|
ໃນລາຍການພາກແລ້ວນີ້,ພວກເຮົາໄດ້ອ່ານຈົດໝາຍກ້ານໜຶ່ງຂອງຜູ້ຟັງແລ້ວ,ແມ່ນຝາກມາຈາກທ້າວວັນນະຈິດ ກິດຕິຄຸນທີ່ຢູ່ແຂວງໄຊຍະບູລີ,ໃນຈົດໝາຍ,ເພິ່ນໄດ້ຕັ້ງຄຳຖາມກ່ຽວກັບຈີນຫຼາຍຂໍ້ໃຫ້ພວກເຮົາຕອບ,ພວກເຮົາເຊື່ອວ່າ,ບັນຫາເຫຼົ່ານີ້ແມ່ນບັນຫາທີ່ຜູ້ຟັງຜູ້ອື່ນຫຼາຍໆທ່ານສົນໃຈນຳແລະຢາກຮູ້,ສະນັ້ນ,ແຕ່ລາຍການພາກນີ້ເປັນຕົ້ນໄປ,ພວກເຮົາຈະຕອບຄຳຖາມເຫຼົ່ານີ້ຢ່າງລະອຽດຕາມລຳດັບ,ຫວັງວ່າບັນດາທ່ານຄົງຕິດຕາມຮັບຟັງ.
ໃນລາຍການມື້ນີ້,ພວກເຮົາຈະຕອບຄຳຖາມຂໍ້ທີໜຶ່ງໃນຈົດໝາຍຂອງທ້າວວັນນະຈິດ ກິດຕິຄຸນຄືຕາມຕົວເລກສະຖິຕິຫຼ້າສຸດ,ປະຈຸບັນສ.ປ.ຈີນມີປະຊາກອນເທົ່າໃດຄົນ?
ປະຊາກອນຈີນກວມ 1 ສ່ວນ 5 ຂອງປະຊາກອນໃນໂລກ.ໃນ 20 ປີມານີ້,ຄຽງຄູ່ກັບການປະຕິຮູບອົງປະກອບເສດຖະກິດໄດ້ຂະຫຍາຍລົງສູ່ລວງເລິກ,ປະຈຸບັນ,ຈີນພວມຢູ່ໃນໄລຍະປະຫວັດສາດອັນພິເສດທີ່ຫັນຈາກເສດຖະກິດແຜນການໄປສູ່ເສດຖະກິດຕະຫຼາດສັງຄົມນິຍົມ.ໃນໄລຍະນີ້,ໃນດ້ານຕ່າງໆຄືເສດຖະກິດ ສັງຄົມເປັນຕົ້ນ,ລ້ວນແຕ່ໄດ້ເກີດມີການປ່ຽນແປງຢ່າງຫຼວງຫຼາຍ,ປະຊາກອນກໍຄືກັນ.ນັບມາຮອດປະຈຸບັນ,ຈີນໄດ້ດຳເນີນການສຳຫຼວດປະຊາກອນໂດຍທົ່ວໄປ 5 ເທື່ອແລ້ວ,4 ເທື່ອກ່ອນລ້ວນແຕ່ແມ່ນດຳເນີນຢູ່ໃຕ້ເງື່ອນໄຂເສດຖະກິດແຜນການ,ການສຳຫຼວດໃນປີ 2000 ແມ່ນດຳເນີນຢູ່ໃຕ້ເງື່ອນໄຂເສດຖະກິດຕະຫຼາດເປັນຄັ້ງທຳອິດ,ໃຕ້ຄວາມພະຍາຍາມອັນມະຫາສານຂອງພະນັກງານສຳຫຼວດປະຊາກອນເກືອບ 10 ລ້ານຄົນ,ການສຳຫຼວດເທື່ອນີ້ໄດ້ຮັບຜົນສຳເລັດຢ່າງເຕັມເມັດເຕັມໜ່ວຍ.