|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການເສັງຄວາມຮູ້ກ່ຽວກັບໄຕ້ຫວັນທີ່ພາດຫົວເລື່ອງວ່າ: ໄຕ້ຫວັນ--ເກາະປະເສີດຂອງຈີນ.
ທ່ານຜູ່ຟັງທີ່ໂຄລົບ, ເຖິງວ່າລະຫວ່າງແຜ່ນດິນໃຫຍ່ຈີນກັບໄຕ້ຫວັນຂັ້ນດ້ວຍຊ່ອງແຄບ ກໍຕາມ, ແຕ່ສອງຝັ່ງກໍແມ່ນຢູ່ໃນປະເທດດຽວມາແຕ່ບູຮານນະການ, ມວນຊົນຢູ່ສອງຝັ່ງມີກົກເຄົ້າອັນດຽວກັນ, ມີມູນເຊື້ອວັດທະນະທຳປະຫວັດສາດອັນດຽວກັນ. ໃນສະເພາະໜ້ານີ້, ຍ້ອນມູນເຫດການເມືອງ, ພີ່ນ້ອງຮ່ວມຊາດລະຫວ່າງສອງຝັ່ງຍັງບໍ່ສາມາດໄປມາຫາສູ່ກັນຢ່າງເສລີ, ແຕ່ມູນເຊື້ອວັດທະນະທຳປະຫວັດສາດອັນດຽວກັນແລະຄວາມຮັກແພງລະຫວ່າງພີ່ນ້ອງຮ່ວມຊາດແມ່ນຕັດບໍ່ຂາດດອກ. ໃນລາຍການເສັງຄວາມຮູ້ກ່ຽວກັບໄຕ້ຫວັນພາກນີ້, ພວກເຮົາຈະສະເໜີສະພາບດ້ານນີ້ສູ່ຟັງ. ລາຍການພາກນີ້ຈະສະເໜີບົດສຸດທ້າຍຂອງລາຍການເສັງຄວາມຮູ້ກ່ຽວກັບໄຕ້ຫວັນເທື່ອນີ້.
ທ່ານຜູ່ຟັງທີ່ໂຄລົບທີ່ພວມຟັງຢູ່ນີ້ ແມ່ນບັນທຶກສຽງຂອງຫຼານນ້ອຍນັກຮຽນໄຕ້ຫວັນພ້ອມກັນອ່ານຄຳພີທີ່ມີຊື່ສຽງຂອງຈີນເລື່ອງ "ບັນທຶກມາລະຍາດ". ເນື້ອໃນທີ່ພວກຫຼານນ້ອຍອ່ານນັ້ນໄດ້ບັນທຶກຄຳພັນລະນາສັງຄົມອັນແຈບໃຈຂອງຂົງຈື້ ນັກແນວຄິດທີ່ມີຊື່ສຽງຂອງຈີນໃນ 2000 ກວ່າປີກ່ອນນີ້ ທີ່ຖືກເອີ້ນເປັນຜູ່ສັກກາລະບູຊາ.
