|
|
 |
| (GMT+08:00)
2005-09-14 20:44:00
|
 |
|
ຈາກງານວາງສະແດງປື້ມໜັງສືເບິ່ງຂະແໜງການພິມຈຳໜ່າຍປື້ມໜັງສືຂອງຈີນ(ສຽງ)
cri
Author: mo
|
ງານວາງສະແດງປື້ມໜັງສືສາກົນປັກກິ່ງຄັ້ງທີ 12 ໄດ້ຈັດຂຶ້ນຢູ່ປັກກິ່ງ, ບຸກຄົນວົງການພິມຈຳໜ່າຍທີ່ມາຈາກ 48 ປະເທດແລະເຂດແຄ້ວນແລະອົງການສາກົນໄດ້ເຂົ້າຮ່ວມງານດັ່ງກ່າວນີ້.
ງານມະຫະກຳຄັ້ງນີ້ມີຮ້ານວາງສະແດງ 1099 ຮ້ານ, ເພີ່ມຂຶ້ນຫລາຍກວ່າປີກາຍນີ້10%. ບຸກຄົນພາຍໃນວົງການເຫັນວ່າ, ງານວາງສະແດງປື້ມໜັງສືສາກົນປັກກິ່ງແມ່ນເຄື່ອງໝາຍທີ່ສັງເກດທ່ວງທ່າຂະຫຍາຍຕົວຂອງຂະແໜງການພິມຈຳໜ່າຍປື້ມໜັງສືຂອງຈີນ.
ຂະແໜງການພິມຈຳໜ່າຍແລະອຸດສາຫະກຳທີ່ກ່ຽວຂ້ອງຂອງຈີນຖືກຖືເປັນຂົງເຂດທີ່ລະດັບໄຂປະຕູບໍ່ສູງປານໃດ. ປັດຈຸບັນ, ຈີນມີສຳນັກງານພິມຈຳໜ່າຍ 570 ກວ່າແຫ່ງ, ແຕ່ລະປີພິມຈຳໜ່າຍປຶ້ມໜັງສືໃໝ່ 2 ແສນຊະນິດ, ແຕ່ໃນຕົ້ນຊຸມປີ 80 ສະຕະວັດທີ່ແລ້ວ, ແຕ່ລະປີພິມຈຳໜ່າຍປື້ມໃໝ່ພຽງແຕ່ 10 ພັນກວ່າຊະນິດ. ນອກນັ້ນ, ປັດຈຸບັນ, ປີໃດ, ຈີນກໍຍັງພິມຈຳໜ່າຍໜັງສືພິມເກືອບ 2 ພັນຊະນິດ, ວາລະສານ 8 ພັນຊະນິດ.
ທ່ານສືຈົ່ງຢວນ ຫົວໜ້າສຳນັກງານໃຫຍ່ຖະແຫລງຂ່າວແລະພິມຈຳໜ່າຍຈີນເຫັນວ່າ, ເມື່ອສັງເກດຈາກຕົວເລກເຫຼົ່ານີ້ແລ້ວເຫັນວ່າ, ຈີນອາດເວົ້າໄດ້ວ່າແມ່ນມະຫາປະເທດພິມຈຳໜ່າຍຂອງໂລກ. ແຕ່ຄວາມຈິງແລ້ວ, ຂະແໜງການພິມຈຳໜ່າຍຂອງຈີນຍັງປະເຊີນບັນຫາບໍ່ໜ້ອຍ. ທ່ານເວົ້າວ່າ:
ເມື່ອໄດ້ພັດທະນາມາຫຼາຍສິບປິ, ໂດຍສະເພາະແມ່ນການພັດທະນາເກືອບ 20ມານີ້, ຂະແໜງການພິມຈຳໜ່າຍຂອງຈີນໄດ້ມີຄວາມກ້າວໜ້າຢ່າງໃຫຍ່ຫລວງ, ກາຍເປັນປະເທດໃຫຍ່ດ້ານພິມຈຳໜ່າຍຂອງໂລກ, ແລະຍັງມີກຳລັງບົ່ມຊ້ອນໃນການພັດທະນາອັນມະຫາສານ. ກຳລັງກວມລວມແລະຄວາມສາມາດແກ່ງແຍ່ງສັງລວມຂອງຂະແໜງການພິມຈຳໜ່າຍຂອງຈີນບໍ່ແຂງແຮງປານໃດ, ມີຄວາມຫຍຸ້ງຍາກແລະມີບັນຫາຫລວງຫລາຍ. ສະນັ້ນ, ວົງການພິມຈຳໜ່າຍຂອງຈີນແລະຕ່າງປະເທດເພີ່ມທະວີການແລກປ່ຽນກັນ, ຮ່ວມມືກັນ, ຈະມີຜົນດີຫລາຍຕໍ່ການພັດທະນາຂະແໜງການພິມຈຳໜ່າຍຂອງຈີນແລະຂອງໂລກ.
