|
|
 |
| (GMT+08:00)
2005-10-21 11:30:29
|
 |
|
ພາລະກິດການບິນອະວະກາດບັນທຸກຄົນຂອງຈີນເຂົ້າສູ່ໄລຍະໃໝ່
cri
Author: ສຣ
 ວັນທີ 17 ຕຸລາ ພາຍຫຼັງຍານອະວະກາດ"ເສີນໂຈ່ວເລກ 6 "ຂອງຈີນບິນອ້ອມໜ່ວຍໂລກ 5 ມື້ແລ້ວ,ໄດ້ລົງຈອດຢູ່ເຂດທີ່ກຳນົດໄວ້ກ່ອນຢ່າງສະດວກ,ນັກບິນອະວະກາດສອງຄົນໄດ້ຍ່າງອອກຈາກຍານອະວະກາດ,ກວັກມືຕໍ່ຄົນທັງຫຼາຍຢ່າງຍິ້ມແຍ້ມແຈ່ມໃສ. ຮອດນີ້,ການບິນອະວະກາດບັນທຸກຄົນຄັ້ງທີສອງຂອງຈີນໄດ້ສຳເລັດຜົນຢ່າງເຕັມເມັດເຕັມໜ່ວຍ,ກໍໝາຍຄວາມວ່າ,ເຕັກນິກການບິນອະວະກາດບັນທຸກຄົນຂອງຈີນໄດ້ຢ່ວງບາດກ້າວໃຫຍ່.
ຍານອະວະກາດເສີນໂຈ່ວເລກ 6 ແມ່ນຖືກຍິງສົ່ງຂຶ້ນສູ່ທ້ອງຟ້າຢູ່ສູນຍິງສົ່ງດາວທຽມຈິວຊວນ ພາກຕາເວັນຕົກສຽງເໜືອຂອງຈີນເມື່ອ 5 ມື້ກ່ອນ,ໃນນັ້ນ ມີນັກບິນອະວະກາດຂອງຈີນ 2 ຄົນ. ທ່ານຫູຊື້ຊຽງ ຮອງຜູ້ບັນຊາການໃຫຍ່ຂອງກິດຈະການການບິນອະວະກາດບັນທຸກຄົນຂອງຈີນເຫັນວ່າ,ການບິນອະວະກາດບັນທຸກຄົນຂອງເສີນໂຈ່ວເລກ 6 ໄດ້ສຳເລັດຜົນຢ່າງເຕັມເມັດເຕັມໜ່ວຍສາມາດຖືໄດ້ວ່າເປັນການເລີ່ມຕົ້ນອັນດີງາມຂອງຍຸດທະສາດກ້າວທີສອງຂອງກິດຈະການການບິນອະວະກາດບັນທຸກຄົນຂອງຈີນ.
"ກິດຈະການການບິນອະວະກາດບັນທຸກຄົນແບ່ງອອກເປັນສາມບາດກ້າວ,ການບິນເທື່ອນີ້ມີນັກບິນອະວະກາດ 2 ຄົນ,ເຮັດວຽກຢູ່ອະວະກາດຫຼາຍມື້,ຊອກຄົ້ນເຕັກນິກຫຼາຍຄົນບິນຢູ່ອະວະກາດຫຼາຍມື້. ນີ້ແມ່ນເນື້ອໃນທີ່ສືບອັນກ່ອນຕໍ່ອັນລຸນ,ເປັນການເລີ່ມຕົ້ນຂອງໄລຍະທີສອງ."
