|
ສະບາຍດີທ່ານຜູ້ຟັງທີ່ໂຄລົບ.ຊົມເຊີຍທ່ານສືບຕໍ່ຮັບຟັງລາຍການນັບເວລາງານເອັກສໂປຈີນ-ອາຊຽນຄືນຫຼັງພາກທີຫ້າ.ເມື່ອໄດ້ຟັງລາຍການສີ່ພາກກ່ອນແລ້ວ,ພວກເຮົາໄດ້ຊາບວ່າ,ງານເອັກສໂປຈີນ-ອາຊຽນມີບົດບາດສີ່ຢ່າງ,ນັ້ນກໍຄື ຊຸກຍູ້ການຮ່ວມມືລະຫວ່າງຈີນກັບບັນດາປະເທດອາຊຽນໃນຂົງເຂດການຄ້າສິນຄ້າ ການລົງທຶນແລະດູດດຶງທຶນ ການຄ້າການບໍລິການແລະການແລກປ່ຽນວັດທະນະທຳເປັນຕົ້ນ.ໃນນັ້ນ,ບົດບາດແລກປ່ຽນວັດທະນະທຳຕົ້ນຕໍແມ່ນບັນລຸເປັນຈິງໂດຍຜ່ານຈາກບຸນສິບະປະເພງພື້ນເມືອງສາກົນນານນີງທີ່ຈັດຂຶ້ນພ້ອມກັນງານເອັກສໂປຈີນ-ອາຊຽນຢູ່ນານນີງ.
ຢູ່ເຂດກວາງຊີເຜົ່າຈ້ວງປົກຄອງຕົນເອງທີ່ມີພູຜາແມ່ນ້ຳອັນສວຍງາມ,ມີ 25 ຊົນເຜົ່າ 48 ລ້ານກວ່າຄົນດຳລົງຊີວິດຢູ່ແຫ່ງນີ້,ໃນນັ້ນເຜົ່າຈ້ວງໄດ້ກວມປະຊາກອນໜຶ່ງສ່ວນສາມ.ແຕ່ໃດມາ,ເຂດກວາງຊີກໍມີສົມຍານາມເປັນທະເລເພງ,ປະຊາຊົນຂອງຊົນເຜົ່າຕ່າງໆມີຮີດຄອງປະເພນີນັກຮ້ອງເພງພື້ນເມືອງ. "ຮ້ອງເພງເກົ່າແລ້ວ,ຮ້ອງເພງໃໝ່,ຮ້ອງເພງຮັກແລ້ວຮ້ອງເພງມ່ວນ",ນາງລິວສ່ານເຈ ເທບທິດາເພງທີ່ຍິງຊາຍນ້ອຍໃຫຍ່ຂອງຈີນຮູ້ໂດຍທົ່ວໄປກໍເປັນຄົນເຜົ່າຈ້ວງຂອງເຂດກວາງຊີ.
"ຮ້ອງເພງຊາວພູດອຍ,ຂ້ອຍຮ້ອງຢູ່ເບື້ອງນີ້,ເຈົ້າຕອບຢູ່ເບື້ອງນັ້ນ,ເພງຊາວພູດອຍຄືນ້ຳໄຫຼໃນລະດູບານໃໝ່,ບໍ່ຢ້ານມີແກ້ງຕັນທາງ ກໍບໍ່ຢ້ານທາງຄົດໆລ້ຽວໆ."
ເພື່ອສົ່ງເສີມເພງພື້ນເມືອງ, ປີ 1999 ເມືອງນານນີງເຂດກວາງຊີໄດ້ຈັດບຸນສິລະປະເພງພື້ນເມືອງສາກົນຄັ້ງປະຖົມມະເລີກ,ຫົກປີມານີ້,ບຸນເພງພື້ນເມືອງທຸກໆຄັ້ງລ້ວນແຕ່ໂລດໂຜນແລະຄຶກຄັກຟົດຟື້ນທີ່ສຸດ, ໄດ້ກາຍເປັນງານມະຫະກຳແຫ່ງການແລກປ່ຽນລະຫວ່າງສິນລະປິນເພງພື້ນເມືອງປະເທດຕ່າງໆ,ໄດ້ເພີ່ມຄວາມເຂົ້າໃຈກັນແລະມິດຕະພາບເຊິ່ງກັນແລະກັນລະຫວ່າງປະຊາຊົນບັນດາປະເທດໃນໂລກ.