ຕາມປະກາດແຈ້ງການເລກ 1 ກ່ຽວກັບຕົວເລກສຳຄັນຂອງການສຳຫຼວດປະຊາກອນທົ່ວປະເທດຈີນຄັ້ງທີ 5,ນັບມາຮອດ 0 ໂມງ ວັນທີ 1 ພະຈິກປີ 2000,ປະຊາກອນທົ່ວປະເທດຈີນມີ 1 ຕື້ 295 ລ້ານ 3 ແສນ 3 ໝື່ນຄົນ,ຍອດຈຳນວນປະຊາກອນລວມທັງປະຊາກອນບັນດາແຂວງ ເຂດປົກຄອງຕົນເອງ ກຳແພງນະຄອນຂອງແຜ່ນດິນໃຫຍ່ຈີນ(ບໍ່ລວມເກາະຕ່າງໆຄືເກາະຈີ່ນເມີນ ເກາະມາຈູເປັນຕົ້ນຂອງແຂວງຟູຈ້ຽນ) ທະຫານທີ່ຮັບໃຊ້ໃນກອງທັບໃນປະຈຸບັນ ປະຊາກອນເຂດບໍລິຫານພິເສດຮົງກົງແລະມາກາວ ປະຊາກອນແຂວງໄຕ້ຫວັນແລະເກາະຕ່າງໆຄືເກາະຈີ່ນເມີນ ເກາະມາຈູເປັນຕົ້ນຂອງແຂວງຟູຈ້ຽນ.ໃນນັ້ນ,ປະຊາກອນຂອງ 22 ແຂວງ; 5 ເຂດປົກຄອງຕົນເອງ; 4 ກຳແພງນະຄອນແລະທະຫານທີ່ຮັບໃຊ້ໃນກອງທັບໃນປະຈຸບັນຂອງແຜ່ນດິນໃຫຍ່ຈີນມີ 1 ຕື້ 265 ລ້ານ 8 ແສນ 3 ໝື່ນຄົນ.ແຂວງເຮີນານມີປະຊາກອນ 92 ລ້ານ 5 ແສນ 6 ໝື່ນຄົນ,ແມ່ນແຂວງທີ່ມີປະຊາກອນຫຼາຍກວ່າໝູ່ຂອງຈີນ,ຖັດມາແມ່ນແຂວງຊານຕົງ,ມີປະຊາກອນ 90 ລ້ານ 7 ແສນ 9 ໝື່ນຄົນ.ນະຄອນຫຼວງປັກກິ່ງ ນະຄອນຫຼວງຂອງຈີນ,ປະຈຸບັນມີປະຊາກອນ 13 ລ້ານ 8 ແສນ 2 ໝື່ນຄົນ,ນະຄອນທຽນສີນມີ 10 ລ້ານ 1 ໝື່ນຄົນ,ນະຄອນຊຽງໄຮ້ມີ 16 ລ້ານ 7 ແສນ 4 ໝື່ນຄົນ,ນະຄອນຈຸງກີ່ງມີ 30 ລ້ານ 9 ແສນຄົນ.
ແຕ່ຊຸມປີ 70 ສະຕະວັດທີ 20 ມານີ້,ຍ້ອນຈີນໄດ້ປະຕິບັດນະໂຍບາຍວາງແຜນຄອບຄົວຢ່າງບັງເກີດຜົນແລະຄຽງຄູ່ກັບເສດຖະກິດສັງຄົມໄດ້ມີການພັດທະນາ,ທ່ວງທ່າທີ່ປະຊາກອນເພີ່ມຂຶ້ນໄວເກີນໄປຂອງຈີນໄດ້ຮັບການສະກັດກັ້ນຢ່າງບັງເກີດຜົນ.ໃນສະຕະວັດນີ້,ຈັງຫວະການເພີ່ມຂຶ້ນຂອງປະຊາຊົນຈີນຈະສືບຕໍ່ຊ້າລົງ,ຮອດປະມານປີ 2030,ຍອດຈຳນວນປະຊາກອນຂອງແຜ່ນດິນໃຫຍ່ຈີນຈະບໍ່ເພີ່ມຂຶ້ນອີກ,ແລ້ວເລີ່ມເພີ່ມຂຶ້ນທາງລົບຢ່າງຊ້າໆ.ມີແຕ່ຂະໜາດປະຊາກອນເລີ່ມຫຼຸດໜ້ອຍລົງ,ກຳລັງໜີບດ້ານປະຊາກອນຈຶ່ງມີຄວາມອາດສາມາດຜ່ອນຄາຍລົງ.ສະນັ້ນ,ໃນໄລຍະຍາວສົມຄວນຂອງສະຕະວັດນີ້,ຈີນຈະຫາບແບກກຳລັງໜີບຍ້ອນປະຊາກອນເພີ່ມຂຶ້ນຢ່າງສືບເນື່ອງ,ບັນຫາຈຳນວນປະຊາກອນຍັງຄົງແມ່ນບັນຫາສຳຄັນກວ່າໝູ່ໃນບັນຫາປະຊາກອນຈີນ.