ຈີນແມ່ນເລີ່ມປະຕິບັດກິດຈະການການບິນອະວະກາດບັນທຸກຄົນເມື່ອປີ 1992,ເວລານັ້ນກໍໄດ້ວາງຍຸດທະສາດສາມບາດກ້າວແລ້ວ. ອີງຕາມແຜນການດັ່ງກ່າວ,ບາດກ້າວທີໜຶ່ງແມ່ນບັນລຸການບິນອະວະກາດບັນທຸກຄົນຄັ້ງທຳອິດ,ເຊິ່ງເປັນການບຸກທະລຸຄັ້ງປະຫວັດສາດ; ຈາກນັ້ນຈະແກ້ໄຂເຕັກນິກພື້ນຖານຂອງການບິນອະວະກາດບັນທຸກຄົນເຊັ່ນນັກບິນອະວະກາດຫຼາຍຄົນບິນຫຼາຍມື້,ນັກບິນອະວະກາດອອກຍານອະວະກາດແລ້ວຍ່າງຢູ່ອະວະກາດ,ແລະຍານອະວະກາດເຊື່ອມຕໍ່ເຂົ້າກັນເປັນຕົ້ນ; ສຸດທ້າຍສ້າງສະຖານີອະວະກາດທີ່ມີຄົນເຝົ້າຮັກສາເປັນເວລາດົນນານ. ເພື່ອບັນລຸຄວາມຝັນເຫຼົ່ານີ້,ຈີນໄດ້ເລີ່ມລົງມືຄົ້ນຄວ້າຍານອະວະກາດແລະລູກສອນໄຟຍານສົ່ງທີ່ໃຊ້ຍິງສົ່ງຍານອະວະກາດ,ເລີ່ມກໍ່ສ້າງສະໜາມຍິງສົ່ງ,ສະໜາມລົງຈອດແລະຕາໜ່າງວັດແທກຄວບຄຸມ,ແລະເລີ່ມອົບຮົມນັກບິນອະວະກາດ…
ເມື່ອໄດ້ພະຍາຍາມ 10 ກວ່າປີແລ້ວ,ເມື່ອສອງປີກ່ອນ,ຈີນໄດ້ຍິງສົ່ງຍານອະວະກາດເສີນໂຈ່ວເລກ 5 ຢ່າງສຳເລັດຜົນ,ໄດ້ສົ່ງນັກບິນອະວະກາດຜູ້ທຳອິດຂຶ້ນສູ່ອະວະກາດ,ແລະໄດ້ບິນຢູ່ອະວະກາດ 21 ຊົ່ວໂມງ, ຈາກນີ້ ຈີນໄດ້ກາຍເປັນປະເທດທີສາມໃນໂລກທີ່ບັນລຸການບິນອະວະກາດບັນທຸກຄົນໂດຍຕົນເອງເຊິ່ງຖັດຈາກຣັດເຊຍແລະອາເມລິກາ. ໜ້າທີ່ບາດກ້າວທີໜຶ່ງກໍໄດ້ເຮັດສຳເລັດໃນເວລານັ້ນ.
ຫຼັງຈາກນັ້ນສອງປີ,ຈີນໄດ້ດຳເນີນການເຄື່ອນໄຫວການບິນອະວະກາດບັນທຸກຄົນອີກເທື່ອໜຶ່ງຢ່າງໄດ້ຮັບຜົນເຕັມເມັດເຕັມໜ່ວຍ. ສິ່ງທີ່ຕ່າງກັບສອງປີກ່ອນນັ້ນແມ່ນ,ຍານອະວະກາດເສີນໂຈ່ວໄດ້ບັນທຸກນັກບິນອະວະກາດຈາກຜູ້ດຽວເພີ່ມຂຶ້ນເປັນສອງຄົນ; ເວລາບິນຢູ່ອະວະກາດກໍໄດ້ຈາກມື້ໜຶ່ງເພີ່ມຂຶ້ນເປັນ 5 ມື້. ນັກບິນອະວະກາດຍັງໄດ້ດຳເນີນການທົດລອງວິທະຍາສາດທີ່ມີຄົນເຂົ້າຮ່ວມເປັນຄັ້ງທຳອິດໃນຍານອະວະກາດ.
ທ່ານຫວາງຢົງຈື້ ຊ່າງອອກແບບໃຫຍ່ຂອງກິດຈະການການບິນອະວະກາດບັນທຸກຄົນຂອງຈີນກ່າວວ່າ,ນັກບິນອະວະກາດບິນຢູ່ອະວະກາດ 5 ມື້ໄດ້ທົດສອບຄວາມສາມາດເຮັດວຽກຂອງຍານອະວະກາດເສີນໂຈ່ວຢ່າງຮອບດ້ານ. ທ່ານເວົ້າວ່າ:
"ຍານອະວະກາດຂອງພວກເຮົາແມ່ນຍິງສົ່ງຂຶ້ນສູ່ອະວະກາດຫຼັງຈາກສະຫະພາບໂຊວຽດແລະອາເມລິກາຍິງສົ່ງ 40 ກວ່າປີ,ແຕ່ວ່າ,ເມື່ອທຽບກັບລະດັບເຕັກນິກຂອງຍານອະວະກາດຂອງພວກເຂົາເຈົ້າໃນປັດຈຸບັນແລ້ວກໍບໍ່ຫຼ້າຫຼັງ."
