|
|
 |
| (GMT+08:00)
2005-10-17 18:24:25
|
 |
|
ອວຍພອນຄູອາຈານທຸກຄົນທັງຫຼາຍ ຈົ່ງມີຄວາມສຸກສັນ(ສຽງ)
cri
|
ວັນທີ 7 ຕຸລາແມ່ນວັນຄູຂອງລາວ, ນະທີ່ນີ້, ສົມບູນຂໍສະແດງຄວາມອວຍພອນຕໍ່ຄູອາຈານທີ່ເຄົາລົບນັບຖືທຸກຄົນທັງຫຼາຍຢູ່ລາວ, ຈົ່ງມີແຕ່ຄວາມສຸກສັນໃນວັນຄູ
ໃນໃຈຂອງຄົນທັງຫຼາຍ, ຄູແມ່ນຜູ້ດຸໝັ່ນຂະຫຍັນພຽນສິດສອນນັກຮຽນຂອງຕົນຢ່າງຈິງຈັງ, ບໍ່ຮູ້ເບື່ອໜ່າຍຕະຫຼອດຫຼາຍສິບປີໂດຍບໍ່ສະແຫວງຊື່ສຽງຮຽງນາມ, ແລະສິ່ງຕອບແທນໃດໆ, ແບກຫາບພາລະໜ້າທີ່ອັນສັກກາລະບູຊາເໝືອນດັ່ງວິສະວະກອນແຫ່ງດວງວິນຍານຂອງມະນຸດເຮົາ. ໃນຫຼາຍພັນປີທີ່ຜ່ານມາ, ຄົນທັງຫຼາຍໄດ້ໃຊ້ຄຳສັບສັນລະເສີນຕ່າງໆເພື່ອສະແດງຄວາມເຄົາລົບນັບຖືຕໍ່ຄູ.
ຫຼີຈ່າງອິນ ນັກກະວີສະໄໝລາຊະວົງຖາງຂອງຈີນເຄີຍຂຽນວ່າ: ມ້ອນຈົນຕາຍຈິ່ງເຊົາທາວໃຍ, ທຽນ, ໄໝ້ຈົນໝົດໄຂຈຶ່ງເຊົາຍ້ອຍ. ເພິ່ນໄດ້ຍົກຍ້ອງນ້ຳໃຈອັນຈົດຈໍ່ ຊື່ສັດໜຽວແໜ້ນແລະຍິນຍອມອຸທິດຕົນຂອງມ້ອນຈົນສຸດຢຽດ, ບົດກະວີດັ່ງກ່າວໄດ້ສືບທອດກັນມາພັນກວ່າປີແລ້ວ. ພາຍລຸນມາ, ຄົນທັງຫຼາຍປຽບຄູເໝືອນກັບມ້ອນ, ແມ່ນການຕີລາຄາຢ່າງສູງຕໍ່ນ້ຳໃຈອຸທິດຕົນໂດຍບໍ່ເຫັນແກ່ຕົວແລະຄຸນສົມບັດອັນສູງສົ່ງຂອງຄູ. ຄົນທັງຫຼາຍຍ້ອງຍໍຄູເໝືອນດັ່ງມ້ອນທາວໃຍ ໃຫ້ຄົນເອົາເສັ້ນໄໝປັ່ນທໍເປັນແຜ່ນແພໃຫ້ຄວາມອຸ່ນແກ່ຄົນທັງຫຼາຍ, ຄູກໍ່ຄືມ້ອນ, ພວກເພິ່ນອຸທິດຄວາມຮັກຂອງຕົນຢ່າງບໍ່ມີບ່ອນສ້ຽງສຸດ, ບໍ່ສະແຫວງຫາຊື່ສຽງ, ແລະກໍ່ບໍ່ມຸ່ງຫວັງຢາກໄດ້ຫຍັງ. ມ້ອນແມ່ນຄຳເອີ້ນທີ່ເຮັດໃຫ້ຄູຮູ້ສຶກມີກຽດທີ່ສຸດ. ທ່ານຈູ່ກວ່າຊຽນ, ນັກການສືກສາທີ່ມີຊື່ສຽງຂອງຈີນເວົ້າວ່າ: ທະແນມແຕ່ຂ້າພະເຈົ້າຍັງມີຊີວິດຢູ່ມື້ໜຶ່ງ, ຂ້າພະເຈົ້າກໍ່ຈະທາວໃຍມື້ໜຶ່ງ, ຂໍແຕ່ເສັ້ນໃໝທີ່ຂ້າພະເຈົ້າທາວອອກນັ້ນສາມາດເພິ່ມຄວາມອົບອຸ່ນໃຫ້ແກ່ໂລກ, ເພີ່ມຄວາມສຸກໃຫ້ແກ່ຄົນທັງຫຼາຍ.
ມ້ອນ, ບໍລິສຸດຜຸດຜ່ອງ, ກິນແຕ່ໃບໄມ້ຂຽວຈັກໃບສອງໃບ, ທາວໃຍມັນກໍຫຼາກຫຼາຍ, ໃຫ້ຄົນຕ່ຳເປັນຜ້າໄໝອັນສວຍງາມ, ຂໍແຕ່ຍັງມີຊີວິດຢູ່, ມ້ອນກໍທາວໃຍຈົນບໍ່ເຊົາ…… ຍ້ອນວ່າມ້ອນມີຄຸນສົມບັດອັນດີເລີດເຫຼົ່ານີ້, ສະນັ້ນ, ຈຶ່ງມີແຕ່ຄູທໍ່ນັ້ນທີ່ສົມປຽບເປັນມ້ອນ.
