|
ທີ່ນີ້, ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງທີ່ເຄົາລົບ, ຊົມເຊີຍທ່ານຮັບຟັງລາຍການຢ່ອນອາລົມໃນວັນເສົາ, ຂ້າພະເຈົ້າແມ່ນແສງແກ້ວ.
ໃນລາຍການມື້ນີ້, ຂ້າພະເຈົ້າຈະສະເໜີເພງຂອງນາງຊູຢຸ້ຍ ນັກຮ້ອງໄຕ້ຫວັນຈີນສູ່ທ່ານຟັງ.
ທີ່ທ່ານພວມຟັງຢູ່ນີ້ແມ່ນເພງ"ແສງຈັນທີ່ຄືກັນ" ຂັບຮ້ອງໂດຍນາງຊູຢຸ້ຍ. ການຂັບຮ້ອງຂອງນາງຊູຢຸ້ຍບາງທີສອງກ້ອງດັງໄກ, ບາງທີກໍອ່ອນໂຍນອ້ອຍອິ່ນ, ສະແດງຄວາມຮູ້ສຶກອັນສຸດຊຶ້ງຕໍ່ຊີວິດຂອງນາງ, ເຮັດໃຫ້ຜູ້ຟັງກະຕຸ້ນໃຈໄປຕາມສຽງເພງ.
ເນື້ອເພງມີຄວາມໝາຍວ່າ: ບໍ່ຮູ້ວ່າ, ໝູ່ຫຼິ້ນນຳກັນແຕ່ນ້ອຍຈາກໄປແຕ່ຍາມໃດ? ບໍ່ຮູ້ວ່າ, ຄົນຢູ່ຄຽງຂ້າງເຫີນຫ່າງໄປແຕ່ຍາມໃດ. ຝູງຄົນທີ່ແອອັດ, ໄດ້ແຍກພວກເຮົາໃຫ້ຫ່າງໄກກັນ. ທໍລະນີທີ່ມິດງຽບ ໄຫ້ສະອຶ້ນໃນຍາມລາຕີທີ່ສະຫງັດ. ຂໍໃຫ້ບອກຂ້ອຍແດ່, ແມ່ນພວກເຮົາໄດ້ປ່ຽນແປງໂລກ, ຫລືແມ່ນໂລກປ່ຽນແປງເຈົ້າກັບຂ້ອຍ?
ທີ່ຟັງມານັ້ນ, ແມ່ນເພງແສງຈັນທີ່ຄືກັນ, ຂັບຮ້ອງໂດຍນາງຊູຢຸ້ຍ. ນາງຊູຢຸ້ຍເລີ່ມເປັນນັກຮ້ອງເມື່ອປີ 1968, ໃນ 15 ປີທຳອິດ, ນາງບໍ່ມີໂອກາດໃດເລີຍ, ສິ່ງທີ່ດົນຕີນຳມາໃຫ້ນາງນັ້ນມີແຕ່ຄວາມພະຍາຍາມແລະຄວາມອິດເມື່ອຍແຕ່ບໍ່ມີຄວາມມ່ວນຊື່ນຍ້ອນຜົນທີ່ໄດ້ຮັກ. ປີ 1983, ນາງຊູຢຸ້ຍໄດ້ອັດແຜ່ນສຽງແຜ່ນທຳອິດຂອງຕົນທີ່ໃຫ້ຊື່ວ່າ: "ແສງຈັນທີ່ຄືກັນ", ແຜ່ນສຽງແຜ່ນນີ້ພໍຫາກໍນຳອອກຈຳໜ່າຍ, ຊື່ສຽງຂອງນາງກໍດັງຂຶ້ນໂລດ. ໃນນັ້ນ ເພງjiugantangmaiwu ມີຂວດເປົ່າຂາຍບໍ່ , ເພງເຊີນມານຳຂ້ອຍ, ແລະເພງແສງຈັນທີ່ຄືກັນ ໄດ້ນິຍົມກັນຢູ່ທົ່ວໄຕ້ຫວັນ. ພາຍຫລັງມາ, ນາງຊູຢຸ້ຍກໍໄດ້ອັດຈຳໜ່າຍCD ອີກ 30 ກວ່າແຜ່ນ, ໄດ້ພົ້ນເດັ່ນຂຶ້ນບົນເວທີເພງສະໄໝດ້ວຍເອກະລັກຂອງຕົນເອງແລະຄວາມສາມາດໃນການແຕ່ງເພງຂອງນາງ.