ແຕ່ໃດມາ, ກໍເຊັ່ນດຽວກັນກັບມວນຊົນແຜ່ນດິນໃຫຍ່, ມວນຊົນໄຕ້ຫວັນແຕ່ຍາມຍັງນ້ອຍກໍໄດ້ຮັບການສຶກສາວັດທະນະທຳທີ່ມີມູນເຊື້ອຂອງຈີນ, ເຖິງວ່າ ຮອດສະໄໝມໍ່ແລະສະໄໝຍຸກປະຈຸບັນ ໄດ້ນຳເບົ້າແບບແລະເນື້ອໃນການສຶກສາຂອງຝ່າຍຕາເວັນຕົກເຂົ້າມາກໍຕາມ, ເນື້ອໃນວັດທະນະທຳທີ່ມີມູນເຊື້ອຂອງປະຊາຊົນຈີນຍັງກວມກວມສ່ວນຫຼາຍ, ແລະຍັງໄດ້ຮັບຄວາມໂຄລົບແລະສົ່ງເສີມຈາກຄົນທັງຫຼາຍຢູ່ຄືເກົ່າ. ຈົນມາຮອດປະຈຸບັນ, ປະຊາຊົນທັງສອງຝັ່ງຍັງໃຊ້ຕົວໜັງສືອັນດຽວກັນ, ປາກພາສາອັນດຽວກັນ, ເຖິງຈະແມ່ນພາສາທ້ອງຖິ່ນໄຕ້ຫວັນ, ແຕ່ຍັງແມ່ນພາສາແຂວງຟູຈ້ຽນແລະແຂວງກວາງຕຸ້ງຂອງແຜ່ນດິນໃຫຍ່ທີ່ຢູ່ແຜ່ນດິນໃຫຍ່. ພ້ອມກັນນັ້ນ ມວນຊົນໄຕ້ຫວັນກໍຍັງຮັກສາວັດທະນະທຳແລະຮີດຄອງປະເພນີໃນຊີວິດການເປັນຢູ່ທີ່ຄືກັນກັບແຜ່ນດິນໃຫຍ່ຢ່າງສົມບູນ, ຊີວິດປະຈຳວັນແລະການບວງສວງທາງສາສະໜາຂອງພວກເຂົາເຈົ້າໄດ້ຢືນຢັນເຖິງສະພາບດັ່ງກ່າວ.
ລູງຈູຟູລາຍອາຍຸ 81 ປີແລ້ວ, ເພິ່ນໄດ້ຂ້າມຊ່ອງແຄບຈາກໄຕ້ຫວັນມາດຳລົງຊີວິດຢູ່ເມືອງເຊ້ຍເໝີນແຂວງຟູຈ້ຽນເມື່ອຍັງໜຸ່ມ, ຫຼັງຈາກນັ້ນກໍສ້າງຄອບຄົວແລະທຳມາຫາກິນຢູ່ແຜ່ນດິນໃຫຍ່, ບໍ່ໄດ້ເມືອໄຕ້ຫວັນຈັກເທື່ອ. ເມື່ອເວົ້າເຖິງຮີດຄອງປະເພນີຂອງສອງຝັ່ງ, ລູງຈູຟູລາຍໄດ້ກ່າວເຖິງສະພາບການສະຫຼອງບຸນກຸດຈີນຢູ່ໄຕ້ຫວັນ. ບຸນກຸດຈີນແມ່ນບຸນປະເພນີສຳຄັນທີ່ສຸດຂອງປະຊາຊາດຈີນ, ຢູ່ພາກໃຕ້ຈີນ, ໃນຍາມສະຫຼອງບຸນກຸດຈີນ ເກືອບທຸກໆຄອບຄົວກໍກິນເຂົ້າໜົມ. ລູງຈູຟູລາຍຫວນຄືນວ່າ:
ແຕ່ກ່ອນ ຂ້າພະເຈົ້າຍັງເປັນເດັກນ້ອຍ, ເມື່ອສະຫຼອງບຸນກຸດຈີນ ແມ່ຂອງຂ້ອຍຈະສີເຂົ້າ ຫູງເຂົ້າໜົມ. ປະເພນີລະຫວ່າງສອງຝັ່ງເກືອບຄືກັນໝົດ, ຢູ່ຝັ່ງນີ້ມີອັນໃດ, ຝັ່ງນັ້ນກໍມີອັນນັ້ນ.