ໃນຖານເປັນປະເທດເອກະພາບທີ່ມີຫຼາຍຊົນເຜົ່າ,ໃນດ້ານນະໂຍບາຍຊົນເຜົ່າ,ລັດຖະບານຈີນໄດ້ປະຕິບັດທິດທາງສົ່ງເສີມແລະສະໜັບສະໜູນຊົນເຜົ່າສ່ວນໜ້ອຍພັດທະນາຕະຫຼອດມາ. ປີ 2000, ປະຊາກອນຂອງຊົນເຜົ່າສ່ວນໜ້ອຍຕ່າງໆຂອງຈີນມີ 106 ລ້ານ 4 ແສນ 3 ໝື່ນຄົນ,ກວມຍອດຈຳນວນປະຊາກອນ 8,41%.ເມື່ອທຽບໃສ່ການສຳຫຼວດປະຊາກອນທົ່ວປະເທດຄັ້ງທີ 4 ໃນປີ 1990 ແລ້ວ,ປະຊາກອນຂອງຊົນເຜົ່າສ່ວນໜ້ອຍຕ່າງໆໄດ້ເພີ່ມຂຶ້ນ 15 ລ້ານ 2 ແສນ 3 ໝື່ນຄົນ,ເພີ່ມຂຶ້ນ 16,7%,ສູງກວ່າອັດຕາເພີ່ມຂຶ້ນຂອງເຜົ່າຮ້ານຄື 11,22% ນັ້ນ 5,48%.ປະຊາກອນຊົນເຜົ່າສ່ວນໜ້ອຍຂອງຈີນເພີ່ມຂຶ້ນຂ້ອນຂ້າງໄວນັ້ນ,ແມ່ນປາສະຈາກນະໂຍບາຍຊົນເຜົ່າຂອງຈີນບໍ່ໄດ້,ໂດຍສະເພາະແມ່ນນະໂຍບາຍວາງແຜນຄອບຄົວທີ່ຂ້ອນຂ້າງຜ່ອນຍານທີ່ປະຕິບັດຢູ່ເຂດຊົນເຜົ່າສ່ວນໜ້ອຍ,ໄດ້ເສີມຂະຫຍາຍບົດບາດໂດຍກົງຕໍ່ການຂະຫຍາຍຕົວຂອງປະຊາກອນຊົນເຜົ່າສ່ວນໜ້ອຍ.
ທ້າວວັນນະຈິດ ກິດຕິຄຸນແລະທ່ານຜູ້ຟັງທັງຫຼາຍທີ່ພວມຟັງລາຍການຂອງພວກເຮົາ,ກ່ຽວກັບບັນຫາສະພາບປະຊາກອນຈີນ,ພວກເຮົາກໍ່ຂໍແນະນຳຮອດທໍ່ນີ້ກ່ອນ,ໃນລາຍການຕໍ່ໄປ,ພວກເຮົາຈະຕອບຄຳຖາມອີກຫຼາຍຂໍ້ຢ່າງເປັນລຳດັບ,ຊົມເຊີຍທ່ານຕິດຕາມຮັບຟັງ.ພ້ອມກັນນັ້ນ,ກໍຊົມເຊີຍທ່ານຕັ້ງໜ້າເຂົ້າຮ່ວມການເສັງຄວາມຮູ້ກ່ຽວກັບໄຕ້ຫວັນ——ເກາະປະເສີດຂອງຈີນທີ່ວິທະຍຸພວກເຮົາຈັດຂຶ້ນ,ແລະຫວັງໃຫ້ທ່ານຝາກຈົດໝາຍມາຍັງພວກເຮົາໃຫ້ຫຼາຍໆ,ສະເໜີຂໍ້ສະເໜີອັນລ້ຳຄ່າຕໍ່ລາຍການຂອງພວກເຮົາ.ນອກນີ້,ເພື່ອຊ່ອຍບັນດາທ່ານຮຽນພາສາຈີນໃຫ້ດີກວ່າເກົ່າ,ປະຈຸບັນ,ປື້ມຮຽນແລະຊີດີຮຽນພາສາຈີນຂອງພວກເຮົາໄດ້ເຮັດສຳເລັດແລ້ວ,ຖ້າທ່ານຕ້ອງການ,ເຊີນທ່ານຝາກຈົດໝາຍມາບອກທີ່ຢູ່ຂອງທ່ານຢ່າງລະອຽດ,ພວກເຮົາຈະຝາກປື້ນຮຽນແລະຊີດີໄປຮອດມືຂອງທ່ານໂດຍໄວເທົ່າທີ່ຈະໄວໄດ້.
|
