|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ, ໃນລາຍການພາກນີ້ ຂ້າພະເຈົ້າຈະເລົ່າສຸພາສິດເລື່ອງ "ປ່ອຍເສືອຄືນເຂົ້າປ່າ" ສູ່ຟັງ.
ຄ.ສ.ປີ 211, ລິວຈ່າງ ຜູ່ປົກຄອງເມືອງອີ້ໂຈ່ວໄດ້ຍິນວ່າໂຈໂສແຕ່ງຈົ່ງຢາວນຳພາກອງທັບບຸກເຂົ້າສູ່ຮັ້ນຈົ່ງ, ເພື່ອໂຈມຕີຈ່າງຫຼູ, ລິວຈ່າງເປັນຫ່ວງວ່າ ເມື່ອໂຈໂສເອົາຊະນະຈ່າງຫຼູແລ້ວຈະມາໂຈມຕີເມືອງອີ້ໂຈ່ວ, ຈຶ່ງຮຽກເສນາບໍດີທັງຫຼາຍມາປຶກສາຫາລືກັນ.
ເສນາບໍດີຈ່າງຊົ່ງສະເໜີວ່າ:"ໂຈໂສມີກຳລັງທະຫານເຂັ້ມແຂງກວ່າໝູ່, ບໍ່ມີໃຜສູ້ໄດ້, ຖ້າໂຈໂສເອົາຊະນະຈ່າງຫຼູແລ້ວມາໂຈມຕີເມືອງອີ້ໂຈ່ວ, ໃຜຈະຕໍ່ຕ້ານໄດ້? ເຫຼົາປີ່ກັບພະບາດສົມເດັດແມ່ນວົງຕະກູນດຽວກັນ, ມີຄວາມອາຄາດບາດໝາງກັບໂຈໂສ, ທັງຊ່າງການທະຫານ, ຖ້າໃຫ້ເຫຼົາປີ່ໄປໂຈມຕີຈ່າງຫຼູ, ຈ່າງຫຼູຈະປະລາໄຊຢ່າງແນ່ນອນ, ເມື່ອຈ່າງຫຼູຖືກຕີແພ້, ອິດທິກຳລັງຂອງເມືອງອີ້ໂຈ່ວຈະເຂັ້ມແຂງຂຶ້ນ, ເມື່ອໂຈໂສມາໂຈມຕີເມືອງອີ້ໂຈ່ວກໍໄຮ້ຄວາມສາມາດແລ້ວ. ລິວຈ່າງຮັບເຫັນດີນຳຈ່າງຊົ່ງ, ແລະແຕ່ງຝາເຈິ້ງໄປຕ້ອນຮັບເຫຼົາປີ່, ທັງແຕ່ງເມິ້ງຕານຳພາກອງທະຫານຫຼາຍພັນຄົນໄປຊ່ອຍເຫຼົາປີ່.
ເມື່ອລິວປ່າ ທີ່ປຶກສາຂອງລິວຈ່າງໄດ້ຮູ້ເລື່ອງນີ້ແລ້ວ ກໍ່ພະຍາຍາມເຕືອນລິວຈ່າງວ່າ:"ເຫຼົາປີ່ເປັນຄົນມີໃຈທະເຍີທະຍານຕະຫຼອດມາ, ເຊີນເຂົາເຂົ້າມາໃນເຂດເຊສວນ, ຄົງຈະມີໄພອັນຕະລາຍບໍ່ສຸດບໍ່ສ້ຽງໃນພາຍໜ້າ." ທີ່ປຶກສາຜູ່ອື່ນ ເຊັ່ນຫວງສວນແລະຫວັງຈິງເປັນຕົ້ນ ກໍເຕືອນວ່າ:"ເຊີນເຫຼົາປີ່ເຂົ້າມາເຂດເຊສວນ, ຍ່ອມຈະເປັນການຊັກນ້ຳເຂົ້າເຮືອຊັກເສືອເຂົ້າບ້ານ, ເຫຼົາປີ່ຈະກືນກິນເຂດເຊສວນພາກຕາເວັນຕົກບໍ່ໄວກໍ່ຊ້າ." ລິວຈ່າງກ່າວວ່າ:"ຖ້າໂຈໂສແລະຈ່າງຫຼູມາໂຈມຕີ, ພະອົງເຮົາບໍ່ມີກຳລັງທະຫານຕ້ານຢັນໄດ້, ເຊີນເຫຼົາປີ່ມາພຽງແຕ່ແມ່ນເພື່ອຕໍ່ຕ້ານກັບໂຈໂສແລະຈ່າງຫຼູເທົ່ານັ້ນ."