ມື້ບຸນແມ່ນພາກສ່ວນອັນສຳຄັນຂອງວັດທະນະທຳທີ່ມີມູນເຊື້ອຂອງຊົນຊາດໜຶ່ງ, ມື້ບຸນທີ່ມີມູນເຊື້ອຂອງມວນຊົນໄຕ້ຫວັນແມ່ນຄືກັນກັບແຜ່ນດິນໃຫຍ່, ປະເພນີສ່ວນໃຫຍ່ກໍຄືກັນ, ຕົວຢ່າງຄື ໃນບຸນກຸດຈີນ, ທຳມະດາແລ້ວຕ້ອງບວງສວງບັນພະບູລຸດ, ຕອນຄ່ຳວັນສົ່ງທ້າຍປີເກົ່າ ໝົດຄອບຄົວຕ້ອງຄົບໜ້າຄົບຕາກັນ ພ້ອມກັນສົ່ງທ້າຍປີເກົ່າ, ໃນມື້ບຸນເຂົ້າໜົມບົວລອຍຕ້ອງມີງານຊົມໂຄມໄຟ, ໃນບຸນເຊັ້ງເມງ ຕ້ອງປັດກວາດສຸສານຂອງຍາດພີ່ນ້ອງຜູ່ລ່ວງລັບໄປແລ້ວ, ໃນບຸນຊ່ວງເຮືອ ຕ້ອງກິນເຂົ້າຕົ້ມຊະນິດໜຶ່ງທີ່ເອີ້ນວ່າ "ຈົ້ງຈື", ໃນບຸນໄຫວ້ພະຈັນ ໝົດຄອບຄົວຕ້ອງຄົບໜ້າຄົບຕາກັນ ຊົມດວງຈັນ, ແລະກິນເຂົ້າໜົມໄຫວ້ພະຈັນທີ່ເປັນສັນຍາລັກແຫ່ງການຄົບໜ້າຄົບຕາກັນໝົດຄອບຄົວ.
ບໍ່ພຽງແຕ່ມີບຸນອັນດຽວກັນ, ມວນຊົນທັງສອງຝັ່ງຍັງເຊື່ອຖືສາສະໜາທີ່ຄືກັນ, ການບວງສວງກໍເກືອບຄືກັນໝົດ, ການບວງສວງກ່ວນຕີ້ພ້ອມກັນຂອງສອງຝັ່ງຊ່ອງແຄບໃນທຸກປີກໍແມ່ນຕົວຢ່າງອັນໜຶ່ງທີ່ພົ້ນເດັ່ນ.
ກ່ວນຕີ້ແຕ່ເດີມຊື່ວ່າກ່ວນອີ, ແມ່ນນາຍພົນທີ່ມີຊື່ສຽງດົ່ງດັງຂອງຈີນໃນຄ.ສ.ສະຕະວັດທີ 3, ເພິ່ນບໍ່ພຽງແຕ່ມີກັ່ງຟູເກັ່ງ, ອົງອາດກ້າຫານ, ກໍຈົງຮັກພັກດີຕໍ່ເຈົ້າຂອງທີ່ສຸດ, ແລະຍັງມີນ້ຳໃຈເພື່ອສັດຈະທຳແລະຄວາມເປັນທຳອີກດ້ວຍ, ຊາວຈີນຮັກແພງເພິ່ນຫຼາຍ, ຈົນກະທັ້ງພາຍຫຼັງມາ ນັບຖືເພິ່ນເປັນ "ເຈົ້າ", ຕັ້ງຮູບປັ້ນຂຶ້ນເພື່ອບວງສວງ. ຢູ່ຊ່ອງແຄບໄຕ້ຫວັນທີ່ໃກ້ກັບຝັ່ງແຜ່ນດິນໃຫຍ່ມີເກາະໜຶ່ງເອີ້ນວ່າເກາະຕົ່ງຊານ, ຢູ່ເທິງເກາະນີ້ມີສານເຈົ້າກ່ວນຕີ້ແຫ່ງໜຶ່ງສ້າງຂຶ້ນເມື່ອສະຕະວັດທີ 14, ຍ້ອນສານເຈົ້າແຫ່ງນີ້ມີປະຫວັດເກົ່າແກ່ຫຼາຍ, ແຕ່ລະປີ ມວນຊົນໄຕ້ຫວັນຈຳນວນຫຼວງຫຼາຍໄດ້ມາບູຊາກ່ວນຕີ້ຢູ່ແຫ່ງນີ້.