ທຽນໄຂໄໝ້ຕົນເອງຢ່າງມິດງຽບ, ໃຊ້ແສງຂອງຕົນເຍືອງຮຸ່ງໃຫ້ຜູ້ອື່ນ, ຈົນຮອດ ໄໝ້ຕົນເອງຈົນໝົດ. ຄຸນສົມບັດແບບນີ້ຂອງທຽນໄຂກໍ່ເຮັດໃຫ້ຄົນທັງຫຼາຍຄຶດເຖິງຄູ, ຄູຖ່າຍທອດຄວາມຮູ້ຂອງຕົນໃຫ້ນັກຮຽນ, ເຍືອງທາງກ້າວເດີນໃຫ້ນັກຮຽນດ້ວຍສະຕິປັນຍາແລະຄຸນສົມບັດຂອງຕົນ, ນ້ຳໃຈອຸທິດຕົນຢ່າງບໍ່ເຫັນແກ່ຕົວ, ເຍືອງທາງໃຫ້ຜູ້ອື່ນໂດຍບໍ່ມຸ່ງຫວັງຢາກໄດ້ຫຍັງກໍ່ເປັນການປຽບທຽບທີ່ດີທີ່ສຸດຕໍ່ຄູ.
ນອກຈາກມ້ອນແລະທຽນໄຂແລ້ວ, ຄົນທັງຫຼາຍຍັງມັກປຽບຄູຄືກັບຊາວສວນ, ນີ້ແມ່ນຄຳຍ້ອງຍໍແບບລຽບໆທີ່ສຸດຈໍ່ຄູ. ຄົນທັງຫຼາຍມັກຖືເດັກນ້ອຍທີ່ໄຮ້ດຽງສາເປັນຄືກັບເບ້ຍໄມ້ແລະດອກໄມ້, ສ່ວນຄູປູກເຍ້ຍໄມ້ແລະດອກໄມ້ເຫຼົ່ານີ້ກໍ່ເໝືອນກັບຄົນເຮັດສວນທີ່ດຸໝັ່ນ, ໃຊ້ສະຕິປັນຍາ, ຄວາມຮັກແລະນ້ຳເຫື່ອນ້ຳແຮງຂອງຕົນ, ຫົດສົງ, ຫຼໍ່ລ້ຽງຮັກສາໃຫ້ເຂົາເຈົ້າມີກິ່ງງ່າດົກໜາ, ເຕີບໃຫຍ່ຢ່າງສົມບູນ.
ທ່ານເຕິ້ງສຽວພີງເວົ້າວ່າ: ຄູແມ່ນຜູ້ເຮັດສວນບຳລຸງສ້າງຄົນຮຸ້ນຫຼັງ, ການອອກແຮງງານຢູ່ມີຫົວຄິດປະດິດສ້າງຂອງພວກເພິ່ນຄວນໄດ້ຮັບຄວາມເຄົາລົບນັບຖືຈາກພັກແລະປະຊາຊົນ, ນີ້ແມ່ນການຕີລາຄາຢ່າງສູງຂອງບູລຸດຜູ້ຍິ່ງໃຫຍ່ທີ່ມີຕໍ່ຄູ.
ຄູໄດ້ປັກດຳຢູ່ໃນນາແຫ່ງພາລະກິດການສືກສາຢ່າງດຸໝັ່ນ, ພວກນັກຮຽນທີ່ກ້າວໄປສູ່ຜົນສຳເລັດນັ້ນ, ບໍ່ມີຜູ້ໃດທີ່ບໍ່ແມ່ນຢຽບບ່າຂອງຄູກ້າວຂຶ້ນໄປສູ່ຍອດສູງແຫ່ງຊີວິດ. ເມື່ອເວົ້າເຖິງເຄັດລັບແຫ່ງຜົນສຳເລັດ, ບັນດານັກວິທະຍາສາດ ສິລະປິນແລະນັກວັນນະຄະດີທີ່ໄດ້ສຳເລັດຜົນໃນໂລກ, ລ້ວນແຕ່ເຫັນວ່າ ການສຶກສາຂອງຄູແມ່ນພື້ນຖານຂອງຄວາມສຳເລັດຜົນຂອງຕົນ. ຜົນສຳເລັດຂອງນັກຮຽນແມ່ນປາສະຈາກຄູບໍ່ໄດ້, ສ່ວນຄູ, ລ້ວນແຕ່ຫວັງໃຫ້ນັກຮຽນທຸກຄົນສຳເລັດຜົນ, ພວກເພິ່ນຍອມເປັນຂັ້ນໄດຢູ່ສະເໝີ, ຫວັງຢາກຖ່າຍທອດຄວາມຮູ້ແລະບົດຮຽນທັງໝົດຂອງຕົນໃຫ້ນັກຮຽນໝົດທຸກຄົນໃນເວລາຕົນຍັງມີຊີວິດຢູ່.
ທ່ານທາວຊິງຈຶ່, ນັກການສຶກສາປະຊາຊົນທີ່ມີຊື່ສຽງຂອງຈີນເວົ້າວ່າ: ຄູໄດ້ກຳໂຊກຊາຕານຂອງຊາດແລະມວນມະນຸດ. ນະທີ່ນີ້, ໃນໂອກາດວັນຄູ, ຂໍອວຍພອນໃຫ້ຄູທຸກຄົນ ເຊິ່ງເປັນວິສະວະກອນແຫ່ງດວງວິນຍານຂອງພວກເຮົາຈົ່ງສຸກສັນໃນວັນຄູແລະມີສຸຂະພາບແຂງແຮງ!
|
|
|
