|
ທ່ານຜູ້ຟັງທີ່ໂຄລົບ,ຊົມເຊີຍທ່ານຮັບຟັງ ລາຍການວັດທະນະທຳຈີນ.ທ່ານຈີດີມາຈາເປັນນັກກະວີທີ່ມີຊື່ສຽງຂອງຈີນເຊິ່ງມີລັກສະນະຕົວແທນຊົນເຜົ່າສ່ວນຫນ້ອຍໃນຍຸກປະຈຸບັນ,ບົດກະວີຂອງທ່ານເຕັມໄປດ້ວຍນ້ຳໃຈວັດທະນະທຳຂອງຊົນເຜົ່າຕົນເອງແລະສີສັນຂອງລັດທິມະນຸດສະທຳ,ມີຜົນສະທ້ອນອັນໃຫຍ່ຫລວງໃນວົງການກະວີພາຍໃນປະເທດແລະຕ່າງປະເທດ.ຕໍ່ໄປເຊີນຟັງບົດສະເຫນີອັນລະອຽດ.
ເຜົ່າອີແມ່ນຊົນເຜົ່າສ່ວນຫນ້ອຍຫນຶ່ງຢູ່ພາກຕາເວັນຕົກສຽງໃຕ້ຂອງຈີນ,ແມ່ນຊົນເຜົ່າທີ່ມີປະຫວັດເກົ່າແກ່ທີ່ສຸດ.ເຜົ່າອີມີພາສາແລະຕົວຫນັງສືຂອງຕົນ,ປະດິທິນຂອງຕົນ;ດົນຕີແລະການຟ້ອນຂອງເຜົ່າອີມີລັກສະນະພິເສດ.ຫນັງສືບູຮານຂອງເຜົ່າອີແມ່ນອຸດົມສົມບູນທີ່ສຸດ,ມີບົດກະວີປະຫວັດ10ບົດເລົ່າລືກັນຈົນຮອດປັດຈຸບັນ.ວັນນະຄະດີພື້ນເມືອງໄດ້ເລົ່າຕໍ່ປາກກັນມາຢ່າງກວ້າງຂວາງເນື້ອໃນ,ເນື້ອໃນເຕັມໄປດ້ວຍສະຕິປັນຍາ.ທ່ານຈີດີມາຈາຜູ້ມີອາຍຸ44ປີກໍ່ແມ່ນນັກກະວີເຜົ່າອີຜູ້ຫນຶ່ງເຕີບໃຫຍ່ຂຶ້ນໃນສະພາບແວດລ້ອມນີ້.
ປີ1982,ພາຍຫລັງທ່ານຈີດີມາຈາສຳເລັດການຮຽນຈາກສະຖາບັນຊົນເຜົ່າຕາເວັນຕົກສຽງໃຕ້,ທ່ານໄດ້ໄປເຮັດວຽກຢູ່ສະຫະພັນວັນນະຄະດີເຂດລຽງຊານແຂວງເຊສວນທີ່ເຕັມໄປດ້ວຍຄວາມກະຕືລືລົ້ນຕໍ່ການປະພັນ,ແຕ່ນັ້ນມາທ່ານໄດ້ແຕ່ງບົດກະວີທີດີເລີດຫລາຍບົດ. ຊຸມນຸມກາບກອນເຫລັ້ມທີ່ຫນຶ່ງຂອງທ່ານຊື່ວ່າເພງແຫ່ງຄວາມຮັກເຄີຍໄດ້ຮັບລາງວັນກະວີຄັ້ງທີສາມ.
