|
|
 |
| (GMT+08:00)
2005-10-14 09:10:37
|
 |
|
ເຂດການຄ້າສາກົນຈີນອາຊຽນທີ່ພວມກໍ່ສ້າງຢູ່(ສຽງ)
cri
 ນະຄອນນານນິງເຂດກວາງຊີແມ່ນເມືອງສວຍງາມທີ່ມີຕົ້ນໄມ້ຂຽວອຸ່ມທຸ່ມ,ດອກໄມ້ເບັ່ງບານຕະຫຼອດປີ. ຢູ່ບ່ອນທີ່ຫ່າງຈາກສູນປະຊຸມແລະວາງສະແດງສາກົນນານນິງທີ່ຈັດງານເອັກສ໌ໂປຈີນອາຊຽນໄປທາງທິດຕາເວັນອອກໜຶ່ງກິໂລແມັດ, ມີບ່ອນທ່ອງທ່ຽວແຫ່ງໜຶ່ງທີ່ມີຊື່ສຽງຊື່ວ່າພູຊິ່ງຊິ້ວ,ຢູ່ຕີນພູແຫ່ງນີ້ມີດິນໂນນຕອນໜຶ່ງມີເນື້ອທີ່ປະມານ 3 ຕາລາງກິໂລແມັດ,ກໍແມ່ນບ່ອນທີ່ວາງແຜນຈະສ້າງເຂດການຄ້າສາກົນຈີນອາຊຽນ.
ໃນເວລາເອົາຂ່າວ,ນັກຂ່າວໄດ້ເຫັນລົດດຸດດິນສິບກວ່າຄັນທີ່ພວມເຮັດວຽກຢູ່ບ່ອນກໍ່ສ້າງທີ່ກວ້າງຂວາງເອີດເຕີດຢ່າງເຄັ່ງຮ້ອນ,ໃຕ້ທ້ອງຟ້າສີຄາມເມກສີຂາວ,ຖະໜົນສຳຄັນຫຼາຍສາຍໄດ້ເປັນຮູບເປັນຮ່າງຂຶ້ນໃນເບື້ອງຕົ້ນແລ້ວ. ຢູ່ແຄມທາງ,ໄດ້ຕັ້ງປ້າຍໂຄສະນາທີ່ສູງໃຫຍ່ເປັນແຖວ,ໃນນັ້ນມີແຜ່ນໜຶ່ງກໍແມ່ນແຜນຜັງຂອງເຂດການຄ້າສາກົນຈີນອາຊຽນທີ່ມີຕຶກສູງຕັ້ງຊ້ອງໆກັນຢູ່ໃຈກາງແລະມີຕົ້ນໄມ້ແລະແມ່ນ້ຳຂຽວງາມໄຫຼອ້ອມ.
ທ່ານຈູມໍ້ ຫົວໜ້າຫ້ອງການຄຸ້ມຄອງການກໍ່ສ້າງເຂດການຄ້າສາກົນຈີນອາຊຽນບອກນັກຂ່າວວ່າ,ກິດຈະການເຂດການຄ້າສາກົນຈີນອາຊຽນໄລຍະທຳອິດໄດ້ເລີ່ມລົງມືສ້າງຢ່າງເປັນທາງການໃນເດືອນເມສາປີນີ້,ລົງທຶນທັງໝົດ 320 ລ້ານຢວນ,ປັດຈຸບັນໄດ້ປູທາງສຳຄັນ 6 ເສັ້ນສຳເລັດແລ້ວ,ການຕິດຕັ້ງໄຟຂ້າງທາງແລະປູກຕົ້ນໄມ້ສ່ວນໜຶ່ງຈະເຮັດສຳເລັດກ່ອນຈັດງານເອັກສ໌ໂປຈີນອາຊຽນຄັ້ງທີສອງ,ກິດຈະການໄລຍະທຳອິດທັງໝົດຈະສ້າງສຳເລັດພາຍໃນປີນີ້. ທ່ານຈູມໍ້ເວົ້າວ່າ:
