|
|
 |
| (GMT+08:00)
2005-09-16 16:05:17
|
 |
|
ເອົາໃຈໃສ່ນຳການນອນ
cri
Author: li
 ການນອນແມ່ນຄວາມຕ້ອງການທາງສະລີລະສາດທີ່ພື້ນຖານທີ່ສຸດຂອງຄົນເຮົາ,ການນອນຫຼັບດີຫຼືບໍ່ມີສ່ວນກ່ຽວຂ້ອງກັບສຸຂະພາບ.
ໃນຕະຫຼອດຊີວິດຂອງຄົນເຮົາ,ມີເວລາເກືອບ 1 ສ່ວນ 3 ແມ່ນເວລານອນ. ໃນເວລານອນ,ອາດຈະມີໄລຍະໃດໜຶ່ງເປັນໄລຍະອັນຕະລາຍ. ການຄົ້ນຄວ້າສະແດງໃຫ້ເຫັນວ່າ,ຄວາມດັນເລືອດຂອງຄົນຕ່ຳກວ່າໝູ່ແມ່ນໃນເວລາປະມານສາມໂມງໃນຍາມເດິກ,ແລະສູງສຸດແມ່ນໃນເວລາຕອນຄ່ຳປະມານ 9 ໂມງ; ກະເພາະເປັນແຜມັກເກີດຂຶ້ນໃນ 2 ໂມງຕອນເດິກ,ໂຣກຫີດມັກເກີດຂຶ້ນໃນຕອນ 4 ໂມງຂ້ອນແຈ້ງ,ພະຍາດຫົວໃຈວາຍມັກເກີດຂຶ້ນໃນຕອນຮຸ່ງເຊົ້າ. ເວົ້າສຳລັບຝູງຄົນຫຼາຍປະເພດດັ່ງລຸ່ມນີ້ແລ້ວ,ຄວາມຊີນເຄີຍດ້ານການນອນ,ແລະທ່ານອນແມ່ນສຳຄັນທີ່ສຸດຕໍ່ສຸຂະພາບ.
ເວົ້າສຳລັບຜູ້ເປັນພະຍາດສາຍເລືອດແລະຫົວໃຈແລ້ວ,ມື້ໜຶ່ງຕ້ອງນອນບໍ່ຕ່ຳກວ່າ 7-8 ຊົ່ວໂມງ,ດີທີ່ສຸດແມ່ນນອນສະແຄງຂວາ,ໃນເວລານອນ, ຮອງຂາສອງເບື້ອງໃຫ້ສູງຂຶ້ນຄືໃຫ້ສູງກວ່າລະດັບໝາກຫົວໃຈໜ້ອຍໜຶ່ງ,ເຮັດແນວນີ້ຈະພາໃຫ້ເລືອດໃນສາຍເລືອດຝອຍໝູນວຽນດີຂຶ້ນ,ຫຼັງຈາກຕື່ນນອນຍາມເຊົ້າແລະກ່ອນນອນໃຫ້ດື່ມນ້ຳຢ່າງເໝາະສົມ.
ສຳລັບແມ່ຍິງຜູ້ຈະໝົດລະດູ,ບາງຄົນມີອາການຫົວໃຈສັ່ນ,ນອນບໍ່ຫຼັບ,ວິນຫົວ,ຫູອື້ແລະຫງຸດຫງິດເປັນຕົ້ນ. ນາຍໝໍສະເໜີວ່າ,ບໍ່ຄວນກິນຢານອນຫຼັບ,ຫາກຄວນເອົາໃຈໃສ່ນຳທາດບຳລຸງໃຫ້ສະໝ່ຳສະເໝີກັນແລະພັກຜ່ອນຢ່າງເໝາະສົມ. ໃນເວລານອນ,ດີທີ່ສຸດໃຫ້ນອນສະແຄງຂວາ,ແຂນຂາວາງຢ່າງສະບາຍ, ກ້າມເນື້ອໝົດຄີງກໍໂຍະຍານ.
ຄົນອ້ວນສ່ວນຫຼາຍມັກນອນຫງາຍ. ທີ່ຈິງແລ້ວ,ການນອນຫງາຍບໍ່ເໝາະສຳລັບການປ່ອຍໃຫ້ໝົດຄີງຄາຍຄວາມຕຶງຄຽດ,ໃນເວລາຄວາມດັນໃນທ້ອງຂ້ອນຂ້າງສູງນັ້ນ,ມັກຈະເຮັດໃຫ້ຄົນມີຄວາມຮູ້ສຶກຫາຍໃຈບໍ່ໂລ່ງ. ໂດຍສະເພາະແມ່ນຜູ້ທີ່ມີພະຍາດຫາຍໃຈຢຸດເຊົາຊົ່ວຄາວໃນເວລານອນ,ເພາະວ່າໃນເວລານອນຫງາຍ,ກົກລີ້ນຈະເຕື່ອຍໄປທາງຫຼັງ,ມັກຕັນການຫາຍໃຈ. ສະນັ້ນ ໃນເວລານອນ ຄົນອ້ວນຄວນໝູນໝອນສູງແດ່,ແລະນອນສະແຄງ.