ບົດກະວີທີ່ທ່ານຈີດີມາຈາແຕ່ງນັ້ນມີລັກສະນະພິເສດໃນດ້ານເນື້ອໃນແລະລົດນິຍົມວັດທະນະທຳຊົນເຜົ່າ,ພ້ອມກັນນັ້ນຍັງມີຄວາມຄິດເລິກເຊິ່ງແລະການສັງເກດທີ່ຫລັກແຫລມ,ດັ່ງນັ້ນຈິ່ງໄດ້ຮັບຄວາມຍ້ອງຍໍຈາກຜູ້ອ່ານແລະວົງການວິຈານ.ທ່ານຈີດີມາຈາແລະບົດກະວີຂອງທ່ານມີຖານະສຳຄັນທີ່ເຂົ້າແທນບໍ່ໄດ້ໃນວົງການກະວີຈີນຍຸກປະຈຸບັນ.ກ່ຽວກັບບັນຫານີ້,ທ່ານຈີດີມາຈາເຫັນວ່າວັດທະນະທຳຂອງເຜົ່າອີເປັນທາດບຳລຸງຂອງທ່ານ.ທ່ານກ່າວວ່າ:
"ຂ້າພະເຈົ້າເຫັນວ່າປະຫວັດສາດແລະວັດທະນະທຳຂອງຊົນເຜົ່າຂ້າພະເຈົ້າໄດ້ຫລໍ່ລ້ຽງຂ້າພະເຈົ້າ,ພ້ອມກັນນັ້ນ,ຂ້າພະເຈົ້າກໍແມ່ນເຄື່ອງຫມາຍຫນຶ່ງຂອງຊົນເຜົ່າແລະວັດທະນະທຳຂອງຂ້າພະເຈົ້າ.ນັກກະວີຜູ້ຫນຶ່ງຈະຫ່າງເຫີນອອກຈາກດິນແດນແລະວັດທະນະທຳທີ່ຫລໍ່ລຽງເພິ່ນບໍ່ໄດ້,ຖ້າຫ່າງເຫີນອອກຈາກນີ້ແລ້ວ,ກໍຈະຕາຍຫລືຈະເປັນຜູ້ຂາດທາດບຳລຸງ,ເປັນຜູ້ປອດໃສແຂງແຮງບໍ່ໄດ້."
ທ່ານຈີດີມາກ່າວວ່າ,ໃນຖານະເປັນຜູ່ສືບທອດຂອງວັດທະນະທຳເກົ່າແກ່ຂອງເຜົ່າອີ,ການປະດິດຄິດແຕ່ງຂອງທ່ານລ້ວນແຕ່ມາຈາກຊີວິດການເປັນຢູ່ທຳມະດາສາມັນທີ່ທ່ານເລີ່ມຮູ້ແຕ່ໄວເດັກ.ບົດປະພັນທີ່ມີລັກສະນະຕົວແທນຄືຈອກຂອງແຮ້ງ,ງົວຕີຕາຍເປັນຕົ້ນ,ເຕັມໄປດ້ວຍນ້ຳໃຈເຜົ່າອີທີ່ອົງອາດກ້າຫານບໍ່ອ່ອນຍອມແລະຮັກຕົນເອງໂຄລົບຕົນເອງ.
ດຽວນີ້,ຊຸມນຸມກາບກອນຂອງທ່ານຈີດີມາຈາໄດ້ພິມຈຳຫນ່າຍ10ກວ່າເຫລັ້ມແລ້ວ.ທ່ານໄດ້ຮັບລາງວັນລະດັບຊາດຈີນຫລາຍເທື່ອ.ບົດກະວີຂອງທ່ານໄດ້ແປເປັນພາສາອັງກິດ,ຝະລັ່ງ, ອີຕາລີ, ຍີ່ປຸ່ນ, ແອດສະປາຍ, ຣູມານີເປັນຕົ້ນ,ໄດ້ຮັບການເອົາໃຈໃສ່ຈາກວົງການກະວີສາກົນ.ທ່ານຈີດີມາຈາເຫັນວ່າ,ໃນນາມເປັນນັກກະວີຜູ້ຫນຶ່ງ,ສຳຄັນທີ່ສຸດແມ່ນຕ້ອງມີນ້ຳໃຈວັດທະນະທຳມະນຸດ.ທ່ານກ່າວວ່າ:
"ຮັກໂລກຫນວ່ຍນີ້ແລະຮັກມະນຸດດ້ວຍກັນແມ່ນຄຸນສົມບັດທີ່ສູງສົ່ງທີ່ສຸດຂອງນັກກະວີຜູ້ຫນຶ່ງ,ນັກກະວີຍິ່ງໃຫຍ່ຜູ້ໃດກໍຕາມຕ້ອງມີນ້ຳໃຈມະນຸດສະທຳ,ຕ້ອງຮັກຜູ້ຄົນທີ່ເປັນຊົນເຜົ່າຕ່າງກັນ,ເຊື້ອຊາດຕ່າງກັນແລະເບື້ອງຫລັງວັດທະນະທຳຕ່າງກັນຢູໃນໂລກພວກເຮົານີ້,ພ້ອມກັນນັ້ນຍັງຕ້ອງຮັກແລະໂຄລົບຊີວິດໃນໂລກ,ນີ້ແມ່ນສຳຄັນທີ່ສຸດສຳລັບນັກກະວີຜູ້ຫນຶ່ງ."