ທ່ານຈາງທີ່ມາຈາກເມືອງໄຕເປຂອງໄຕ້ຫວັນກ່າວວ່າ, ໃນຄອບຄົວເຂົາເຈົ້າໄດ້ບວງສວງກ່ວນຕີ້ໂດຍຕະຫຼອດ, ແຕ່ຍາມຍັງເປັນເດັກນ້ອຍ, ເພິ່ນກໍເຊື່ອຖືກ່ວນຕີ້, ໃນຫຼາຍປີມໍ່ໆມານີ້, ເພິ່ນມາເຂົ້າຮ່ວມພິທີບວງສວງຢູ່ເກາະຕົ່ງຊານເກືອບທຸກປີ, ຍັງຊົມເບິ່ງການສະແດງພື້ນເມືອງ. ທ່ານເວົ້າວ່າ: ຜູ່ເຊື່ອຖືກ່ວນຕີ້ຢູ່ໄຕ້ຫວັນມີຈຳນວນຫຼວງຫຼາຍ, ມາເຂົ້າຮ່ວມພິທີບວງສວງຢູ່ແຫ່ງນີ້ ສາມາດສຳນຶກຮູ້ປະເພນີບວງສວງຫຼາຍໆຢ່າງ.
ນາງເທບພະເຈົ້າທີ່ຊື່ດັງອີກອົງໜຶ່ງທີ່ມວນຊົນຢູ່ສອງຝັ່ງຊ່ອງແຄບເຊື່ອຖືນຳກັນນັ້ນແມ່ນເອີ້ນວ່າ "ມ່າຈູ". ມ່າຈູແມ່ນນາງເທບພະເຈົ້າທີ່ປົກປັກຮັກສາຜູ່ເດີນທະເລໃຫ້ປອດໄພ, ຕາມເລົ່າກັນວ່າ ແມ່ນຜັນແປມາຈາກແມ່ຍິງຜູ່ໜຶ່ງທີ່ມີຊີວິດຢູ່ໃນລາຊະວົງຊົ້ງຂອງຈີນ ຫ່າງຈາກປະຈຸບັນປະມານ 1000 ປີ. ມວນຊົນຈຳນວນຫຼວງຫຼາຍທີ່ຢູ່ແຄມທະເລພາກຕາເວັນອອກສຽງໃຕ້ຂອງຈີນ ເກາະໄຕ້ຫວັນແລະຢູ່ຫຼາຍໆແຫ່ງຂອງອາຊີອາຄະເນລ້ວນແຕ່ເຊື່ອຖືມ່າຈູທີ່ສຸດ, ຢູ່ແຫ່ງຕ່າງໆໄດ້ສ້າງໃຫ້ມີສານເຈົ້າມ່າຈູຫຼາຍໆແຫ່ງ. ຕາມສະຖິຕິ, ພຽງແຕ່ຢູ່ໄຕ້ຫວັນກໍມີສານເຈົ້າມ່າຈູ 74 ແຫ່ງ, ສ່ວນສານເຈົ້າໃຫຍ່ຂອງມ່າຈູ, ໄດ້ສ້າງຢູ່ເທິງເກາະເມີຍໂຈ່ວ ເກາະນ້ອຍໆທີ່ຂຶ້ນກັບແຂວງຟູຈ້ຽນແຜ່ນດິນໃຫຍ່ຈີນ.