ຍານອະວະກາດເສີນໂຈ່ວເລກ 6 ແມ່ນຍານອະວະກາດທີ່ມີເສັ້ນຜ່າກາງໃຫຍ່ກວ່າໝູ່ໃນໂລກປັດຈຸບັນ,ສາມາດບັນທຸກນັກບິນອະວະກາດສາມຄົນ. ຍານອະວະກາດປະກອບດ້ວຍຫ້ອງຊຸກດັນ,ຫ້ອງກັບຄືນແລະຫ້ອງໂຄຈອນ. ໃນເວລາຈີນດຳເນີນການບິນອະວະກາດບັນທຸກຄົນຄັ້ງທຳອິດ,ສະຖານທີ່ເຄື່ອນໄຫວຂອງນັກບິນອະວະກາດມີແຕ່ຢູ່ໃນຫ້ອງກັບຄືນທໍ່ນັ້ນ,ແຕ່ໃນການບິນຂອງຍານອະວະກາດເສີນໂຈ່ວເລກ 6,ນັກບິນອະວະກາດສອງຄົນບໍ່ພຽງແຕ່ໄດ້ຖອດເສື້ອການບິນອະວະກາດອອກ,ຈາກຫ້ອງກັບຄືນໄປສູ່ຫ້ອງໂຄຈອນທໍ່ນັ້ນ,ຫາກຍັງໄດ້ສຳເລັດການທົດລອງວິທະຍາສາດໃນດ້ານວິທະຍາສາດຊີວິດແລະວິທະຍາສາດອຸປະກອນເປັນຕົ້ນຢູ່ຫ້ອງໂຄຈອນ,ແລະໄດ້ພັກຜ່ອນຢູ່ໃນຫັ້ນ.
ທ່ານຈ່າງປາຍນານ ຊ່າງອອກແບບໃຫຍ່ລະບົບຍານອະວະກາດຂອງກິດຈະການການບິນອະວະກາດບັນທຸກຄົນຂອງຈີນແນະນຳວ່າ,ຢູ່ໃນຫ້ອງໂຄຈອນໄດ້ມີເຄື່ອງຈຳເປັນຊະນິດຕ່າງໆໃນຊີວິດການເປັນຢູ່ແລະເຮັດວຽກຂອງນັກບິນອະວະກາດ,ແມ່ນເຮືອນແທ້ຈິງຂອງນັກບິນອະວະກາດໃນອະວະກາດ.
"ໃນຫ້ອງໂຄຈອນມີເຄື່ອງສະສົມຂອງເສດ,ເພື່ອປ້ອງກັນບໍ່ໃຫ້ເສດອາຫານຫຼືນ້ຳບິນອອກມາແລ້ວລອຍໄປບ່ອນອື່ນໃນເວລານັກບິນອະວະກາດກິນເຂົ້າ,ແລ້ວກະທົບກະເທືອນເຖິງການເຮັດວຽກຂອງອຸປະກອນໃນຍານອະວະກາດ,ສະນັ້ນ,ຈຶ່ງມີເຄື່ອງໜຶ່ງຄ້າຍຄືເຄື່ອງດູດຝຸ່ນສາມາດຈັບເອົາເສດອາຫານ; ສິ່ງທີ່ນັກບິນອະວະກາດໃຊ້ສຳລັບນອນນັ້ນແມ່ນສິ່ງທີ່ຄ້າຍຄືກັບຖົງນອນທີ່ພວກເຮົາໃຊ້ໃນເວລານອນຢູ່ກາງແຈ້ງ."
ພາຍໃນເວລາສອງປີອັນສັ້ນໆ,ຈີນໄດ້ສຳເລັດການບິນອະວະກາດບັນທຸກຄົນສອງເທື່ອຢ່າງສຳເລັດຜົນ,ເຕັກນິກການບິນອະວະກາດບັນທຸກຄົນຂອງຈີນພວມນັບມື້ນັບສຸກງອມ. ທ່ານຫູຊື້ຊຽງ ຮອງຜູ້ບັນຊາການໃຫຍ່ຂອງກິດຈະການການບິນອະວະກາດບັນທຸກຄົນຂອງຈີນເວົ້າວ່າ,ຕໍ່ໄປພາຍໜ້າ,ຈີນຍັງຈະຄ່ອຍໆຊອກຄົ້ນເຕັກນິກພື້ນຖານທີ່ກ່ຽວຂ້ອງເຊັ່ນອອກຍານອະວະກາດ,ຍານອະວະກາດເຊື່ອມຕໍ່ເຂົ້າກັນແລະສ້າງສະຖານີອະວະກາດເປັນຕົ້ນ.
"ຈີນມີແຜນຈະດຳເນີນການເຄື່ອນໄຫວອອກຍານອະວະກາດໃນປີ 2007,ແລະຈະໃສ່ຊຸດການບິນອະວະກາດທີ່ຊາວຈີນພວກເຮົາຄົ້ນຄວ້າຜະລິດເອງ; ຮອດປະມານປີ 2008 ປີ 2009 ບັນລຸຍານອະວະກາດເຊື່ອມຕໍ່ເຂົ້າກັນ,ຮອດເວລານັ້ນ,ພວກເຮົາຈະສົ່ງນັກບິນອະວະກາດຫຼາຍຄົນຂຶ້ນສູ່ອະວະກາດ,ແລະດຳເນີນການເຄື່ອນໄຫວບິນອະວະກາດບັນທຸກຄົນຢ່າງເນື່ອງນິດ.
|
|
|
