|
ຕາມຂ່າວCRI:ວັນທີ1ພະຈິກ,ທ່ານຫູຈິນທ່າວ ເລຂາທິການໃຫຍ່ສູນກາງກພັກກອມມູນິດຈີນ ປະທານປະເທດຈີນທີ່ພວມຢ້ຽມຢາມຫວຽດນາມໄດ້ກ່າວຄຳປາຖະກະຖາຢູ່ສະພາແຫ່ງຊາດຫວຽດນາມ.ທ່ານກ່າວເນັ້ນວ່າ,ການພັດທະນາຂອງຈີນບໍ່ຫ່ອນຊິກີດຂວາງບຸກຄົນໃດໆ ກໍ່ບໍ່ຫ່ອນຊິຂົ່ມຂູ່ບຸກຄົນໃດໆ,ມີແຕ່ເປັນຜົນດີຕໍ່ສັນຕິພາບ ສະຖຽນລະພາບແລະຄວາມຈະເລີນຮຸ່ງເຮືອງຂອງໂລກ.
ໃນເວລາກ່າວປາຖະກະຖາ,ທ່ານຫູຈິນທ່າວໄດ້ແນະນຳສະພາບການພັດທະນາແລະນະໂຍບາຍການຕ່າງປະເທດຂອງຈີນຢ່າງຮອບດ້ານ,ໄດ້ບັນລະຍາຍບັນຫາຕ່າງໆ ເຊັ່ນຂະຫຍາຍການພົວພັນຈີນຫວຽດນາມ ການພົວພັນຈີນກັບປະເທດໃກ້ຄຽງອາຊີເປັນຕົ້ນ.ທ່ານເວົ້າວ່າ,ຈີນຕັ້ງໜ້າສົ່ງເສີມໃຫ້ການພົວພັນລະຫວ່າງຊາດ ເປັນປະຊາທິປະໄຕແລະເປົ້າແບບການຂະຫຍາຍຕົວຫັນເປັນຫຼາຍຢ່າງຫຼາຍແນວ, ຊຸກຍູ້ໂລກຫັນເປັນຫຼາຍເຄົ້າແລະເສດຖະກິດໂລກາວິວັດ,ຊຸກຍູ້ປະຊາຄົມໂລກສ້າງຕັ້ງລະບຽບການການເມືອງເສດຖະກິດສາກົນອັນໃໝ່ທີ່ທ່ຽງທຳແລະສົມເຫດສົມຜົນ,ຂະຫຍາຍໄປສູ່ທິດທີ່ມີຜົນດີຕໍ່ການບັນລຸຄວາມຈະເລີນຮຸ່ງເຮືອງພ້ອມກັນ.ຈີນຄັດຄ້ານການແກ້ໄຂການວິວາດກັນດ້ວຍກຳລັງອາວຸດຫຼືຂົ່ມຂູ່ດ້ວຍກຳລັງອາວຸດ, ຄັດຄ້ານລັດທິເຈົ້າອຳນາດແລະການເມືອງອຳນາດທຸກຮູບທຸກແບບ,ຄັດຄ້ານລັດທິກໍ່ການຮ້າຍທຸກຮູບທຸກແບບ.
ທ່ານຫູຈິນທ່າວຍັງກ່າວວ່າ,ຈີນຈະເດັດດ່ຽວປະຕິບັດທິດທາງການຕ່າງປະເທດຕໍ່ປະເທດອ້ອມຂ້າງທີ່ວ່າມີໄມຕີຈິດກັບປະເທດໃກ້ຄຽງແລະຖືປະເທດໃກ້ຄຽງເປັນເພື່ອນ,ແລະນະໂຍບາຍການຕ່າງປະເທດຕໍ່ປະເທດອ້ອມຂ້າງທີ່ວ່າມີຄວາມປອງດອງກັນກັບປະເທດໃກ້ຄຽງ ໃຫ້ປະເທດໃກ້ຄຽງມີສະຖຽນລະພາບແລະໃຫ້ປະເທດໃກ້ຄຽງຈະເລີນຮຸ່ງເຮືອງ.
ທ່ານຫູຈິນທ່າວແມ່ນຜູ້ນຳຕ່າງປະເທດຜູ້ທຳອິດທີ່ກ່າວປາຖະກະຖາຢູ່ສະພາແຫ່ງຊາດຫວຽດນາມ.ຜູ້ແທນ500ກວ່າຄົນຂອງຈີນແລະຫວຽດນາມໄດ້ຮັບຟັງການກ່າວປາຖະກະຖາຂອງທ່ານ.
|
