|
|
 |
| (GMT+08:00)
2005-10-27 10:25:05
|
 |
|
ນ້ຳມັນເຊື້ອໄຟຂຶ້ນລາຄາ ກະທົບກະເທືອນເສດຖະກິດອາຊຽນ(ສຽງ)
cri
Author: da
|
ແຕ່ປີນີ້ມາ,ນ້ຳມັນເຊື້ອໄຟສາກົນໄດ້ຂຶ້ນລາຄາຕິດໆ,ນີ້ໄດ້ນຳເອົາຜົນສະທ້ອນອັນໃຫຍ່ຫຼວງໃຫ້ແກ່ເສດຖະກິດຂອງປະເທດອາຊີ.ບັນດາປະເທດອາຊຽນທະຍອຍກັນປັບປຸງນະໂຍບາຍເສດຖະກິດຂອງຕົນ,ຮັບມືກັບການກະໜ່ຳເສດຖະກິດຂອງປະເທດຕົນຍ້ອນນ້ຳມັນເຊື້ອໄຟຂຶ້ນລາຄາ.ໃນລາຍການເຂົ້າສູ່ອາຊຽນພາກນີ້,ເຊີນທ່ານຟັງບົດແຈ້ງຂ່າວທີ່ພາດຫົວເລື່ອງວ່າ: ນ້ຳມັນເຊື້ອໄຟຂຶ້ນລາຄາ ກະທົບກະເທືອນເຖິງເສດຖະກິດອາຊຽນ.
ນ້ຳມັນເຊື້ອໄຟຂຶ້ນລາຄາຢ່າງຕໍ່ເນື່ອງເຮັດໃຫ້ອິນໂດເນເຊຍເກີດໄພເງິນເຟີ້. ເດືອນກໍລະກົດປີນີ້ ຕົວເລກສະຖິຕິລາຄາບໍລິໂພກຂອງປະຊາຊົນອິນໂດເນເຊຍໄດ້ເພີ່ມຂຶ້ນຫຼາຍກວ່າເວລາດຽວກັນ 7,84%,ໃນຂະນະດຽວກັນ ນ້ຳມັນເຊື້ອໄຟຂຶ້ນລາຄາຕິດໆ,ກໍເຮັດໃຫ້ເງິນຕຸນອິນໂດເນເຊຍຫຼຸດລາຄາຕິດໆ.ເພື່ອກອບກູ້ເງິນຕາທີ່ຫຼຸດລາຄາ,ທະນາຄານກາງອິນໂດເນເຊຍໄດ້ປະກາດມາດຕະການ 6 ຂໍ້ເພື່ອເຮັດໃຫ້ເງິນຕາໝັ້ນທ່ຽງ,ຊຶ່ງລວມທັງຍົກອັດຕາພື້ນຖານໃຫ້ສູງຂຶ້ນ.
ນ້ຳມັນເຊື້ອໄຟສາກົນຂຶ້ນລາຄາຢ່າງຕໍ່ເນື່ອງແລະ ນ້ຳມັນເຊື້ອໄຟຂອງປະເທດຕົນຫຼຸດລາຄາ ຊຸກຍູ້ໃຫ້ລັດຖະບານອິນໂດເນເຊຍຕັດສິນໃຈຫຼຸດຄ່າເກື້ອກູນເພື່ອຍົກສູງລາຄານ້ຳມັນເຊື້ອໄຟຢູ່ພາຍໃນປະເທດ.ຕາມໄດ້ຊາບ,ລັດຖະບານອິນໂດເນເຊຍວາງແຜນເບີກເງິນສົດເກື້ອກູນຄອບຄົວທຸກຍາກໃນທົ່ວປະເທດ 15 ລ້ານ 5 ແສນຄອບຄົວ,ແຕ່ລະຄອບຄົວ 30 ໂດລາສະຫະລັດ,ເພື່ອຮັບມືກັບການກະໜ່ຳຫຼັງຈາກນ້ຳມັນເຊື້ອໄຟຂຶ້ນລາຄາແລ້ວ.