ຝາເຈິ້ງເດີນທາງໄປຮອດເມືອງຈິ່ງໂຈ່ວພົບກັບເຫຼົາປີ່, ແລະແຈ້ງເຈດຕະນາຂອງລິວຈ່າງທີ່ເຊີນເພິ່ນເຂົ້າໄປເຂດເຊສວນ, ທັງສະເໜີຕໍ່ເຫຼົາປີ່ວ່າ:"ເມືອງອີ້ໂຈ່ວແມ່ນເຂດແຄວ້ນທີ່ຮັ່ງມີແລະອຸດົມສົມບູນທີ່ສຸດ, ຜູ່ຄົນທີ່ອົງອາດກ້າຫານແລະສະຫຼາດສະຫຼຽວຄືທ່ານນີ້, ຍັງມີຈ່າງຊົ່ງຊ່ອຍເຫຼືອ, ການຍາດເອົາເມືອງອີ້ໂຈ່ວຈະບໍ່ແມ່ນເລື່ອງຍາກ."
ເຫຼົາປີ່ເລີຍໃຫ້ຂົງເບັ້ງແລະກວນອູເຝົ້າຮັກສາເມືອງຈິ່ງໂຈ່ວ, ແລະນຳພາກອງທະຫານເດີນທັບໄປສູ່ເມືອງອີ້ໂຈ່ວ.
ລິວຈ່າງໄດ້ຮັບຂ່າວວ່າເຫຼົາປີ່ພວມເດີນທັບມາສູ່ເມືອງອີ້ໂຈ່ວ, ເລີຍນຳພາກອງທະຫານ 3 ໝື່ນຄົນໄປຕ້ອນຮັບ. ລິວຈ່າງກັບເຫຼົາປີ່ພົບປະກັນຢູ່ເມືອງຜູຊ້ຽນ, ລິວຈ່າງໄດ້ສົ່ງກອງທະຫານແລະສະບຽງອາຫານໃຫ້ເຫຼົາປີ່ອີກ, ເພື່ອໃຫ້ເຫຼົາປີ່ໄປໂຈມຕີຈ່າງຫຼູ.
ລິວປ່າໄດ້ຮູ້ແລ້ວ ກໍ່ພະຍາຍາມເຕືອນລິວຈ່າງອີກວ່າ:"ໃຫ້ເຫຼົາປີ່ໄປໂຈມຕີຈ່າງຫຼູ, ກໍເໝືອນກັບການປ່ອຍໃຫ້ເສືອຄືນເຂົ້າປ່າ, ຢາກຄວບຄຸມມັນອີກກໍ່ຍາກທີ່ສຸດແລ້ວ. ແຕ່ລິວຈ່າງບໍ່ຮັບເຫັນດີນຳ.
ພາຍຫຼັງມາ ລິວຈ່າງໄດ້ຮູ້ວ່າຈ່າງຊົ່ງສົມຮູ້ຮ່ວມຄິດກັບເຫຼົາປີ່, ເລີຍຂ້າຈ່າງຊົ່ງຖິ້ມ. ເຫຼົາປີ່ໂມໂຫຫຼາຍ, ເລີຍນຳພາກອງທະຫານບຸກໄປສູ່ເມືອງເສິງຕູ, ຍັງສັ່ງໃຫ້ຂົງເບັ້ງນຳພາເຕ່ຍຫຸຍແລະຈ້າວຢຸນເປັນຕົ້ນເດີນທັບຕາມແມ່ນ້ຳຢາງເຊ ບຸກໄປສູ່ເມືອງອີ້ໂຈ່ວ, ເພື່ອຊ່ອຍບຸກໂຈມຕີເມືອງເສິງຕູ, ລິວຈ່າງຕ້ານຢັນບໍ່ໄດ້, ຈຶ່ງຈຳເປັນຕ້ອງຍອມຈຳນົນ.
ພາຍຫຼັງເຫຼົາປີ່ຍາດໄດ້ເມືອງເສິງຕູແລ້ວ ກໍ່ແຕ່ງຕັ້ງຕົນເອງເປັນຜູ່ປົກຄອງເມືອງອີ້ໂຈ່ວ. ພາຍຫຼັງມາໄດ້ສ້າງຕັ້ງອຳນາດການປົກຄອງສູຮັ້ນຂຶ້ນ. ແຕ່ນັ້ນມາ, ຈີນກໍ່ໄດ້ເຂົ້າສູ່ສະໄໝສາມລັດຄື ລັດເວິ້ຍ ລັດສູແລະລັດອູຊົງຕົວຢູ່ນຳກັນ.
|