"ເຂດການຄ້າປະກອບດ້ວຍສາມພາກສ່ວນ,ພາກສ່ວນທີໜຶ່ງແມ່ນເຂດການຄ້າໃຈກາງ,ວາງແຜນ 1,1 ຕາລາງກິໂລແມັດ,ຈະສ້າງເປັນສູນການຄ້າທີ່ມີເອກະລັກອາຊີອາຄະເນ,ປະກອບສິ່ງກໍ່ສ້າງຄົບຊຸດສຳລັບເຮັດການຄ້າ,ຈັດກອງປະຊຸມງານວາງສະແດງ,ແລະງານແລກປ່ຽນວັດທະນະທຳ,ມີໂຮງແຮມແລະຄຸ້ມເຮືອນຢູ່ສາກົນເປັນຕົ້ນ; ພາກສ່ວນທີສອງແມ່ນບ່ອນຕັ້ງສຳນັກງານຕິດຕໍ່ພົວພັນຂອງບັນດາປະເທດອາຊຽນ,ຈະສະໜອງທີ່ດິນປະມານ 4 ເຮັກຕາໃຫ້ແຕ່ລະປະເທດ,ໃຫ້ບັນດາປະເທດອາຊຽນກັບນະຄອນນານນິງພ້ອມກັນບຸກເບີກກໍ່ສ້າງ; ພາກສ່ວນທີສາມແມ່ນບ່ອນຫຼິ້ນກິລາແລະພັກຜ່ອນລື້ນເລີງ,ຢູ່ແຫ່ງນັ້ນຍັງຈະສ້າງໂຮງຮຽນສາກົນຫຼັງໜຶ່ງ."
ທ່ານຈູມໍ້ບອກນັກຂ່າວວ່າ,ເຂດການຄ້າໃຈກາງຈະຕັ້ງສະຖານກົງສູນຂອງ 20 ປະເທດ,ປັດຈຸບັນ,ມາເລເຊຍ,ຫວຽດນາມແລະສ.ເກົາຫຼີໄດ້ກຳນົດບ່ອນກໍ່ສ້າງແລ້ວ. ຢູ່ໃນເຂດສຳນັກງານຕິດຕໍ່ພົວພັນຂອງບັນດາປະເທດອາຊຽນ,ຈະຈັດໃຫ້ມີເຂດຂອງ 10 ປະເທດອາຊຽນຄືບຼູໄນ,ອິນໂດເນເຊຍ,ມາເລເຊຍ,ຟິລິບປິນ,ສິງກະໂປ,ໄທ,ຫວຽດນາມ,ລາວແລະກຳປູເຈຍເປັນຕົ້ນ,ພ້ອມດ້ວຍເຂດຂອງຍີ່ປຸ່ນ,ສ.ເກົາຫຼີແລະເຂດຂອງຮົງກົງຈີນແລະມາກາວຈີນ. ປັດຈຸບັນ,ຫວຽດນາມ,ມາເລເຊຍ,ສ.ເກົາຫຼີແລະລາວເປັນຕົ້ນໄດ້ກຳນົດບ່ອນກໍ່ສ້າງແລ້ວ,ໃນໄລຍະຈັດງານເອັກສ໌ໂປຈີນອາຊຽນ,ເຂດຂອງມາເລເຊຍຍັງຈະຈັດພິທີວາງສີລາຈາລຶກ.
ນອກນີ້,ຢູ່ບໍລິເວນເຂດການຄ້າສາກົນຈີນອາຊຽນ,ອົງການປົກຄອງນະຄອນນານນິງຍັງກຽມສ້າງເຂດເຮືອນຢູ່ຊັ້ນສູງແລະຕຶກຫ້ອງການ,ເພື່ອເສີມສ້າງແລະບູລະນະສັບພະຄຸນສັງລວມຂອງເຂດການຄ້າຕື່ມອີກ.