ນ້ຳມັນເຊື້ອໄຟຂຶ້ນລາຄາກໍໄດ້ນຳເອົາກຳລັງໜີບອັນຫຼວງຫຼາຍໃຫ້ແກ່ຟີລິບປິນ.ຕາມສະຖິຕິຝ່າຍທາງການ,ຟີລິບປິນຕ້ອງການນ້ຳມັນເຊື້ອໄຟມື້ລະ 3 ແສນ 3 ໝື່ນບາເລນ,ແມ່ນອາໄສນ້ຳເຂົ້າຈາກຕ່າງປະເທດໝົດ.ບວກກັບໃນຫຼາຍອາທິດທີ່ຜ່ານມາ,ສະຖານະພາບການເມືອງຂອງຟີລິບປິນປັ່ນປ່ວນ,ອັດຕາແລກປ່ຽນເງິນເປໂຊຟີລິບປິນກັບເງິນໂດລາໄດ້ຫຼຸດລາຄາລົງເປັນກ້າວໆ,ລາຄາສິ່ງຂອງພັດແພງຂຶ້ນຢ່າງຫຼວງຫຼາຍ.ເພື່ອແກ້ໄຂບັນຫາໄພເງິນເຟີ້ຂອງປະເທດຕົນ,ພາຍຫຼັງຈັດກອງປະຊຸມປະຈຳສະພາແຫ່ງຊາດໃນເດືອນກັນຍາແລ້ວ ຜູ້ວ່າການທະນາຄານກາງຟີລິບປິນກ່າວວ່າ,ໃນຫຼາຍເດືອນພາຍໜ້າ,ນະໂຍບາຍເງິນຕາຟີລິບປິນຈະຮັດແໜ້ນ; ພ້ອມກັນນັ້ນ ເພື່ອຮັບມືກັບສະພາບນ້ຳມັນເຊື້ອໄຟຂຶ້ນລາຄາ,ທ່ານນາງອາໂລໂຢ ປະທານາທິບໍດີຟີລິບປິນໄດ້ອອກຄຳສັ່ງ,ເກືອດຫ້າມຂະແໜງການລັດຖະບານຊື້ລົດໃໝ່,ເພື່ອຫຼຸດການສິ້ນເປືອງນ້ຳມັນເຊື້ອໄຟ.ທ່ານນາງອາໂລໂຢເວົ້າວ່າ,ກະຊວງພະລັງງານແລະພາກສ່ວນອື່ນຂອງລັດຖະບານຟີລິບປິນຈະຈັດການເຄື່ອນໄຫວສຶກສາແລະໂຄສະນາການປະຢັດພະລັງງານຢູ່ທົ່ວປະເທດ,ເຮັດໃຫ້ການປະຢັດພະລັງງານກາຍເປັນແບບແຜນດຳລົງຊີວິດຊະນິດໜຶ່ງ.ທ່ານນາງເວົ້າວ່າ,ການເຄື່ອນໄຫວເທື່ອນີ້ ຈະເຮັດໃຫ້ປະລິມານນ້ຳມັນເຊື້ອໄຟທີ່ຟີລິບປິນນຳເຂົ້ານັ້ນຫຼຸດໜ້ອຍລົງ 12%,ເທົ່າກັບໄດ້ປະຢັດຄ່າໃຊ້ຈ່າຍນ້ຳມັນເຊື້ອໄຟ 874 ລ້ານໂດລາຕໍ່ປີ.
ເດືອນກໍລະກົດປີນີ້ ລັດຖະບານໄທໄດ້ຍົກເລີກລະບອບເກື້ອກູນນ້ຳມັນເຊື້ອໄຟເພື່ອປັບປຸງສະພາບລາຍໄດ້ລາຍຈ່າຍສາກົນ,ທັງນີ້ແມ່ນຍ້ອນວ່າ ນ້ຳມັນເຊື້ອໄຟຂຶ້ນລາຄາ,ຂຸມງົບປະມານຂອງໄທໃນ 6 ເດືອນຕົ້ນປີນີ້ໄດ້ບັນລຸ 6 ຕື້ 200 ລ້ານໂດລາ,ເຊິ່ງແມ່ນລະດັບສູງສຸດຫຼັງຈາກເກີດວິກິດການການເງິນອາຊີມານີ້,ອັດຕາເງິນເຟີ້ຂອງໄທກໍຢູ່ໃນລະດັບສູງສຸດແຕ່ວິກິດການເງິນອາຊີເມື່ອປີ 1997 ມານີ້.
