|
ທີ່ນີ້,ວິທະຍຸສາກົນແຫ່ງປະເທດຈີນ,ສະບາຍດີ,ທ່ານຜູ້ຟັງທີ່ເຄົາລົບ,ລາຍການອ່ານຈົດໝາຍຜູ້ຟັງໄດ້ວຽນມາພົບກັບທ່ານອີກຕາມເຄີຍ.ໃນລາຍການພາກນີ້,ກ່ອນອື່ນ,ຂ້າພະເຈົ້າຈະອ່ານຈົດໝາຍກ້ານໜຶ່ງທີ່ຝາກມາຈາກທ້າວວັນນະຈິດ ກິດຕິຄຸນ ມິດລາຍການພວກເຮົາທີ່ຢູ່ແຂວງໄຊຍະບູລີ,ໃນຈົດໝາຍ,ທ້າວຂຽນວ່າ,ຜ່ານຈາກລາຍການຂອງພວກເຮົາໄດ້ຮຽນຄວາມຮູ້ສາລະຫຼາຍຢ່າງຫຼາຍແນວແລະມີຜົນປະໂຫຍດຫຼາຍຕໍ່ຊີວິດການເປັນຢູ່,ສະນັ້ນ,ໃນແຕ່ລະມື້,ທ້າວກໍນອນຢູ່ເທິງຕຽງຄອຍຖ້າຮັບຟັງລາຍການຂອງພວກເຮົາ,ຕໍ່ໄປພວກເຮົາກໍຈະອ່ານຈົດໝາຍທີ່ກະຕືລືລົ້ນກ້ານນີ້ສູ່ທ່ານຟັງ:
ສະບາຍດີ ຄະນະ CRI ພາກພາສາລາວ
ຂ້າພະເຈົ້າຍອມຮັບວ່າຕົນເອງໄດ້ຂາດການຕິດຕໍ່ກັບCRIພາກພາສາລາວເກືອບຮອດ1ປີ;ແຕ່ສ່ວນເລິກຂອງຫົວໃຈຍັງຄິດຮອດແລະຫວັງຫາຄະນະຈັດທຳລາຍການທຸກໆຄົນ.
ໄລຍະເວລາແຕ່21ໂມງ30ນາທີເປັນຕົ້ນໄປເປັນເວລານາທີແຫ່ງການຕິດຕາມຂ່າວຈາກCRIພາກພາສາລາວຂອງຂ້າພະເຈົ້າເຊິ່ງໄດ້ທັງຄວາມຮູ້ ສາລະແລະສິ່ງທີ່ເປັນປະໂຫຍດໃນການດຳລົງຊີວິດ.ທີ່ຫົວຕຽງຫ້ອງນອນຂອງຂ້າພະເຈົ້າຈະມີວິທະຍຸນ້ອຍຄອຍເປີດຮັບຟັງສຽງຈາກທີມງານCRI ມີທັງຄວາມເພີດເພີນ ມ່ວນຊື່ນແລະສະບາຍໃຈທີ່ໄດ້ຮັບຟັງຂ່າວຂອງພວກທ່ານໃນລະບົບຄື້ນກາງ(ແຕ່ບໍ່ຮູ້ຄວາມຖີ່)ເຊິ່ງສາມາດຮັບຟັງໄດ້ຊັດເຈນດີ,ຄື້ນແຮງດີຫຼາຍ,ແຕ່ບາງເທື່ອສຽງກໍຂາດຫາຍເປັນບາງຕອນ,ຖ້າກະຈາຍເປັນລະບົບຄື້ນສັ້ນກໍຄົງດີບໍ່ໜ້ອຍຫຼືວ່າມີແລ້ວຂ້າພະເຈົ້າບໍ່ຮູ້;ຂໍ້ນີ້ກະລຸນາຕອບແລະອະທິບາຍໃຫ້ລະອຽດຕື່ມແດ່.
ມາພ້ອມກັບຈົດໝາຍສະບັບນີ້,ຂ້າພະເຈົ້າມີຄຳຖາມຄ້ອງຄາໃຈທີ່ຈະຕ້ອງໄດ້ຂໍຄວາມກະຈ່າງແຈ້ງແລະຄຳຕອບຈາກCRI:
1.ປັດຈຸບັນ ສ.ປ.ຈີນມີປະຊາກອນເທົ່າໃດ?(ຕາມຕົວເລກຫຼ້າສຸດ)
2.ລາຍໄດ້ສະເລ່ຍຕໍ່ຫົວຄົນ/ປີຂອງຈີນມີເທົ່າໃດ?
