືມນຳລັດໄດ້."
ຄ່າຮຽນກູ້ຢືມນຳລັດ,ຈະມີ 6 ພັນຢວນຕໍ່ປີ.ນອກນີ້,ນັກສຶກສາຜູ້ທຸກຍາກຍັງສາມາດຮ້ອງຂໍຕຳແໜ່ງທັງຮຽນທັງເຮັດວຽກຢູ່ໃນໂຮງຮຽນ,ໄປອອກແຮງງານຢູ່ຫ້ອງອາຫານ ຫໍສະໝຸດແລະຊູເປີມາເກັດຂອງໂຮງຮຽນເປັນຕົ້ນ,ເພື່ອມີລາຍຮັບ ຈ່າຍຄ່າກິນຄ່າຢູ່ ເປັນຕົ້ນ.ນອກນີ້, ແຕ່ລະເດືອນ ລັດຖະບານຍັງເອົາຄ່າເກື້ອກູນ 150 ຢວນໃຫ້ນັກສຶກສາຜູ້ທຸກຍາກ.
ຕາມສະຖິຕິ,ປະຈຸບັນ ຈີນມີນັກສຶກສາ 13 ລ້ານ 5 ແສນຄົນກຳລັງຮຽນຢູ່ໃນໂຮງຮຽນ,ໃນນັ້ນ ມີນັກສຶກສາຜູ້ທຸກຍາກທີ່ເໝືອນກັບນາງລິວອີ້ປະມານ 2 ລ້ານ 6 ແສນຄົນ,ກວມ 19%.ເພື່ອຊ່ອຍເຫຼືອພວກເຂົາເຈົ້າສຳເລັດການຮຽນຢ່າງສະດວກ,ລັດຖະບານຈີນແລະໂຮງຮຽນຊັ້ນສູງໄດ້ໃຊ້ວິທີຕ່າງໆຄື ເບີກເງິນກູ້ຢືມແຫ່ງລັດ ທຶນຮຽນແຫ່ງລັດ ທັງຮຽນທັງເຮັດວຽກເພື່ອໄດ້ເບີກຄ່າຮຽນ ຫຼຸດແລະຍົກເວັ້ນຄ່າຮຽນ ແລະເບີກເງິນເກື້ອກູນ,ຊ່ອຍເຫຼືອນັກສຶກສາຜູ້ທຸກຍາກ.
ເຊັ່ນ:ແຕ່ລະປີ ລັດຖະບານຈີນເອົາທຶນຮຽນແຫ່ງລັດ 200 ລ້ານຢວນເພື່ອອຸປະຖຳນັກສຶກສາຜູ້ທຸກຍາກທີ່ມີຄຸນສົມບັດແລະການຮຽນໄດ້ດີ 5 ໝື່ນຄົນ,ແລະເອົາຄ່າຊ່ອຍຮຽນແຫ່ງລັດ 150 ຢວນຕໍ່ເດືອນເປັນຄ່າກິນຄ່າຢູ່ໃຫ້ນັກສຶກສາຜູ້ທຸກຍາກ,ອັນໄດ້ເຮັດໃຫ້ນັກສຶກສາ 5 ແສນ 3 ໝື່ນກວ່າຄົນໄດ້ຜົນປະໂຫຍດຕໍ່ປີ.
ເພື່ອຮັບປະກັນໃຫ້ປະຕິບັດນະໂຍບາຍເກື້ອກູນນັກສຶກສາຜູ້ທຸກຍາກທຸກລາຍຂອງລັດຢ່າງສະດວກ,ກະຊວງສຶກສາທິການຈີນຍັງເພີ່ມທະວີການສຳຫຼວດ.ທ່ານຊູ່ຍປ່າງອຽນ ເຈົ້າໜ້າທີ່ກະຊວງສຶກສາທິການຈີນແນະນຳວ່າ:
"ໃນເດືອນກໍລະກົດ ກະຊວງສຶກສາທິການໄດ້ປະກາດໜັງສືວຽນໄປແຫ່ງຕ່າງໆ ບັນດາພະແນກທີ່ກ່ຽວຂ້ອງແລະໂຮງຮຽນຊັ້ນສູງອີກຄັ້ງໜຶ່ງ,ທວງໃຫ້ບັນດາໂຮງຮຽນຊັ້ນສູງຕ້ອງປະຕິບັດບັນດານະໂຍບາຍທີ່ອຸປະຖຳນັກສຶກສາຜູ້ທຸກຍາກຢ່າງຮອບດ້ານ ກ່ອນເປີດສົກຮຽນໃໝ່ປີນີ້,ຮັບປະກັນໃຫ້ນັກສຶກສາຜູ້ທຸກຍາກທີ່ເສັງເຂົ້າໂຮງຮຽນຊັ້ນສູງສາມາດເຂົ້າຮຽນຢ່າງສະດວກ."
ໂດຍຜ່ານການປະສົບການຂອງນາງລິວອີ້,ນັກຂ່າວປະກົດເຫັນວ່າ,ການຊ່ອຍເຫຼືອລູກຫຼານຂອງຄອບຄົວທຸກຈົນເຂົ້າຮຽນມະຫາວິທະຍາໄລແນວໃດນັ້ນ ໄດ້ນັບມື້ນັບໄດ້ຮັບຄວາມສົນໃຈຈາກລັດຖະບານຈີນ,ນະໂຍບາຍແລະມາດຕະການທຸກລາຍກ່ຽວກັບການອຸປະຖຳນັກສຶກສາຜູ້ທຸກຍາກເຂົ້າຮຽນນັ້ນກໍໄດ້ຮັບການປັບປຸງໃຫ້ດີຂຶ້ນແລະບັງເກີດຜົນຢ່າງບໍ່ຢຸດຢັ້ງ.
|
|
|