ຕາມໄດ້ຊາບ,ຍ້ອນຂາດນ້ຳມັນເຊື້ອໄຟ,ພາກສ່ວນຄຸ້ມຄອງການບິນຂອງໄທຈະຍົກເລີກໃບທຸລະກິດຂອງ 4 ບໍລິສັດການບິນທີ່ລາຄາຖືກ; ໃນຂະນະດຽວກັນ,ລັດຖະບານໄທກໍຈະໃຊ້ເຄື່ອງເສດເຫຼືອຄື ຮາກຕົ້ນໝາກພ້າວແລະເປືອກໝາກພ້າວເປັນຕົ້ນແທນວັດຖຸເຊື້ອໄຟ,ແລະຈະສ້າງໂຮງຜະລິດໄຟຟ້າດ້ວຍຕົ້ນໝາກພ້າວແຫ່ງໜຶ່ງ.
ຄຽງຄູ່ກັບນ້ຳມັນເຊື້ອໄຟໃນຕະຫຼາດສາກົນຂຶ້ນລາຄາເທື່ອລະກ້າວ,ມາເລເຊຍ ທີ່ເປັນປະເທດຜະລິດສົ່ງອອກນ້ຳມັນເຊື້ອໄຟກໍຖືກກຳລັງໜີບເຊັ່ນດຽວກັນ. ແຕ່ໃດມາ ລັດຖະບານມາເລເຊຍໄດ້ໃຊ້ນະໂຍບາຍເກື້ອກູນຕໍ່ວິສາຫະກິດນ້ຳມັນເຊື້ອໄຟຂອງພາຍໃນປະເທດ,ແຕ່ລະປີ ຕ້ອງເສຍທຶນແຫ່ງລັດຈຳນວນຫຼວງຫຼາຍ,ນ້ຳມັນເຊື້ອໄຟໃນຕະຫຼາດສາກົນຂຶ້ນລາຄາ ເຮັດໃຫ້ຄັງເງິນແຫ່ງຊາດມາເລເຊຍແຮງເຫຼືອບ່າໃນການເກື້ອກູນ.ໃນໄລຍະແຕ່ເດືອນຕຸລາປີກາຍຮອດທ້າຍເດືອນກໍລະກົດປີນີ້,ລັດຖະບານມາເລເຊຍຈຳເປັນຕ້ອງຂຶ້ນລາຄານ້ຳມັນສຳເລັດຮູບຂອງປະເທດຕົນຄື ນ້ຳມັນແອັດຊັງແລະນ້ຳມັນກາຊວນເປັນຕົ້ນ 4 ເທື່ອ,ແຕ່ວ່າ ໄພເງິນເຟີ້ຍ້ອນລາຄານ້ຳມັນແພງຂຶ້ນ ພັດເຮັດໃຫ້ຄົນມາເລເຊຍມີພາລະໜັກໜ່ວງໃນດ້ານຊີວິດການເປັນຢູ່.ຫວ່າງມໍ່ໆນີ້ ລັດຖະບານມາເລເຊຍໄດ້ປະກາດມາດຕະການພວງໜຶ່ງ ເຊິ່ງລວມທັງການຫຼຸດຄ່າບົວລະບັດເສັ້ນທາງຢ່າງຫຼວງຫຼາຍ,ເພື່ອຮັບມືກັບຜົນສະທ້ອນຍ້ອນນ້ຳມັນເຊື້ອໄຟສາກົນໃນສະເພາະໜ້ານີ້ຂຶ້ນລາຄາຢ່າງບໍ່ຢຸດຢັ້ງທີ່ມີຕໍ່ມາເລເຊຍ.ຫ້ອງການນາຍົກລັດຖະມົນຕີມາເລເຊຍອອກຖະແຫຼງການກ່າວວ່າ,ເລີ່ມແຕ່ວັນປະກາດຮອດທ້າຍປີນີ້,ມາເລເຊຍຈະບໍ່ຂຶ້ນລາຄານ້ຳມັນແອັດຊັງ ນ້ຳມັນກາຊວນແລະອາຍແກັສທຳມະຊາດທີ່ໃຊ້ໃນຝ່າຍພົນລະເຮືອນ;ໃນປີນີ້ແລະປີໜ້າ,ສະຖານີເກັບຄ່າບົວລະບັດເສັ້ນທາງດ່ວນເສັ້ນຕ່າງໆຂອງມາເລເຊຍ ກໍຈຳເປັນຕ້ອງຍົກສູງຄ່າບົວລະບັດເສັ້ນທາງ.