3.ຈີນແບ່ງການປົກຄອງອອກເປັນຈັກແຂວງ(ເຂດຫຼືມົນທົນ),ຕ່າງຈາກການປົກຄອງຂອງລາວບໍ່?
4.ຕົວເລກປັດຈຸບັນມີນັກສຶກສາລາວມາສຶກສາຮ່ຳຮຽນຢູ່ຈີນມີຫຼາຍປານໃດ?
ຂ້າພະເຈົ້າຂໍອະນຸຍາດລົບກວນພວກທ່ານສະເພາະແຕ່ 4 ຄຳຖາມນີ້ກ່ອນ;ຫວັງວ່າພວກທ່ານຄົງຫາໂອກາດໃຫ້ຄຳຕອບແກ່ຂ້າພະເຈົ້າແລະທ່ານຜູ້ຟັງທັງຫຼາຍໃນໄວໆນີ້.
ຫຼາຍລາຍການກໍໄດ້ມີສີສັນແລະຮູບແບບໃໝ່ດຶງດູດຜູ້ຟັງໄດ້ດີຫຼາຍກວ່າເກົ່າ.ຂ້າພະເຈົ້າສັງເກດເຫັນວ່າຄົນຈີນຍ່າງໄວແລະຫ້າວຫັນກວ່າຄົນລາວບວກກັບລະດັບຄວາມຮູ້ຂອງຄົນຈີນທີ່ມີຢ່າງມະຫາສານຈຶ່ງສົ່ງອິດທິພົນເຮັດໃຫ້ເສດຖະກິດສັງຄົມຂອງຈີນເຕີບໃຫຍ່ຂະຫຍາຍຕົວຢ່າງໄວວາ.ຂ້າພະເຈົ້າກໍປາຖະໜາຢາກໃຫ້ລາວມີຈັງຫວະກ້າວເດີນຄ້າຍຄຽງກັບຈີນແລະພວກທ່ານກໍມີອິດທິພົນບໍ່ໜ້ອຍທີ່ຈະກະຕຸກຊຸກຍູ້ໃຫ້ຄົນລາວມີຄວາມຄິດ ວິໄສທັດແລະ"ບາດຍ່າງ"ໄວຂຶ້ນກວ່າເກົ່າ.
ຂໍໃຫ້ພວກທ່ານຖືວ່ານີ້ເປັນການແລກປ່ຽນຄວາມຄິດເຫັນ ຮ້າຍດີຫຼືມີວິທີທາງອອກທີ່ດີກໍຂໍຝາກໄວ້ນຳ ຄະນະຈັດທຳລາຍການຂອງCRIຈະເປັນຜູ້ຊີ້ຂາດແລ້ວປ່ອຍມັນກັບເຂົ້າສູ່ໝາກຫົວໃຈຂອງຜູ້ຟັງໂດຍຜ່ານຄື້ນຂອງສະຖານີCRI.
ຂໍໃຫ້ຄະນະCRIພາກພາສາລາວຈົ່ງປະສົບຄວາມສຸກ,ຢູ່ຄູ່ທ່ານຜູ້ຟັງຕະຫຼອດໄປ.