ການຄ້າລິຂະສິດຂອງຈີນກັບຕ່າງປະເທດຍັງຂາດດຸນຫລາຍ. ຕາມສະຖິຕິຂອງກົມລິຂະສິດແຫ່ງຊາດຈີນ, ແຕ່ປີ 1995 ຮອດປີ 2004, ອັດຕາສົ່ງອອກແລະນຳເຂົ້າລິຂະສິດຂອງຈີນສະເລ່ຍແລ້ວແມ່ນປະມານ 1ຕໍ່10. ລິຂະສິດທີ່ສົ່ງອອກ ສ່ວນຫລາຍແມ່ນໄດ້ສົ່ງເຂົ້າຮົງກົງໄຕ້ຫວັນຂອງຈີນແລະຕະຫລາດຊາວຈີນອາຊີອາຄະເນ, ແຕ່ໜັງສືທີ່ນຳເຂົ້າສ່ວນຫລາຍມາຈາກປະເທດເອີລົບແລະອາເມລິກາ. ສະນັ້ນ, ການຄ້າລິຂະສິດລະຫວ່າງຈີນກັບປະເທດຝ່າຍຕາເວັນຕົກມີຄວາມບໍ່ສົມດຸນກັນທີ່ສຸດ. ທ່ານນາງອູເວີຍ ເຈົ້າໜ້າທີ່ຊັ້ນສູງຂອງຫ້ອງການຖະແຫລງຂ່າວຄະນະລັດຖະບານຈີນເຫັນວ່າ, ສະພາບແນວນີ້ບໍ່ມີຜົນດີຕໍ່ການໃຫ້ໂລກຊອກຮູ້ຈີນ. ນາງເວົ້າວ່າ:
ມີຂໍ້ມູນສະແດງໃຫ້ເຫັນວ່າ, ຈຳນວນຂໍ້ມູນຂ່າວສານທີ່ປະເທດພັດທະນາຝ່າຍຕາເວັນຕົກສົ່ງໃຫ້ປະເທດພວມພັດທະນານັ້ນ, ແມ່ນ 100 ເທົ່າຂອງປະເທດພວມພັດທະນາສົ່ງໄປໃຫ້ປະເທດພັດທະນາ. ຄວາມໂຕນກັນແນວນີ້ກໍໄດ້ສະແດງໃຫ້ເຫັນໃນດ້ານການຄ້າຜະລິດຕະພັນວັດທະນາທຳຄືກັນ. ໜັງສືພິມວາລະສານແລະເຄື່ອງພິມສຽງແລະພາບຂອງຈີນແມ່ນຂາດດຸນຫລາຍໃນການຄ້າລະຫວ່າງຊາດ. ການຂາດດຸນຢ່າງຫລວງຫລາຍໃນດ້ານຂອງການຄ້າຜະລິດຕະພັນວັດທະນະທຳໄດ້ຂັດຂວາງໂລກຊອກຮູ້ຈີນ.
ເພື່ອປ່ຽນແປງສະພາບດັ່ງກ່າວ, ໃນເດືອນກໍລະກົດປີນີ້, ລັດຖະບານຈີນໄດ້ຖອດຖອນເອົາບົດຮຽນຂອງປະເທດອື່ນ, ປະຕິບັດແຜນການເຜີຍແຜ່ໜັງສືຈີນຕໍ່ຕ່າງປະເທດ, ແລະໄດ້ໃຊ້ຮູບການເກື້ອກູນຄ່າແປພາສາ, ສົ່ງເສີມໃຫ້ນັກທຸລະກິດພິມຈຳໜ່າຍແລະອົງການພິມຈຳໜ່າຍຂອງຕ່າງປະເທດຈຳໜ່າຍໜັງສືຂອງຈີນ. ງານວາງສະແດງປື້ມໜັງສືຄັ້ງນີ້ໄດ້ຈັດບ່ອນວາງສະແດງຈຳເພາະ, ວາງສະແດງສາລະບານໜັງສືທີ່ບັນຈຸແຜນການເຜີຍແຜ່ປື້ມໜັງສືຕໍ່ຕ່າງປະເທດຂອງຈີນງວດໜຶ່ງ, ໄດ້ພາໃຫ້ພໍ່ຄ້າພິມຈຳໜ່າຍຂອງຕ່າງປະເທດສົນໃຈນຳ.