ຕາມທ່ານນາງເຈິງເຢິ້ນເໝິຍ ຜູ່ຊ່ຽວຊານຄົ້ນຄວ້າບັນຫາໄຕ້ຫວັນສະພາບັນດິດວິທະຍາສາດສັງຄົມຈີນແນະນຳວ່າ, ບັນພະບູລຸດຂອງມວນຊົນໄຕ້ຫວັນມີ 98% ຢູ່ແຜ່ນດິນໃຫຍ່ຈີນ. ມີຫຼາຍໆຄົນໄດ້ດຳລົງຊີວິດຢູ່ໄຕ້ຫວັນມາຫຼາຍເຊັ່ນຄົນແລ້ວ, ພວກເຂົາເຈົ້າຮັກແພງດິນແດນໄຕ້ຫວັນ, ແຕ່ໃນຂະນະດຽວກັນ ກໍລືມຄວາມຮັກແພງຂອງບ້ານເກີດເມືອງນອນບໍ່ໄດ້. ທ່ານຢາງເຄີ້ເຈິ້ງດຳລົງຊີວິດຢູ່ໄຕຫວັນ, ບັນພະບູລຸດຂອງເພິ່ນຢູ່ເກາະຕົ່ງຊານ, ກໍແມ່ນເກາະທີ່ສ້າງມີສານເຈົ້າກ່ວນຕີ້ທີ່ມີປະຫວັດເກົ່າແກ່ແຫ່ງໜຶ່ງທີ່ພວກເຮົາຫາກໍ່ກ່າວເຖິງຜ່ານມານັ້ນ, ທ່ານກ່າວວ່າ, ທ່ານຄິດເຖິງບ້ານເກີດເມືອງນອນຫຼາຍ. ເມື່ອ 10 ກວ່າປີກ່ອນ, ທ່ານຢາງເຄີ້ເຈິ້ງກໍມາລົງທຶນສ້າງໂຮງງານຢູ່ແຜ່ນດິນໃຫຍ່ແລ້ວ, ການທຸລະກິດຂອງເພິ່ນສະດວກຫຼາຍ. ໃນໄລຍະມໍ່ໆນີ້, ທ່ານກຽມຈະລົງທຶນ 5 ລ້ານຢວນ ສ້າງສູນວາງສະແດງວັດທະນະທຳສອງຝັ່ງຊ່ອງແຄບຢູ່ເກາະຕົ່ງຊານ ບ້ານເກີດເມືອງນອນຂອງທ່ານ.
ທ່ານນາງເຈ້ງເຢິ້ນເໝິຍ ຜູ່ຊ່ຽວຊານດ້ານບັນຫາໄຕ້ຫວັນສະພາບັນດິດວິທະຍາສາດສັງຄົມຈີນກ່າວວ່າ, ໃນຖານະເປັນຄົນຈີນ, ການພັດທະນາຂອງສອງຝັ່ງຊ່ອງແຄບລ້ວນແຕ່ເຮັດໃຫ້ເພິ່ນຮູ້ສຶກພາກພູມໃຈ, ໂດຍສະເພາະແມ່ນໃນຊູ່ມື້ນີ້, ຖານະຂອງຈີນໃນສາກົນໄດ້ສູງຂຶ້ນຢ່າງບໍ່ຢຸດຢັ້ງ, ເຮັດໃຫ້ເພິ່ນຍິ່ງຫວັງຢ່າງແຮງກ້າໃຫ້ສອງຝັ່ງສາມາດໂຮມເຂົ້າເປັນເອກະພາບກັນໂດຍໄວ, ເຮັດໃຫ້ປະຊາຊົນທັງສອງຝັ່ງສາມາດມີກຽດພ້ອມກັນໃນການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນ.