ຂອບໃຈທ້າວວັນນະຈິດ ກິດຕິຄຸນທີ່ໄດ້ຕີລາຄາສູງຕໍ່ລາຍການຂອງພວກເຮົາແລະໄດ້ສົ່ງຄຳອວຍພອນອັນດີງາມມາຍັງພວກເຮົາ,ທີ່ຈິງແລ້ວ,ລາຍການຂອງພວກເຮົາແມ່ນກະຈາຍສຽງດ້ວຍລະບົບຄື້ນສັ້ນຕະຫຼອດມາ,ໃນເພງອັດທ້າຍລາຍການທຸກມື້,ພວກເຮົາກໍຈະແນະນຳຂະໜາດຄື້ນຂອງລາຍການພວກເຮົາ,ເນື່ອງໃນໂອກາດນີ້,ຂ້າພະເຈົ້າຂໍແນະນຳອີກເທື່ອໜຶ່ງ,ເຊີນທ່ານຈື່ໄວ້ໃຫ້ດີໆເດີ!ຂະໜາດຄື້ນແລະເວລາອອກອາກາດຂອງລາຍການພວກເຮົາມີດັ່ງນີ້:
ພາກທີໜຶ່ງ: 19:30—20:30： 30,66 ມ. 40,76 ມ
9785KHZ 7360KHZ
ພາກທີສອງ: 21:30—22:30： 31,01 ມ. 40,76 ມ
9675KHZ 7360KHZ
ບາງເທື່ອ,ຍ້ອນເງື່ອນໄຂມີຄວາມຈຳກັດ,ລາຍການຂອງພວກເຮົາຄືຊິຟັງບໍ່ແຈ້ງປານໃດ,ກໍຫວັງໃຫ້ທ່ານຜູ້ຟັງເຂົ້າໃຈພວກເຮົາດ້ວຍ.ສຳລັບຄຳຖາມຫຼາຍຂໍ້ທີ່ທ້າວວັນນະຈິດ ກິດຕິຄຸນສະເໜີອອກມາໃນຈົດໝາຍນັ້ນ,ຍ້ອນມີເວລາຈຳກັດ,ພວກເຮົາຈະຕອບຢ່າງລະອຽດໃນລາຍການຕໍ່ໄປ,ຊົມເຊີຍທ້າວວັນນະຈິດ ກິດຕິຄຸນແລະທ່ານຜູ້ຟັງທັງຫຼາຍຕິດຕາມຮັບຟັງ,ພ້ອມກັນນີ້,ກໍຊົມເຊີຍທ່ານຜູ້ຟັງຕັ້ງໜ້າຝາກຈົດໝາຍມາຕັ້ງຄຳຖາມທີ່ຕົນສົນໃຈນຳ.ນອກນີ້,ປະຈຸບັນ,ໃນລາຍການພວກເຮົາພວມດຳເນີນການເສັງຄວາມຮູ້ກ່ຽວກັບໄຕ້ຫວັນ——ເກາະປະເສີດຂອງຈີນ,ຊົມເຊີຍທ່ານຕັ້ງໜ້າເຂົ້າຮ່ວມ,ກໍຫວັງໃຫ້ທ່ານຝາກຈົດໝາຍມາຍັງພວກເຮົາ,ສະເໜີຂໍ້ສະເໜີອັນລ້ຳຄ່າຕໍ່ລາຍການຂອງພວກເຮົາ.ໃນມ້ວນທ້າຍລາຍການ,ຂໍບອກຂ່າວດີຂ່າວໜຶ່ງໃຫ້ທ່ານຜູ້ຟັງທັງຫຼາຍຊາບ,ເພື່ອຊ່ອຍບັນດາທ່ານຮຽນພາສາຈີນໃຫ້ດີກວ່າເກົ່າ,ປະຈຸບັນ,ປື້ມຮຽນແລະຊີດີຮຽນພາສາຈີນຂອງພວກເຮົາໄດ້ເຮັດສຳເລັດແລ້ວ,ຖ້າທ່ານຕ້ອງການ,ເຊີນທ່ານຝາກຈົດໝາຍມາບອກທີ່ຢູ່ຂອງທ່ານຢ່າງລະອຽດ,ພວກເຮົາຈະຝາກປື້ນຮຽນແລະຊີດີໄປຮອດມືຂອງທ່ານໂດຍໄວເທົ່າທີ່ຈະໄວໄດ້.ເອົາລະ,ທ່ານຜູ້ຟັງທີ່ເຄົາລົບ,ລາຍການຂອງພວກເຮົາພາກນີ້ຂໍສິ້ນສຸດລົງພຽງທໍ່ນີ້,ເພງມ່ວນເພງໜຶ່ງ,ຂໍມອບໃຫ້ທ້າວວັນນະຈິດ ກິດຕິຄຸນແລະທ່ານຜູ້ຟັງທັງຫຼາຍທີ່ພວມຟັງລາຍການຂອງພວກເຮົາ,ສະບາຍດີ.
|