ທີ່ທ່ານພວມຟັງຢູ່ນີ້ແມ່ນເພງ" jiugantangmaiwu ມີຂວດເປົ່າຂາຍບໍ່" ຂັບຮ້ອງໂດຍນາງຊູຢຸ້ຍ. ເພງນີ້ແມ່ນເພງເອກໃນຮູບເງົາເລື່ອງ"ຂີ່ລົດຜິດ" ຮູບເງົາໄຕ້ຫວັນຈີນ. ຊື່ເພງແມ່ນພາສາທ້ອງຖິ່ນຂອງໄຕ້ຫວັນ, ແມ່ນຄວາມທີ່ຜູ້ຮັບຊື້ເຄື່ອງເສດຂອງເສຍເອີ້ນໃຫ້ຄົນເອົາຂອງມາຂາຍ. ເພງນີ້ໄດ້ວາດພາບພະເອກໃນເລື່ອງປາຖະໜາແລະສະແຫວງຫາຢ່າງບໍ່ຢຸດຢັ້ງຕໍ່ຊີວິດແລະຄວາມຮັກ.
ທີ່ຟັງມານັ້ນແມ່ນເພງ"jiugantangmaiwu ມີຂວດເປົ່າຂາຍບໍ່". ຕໍ່ໄປເຊີນຟັງເພງfengxian ຂໍມອບໃຫ້ ຂັບຮ້ອງໂດຍນາງຊູຢຸ້ຍ. ໃນເພງນີ້, ນາງຊູຢຸ້ຍໄດ້ຝາກຝັງອາລົມຈິດອັນເລິກເຊິ່ງຂອງນາງໄວ້ກັບສຽງເພງ. ມີຄວາມໂສກ, ມີນ້ຳຕາ ມີຄວາມເສົ້າໝອງ, ບາງທີກໍສຸດວິໄສທີ່ການເວລາຜ່ານໄປປານກະແສນ້ຳໄຫຼ. ເຊີນຟັງໄດ້ເລີຍ: fengxian ຂໍມອບໃຫ້.
ເນື້ອເພງມີຄວາມໝາຍວ່າ: ເອົາຫົນທາງທີ່ຍາວຢຽດມອບໃຫ້ໄລຍະທີ່ກວງໄກ, ດອກກຸຫຼາບມອບໃຫ້ຄວາມຮັກ, ສຸດທີ່ຮັກ, ຂ້ອຍຈະເອົາຫຍັງມອບໃຫ້ເຈົ້າ? ປອນເມກສີຂາວມອບໃຫ້ທົ່ງຫຍ້າ, ແມ່ນ້ຳມອບໃຫ້ທະເລ, ເພື່ອນທີ່ຮັກ, ຂ້ອຍຈະເອົາຫຍັງມອບໃຫ້ເຈົ້າ?
ທີ່ຟັງມານັ້ນແມ່ນເພງ" fengxian ຂໍມອບໃຫ້". ຕໍ່ໄປເຊີນຟັງເພງເຊີນມານຳຂ້ອຍ ຂອງນາງຊູຢຸ້ຍ.
ສຸດທ້າຍ, ພວກເຮົາມາຟັງເພງ"ເດັກນ້ອຍທີ່ຮັກ" ເຊິ່ງແມ່ນເພງເອກໃນແຜ່ນCDທີ່ນາງຊູຢຸ້ຍອັດອອກຈຳໜ່າຍເມື່ອປີ 1985. ເມື່ອທຽບກັບເພງອື່ນຂອງນາງແລ້ວ, ເນື້ອໃນຂອງເພງນີ້ບໍ່ແມ່ນຫົວຂໍ້ກ່ຽວກັບມະນຸດສະຍະພາບອີກ, ແຕ່ຫາກແມ່ນຄວາມຮັກໄຄ່ທີ່ບໍ່ລືມຈັກເທື່ອ. ຕໍ່ໄປເຊີນຟັງເພງນີ້ໄດ້ເລີຍ:
ທ່ານຜູ້ຟັງທີ່ຮັກແພງ, ເພງຂອງນາງຊູຢຸ້ຍຂໍສະເໜີພຽງທໍ່ນີ້ກ່ອນ, ຂອບໃຈທ່ານທີ່ຮັບຟັງ, ວັນເສົາໜ້າ, ເຊີນທ່ານຕິດຕາມລາຍການຢ່ອນອາລົມຂອງພວກເຮົາອີກ. ສະບາຍດີ.
|