ຍ້ອນວ່າເຂດກວາງຊີມີຮີດຄອງປະເພນີຄ້າຍຄືກັນກັບປະເທດອາຊຽນ,ວັດທະນະທຳກໍ່ຄ້ານຄືກັນ,ສະນັ້ນ,ແຕ່ປີ2002ເປັນຕົ້ນມາ,ງານລາຕີທີ່ຖືສີສັນອາຊີອາຄະເນເປັນຫົວຂໍ້ຫຼັກໄດ້ກາຍເປັນພາກສ່ວນສຳຄັນຂອງການເຄື່ອນໄຫວວັດທະນະທຕ່າງໆຂອງບຸນເພງພື້ນເມືອງ.ໂດຍສະເພາະແມ່ນພາຍຫຼັງງານເອັກສໂປຈີນ-ອາຊຽນໄດ້ກຳນົດເມືອງນານນີງເປັນບ່ອນຈັດງານຖາວອນເມື່ອປີ 2004 ແລ້ວ,ບຸນສິລະປະເພງພື້ນເມືອງສາກົນນານນີງກໍໄດ້ກາຍເປັນການເຄື່ອນໄຫວຂັ້ນລັດ,ຫາບແບກໜ້າທີ່ອັນໜັກນາທີ່ເປັນສາຍຕິດຕໍ່ວັດທະນະທຳຈີນກັບອາຊຽນ.
ເດືອນຕຸລາປີ2004,ການເຄື່ອນໄຫວສາກົນຂະໜາດໃຫຍ່ສາມລາຍ ເຊັ່ນງານເອັກສໂປຈີນ -ອາຊຽນຄັ້ງປະຖົມມະເລີກ ກອງປະຊຸມສຸດຍອດການຄ້າແລະການລົງທຶນຈີນ-ອາຊຽນແລະບຸນເພງພື້ນເມືອງສາກົນກໍແມ່ນເປີດສາກຢູ່ທ່າມກາງສຽງເພງ "ຕ້າຕີ້ເຟິ່ຍເກີ່" ສຽງເພງດັງກ້ອງປັດທະພີ"ເພງຫົວຂໍ້ຫຼັກຂອງບຸນເພງພື້ນເມືອງ.
ເພື່ອສະແດງໃຫ້ເຫັນຫົວຂໍ້ຫຼັກແລກປ່ຽນຫົວກະທິດ້ານວັດທະນະທຳລະຫວ່າງຈີນກັບອາຊຽນຢ່າງເຕັມທີ່, ປີ 2004, ບຸນສິລະປະເພງພື້ນເມືອງສາກົນນານນີງຍັງໄດ້ຈັດງານລາຕີຂະໜາດໃຫຍ່ສາມລາຍຢ່າງເປັນລຳດັບ ເຊັ່ນ "ຮີດຄອງປະເພນີອາຊີອາຄະເນ-ເຕົ້າໂຮມກັນຢູ່ນານນີງປີ 2004" "ງານແຟເຊິນສາກົນອາຊີອາຄະເນປີ2004"ແລະ"ຄວາມຮັກແພງຈາກປະຊາຊາດຈີນ-ງານລາຕີສະຫຼອງງານເອັກສໂປຈີນອາຊຽນ",ໄດ້ຮັບຄວາມຊົມເຊີຍຈາກນັກທຸລະກິດອາຊຽນທີ່ມາເຂົ້າຮ່ວມງານວາງສະແດງ.