ທີ່ທ່ານພວມຟັງຢູ່ນີ້ແມ່ນເພງທີ່ຊື່ດັງທີ່ສຸດຢູ່ສອງຝັ່ງຊ່ອງແຄບ, ເພງນີ້ມີຊື່ວ່າ "ຫຼົງເຕິສວນເຢິນ" ແປວ່າ "ລູກຫຼານຂອງປະຊາຊາດຈີນ", ແຕ່ງໂດຍທ່ານໂຫວເຕີຈ້ຽນ ນັກດົນຕີທີ່ມີຊື່ສຽງໄຕ້ຫວັນ. ເນື້ອໃນຂອງເພງມີຢູ່ວ່າ: ຢູ່ທິດບົວລະພາທີ່ມີປະຫວັດເກົ່າແກ່ມີມັງກອນໂຕໜຶ່ງ, ຊື່ຂອງເຂົາເອີ້ນວ່າຈີນ; ຢູ່ທິດບົວລະພາທີ່ມີປະຫວັດເກົ່າແກ່ມີຄົນຝູງໜຶ່ງ, ພວກເຂົາເຈົ້າລ້ວນແຕ່ແມ່ນລູກຫຼານຂອງປະຊາຊາດຈີນ. ຂ້າພະເຈົ້າເຕີບໃຫຍ່ຂຶ້ນຢູ່ຈີນ, ເຕີບໃຫຍ່ແລ້ວແມ່ນຈະເປັນຜູ່ສືບທອດຂອງປະຊາຊາດຈີນ, ຂ້າພະເຈົ້າມີໜ່ວຍຕາດຳ ຜົມດຳ ຜິວໜັງເຫຼືອງ, ແມ່ນລູກຫຼານຂອງປະຊາຊາດຈີນຈົນເທົ່າໃດໆ.
ທ່ານຜູ່ຟັງ, ໃນມ້ວນທ້າຍຂອງລາຍການພາກນີ້, ພວກເຮົາໄດ້ຕັ້ງສອງຄຳຖາມຄືດັ່ງລຸ່ມນີ້: ຄຳຖາມຂໍ້ທີໜຶ່ງ, ຂໍໃຫ້ທ່ານຍົກສາມບຸນທີ່ເປັນມູນເຊື້ອຄືກັນລະຫວ່າງແຜ່ນດິນໃຫຍ່ຈີນກັບໄຕ້ຫວັນ. ຄຳຖາມຂໍ້ທີສອງ, ມວນຊົນໄຕ້ຫວັນທີ່ມີບັນພະບູລຸດຢູ່ແຜ່ນດິນໃຫຍ່ມີຫຼາຍເທົ່າໃດ? ຕໍ່ໄປຂໍອ່ານສອງຄຳຖາມດັ່ງກ່າວອີກເທື່ອໜຶ່ງ: ຄຳຖາມຂໍ້ທີໜຶ່ງ, ຂໍໃຫ້ທ່ານຍົກສາມບຸນທີ່ເປັນມູນເຊື້ອຄືກັນລະຫວ່າງແຜ່ນດິນໃຫຍ່ຈີນກັບໄຕ້ຫວັນ. ຄຳຖາມຂໍ້ທີສອງ, ມວນຊົນໄຕ້ຫວັນທີ່ມີບັນພະບູລຸດຢູ່ແຜ່ນດິນໃຫຍ່ມີຫຼາຍເທົ່າໃດ?
ທ່ານຜູ່ຟັງທີ່ໂຄລົບ, ລາຍການເສັງຄວາມຮູ້ກ່ຽວກັບໄຕ້ຫວັນທີ່ພາດຫົວເລື່ອງວ່າ "ໄຕ້ຫວັນ--ເກາະປະເສີດຂອງຈີນ" ບົດຕ່າງໆໄດ້ອອກອາກາດໝົດຊູ່ບົດແລ້ວ, ຂອບໃຈທ່ານທີ່ຮັບຟັງ, ຂໍອວຍພອນໃຫ້ທ່ານຈົ່ງໄດ້ຜົນງານດີໃນລາຍການເສັງຄວາມຮູ້ເທື່ອນີ້, ພົບກັນໃໝ່ໃນລາຍການໜ້າ, ສະບາຍດີ.
|