ທ່ານຜູ້ຟັງທີ່ຮັກແພງ,ເປັນຫຍັງຈຶ່ງເລືອກເອົານະຄອນນານນິງເຂດກວາງຊີເປັນບ່ອນກໍ່ສ້າງເຂດການຄ້າສາກົນຈີນອາຊຽນ? ທ່ານຫຼີຈິນຈາວ ຮອງປະທານຄະນະຈັດງານເອັກສ໌ໂປຈີນອາຊຽນ ຮອງປະທານເຂດກວາງຊີເຜົ່າຈ້ວງປົກຄອງຕົນເອງເຫັນວ່າ,ເຂດກວາງຊີແມ່ນເຂດດຽວຂອງຈີນທີ່ມີດິນຕໍ່ແດນທັງມີຊ່ອງທາງໄປມາເທິງທະເລກັບປະເທດອາຊຽນ,ມີທ່າແຮງທາງພູມສາດທຳມະຊາດໃນການພັດທະນາແລະໄປມາຫາສູ່ກັນກັບບັນດາປະເທດອາຊຽນໃນຂົງເຂດເສດຖະກິດການຄ້າແລະວັດທະນະທຳເປັນຕົ້ນ.
"ເຂດກວາງຊີຕັ້ງຢູ່ຈຸດຄົບກັນລະຫວ່າງພາກກາງກັບພາກຕາເວັນຕົກຂອງຈີນ,ແລະກໍ່ຕັ້ງຢູ່ຈຸດຄົບກັນບ່ອນຈີນຕໍ່ແດນກັບອາຊຽນ,ດິນຈີນທີ່ຕໍ່ແດນກັບອາຊຽນມີແຂວງຢູນນານແລະເຂດກວາງຊີ,ແຕ່ວ່າມີແຕ່ເຂດກວາງຊີທໍ່ນັ້ນທີ່ມີທາງລົດໄຟ,ທາງຫຼວງແລະທາງນ້ຳເຊື່ອມຕໍ່ກັບປະເທດອາຊຽນ."
ທ່ານຫຼີຈິນຈາວເວົ້າວ່າ,ຢູ່ຊາຍແດນຈີນຫວຽດນາມ,ເຂດກວາງຊີມີດ່ານຊາຍແດນ 12 ແຫ່ງ,ເມືອງທ່າເປຫາຍ,ຊິ່ນໂຈ່ວແລະຟາງເຊິງແມ່ນທ່າກ່ຳປັ່ນທີ່ດີ,ແລະແມ່ນທ່າກ່ຳປັ່ນທີ່ໃກ້ກັບອາຊີອາຄະເນທີ່ສຸດ. ຢູ່ເຂດກວາງຊີ,ມີທາງຫຼວງມາດຖານ 10 ເສັ້ນເນັ່ງໄປຫາຫວຽດນາມ,ທາງດ່ວນທີ່ເນັ່ງຈາກເມືອງນານນິງໄປຫາດ່ານມິດຕະພາບທີ່ພວມກໍ່ສ້າງຢູ່ນັ້ນຈະເຮັດໃຫ້ເວລາຂີ່ລົດຈາກນານນິງໄປຫາຮ່າໂນ້ຍສັ້ນເຂົ້າເຫຼືອ 3 ຊົ່ວໂມງເຄິ່ງ; ໃນດ້ານທາງລົດໄຟ,ຈາກເມືອງນານນິງຜ່ານດ່ານມິດຕະພາບໄປຮອດຮ່າໂນ້ຍສາມາດເຊື່ອມຕໍ່ກັບທາງລົດໄຟປານອາຊີ,ແລ້ວເຂົ້າສູ່ປະເທດອາຊຽນ. ເດີ່ນຍົນສາກົນນານນິງແລະກຸ້ຍລິນຂອງເຂດກວາງຊີໄດ້ເປີດຖ້ຽວບິນໄປມາໂດຍກົງລະຫວ່າງຮ່າໂນ້ຍ,ບາງກອກແລະກົວລາລຳເປີແລ້ວ.