ເພື່ອນຜູ້ຟັງ,ທີ່ທ່ານຈະໄດ້ຟັງໃນລຳດັບຕໍ່ໄປນີ້ແມ່ນເພງທີ່ຂັບຮ້ອງໂດຍນັກຮ້ອງຂອງລາວໃນງານລາຕີ "ຮີດຄອງປະເພນີອາຊີອາຄະເນ-ເຕົ້າໂຮມກັນຢູ່ນານນີງປີ2004",ຂໍໃຫ້ພວກເຮົາໄປສຳຜັດກັບຮີດຄອງປະເພນີອາຊີອາຄະເນອັນເຂັ້ມຂຸ້ນໃນງານລາຕີປີກາຍນີ້. ປະຈຸບັນນີ້, ບຸນສິລະປະເພງພື້ນເມືອງສາກົນນານນີງໄດ້ພ້ອມກັນກັບບຸນດົນຕີສາກົນປັກກິ່ງແລະບຸນດົນຕີສາກົນຊຽງໄຮ້ກາຍເປັນງານດົນຕີທີ່ສຳຄັນກວ່າໝູ່ສາມລາຍທີ່ມີຊື່ສຽງດົ່ງດັງທີ່ສຸດຢູ່ຈີນ.ປີນີ້,ອີງຕາມຄວາມຊິນເຄີຍ,ງານເອັກສໂປຈີນອາຊຽນກັບບຸນສິລະປະເພງພື້ນເມືອງສາກົນນານນີງຈະຈັດຂຶ້ນໃນເວລາດຽວກັນ,ເມື່ອທຽບໃສ່ຫົກເທື່ອກ່ອນແລ້ວ, ງານລາຕີເປີດສາກ "ສຽງເພງດັງກ້ອງປັດທະພີ" ແລະງານລາຕີປິດສາກ "ຮີດຄອງປະເພນີອາຊີອາຄະເນ"ຂອງບຸນສິລະປະເພງພື້ນເມືອງສາກົນນານນີງຄັ້ງທີ 7 ທີ່ຈະຈັດຂຶ້ນໃນໄວໆນີ້ມີຈຸດພິເສດຫຍັງແດ່? ຂໍເຊີນທ່ານຟັງຄຳແນະນຳຂອງທ່ານນາງລິວລີ້ລີງ ປະທານບໍລິສັດເຜີຍແຜ່ວັດທະນະທຳຕ້າຕີ້ເຟີ່ຍເກີ່ນານນີງ.
ງານລາຕີເປີດສາກຂອງບຸນສິລະປະເພງພື້ນເມືອງປີນີ້ຍັງຄົງແມ່ນສ້າງລັກສະນະຊົນເຜົ່າລັກສະນະສາກົນ ລັກສະນະທັນສະໄໝແລະລັກສະນະສິລະປະ,ວິທີລະອຽດແມ່ນ ສອດຮ້ອຍເພງພື້ນເມືອງຈີນແລະຕ່າງປະເທດໂດຍແບ່ງເປັນສີ່ພາກ ເຊັ່ນ ພາກລະດູບານໃໝ່ ພາກລະດູຮ້ອນ ພາກລະດູໃບໄມ້ຫຼົ່ນແລະພາກລະດູໜາວ.
ທ່ານນາງລິວລີ້ລີງເວົ້າວ່າ,ບຸນສິລະປະເພງພື້ນເມືອງປີນີ້ຈະສະແດງໃຫ້ເຫັນລັກສະນະຊົນເຜົ່າ ຢ່າງຈະແຈ້ງທີ່ສຸດ,ມີຄະນະຮ້ອງຮວມໝູ່ຊົນຊາດກຸງວຽນຮ້ອງດົນຕີເບື້ອງຫຼັງຂອງງານລາຕີ, ມີຄະນະສິລະປະກອງທັບແດງລັດເຊຍຮ້ອງເພງພື້ນເມືອງຈີນແລະເພງພື້ນເມືອງລັດເຊຍ, ຍັງມີຄະນະຮ້ອງຮວມໝູ່ເຍົາວະຊົນກຸງວຽນຮ້ອງເພງ "ຕ້າຕີ້ເຜີ່ຍເກີ່ ສຽງເພງດັງກ້ອງປັດທະພີ" ແລະອື່ນໆ.
