ນາຍົກລັດຖະມົນຕີປາເລັສຕິນຮຽກຮ້ອງໃຫ້ປະຊາຄົມໂລກຈົ່ງສະກັດກັ້ນອິສຣາແອນທີ່ເລື່ອນຂັ້ນນະໂຍບາຍໂຈມຕີທາງການທະຫານ
cri
ຕາມຂ່າວCRI,ວັນທີ24ກັນຍາ,ຢູ່ລາມາລາ,ທ່ານຄູໄລ ນາຍົກລັດຖະມົນຕີລັດຖະບານປາເລັສຕິນປົກຄອງຕົນເອງໄດ້ໃຫ້ສຳພາດ,ຮຽກຮ້ອງໃຫ້ປະຊາຄົມໂລກ,4ຝ່າຍທີ່ກ່ຽວຂ້ອງກັບບັນຫາຕາເວັນອອກກາງໂດຍສະເພາະແມ່ນອາເມລິກາໃຊ້ກຳລັງກົດໜີບຕໍ່ອິສຣາແອນ,ຫ້າມບໍ່ໃຫ້ເຂົາເພີ່ມທະວີນະໂຍບາຍໂຈມຕີທາງການທະຫານທີ່ແນໃສ່ປະຊາຊົນປາເລັສຕິນ.
ທ່ານຄູໄລກ່າວວ່າ,ອິສຣາແອນ ຫຼອນໂຈມຕີທາງອາກາດຢູ່ແຖບກາຊາຈະກະທົບກະເທືອນສະຖານະການໃນປັດຈຸບັນຢ່າງໜັກໜ່ວງ,ທຳລາຍຄວາມພະຍາຍາມຂອງປະຊາຄົມໂລກທີ່ຊ່ອຍເຫຼືອຝ່າຍປາເລັສຕິນສ້າງສາກາຊາຄືນໃໝ່ແລະຈັດການເຈລະຈາສັນຕິພາບປາເລັສຕິນອິສຣາແອນຄືນໃໝ່.
ທ່ຽງຄືນວັນທີ24ກັນຍາ,ຄະນະລັດຖະບານອິສຣາແອນໄດ້ຜ່ານມະຕິ,ຕົກລົງຟື້ນຟູການເຄື່ອນໄຫວສະສາງພວກປະກອບອາວຸດຂອງປາເລັສຕິນຢ່າງມີເປົ້າໝາຍ,ແລະອັດຕັນແຖບກາຊາແລະຝັ່ງຕາເວັນຕົກແມ່ນ້ຳຈໍແດນຢ່າງບໍ່ເວລາຈຳກັດ.
ວັນທີ24ກັນຍາ,ທ່ານອາບູນ ເກດ ລັດຖະມົນຕີການຕ່າງປະເທດເອຢິບແລະທ່ານມຸດຊາ ເລຂາທິການໃຫຍ່ສັນນິບາດປະເທດອາລັບຕ່າງໄດ້ອອກຖະແຫຼງການ,ສະແດງຄວາມວິຕົກກັງວົນຫຼາຍຕໍ່ເລື່ອງປາເລັສຕິນອິສຣາແອນເກີດເຫດການນອງເລືອດຢ່າງລຽນຕິດໃນຫວ່າງມໍ່ໆນີ້,ພາໃຫ້ສະຖານະການປາເລັສຕິນອິສຣາແອນເຄັ່ງຕຶງອີກ.
|
|