ທ່ານຈີດີມາຈາແມ່ນນັກກະວີຊົນເຜົ່າສ່ວນຫນ້ອຍຜູ້ຫນຶ່ງ,ແຕ່ພັດແຕ່ງດ້ວຍພາສາຮັ້ນ.ທ່ານໃຊ້ກຳລັງວັງຊາແລະກາລະເວລາທີ່ລື່ນນັກກະວີເຜົ່າຮັ້ນຫລາຍເທື່ອ,ຮ່ຳຮຽນຄົ້ນຄວ້າວັນນະຄະດີບູຮານແລະວັນນະຄະດີຍຸກປະຈຸບັນຂອງພາສາຮັ້ນ,ແລະເຮັດໃຫ້ວັດທະນະທຳເຜົ່າຮັ້ນກັບວັດທະນະທຳເຜົ່າອີປະສານກັນຢ່າງອິນຊີ.
ປະຈຸບັນ,ທ່ານຈີດີມາຈາໄດ້ດຳລົງຕຳແຫນ່ງໃນສະມາຄົມນັກຂຽນຈີນ,ຍັງເປັນບັນນາທິການໃຫຍ່ຂອງວາລະສານ ວັນນະຄະດີຊົນເຜົ່າ.ເຖິງວ່າທ່ານຂຸ້ນວຽກຫລາຍ,ແຕ່ທ່ານຍັງແຕ່ງບົດກະວີໂດຍຕະຫລອດ,ທັງໄດ້ຮັບຜົນງາມເດັ່ນ.ທ່ານເຫັນວ່າ,ໄລຍະປະຈຸບັນແມ່ນໄລຍະພັດທະນາດີທີ່ສຸດຂອງວັນນະຄະດີສິລະປະຈີນລວມທັງກະວີຈີນ.ທ່ານຈີດີມາຈາກ່າວວ່າ:
"ຄວນເວົ້າວ່າ,ວົງການກະວີຈີນໃນປະຈຸບັນແມ່ນຮຸ່ງເຮືອງທີ່ສຸດ,ນີ້ແມ່ນຄວາມຈິງທາງພາວະວິໄສ.ຂ້າພະເຈົ້າເຫັນວ່າສະພາບແວດລ້ອມການແຕ່ງໃນປະຈຸບັນນີ້ແມ່ນດີກວ່າຍາມໃດຫມົດ,ຄວາມຄິດຂອງນັກປະພັນແມ່ນຫັນມັງທີ່ສຸດ,ບໍ່ວ່າຍາມໃດກໍ່ຂຽນກໍແຕ່ງ.ໃນປະຈຸບັນບົດປະພັນກໍຫລາຍທີ່ສຸດ, ສຳນັກກໍມີຫລາຍ, ນັກກະວີທີ່ສະເຫນີເຈດຈຳນົງສິລະປະຕ່າງກັນກໍຫລາຍທີ່ສຸດ."
ທ່ານຈີດີມາຈາກ່າວວ່າ,ໃນຂວັນຕົນເອງ,ທ່ານແມ່ນນັກກະວີຕະຫລອດຊີວິດ.ການຂຽນການແຕ່ງບົດກະວີເປັນການເຄື່ອນໄຫວຈິດໃຈສຳຄັນທີ່ສຸດໃນຊີວິດຂອງທ່ານ.ເວົ້າອີກໃນຫນຶ່ງແມ່ນໃນຊີວິດຂອງທ່ານບໍ່ມີກະວີບໍ່ໄດ້.
ທ່ານຜູ້ຟັງທີ່ໂຄລົບ,ທີ່ຟັງມານັ້ນເປັນບົດສະເຫນີທ່ານຈີດີມາຈາ ນັກກະວີຊົນເຜົ່າສ່ວນຫນ້ອຍຈີນ.ສະບາຍດີ.
|