ອີກດ້ານໜຶ່ງ,ມາເລເຊຍຍັງອອກແຮງສະແຫວງຫາພະລັງງານເຂົ້າແທນ,ກ່າວເນັ້ນຄວາມສຳຄັນຂອງການນຳໃຊ້ນ້ຳມັນເຊື້ອໄຟຊີວະພາບຕໍ່ການພັດທະນາເສດຖະກິດ.ຫວ່າງມໍ່ໆນີ້ ລັດຖະບານມາເລເຊຍຍັງຈັດການເຄື່ອນໄຫວປະຢັດພະລັງງານໃນທົ່ວປະເທດ,ຍົກສະຕິປະຢັດພະລັງງານຂອງມວນຊົນໃຫ້ສູງຂຶ້ນ.ບຸກຄົນທີ່ກ່ຽວຂ້ອງວິເຄາະວ່າ,ນ້ຳມັນເຊື້ອໄຟຂຶ້ນລາຄາບໍ່ມີຜົນສະທ້ອນຍາວນານປານໃດຕໍ່ມາເລເຊຍ,ເພາະວ່າ ມາເລເຊຍກໍ່ຜະລິດນ້ຳມັນເຊື້ອໄຟ.
ເມື່ອທຽບກັບອິນໂດເນເຊຍແລະຟີລິບປິນ,ນ້ຳມັນເຊື້ອໄຟຂຶ້ນລາຄາສົ່ງຜົນກະທົບເສດຖະກິດສິງກະໂປແລະບຼູໄນນັ້ນໜ້ອຍ. ສາຍເຫດກໍແມ່ນ,ມາດຕະການຂອງລັດຖະບານສິງກະໂປກ່ຽວກັບການຊຸກຍູ້ຕະຫຼາດເຮືອນຢູ່ຫວ່າງມໍ່ໆນີ້ ມີຜົນດີຕໍ່ການປົກປັກຮັກສາຄວາມຮຽກຮ້ອງຕ້ອງການຢູ່ພາຍໃນປະເທດ,ແລ້ວຜ່ອນຄາຍຜົນສະທ້ອນຫຼີກຊ້ອນຍ້ອນນ້ຳມັນເຊື້ອໄຟຂຶ້ນລາຄາ.
ນັກວິເຄາະເສດຖະກິດສາກົນເຫັນວ່າ,ໂຄງການຫຼຸດພາສີຂອງອົສຕຼາລີ ໂຄງການພື້ນຖານໂຄງລ່າງຂອງໄທ ແລະໂຄງການຕະຫຼາດເຮືອນຢູ່ຂອງສິງກະໂປ ລ້ວນແຕ່ແມ່ນພາຫະນະຂອງລັດຖະບານທີ່ຮັບມືກັບນ້ຳມັນເຊື້ອໄຟໄດ້ຂຶ້ນລາຄາ,ທຽບກັບການຄວບຄຸມຕະຫຼາດແຕ່ຢ່າງດຽວນັ້ນ,ພາຫະນະເຫຼົ່ານີ້ຈະມີຜົນດີຫຼາຍກວ່າຕໍ່ການຜ່ອນຄາຍກຳລັງໜີບຍ້ອນລາຄານ້ຳມັນເຊື້ອໄຟຂຶ້ນລາຄາ.ພ້ອມກັນນັ້ນ ພວກເຂົາເຈົ້າຊີ້ອອກວ່າ,ບຼູໄນທີ່ມີບໍ່ນ້ຳມັນທີ່ກວມເນື້ອທີ່ກວ້າງໃຫຍ່ໄພສານນັ້ນ,ແມ່ນປະເທດໄດ້ຮັບຜົນປະໂຫຍດຫຼາຍກວ່າເພິ່ນໃນອົງກອນເສດຖະກິດຂອງອາຊີອາຄະເນໃນຂະບວນນ້ຳມັນເຊື້ອໄຟຂຶ້ນລາຄາຄັ້ງນີ້.
|
|
|