ສາມາດເວົ້າໄດ້ວ່າ,ເຂດກວາງຊີໄດ້ສ້າງເຄືອຂ່າຍຄົມມະນາຄົມສາມມິຕິທາງບົກ,ທາງທະເລແລະທາງອາກາດທີ່ເຊື່ອມຕໍ່ກັບປະເທດອາຊຽນທີ່ສະດວກກວ່າໝູ່ແລະວ່ອງໄວກວ່າໝູ່,ໂດຍສະເພາະແມ່ນໃນສອງປີມໍ່ໆມານີ້,ຄຽງຄູ່ກັບການເລັ່ງລັດກໍ່ສ້າງເຂດການຄ້າເສລີຈີນອາຊຽນໃຫ້ໄວເຂົ້າ,ງານເອັກສ໌ໂປຈີນອາຊຽນຈັດຂຶ້ນຢູ່ນານນິງຕະຫຼອດ,ເຮັດໃຫ້ທ່າແຮງທີ່ຕັ້ງຂອງເຂດກວາງຊີພົ້ນເດັ່ນກວ່າເກົ່າ,ມີບົດບາດພິເສດກວ່າເກົ່າ,ພວມປະເຊີນກັບໂອກາດພັດທະນາທີ່ບໍ່ເຄີຍມີມາກ່ອນ. ທ່ານຫຼີຈິນຈາວເຫັນວ່າ,ເຂດການຄ້າສາກົນຈີນອາຊຽນສ້າງຢູ່ເມືອງນານນິງເປັນການຄັດເລືອກທີ່ດີທີ່ສຸດໃນດ້ານກາລະໂອກາດ,ເຊື່ອວ່າ,ຕໍ່ໄປພາຍໜ້າ,ເຂດການຄ້າດັ່ງກ່າວກັບງານເອັກສ໌ຈີນອາຊຽນທີ່ຈັດຂຶ້ນເປັນປະຈຳໃນເດືອນຕຸລາທຸກປີນັ້ນ,ຕ່າງຈະຕາບຈູນກັນ,ຊ່ອຍຊຸກຍູ້ໜູນກັນປະກອບພະລັງແຮງໃໝ່ເຂົ້າໃນການແລກປ່ຽນແລະຮ່ວມມືກັນລະຫວ່າງຈີນກັບບັນດາປະເທດອາຊຽນ.
ເຖິງວ່າປັດຈຸບັນຍັງພວມກໍ່ສ້າງພື້ນຖານໂຄງລ່າງຢູ່,ພວກເຮົາຍັງບໍ່ສາມາດເຫັນໂສມໜ້າລວມກໍຕາມ,ແຕ່ອີກບໍ່ດົນ,ແຜນຜັງທີ່ຍິ່ງໃຫຍ່ສະຫງ່າດັ່ງກ່າວຈະກາຍເປັນພາບຕົວຈິງ,ເມື່ອຮອດເວລານັ້ນ ຢູ່ພາກຕາເວັນອອກຂອງເມືອງນານນິງ ເຂດເມືອງໃໝ່ທີ່ມີເອກະລັກອາຊີອາຄະເນຈະໂປໂລເດັ່ນຂຶ້ນ,ຢູ່ແຫ່ງນັ້ນ ການບໍລິການດ້ານການຄ້າ,ການແລກປ່ຽນວັດທະນະທຳແລະສະຖານທີ່ພັກຜ່ອນລື້ນເລີງຈະມີຄົບຊຸດ,ຕຶກສູງ,ທິວທັດສວຍງາມແລະຕົ້ນໄມ້ຕົ້ນຫຍ້າທີ່ຂຽວງາມຈະຕ້ອນຮັບທູຕານຸທູດ,ຜູ້ແທນການຄ້າແລະບຸກຄົນວົງການຕ່າງໆຂອງບັນດາປະເທດອາຊີ.
|
|
|