ທ່ານນາງແອນນາ ມາເລຍ ປະທານສະມາຄົມນັກທຸລະກິດພິມຈຳໜ່າຍສາກົນເຫັນວ່າ, ຄຽງຄູ່ກັບຂະແໜງການພິມຈຳໜ່າຍຈີນໄຂປະຕູກວ້າງອອກ, ການຮ່ວມມືຂອງນັກທຸລະກິດພິມຈຳໜ່າຍຈີນແລະຕ່າງປະເທດນັບມື້ນັບກວ້າງຂວາງ. ເພີ່ນເວົ້າຢູ່ເທິງເວທີປາໄສພິມຈຳໜ່າຍສາກົນຂອງງານວາງສະແດງຄັ້ງນີ້ວ່າ:
ນັກພິມຈຳໜ່າຍຂອງບັນດາປະເທດບໍ່ແມ່ນໂດດດ່ຽວ, ຕ້ອງແບ່ງປັນບົດຮຽນແລະຄວາມຄິດຂອງໃຜລາວ, ຂ້າພະເຈົ້າຢາກຮູ້ວ່ານັກພິມຈຳໜ່າຍຂອງຈີນມີຄວາມຄິດແນວໃດ.
ທ່ານນາງແອນນາເວົ້າວ່າ, ຂະແໜງການພິມຈຳໜ່າຍຂອງຈີນພວມເລັ່ງລັດເຊື່ອມໂຍງເຂົ້າໃນລະບົບພິມຈຳໜ່າຍຂອງໂລກ. ຜູ້ອ່ານຫລວງຫລາຍຂອງຈີນໄດ້ສະໜອງອະນາຄົດພັດທະນາອັນຮຸ່ງເຮືອງໃຫ້ຂະແໜງການພິມຈຳໜ່າຍປື້ມຂອງໂລກ.
ງານວາງສະແດງປື້ມໜັງສືສາກົນປັກກິ່ງທີ່ຈັດຂຶ້ນປີລະເທື່ອບໍ່ພຽງແຕ່ໄດ້ກາຍເປັນສະຖານທີ່ສຳຄັນຂອງການຄ້າລິຂະສິດທໍ່ນັ້ນ, ແລະກໍແມ່ນສະຖານທີ່ຊອກຮູ້ສະພາບໃໝ່ສຸດຂອງຂະແໜງການພິມຈຳໜ່າຍຂອງຈີນຢ່າງຮອບດ້ານ, ສະນັ້ນ, ຈຶ່ງໄດ້ດຶງດູດເອົາກຸ່ມພິມຈຳໜ່າຍທີ່ສຳຄັນເກືອບທັງໝົດໃນໂລກມາເຂົ້າຮ່ວມ. ຫວ່າງກ່ອນນີ້ບໍ່ດົນ, ຈີນໄດ້ປະກາດເອກະສານສາມສະບັບເຊັ່ນ"ບາງກົດຂໍ້ກຳນົດກ່ຽວກັບທຶນທີ່ບໍ່ແມ່ນຂອງສ່ວນລວມເຂົ້າຮ່ວມຜະລິດຕະກຳວັດທະນະທຳ", "ວິທີການກ່ຽວກັບການເພີ່ມທະວີການຄຸ້ມຄອງຜະລິດຕະພັນວັດທະນະທຳຂາເຂົ້າ", ແລະ"ຄວາມເຫັນບາງຢ່າງກ່ຽວກັບການນຳທຶນຕ່າງປະເທດເຂົ້າໃນຂົງເຂດວັດທະນະທຳ ", ໄດ້ມີການກຳນົດຢ່າງຈະແຈ້ງກ່ຽວກັບບັນຫາທີ່ກ່ຽວຂ້ອງກັບການລົງເລີກປະຕິຮູບໂຄງປະກອບພິມຈຳໜ່າຍໃນສະເພາະໜ້າຕື່ມອີກ. ບຸກຄົນພາຍໃນຂະແໜງການເຫັນໂດຍທົ່ວໄປວ່າ, ຂະແໜງການພິມຈຳໜ່າຍປື້ມໜັງສືຂອງຈີນມີອະນາຄົດອັນດີງາມ.
|
|
|