ງານລາຕີເປີດສາກ "ສຽງເພງດັງກ້ອງປັດທະພີ" ຕົ້ນຕໍແມ່ນລາຍການຮ້ອງເພງ. ງານລາຕີປິດສາກ "ຮີດຄອງປະເພນີອາຊີອາຄະເນ" ຕົ້ນຕໍແມ່ນສະແດງຮີດຄອງປະເພນີຂອງບັນດາປະເທດດ້ວຍການຟ້ອນລຳທຳເພງ,ໂດຍສະເພາະແມ່ນໂລມັນຕິກແລະທິວທັດສວຍງາມຂອງພາກພື້ນແຖບຮ້ອນ.ຜູ້ກຳກັບການ ສະແດງຂອງງານລາຕີເປີດສາກແລະປິດສາກຕ່າງໄດ້ເຊື້ອເຊີນທ່ານຫຼັງຄຸ່ນແລະທ່ານເຊິນເວີຍຢາ ຜູ້ກຳກັບການສະແດງງານລາຕີສິລະປະທີ່ມີຊື່ສຽງດົງດັ່ງກວ່າໝູ່ຢູ່ຈີນ.
ທ່ານນາງລິວລີ້ລີງບອກນັກຂ່າວວ່າ,ເພື່ອກຳກັບການສະແດງຂອງງານລາຕີປິດສາກໃຫ້ດີ, ທ່ານເຊິນເວີຍຢາ ຮອງຫົວໜ້າທັງເປັນຜູ້ຄຸມດ້ານສິລະປະຂອງຄະນະສິລະປາກອນຟ້ອນລຳແຫ່ງຊາດຈີນໄດ້ນຳພາຄະນະໄປທັດສະນະສຶກສາຢູ່ບັນດາປະເທດອາຊີອາຄະເນ.ຮີດຄອງປະເພນີທີ່ມີເອກະລັກພິເສດຂອງບັນດາປະເທດອາຊີອາຄະເນເຮັດໃຫ້ທ່ານເຊິນເວີຍຢາຕື່ນຕາຕື່ນໃຈທີ່ສຸດ,ຈຶ່ງເກີດມີຄວາມຄຶດຂໍ້ໜຶ່ງວ່າ, ແຕ່ປີນີ້ເປັນຕົ້ນໄປ, ງານລາຕີ "ຮີດຄອງປະເພນີ ອາຊີອາຄະເນ" ແຕ່ລະປີຈະຖືປະເທດໜຶ່ງເປັນຫົວຂໍ້ຫຼັກ,ໂຮມສູນສະແດງໃຫ້ເຫັນສະເໜຕ່າງໝູ່ຂອງປະເທດນີ້.ຫົວຂໍ້ຫຼັກຂອງປີນີ້ແມ່ນອັງກໍວັດໃນຄວາມໄຝ່ຝັນ,ຈະສະແດງໃຫ້ເຫັນວັດທະນະທຳອັງກໍວັດຂອງກຳປູເຈຍທີ່ລືຊາຜາກົດໃນທົ່ວໂລກດ້ວຍເຕັ້ນລຳແລະດົນຕີ.
ທ່ານາງລິວລີ້ລີງເວົ້າວ່າ,ລາຍການຂອງງານລາຕີເປີດສາກແລະປິດສາກລ້ວນແຕ່ໂລດໂຜນທີ່ສຸດ,ເປັນໜ້າຄອງຄອຍ,ຫວັງໃຫ້ງານລາຕີດັ່ງກ່າວສາມາດສົ່ງຄວາມຮູ້ສຶກອັນດີ ງາມໃຫ້ແກ່ນັກທຸລະກິດປະເທດຕ່າງໆ ໂດຍສະເພາະແມ່ນນັກທຸລະກິດອາຊີອາຄະເນທີ່ມາ ເຂົ້າຮ່ວມງານເອັກສໂປຈີນ-ອາຊຽນ.
ທ່ານຜູ້ຟັງທີ່ໂຄລົບ,ທີ່ຟັງມານັ້ນແມ່ນບົດສະເໜີບຸນສິລະປະເພງພື້ນເມືອງສາກົນນານນີງທີ່ຈັດຂຶ້ນໃນເວລາດຽວກັນກັບງານເອັກສໂປຈີນ-ອາຊຽນ,ຂອບໃຈທ່ານທີ່ຮັບຟັງ,ສະບາຍດີ.
|