ສຳລັບຜູ້ທີ່ມີພະຍາດກະດູກກ້ານຄໍ,ໃນເວລານອນຄວນບໍ່ໝູນໝອນແລະນອນຫງາຍ,ຫຼືວ່າເອົາໝອນຮອງກ້ານຄໍ,ຢ່າໃຫ້ກ້ານຄໍຄ້າງຢູ່ບໍ່ມີຂອງໝູນ. ນອກນີ້ ຢ່າພິກຄີງແຮງໆກະທັນຫັນ.
ທຳມະດາແລ້ວ,ຜູ້ທີ່ເຄີຍເປັນພະຍາດສາຍເລືອດສະໝອງຕັນນັ້ນຈະເປັນອຳມະພາດເຄິ່ງຄີງ,ຄົນເຈັບປະເພດນີ້ຄວນເຮັດຕາມຄຳສັ່ງຂອງນາຍໝໍ,ອີງຕາມສະພາບຂອງຕົນໃຊ້ທ່ານອນພິເສດ,ເພື່ອຮັບປະກັນໃຫ້ເລືອດໝູນວຽນດີຕາມແຂນຂາທີ່ເປັນພະຍາດ,ຈຶ່ງຈະຊ່ອຍໃຫ້ແຂນຂາຟື້ນສຸຂະພາບ.
ເວົ້າສຳລັບຜູ້ທີ່ນອນຫຼັບດີຫຼັງຈາກເມົາເຫຼົ້າຫຼືອິດເມື່ອຍແລະຄົນເປັນເບົາຫວານແລ້ວ,ນອນທ່າດຽວດົນໂພດຈະໜີບເຕັງແຂນຂາ,ອາດຈະເປັນໂທດຕໍ່ເສັ້ນປະສາດອ້ອມຂ້າງ.
ສິ່ງແວດລ້ອມທີ່ອົບອຸ່ນແລະສະບາຍແມ່ນຂາດບໍ່ໄດ້ສຳລັບການນອນ, ພະຍາດບາງຢ່າງແມ່ນຍ້ອນສິ່ງແວດລ້ອມ. ຕົວຢ່າງຄືເສັ້ນປະສາດໜ້າມືນຊາແມ່ນຍ້ອນເປິດແອໃນເວລານອນ.
ໃນສັງຄົມປັດຈຸບັນ,ຈັງຫວະດຳລົງຊີວິດໄວຫຼາຍ,ມີກຳລັງໜີບແຮງ, ວຽກກໍໜັກ,ມະນຸດສຳພັນກໍສັບສົນ,ຄວາມຊີນເຄີຍອັນບໍ່ເໝາະສົມຫຼາຍຢ່າງ,ກິນເຫຼົ້າຫຼາຍເກີນໄປ,ເຮັດວຽກກາງຄືນເປັນຕົ້ນລ້ວນແຕ່ຈະເຮັດໃຫ້ຄົນອິດເມື່ອຍເກີນໄປ. ແຕ່ບາງຄົນເຖິງວ່າເມື່ອຍກໍຍັງນອນບໍ່ຫຼັບ,ໃນກໍລະນີນີ້,ໃຫ້ລອງໃຊ້ວິທີດັ່ງລຸ່ມນີ້ເບິ່ງ:
ດີທີ່ສຸດ,ຢ່າເອົາວຽກຫ້ອງການກັບເມືອເຮັດຢູ່ບ້ານ,ກ່ອນນອນ,ຢ່າເຄັ່ງຕຶງ,ຕື່ນເຕັ້ນຫຼືອິດເມື່ອຍເກີນໄປ,ຢ່າຫຼິ້ນກິລາຮຸນແຮງເກີນໄປ. ຖ້າບໍ່ຢາກນອນເທື່ອ,ກໍຢ່ານອນເທິງຕຽງ,ໃຫ້ຫາໜັງສືມາອ່ານ,ເຮັດສິ່ງໃດສິ່ງໜຶ່ງທີ່ເຮັດໃຫ້ຈິດໃຈສະຫງົບລົງໄດ້. ເວົ້າງ່າຍໆກໍຄື,ເວລາໃດຢາກນອນ,ຄ່ອຍໄປນອນ.
ກ່ອນນອນ,ໃຫ້ອາບນ້ຳອຸ່ນ,ອາຫານຄ່ຳຢ່າກິນຄ່ຳຫຼາຍແລະຢ່າກິນອິ່ມເກີນໄປ,ດີທີ່ສຸດ ໃຫ້ກິນອາຫານທີ່ຍ່ອຍງ່າຍ,ຢ່າກິນເຫຼົ້າຫຼືເຄື່ອງດື່ມທີ່ມີກາເຟອິນ.
ຫຼັງຈາກຂຶ້ນຕຽງແລ້ວ,ບໍ່ໃຫ້ຄິດວ່າ"ມື້ນີ້ໂຕເອງຈະນອນຫຼັບຫຼືບໍ່",ຄິດແນວນີ້ມັກຈະເກີດອາລົມຈິດຫງຸດຫງິດ,ບໍ່ຫຼັບກໍຢ່າບັງຄັບໃຫ້ຕົນນອນ,ເພາະແຮ່ງເຮັດແນວນີ້ ແຮ່ງນອນບໍ່ຫຼັບ.
|
|
|
